Nzyeté 33

Yakwɔ̂b gyǎ Ezagẅi

1Yakwɔ̂b la giŋ tà ḿbʉʼʉ twó yé, ńgyá Ezagẅi ne ńtóo, epʉ̀a gwɔ́ nzèm yé tà ńkuʼ pʉ̀a nkÿo lekùɔ. Á gabte penkʉ́ pé, ńná tsɔ́ né Léyà, ńná petsɔ́ né Lǎshÿɛ̂, ḿbiŋ ńná petsɔ́ né megàŋafàʼ pepanzwě pépʉ́a pie é léen ńcʉ́ʼ mezwě pé. 2Ńgʉa na megàŋafàʼ pepanzwě pépʉ́a pie é léen ńcʉ́ʼ mezwě pé, á tsege wɔ́b lâ gubé yɔ́b, ńnáa mvfò, ḿbɔ́ɔnte ńtsege Léyà pâ gubé yé, ḿbɔ́ɔnte ńtsege Lǎshÿɛ̂ pɔ́ Yesyɛ̂b. 3Kwàʼ yé máŋwɛ́ cʉa ńgwɔ́ mvfò pɔ́b. Ńgwaa gʉa tà kúu lejʉ́ŋ fɛ̌ we Ezagẅi, ńŋwɔ́ʼ nnɛ́ ngʉ̀a sɔɔnmbʉ́a tà zǐ yé kíbe ssé. 4Ezagẅi kÿote, ńzáʼa yé, ńtáŋte yé, ḿbéle yé kʉ́kʉ́b yé. Pɔ́ yé pú ńdʉa. 5Ezagẅi la gyá nzẅìŋ panzwě pâ penkʉ́, ńzɛ́te yé ngie: «Pɔɔn, ée pawɔ̌ pie ée nzèm gù?» Á tsɔ́ʼ ngie: «Ée gubé gie e Ssé ka lɔgɔ pòŋontʉ́m yé, ńná né mèŋ, mèŋ ngàŋafàʼ gù.»

6Megàŋafàʼ pé pepanzwě pâ gubé yɔ́b tó yɔ́b, ńŋwɔ́ʼ nnɛ́ mvfò yé. 7Léyà pâ penkʉ́ pé tó yɔ́b, ńŋwɔ́ʼ nnɛ́ mvfò yé, Yesyɛ̂b pɔ́ Lǎshÿɛ̂ tó yɔ́b, ńŋwɔ́ʼ nnɛ́ mvfò yé. 8Ezagẅi zɛ́te yé ngie: «Agi nùɔ menɔ̀ɔn gie m bumté li, á lɔgɔ ngie kɔ́?» Á tsɔ́ʼ ngie: «N dɔgɔ ńtóo pɛ́ʼɛ̀, ńtsɔ́ɔn ngie, ɔ̀ lɔgɔ pòŋontʉ́m jú, ńkẅé wɔ́ɔn mboŋó me ndè wɔ̀ɔn.» 9Ezagẅi gɔɔn ngie: «Atsɔ́ mmó té ne ńzága wɔ́ɔn mɔ́, mbà fɛ̌ wɔ̀ɔn. Leʼe shúm shú.» 10Á gɔɔn púʼu, Yakwɔ̂b tsɔ́ʼ ngie: «Ngǎŋ, tsetsɔ́ʼ, à lɔɔn ngwɔ́ gie ɔ̀ ge lɔgɔ pòŋontʉ́m jú, é kẅé wɔ́ɔn, ɔ̀ zẅíŋe mmó nanǎ gie n nǎ lɛ̂. Á zɔɔn ńgwaa gwɔ́, mbà n dɔ̌g pɔ́ ntí gie mé lɔg ńtóo mvfò Ssé, ńtóo mvfò gù. Ɔ̀ pǐŋ ńkẅé wɔ́ɔn mboŋó. 11Shúshu, zẅíŋe mmó nanǎ gie n nǎ né gù. Ńtí nue e Ssé ka cÿó gʉm yɔ́ɔn, ńgÿo n gwɔ́ ngàŋa mmó.»

Yakwɔ̂b pú sẅíŋte Ezagẅi sẅiŋté, tà á zẅíŋ. 12Ezagẅi gɔɔn né Yakwɔ̂b ngie: «Pege zye légiŋ, pɔ̀gɔ ge gwɔ́ kwò.» 13Yakwɔ̂b tsɔ́ʼ ngie: «Andè wɔ̀ɔn, ɔ̀ ne ńzsé ngie á zɛ́te lézɔ́bte gubé zɔbté. N gẅiin mezwě menjʉ̀njÿò pâ mezwě mefòŋ pie é nyé ne ńnóŋo púɔ nǒŋ. Pege lɔɔn ńgÿo pɔ́ giŋ lê tʉ̀ tsɔ̌ ntí, mbɔɔ na tàʼa lyɛ̌ʼ, mbà pɔ́ ge pú kwéte. 14Shúshu me ndè, gwɔ́ mvfò, mèŋ ngàŋafàʼ gù, n gwɔ́ nzèm, ńne ńgiŋe ndɔɔn ndɔɔn na ntí gie menɔ̀ɔn ée mvfò mèŋ ńne ńgiŋe yɔ́b púʼu. Mbɔɔ na ntí gie e gubé ne ńgiŋe yɔ́b púʼu. N ge ké giŋ pɔ́ púʼu tà láʼ kúu mbʉ̀a gù á Seyî.» 15Ezagẅi gɔɔn ngie: «N ge nyé tsɔ́ pʉ̀a pɔ́ɔn pi lâ pɔ̌ gwɔ́ kwò.» Yakwɔ̂b tsɔ́ʼ ngie: «Púʼu mélàʼakɔ́? Shúshu me ndè, ké ńgẅiin pɔ́ pòŋontʉ́m jú nzèm mèŋ.»

16Pɔ́ lyɛ̌ʼ ŋwɛ́, Ezagẅi piŋ tà ńkúu Seyî, 17Ńgʉa na Yakwɔ̂b, mbà à la gʉa Sukɔd, ńkwɛ́ɛ tàʼ ndá, é gwɔ́ ye. Ḿbiŋ ńkwɛ́ menkáʼ, é gwɔ́ me menɔ̀ɔn pé. Áa mmó gie á la gÿo, mé tóŋo jʉʼó lê Sukɔd, ńdɔgɔ ńgɔɔn ngie nkáʼa menɔ̀ɔn.

Yakwɔ̂b kwɛ̌ mentàb mé ngʉ̀ŋe Sishÿɛ̂m

18Yakwɔ̂b la fó kwòŋo Alam, ńgʉa tà ńkúu tÿǒsoŋo Sishÿɛ̂m á Kánàhan té lɔ̌ʼ, ńkwɛ́ mbʉ̀a ye á ncú tÿǒsoŋ. 19À la lɔg tsɔ̌ ntí nkáb pàg nkÿo, ńjúu jʉʼʉ tsetsáʼ gie à la kwɛ́ mentàb mé wó, á mbwó míŋ Amɔɔ gẅie aa tá pà Sishÿɛ̂m. 20Ńnyɛte jʉʼʉ lenuŋé pwɔʼ, ńná lezíŋ lê Ɛɛ-Elohe-Ésàlayɛ (ńdɔgɔ ńgɔɔn ngie «Ɛɛ ée Ssé, é Ssé Ésàlayɛ»).

Currently Selected:

Nzyeté 33: nnh

Highlight

Copy

Compare