Nzyeté 35

Yakwɔ̂b fǒ Sishÿɛ̂m ńgʉa né Mbetɛɛ

1Á tǎa ńgwɔ́ tsɔ́ lyɛ̌ʼ, e Ssé gɔɔn né Yakwɔ̂b ngie: «Pʉʉ, ńgʉa ńnéŋe Mbetɛɛ! Ɔ̀ ge kúu wó, é kwɛ́ɛ jʉʼʉ lenuŋé pwɔʼ, é náa mbwó Ssé gie e la kẅɛɛ mvfò gù wó, á fʉ̀ʼ gie ɔ̀ la ne ńkÿo fɛ̌ gù Ezagẅi.»

2Yakwɔ̂b gɔɔn mbwó pʉ̀a tsìŋendá yé tà mbɔɔ mbwó pʉ̀a pie pâ pɔ̌ la gwɔ́ ngie: «Pi gwáʼ messé ndyɛ̀ʼɛ mie ée mendá pi. Pi sɔg menò tepòŋ na pi, ńgwɔ́ ndʉalʉ̌a, ńkúbe menzsǒ mí. 3Pege ge pʉ né Mbetɛɛ, n ge kúu wó, é pwóon jʉʼʉ lenuŋé pwɔʼ, é náa mbwó Ssé gie e ka júʼu sẅíŋtè yɔ́ɔn, á fʉ̀ʼ gie n kaa tsɛ̀ɛ cʉanò. À ka tóonte wɔ́ɔn, á na legìŋ gẅie n ka gÿo.» 4Ńgɔɔn púʼu, pɔ́ pú ńkate messé ndyɛ̀ʼɛ mie pɔ́ la gẅiin, ḿbú ńnáa mbwó Yakwɔ̂b, tà mbɔɔ mekwáŋ#35:4 mekwáŋ (kà meyalʉ́ŋ wɔ́ɔ) é ge gǎa wɔ́ɔ é gwɔ́ liŋé gie á lɔ́ɔn ńdaʼte nyìŋ aa nzèm ssé. metuŋó. Á ffo tsìŋe tÿǒ gʉ́m gie áa ngʉ̀ŋe Sishÿɛ̂m. 5Yakwɔ̂b pâ penkʉ́ pé la gwaa fó jʉʼó gʉa, máamáa shʉ́shÿɔ́g Ssé pú ńgwoon pʉ̀a pie é tsẅé tsɛ̀ɛ metÿǒsoŋ mie é kéle jʉʼó. Tà nyìŋ te gẅiin shÿɔ̀g léjwoŋte wɔ́b wɔ́.

6Yakwɔ̂b pâ pʉ̀a pie pâ pɔ̌ la gwɔ́ la gʉa tà ńkúu Lûuzè gẅie mé gíŋe ńtóŋ lê Mbetɛɛ, á gwɔ́ tsɛ̀ɛ ngwòŋ Kánàhan. 7Ńkúu wó, ńkwɛ́ɛ jʉʼʉ lenuŋé pwɔʼ, ńtóŋ lezíŋ jʉʼó lê Ɛɛ-Mbetɛɛ (ńdɔgɔ ńgɔɔn ngie e «Ssé Mbetɛɛ»), ńtí páʼ á laa fʉ̀ʼ gie à la ne ńkÿo fɛ̌ we, e Ssé kẅɛɛ mvfò yé jʉʼó ŋwɛ́. 8Ndebóla gẅie à laa mátsáb Lɛpékà la kwé, mé túŋo yé ngʉ̀ŋe Mbetɛɛ á tsìŋe tsɔ́ tÿǒ gie á fáŋ, lezíŋ gwɔ́ lê shÿɛ̂n, mbà mé la tsẅi lezíŋ yɛ̌ tÿǒ lê tÿǒ lelʉ̀a.

9Á laa fʉ̀ʼ gie Yakwɔ̂b la fó kwòŋo Alam ḿbiŋ, e Ssé gíŋe ńkẅɛɛ mvfò yé, ńnéŋ mbʉ́lè na yé. 10Ńgɔɔn né yé ngie: «Lezíŋ shú ée lê Yakwɔ̂b, táʼ mé té gíŋe tóŋo gú púʼu wɔ́, mé ge cʉ́ʼ tóŋo gú pɔ́ lê Ésàlayɛ.» 11E Ssé gɔɔn né yé ngie: «N gee Ssé gie e pǔ ńgẅiin ngʉ̀ʼ, zyé mboŋó, ngẅɛ̀ jù zyéen. Tàʼ ngwòŋ, ńgÿo tàʼ nùɔ mengwòŋ, ge láʼ fó na gù. Ɔ̀ piŋ ńzyé mefùɔ. 12Ngwòŋ gẅie n da náa mbwó Ábalaham pɔ́ Ésàg, n nǎ né gù mbɔɔ né ngẅɛ̀ jú tà mbɔɔ fʉ̀ʼ gie ɔ̀ te láʼ gíŋe gwɔ́ wó wɔ́.»

13E Ssé fó jʉʼ gie à gɔ̌ɔn nò né Yakwɔ̂b wó, ḿbʉ. 14Yakwɔ̂b líe tóon jʉʼó, ḿbʉʼʉ ńtÿɔ́g tÿɔ́g, ḿpfɛte shúm pwɔʼ ndumó: é melùʼ pɔ́ mevɛ́. 15Yakwɔ̂b tsẅi lezíŋ yɛ̌ jʉʼ gie Ssé la gɔɔn nò né yé wó lê Mbetɛɛ.

Lǎshÿɛ̂ zyě Mbɛŋjÿamɛŋ, ńkwé

16Yakwɔ̂b pâ pʉ̀a pé la fó Mbetɛɛ ńgʉa tà ńkúu tsɔ́ jʉʼ, tà lefǒ yɛ̌ jʉʼ, ńkúu Efalata, ntyě nyé sag, Lǎshÿɛ̂ zyé. Ńgwaa zyé, ńgyá ngɔ́ʼ tɛʼ. 17Afʉ̀ʼ gie Lǎshÿɛ̂ la gíŋe ḿbú ne ńgyá ngɔ́ʼ lezyé ŋwɛ́, mánkẅè gɔɔn né yé ngie: «Te gíŋe ḿbɔ́g, ɔ̀ gǐŋ ńzyé tàʼ múɔ mbàŋa.» 18Páʼ Lǎshÿɛ̂ la cʉ́ʼ ńgwɔ́ pɔ́ ncwò legwé la, á gwaa cʉ́m, ńtsẅi lezíŋ múɔ lê Mbɛŋ-Oni, ńdɔgɔ ńgɔɔn ngie: «Múɔ ngʉ̀ngʉ̀». Táʼ, tá múɔ tsẅi sé yé lê Mbɛŋjÿamɛŋ, «Múɔ gẅie aa pwó tʉ̀#35:18 Yakwɔ̂b kubé ntsẅì tepòŋ (Mbɛŋ-Oni) ńtsẅi yembòŋo Mbɛŋjÿamɛŋ la pwó tʉ̀ gie mé tʉʉ lelÿò, ńzsé ngie áa yembòŋo (Tóŋo ŋwàʼne mezɔ̀bɔ ntse 137:5), tà mbɔɔ gwǒŋ yetʉ̀ (ŋwàʼne mezɔ̀bɔ ntse 110:5 pɔ́ mmó gie mé ŋweʼe mǒ; Ńdʉŋte na Mat. 25:34). yɔ́ɔn». 19Lǎshÿɛ̂ kwé, mé túŋo yé ngʉ̀ŋe mánzsè Efalata gẅie mé ée fʉ̀ʼɔɔn ńtóŋ lê Mbɛ́tèlehɛm. 20Yakwɔ̂b líe tóon, ḿbʉʼʉ ńtÿɔ́gɔ na lesyè Lǎshÿɛ̂. Tóon ŋwɛ́ gǐŋ ńtyé pɔ́ na lesyè Lǎshÿɛ̂ tà ńkú lyɛ̌ʼɔɔn.

21Yakwɔ̂b gʉa tà ńtɔ́gɔ Migdá-Endɛ̂ɛ, ńkwɛ́ ntàb ye#35:21 Migdá-Endɛ̂ɛ kà nùɔ menɔ̀ɔn: ntyě té sag léfó jʉʼó ńgʉa ńkúu lekwɛ́ Siyoŋ wɔ́.. 22Á laa fʉ̀ʼ gie Yakwɔ̂b la ne ńtsẅé tsɛ̀ɛ wɔɔn ngwòŋ, Lẅímbèŋ gʉa, ńnuŋe Mbila gẅie à laa mágàb tá we. Ńnuŋe yé púʼu, Yakwɔ̂b júʼ.

Yakwɔ̂b la gẅiin penkʉ́ ntsɔ̀b pʉ́a: 23Egubé yembàŋa gie pɔ́ Léyà la zyé é yɔɔn: Wɔɔn Lẅímbèŋ múɔ letwó we, wɔɔn gwɔ́ Simeyoŋ, wɔɔn gwɔ́ Lěvî, wɔɔn gwɔ́ Yúndà, wɔɔn gwɔ́ Esakaa ńgÿo Zambuloŋ. 24Penkʉ́ pembàŋa pie pɔ́ Lǎshÿɛ̂ la zyé é pɔ́ɔn: wɔɔn Yesyɛ̂b ńgÿo Mbɛŋjÿamɛŋ. 25Egubé yembàŋa gie pɔ́ Mbila ngàŋafàʼ Lǎshÿɛ̂ la zyé é yɔɔn: wɔɔn Ndaŋ ńgÿo Nɛbtali. 26Penkʉ́ pembàŋa pie pɔ́ Zilépà ngàŋafàʼ Léyà la zyé e pɔɔn: wɔɔn Ngâd ńgÿo Ashÿɛ̂ɛ. Pɔɔn pú ńdɔgɔ ńgwɔ́ penkʉ́ pembàŋa Yakwɔ̂b pie à la zyé kwòŋo Alam.

27Yakwɔ̂b la gʉa tà ńkúu lejʉ́ŋ tá we Ésàg, á Mamlé, á tsɛ̀ɛ pàga láʼa Kiliyad-Alemba gie mé gíŋe ńtóŋ lê Embeloŋ, á jʉʼ gie Ábalaham pɔ́ Ésàg la tsẅé wó, ńgwɔ́ pakÿoláʼ. 28Ésàg la tsẅé ndùm njÿó ngùʼ móm lefɔ̌ɔn nzèm nkÿo; 29Ńgwaa kwé gʉa tsɛ́ pamángʉanjʉʼ pé púʼu, mbà à zyě ńgyá njÿó. Ezagẅi pɔ́ Yakwɔ̂b pie ée penkʉ́ pé, é túŋo yé.

Currently Selected:

Nzyeté 35: nnh

Highlight

Copy

Compare