Nzyeté 34

Simeyoŋ pɔ́ Lěvî tǎg nzèm fɛ̌ wɔ́b wemanzwě gẅie mé cʉ̌ŋ nzẅìŋ wé

1Á gÿo ńgwɔ́ tsɔ́ lyɛ̌ʼ, Ndínà gẅie aa múɔ manzwě gẅie Léyà pɔ́ Yakwɔ̂b la zyé, á gʉa létsyɛʼte púɔ panzwě pie ée láʼ. 2Sishÿɛ̂m míŋ Amɔɔ gẅie aa múɔ ntɔ́ʼ pʉ̀a Hevid, gyá yé, ńgwoon yé, ńdɔg tʉ̀ ńnuŋe yé, ńdɔg ńcʉŋ nzẅìŋ wé. 3Sishÿɛ̂m la líe Ndínà, míŋ Yakwɔ̂b, á pú sí, á nò yé kúu twó yé, tà á faʼ shÿó légwɔ́ gie múɔ manzwě kwoŋo yé. 4Sishÿɛ̂m gɔɔn né tá wé Amɔɔ ngie: «Lúɔ múɔ manzwě wɔɔn ńná né mèŋ. N dɔgɔ yé ńgÿo nzwě wɔ̀ɔn.» 5Yakwɔ̂b júʼ páʼ Sishÿɛ̂m ka néŋ ncÿǒ na míŋ wé Ndínà. Táʼ, legwɔ́ gie penkʉ́ pé laa nkáʼ, ḿpféle menɔ̀ɔn pé, gÿo, Yakwɔ̂b láŋte laŋté tà pɔ́ láʼ ńtó. 6Amɔɔ tá pà Sishÿɛ̂m gʉa ńgyá Yakwɔ̂b, pɔ́ yé shwóŋe. 7Egubé Yakwɔ̂b la gÿo éfó nkáʼ ńtó, ńjúʼu nò ŋwɛ́, anò pú ńgyáŋa wɔ́b, pɔ́ júʼ á gwɔ́ kwàʼ cʉŋe nzẅìŋ, ńtí páʼ Sishÿɛ̂m ka lɔg tʉ̀ ńnuŋe míŋ Yakwɔ̂b. Á piŋ ńgwɔ́ mmó gie mé té zẅíŋe Ésàlayɛ wɔ́. 8Amɔɔ la gɔɔn né pɔ́b ngie: «Anò míŋ gẅi ka kúu twó míŋ wɔ̀ɔn Sishÿɛ̂m, shúshu, pi nyé yé, à zɔ́ʼɔ yé, ńdɔg ńgÿo nzwě we. 9Ngwɔ́ pege cʉate na nò lɔ́ɔnndá ńtemte, egubé yég yembàŋa e zɔ́ʼ gí yepanzwě; egí yembàŋa, e zɔ́ʼ yég yepanzwě. 10Ngwɔ́ pege pú ńtsẅé jʉʼɔɔn, á tsɛ̀ɛ ngwòŋ wég, é cʉ́ʼ ńgwɔ́ pɔ́ gẅí gí. Pi líe jʉʼ ńnéŋe wó, ńtáŋa metʉ̌a, ńjú metsetsáʼ.»

11Sishÿɛ̂m gɔɔn né tá pà Ndínà pâ mefɛ̌ pé ngie: «Pi lɔgɔ pòŋontʉ́m gí, ńkẅé wɔ́ɔn! Pi lɔɔn ńzɛ́te wɔ́ɔn kɔ́ wɔ́ɔ, mbà n ge ńná. 12Pi záʼ nkába twó manzwě e gyɔ́ɔn, ńtʉ́ shúm sie é zɛ́te, e gyɔ́ɔn. Pi lɔɔn ńzɛ́te wɔ́ɔn kɔ́ wɔ́ɔ, mbà n ge ná. Anò gwɔ́ pɔ́ ngie pi náa múɔngùɔ né mèŋ, n dɔgɔ yé ńgÿo ńzẅé wɔ̀ɔn.» 13Egubé Yakwɔ̂b lɔgɔ zéme, ńtsɔ́ʼɔ nò né Sishÿɛ̂m pɔ́ tá we Amɔɔ. Ńtí páʼ Sishÿɛ̂m ka cʉŋ nzẅìŋ fɛ̌ wɔ́b Ndínà. 14Ńgɔɔn né pɔ́b ngie: «À lɔɔn ngwɔ́ peg é le náa fɛ̌ weg mbwó nyìŋ gẅie mé kaa púʼu yé wɔ́ wɔ́. Peg lɔɔn ńgÿo púʼu, mbà áa nò shʉ́ mbwó peg tɛʼ. 15Ammó gie ngwɔ́ peg cʉa mǒ tá ńzẅíŋ, ayɔɔn. Pi lɔɔn ńcʉ́ʼ páʼ peg, ńzẅíŋ mé púʼ pʉ̀a pí pembàŋa ntsèm, 16mbà peg ge ná penkʉ́ pég pepanzwě né pi. É piŋ zɔ́ʼ yég pí penkʉ́ pepanzwě. Pege pú ńtsẅé, ńcʉ́ʼ ńgwɔ́ pɔ́ pʉ̀a tàʼa láʼ. 17Táʼ, pi lɔɔn ńké te zẅíŋ, ńgÿo mé púʼu gẅí wɔ́, mbà peg ge kẅé míŋ weg, é lɔgɔ yé fó jʉʼɔɔn gʉa.»

18Ashwóŋè yɔ́b kúte Amɔɔ pɔ́ míŋ we Sishÿɛ̂m. 19Múɔ mbàŋa wa lwo ńgÿo páʼ à jǔʼ. Ńtí páʼ anò míŋ Yakwɔ̂b laa letʉ́m yé tɛʼ. Sishÿɛ̂m laa múɔ, ńgẅiin mekùʼ tsɛ̀ɛ ngẅɛ̀ yɔ́b tɛʼ. 20Amɔɔ pɔ́ míŋ we Sishÿɛ̂m gʉa ncú tÿǒsoŋ pɔ́b, ńgɔɔn né pʉ̀a pɔ́b ngie: 21«Peg ne ńgyá pʉ̀a pɔɔn, é gẅiin mbʉ́lè nzèm pege; tà ngwɔ́ pege nyé wɔ́b pɔ́ néŋe tsɛ̀ɛ ngwòŋ wɔɔn, ńtáŋ sɔ̌ɔn. Ngwòŋ wɔɔn piŋ éfáŋ tà ngwɔ́ yɔ́b jʉʼ, á le zág! Pege ge zɔ́ʼ penkʉ́ pɔ́b pepanzwě. Pɔ́ piŋ ńzɔ́ʼ pégè penkʉ́ pepanzwě. 22Táʼ, pɔ́ gɔ̌ɔn ngie peg lâ pɔ̌ ge gwaa néŋe tà cʉ́ʼ pʉ̀a tàʼ ngwòŋ, pege zẅíŋ, ḿbúʼ mbàŋa ntsèm tsetsɛ̀ɛ pege páʼ pɔ́b yɔ́b. 23Á lɔɔn ńgwɔ́ púʼu, mbà menùɔ menɔ̀ɔn pɔ́b, tà mbɔɔ shúm sɔ́b ntsèm é té cʉ́ʼ gwɔ́ pɔ́ ségè wɔ́ le? Pege zẅíŋe nò gie pɔ́ gɔ̌ɔn, pege lâ pɔ̌ pú ńnéŋe.» 24Epʉ̀a pie é laa ncú tÿǒsoŋ yé, é la júʼu yɔɔn nò gie Amɔɔ pɔ́ míŋ we Sishÿɛ̂m gɔ̌ɔn, ńzẅíŋ, mbàŋa ntsèm gie é lɔ̌g ye ncú tÿǒsoŋ yé ŋwɛ́ ńkẅɛ, é gÿo mé púʼu wɔ́b.

25Á gwɔ́ lyɛ̌ʼ mbɔ́ɔntè yétá, tà mejʉʼ nnɛ́ pʉ̀a pie mé ka púʼu wɔ́b nyé ńgyáŋa gyǎŋ, egubé Yakwɔ̂b yépʉ́a yembàŋa: Á Simeyoŋ pɔ́ Lěvî pie ée mefɛ̌ Ndínà, é kate menně ncù, ńdɔg ńkúu tÿǒsoŋ tà lagá nyìŋ té zsé, ńzẅéte mbàŋa ntsèm. 26Ńzẅé mbɔɔ Amɔɔ pɔ́ míŋ we Sishÿɛ̂m né nně ncù. Éfó ndá Sishÿɛ̂m, ńkẅile Ndínà. 27Penkʉ́ Yakwɔ̂b ŋwéʼe na mepfó, ńtaʼ, ḿbú ńtúʼ shúm tÿǒsoŋ. Ńtí nue mé ka cʉŋ nzẅìŋ fɛ̌ wɔ́b wemanzwě. 28Ḿbiŋ ńgwoon menjʉ̀njÿò, ńgwoon mvfó, ńgwoon mefòŋ, mbɔɔ menzikáasè, ḿbú ńtúʼ shúm ntsèm sie é laa tÿǒsoŋ tà mbɔɔ sie é laa tsɛ̀ɛ membʉ̀a. 29Pɔ́ la pú ńtúʼ shúm tʉ̀nzẅìŋ sɔ́b ntsèm, ńgwoon gubé yɔ́b, ńgwoon mezwě pɔ́b, ḿbú túʼ shúm tsɛ̀ɛ mendá ntsèm ńdɔg ńgʉa.

30Á cʉa púʼu, Yakwɔ̂b gɔɔn né Simeyoŋ pɔ́ Lěvî ngie: «Pi neŋé nò na mèŋ. Ńgÿo ńcʉ́ʼʉ nyìŋ tepòŋ mbwó pʉ̀a wɔɔn ngwòŋ, á mbwó pʉ̀a Kánàhan mbɔɔ mbwó pʉ̀a Pelísè. Pɔ́ ge tíʼte na mèŋ, é lÿɔ́ʼɔ wɔ́ɔn né ncù, é gwɔʼ ngẅɛ̀ yɔ̀ɔn, ńtí nue epɔ́ɔn pʉ̀a té gyɔ́ɔn.» 31Lěvî pɔ́ Simeyoŋ tsɔ́ʼɔ mbwó tá wɔ́b ngie: «Nyìŋ te gẅiin légÿo mmó gie mé gÿo na káatÿǒ manzwě á na fɛ̌ wege wemanzwě wɔ́.»

Currently Selected:

Nzyeté 34: nnh

Highlight

Copy

Compare