1 Pédro̱ 5
5
Rí nithúún xa̱bo̱ buanuu tsí juya̱ idxu̱u̱
1Nandoꞌ rí ma̱thu̱ún mbá ajngáa xa̱bo̱ buanuu tsí juya̱ ikhalaꞌ, tsí júwa̱ꞌ ga̱jma̱á nindxa̱ꞌlaꞌ. Numuu rí ikhúúnꞌ máꞌ mangúúnꞌ ñajunꞌ xa̱bo̱ nikhi̱i̱ tsí jayá ikha xómá ikhii̱n, jamí ndi̱yo̱o̱lo̱ꞌ xáne nimínu̱u̱ꞌ Krísto̱. Jamí mangúúnꞌ máꞌ ma̱nindxu̱ꞌ xómá jaꞌnii̱ ikhaa̱ ído̱ rí ma̱ꞌkhaa̱ ná numbaa. Xáꞌnii i̱thu̱únlo̱ꞌ xa̱bo̱ buanuu tsúꞌkhue̱n: 2Gu̱ña̱wu̱únlaꞌ xa̱bi̱i Ana̱ꞌlóꞌ tsí júwa̱ꞌ ná ñawánlaꞌ, xómá ene̱ xa̱bo̱ tsí nu̱ña̱wu̱ún xu̱kú mogo̱. Gu̱ña̱wúu̱n májánlaꞌ ga̱jma̱á mbá jañii a̱kia̱nꞌlaꞌ,#5.2 Ríga̱ mbá tikhu i̱yi̱i̱ꞌ griégo̱ rí wayuu rí naꞌthán xáꞌnii: «Gu̱ña̱wúu̱n májánlaꞌ ga̱jma̱á mbá jañii a̱kia̱nꞌlaꞌ, xómá rí nandoo Ana̱ꞌlóꞌ». ra̱ꞌkhá ga̱jma̱á tsiakhe̱, ni máꞌ ra̱ꞌkhá ga̱jma̱á numuu rí nandalaꞌ mu̱da̱a̱ꞌ mbúkha̱a̱, rí ga̱jma̱á numuu rí nandalaꞌ mu̱ne̱-mba̱ꞌwi̱inlaꞌ xa̱bi̱i Ana̱ꞌlóꞌ. 3Mu̱xúñu̱úlaꞌ mi̱ndaꞌkho tsí nijaniálaꞌ rí mu̱ña̱wu̱únlaꞌ asndo xó rí ikháanꞌlaꞌ ñajwanlaꞌ ña̱ꞌñíi̱, rí ga̱nindxa̱ꞌlaꞌ mbá xkri̱da mbuyáa̱. 4Xkuaꞌnii kajngó ído̱ rí ma̱ꞌkha̱a Krísto̱, xa̱bo̱ tsí phú ginii na̱ña̱wa̱nꞌlóꞌ, mu̱drígúulaꞌ gamaku rí phú tsímáá, rí jámuu ríga̱.
Rí nithúún mbá xúgíin tsí nanimbu̱únꞌ juyáá Jesús
5Xúꞌkhue̱n máꞌ ikháanꞌlaꞌ, xa̱bo̱ tikhu, gu̱ne̱-mbáníílaꞌ rí nuthan xa̱bo̱ buanuu. Mbá xúgiáanꞌlaꞌ gu̱xrígú-mijnálaꞌ jamí gu̱ni̱ꞌñá-mijnálaꞌ rí mu̱xna̱-ñájun-mijnálaꞌ, numuu rí:
«Ana̱ꞌlóꞌ na̱we̱je̱-ꞌthúu̱n xa̱bo̱ tsí nu̱xu̱xí-mijná,
xómáꞌ tsí nu̱xrígú-mijná rá, nambáñúu̱ ga̱jma̱á rí máján».
6Ikhaa jngó, gu̱xrígú-mijnálaꞌ ná inuu Ana̱ꞌlóꞌ tsí gíꞌdoo mbá xúgíí tsiakhe̱, kajngó ikhaa̱ ma̱ꞌnii̱ rí phú ma̱gi̱ꞌdoo numalaꞌ ído̱ gága̱nú mbiꞌi. 7Gu̱ni̱ꞌñáálaꞌ mbá xúgíí gajmá rí guáꞌdáálaꞌ ná ñawúun Ana̱ꞌlóꞌ, numuu rí ikhaa̱ na̱ña̱wa̱nꞌlaꞌ.
8Gu̱ndxa̱ꞌwa̱-mijná májánlaꞌ rí mu̱ne̱laꞌ, jamí ga̱juwalaꞌ xawi. Numuu rí gixa̱a̱ tsí gíꞌdáanꞌlaꞌ sia̱nꞌ, ngrigo̱o̱ꞌ-randxaꞌwée̱ xómá i̱ndi̱í phuu tsí ndaꞌyáa tsí mi̱khu̱u̱. 9Ga̱wajún-ꞌthi̱ínlaꞌ gixa̱a̱ ga̱jma̱á majñu̱u̱ rí wéje̱-gúkúu a̱kia̱nꞌlaꞌ ná inuu Ana̱ꞌlóꞌ, numuu rí ndu̱ya̱álaꞌ máꞌ rí mbá xúgíí inuu numbaa júwa̱ꞌ a̱ngia̱nꞌlaꞌ tsí nu̱míni̱í xómá rí nu̱míni̱í ikháanꞌlaꞌ.
10Jamí ído̱ rí wámba̱ máꞌ ni̱míni̱ílaꞌ mbá wátha̱ wáa mbiꞌi, a̱ꞌkhue̱n rí jmína̱a̱ꞌ máꞌ Ana̱ꞌlóꞌ tsí nindxaꞌwálaꞌ rí ma̱nindxa̱ꞌlaꞌ xómá jaꞌnii̱ ikhaa̱ ga̱jma̱á majñu̱u̱ Jesukrísto̱,#5.10 Ríga̱ mbá tikhu i̱yi̱i̱ꞌ griégo̱ rí wayuu rí naꞌthán «Krísto̱». ma̱ꞌnii̱ rí ma̱ꞌne káxáanꞌlaꞌ, ma̱wajún-gúkuálaꞌ, ma̱ꞌne gúkuáanꞌlaꞌ, jamí rí ma̱ꞌne jañii a̱kia̱nꞌlaꞌ ju̱yáa̱. 11A̱gu̱ma-mba̱a̱ Ana̱ꞌlóꞌ jamí gaꞌthán-ñájwii̱n i̱ndo̱ó máꞌ ikhaa̱ jámuu mbiꞌi. Xkuaꞌnii gáꞌne.
Naꞌthángoo Pédro̱
12Ga̱jma̱á majñu̱u̱ Silbáno̱, dxájwalóꞌ tsí nda̱yo̱o̱ rí phú jmbii, ni̱tháán mbá lájwíin i̱yi̱i̱ꞌ ríge̱ꞌ ma̱ꞌga inalaꞌ. Ga̱jma̱á majñu̱u̱ i̱yi̱i̱ꞌ ríge̱ꞌ na̱xna̱ꞌlaꞌ tsiakhe̱ jamí na̱tha̱nꞌlaꞌ rí phú na̱ni̱gu̱u̱ꞌ Ana̱ꞌlóꞌ e̱ne̱laꞌ. Ga̱wajún-gúkuálaꞌ ga̱jma̱á numuu rúꞌkhue̱n.
13Nu̱ra̱xáa̱nꞌlaꞌ tsí nanimbu̱únꞌ juyáá Jesús ná xuajen Babilónia̱. Ikhii̱n mangii̱n watraꞌwíi̱n xómá rí ikháanꞌlaꞌ. Xúꞌkhue̱n máꞌ naraxáanꞌlaꞌ a̱ꞌdéꞌ Márko̱s. 14Gu̱ra̱xi̱-mijnáalaꞌ ga̱jma̱á gamaku xómá rí nune̱ xa̱bo̱ tsí nandúún juya-mijná.
Ga̱juwalaꞌ tsímáá mbá xúgiáanꞌ ikháanꞌlaꞌ, tsáanꞌ ñajwanlaꞌ xa̱bi̱i Jesukrísto̱.#5.14 Ríga̱ mbá tikhu i̱yi̱i̱ꞌ griégo̱ rí wayuu rí naꞌthán «Krísto̱». Xkuaꞌnii gáꞌne.#5.14 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa «Xkuaꞌnii gáꞌne».
Currently Selected:
1 Pédro̱ 5: tcf
Highlight
Copy
Compare
Share
Want to have your highlights saved across all your devices? Sign up or sign in
© 2025 SIL Global. Creative commons license CC BY-SA.
