Nzyeté 32

1Lambaŋ gÿo ńdu ssé tsɛ̀ɛ mbaʼámbaʼ, ńnéŋ mbʉ́lè na gubé yé yepanzwě pâ gubé gubé yé, pâ pɔ̌ faŋte mennɛ́, á lɔg ńdeʼe wɔ́b, ḿbiŋ nzèm né mbʉ̀a yé.

Yakwɔ̂b ne ńcwoŋte mbùm ye, légyá Ezagẅi

2Yakwɔ̂b la píi we mánzsè ńne ńgee, mecÿɔ́ʼ Ssé tsɛ́ɛ yé. 3Yakwɔ̂b gyá wɔ́b, ńgẅiin shʉ́shÿɔ́g, ńgɔɔn ngie: «Yɔɔn áa nùɔ Ssé!» Ńdeen ńké ńtóŋ lezíŋ jʉʼó lê Mahanayîm#32:3 Mahanayîm lɔgɔ ngie menùɔ mémbʉ́a. Yɔɔn jʉʼ gie mé gɔɔn lɔɔn, áa Talaŋsejɔɔndani né ngʉ̀ŋe tsitsyɛ̀ Yambɔg, tá mé laa kwaʼ ngie ajʉʼó yɔɔn wɔ́..

4Yakwɔ̂b gÿo púʼu, ḿvɔg ńtúm memántúm, á mbwó fɛ̌ we Ezagẅi, á tsɛ̀ɛ láʼa Seyî, á ngwòŋ Éndɔ̀m#32:4 ngwòŋ Éndɔ̀m mbɔɔ láʼa Seyî: mezíŋ mɔɔn mémbʉ́a lɔgɔ ḿbú ńdaʼte pɔ́ pàga láʼ gie á fó ntsíŋ ntse máŋʉ́ ngwáŋ, ńgʉa ńkúu ntsíŋ sǎʼnèm., 5ńgɔɔn né pɔ́b ngie: Pi júʼu nò gie pi ge tó éshwóŋo Ezagẅi, á ndè wɔ̀ɔn. Pi tó ńgɔɔn né yé ngie ngàŋafàʼ we Yakwɔ̂b, à gɔ̌ɔn ngie: «N ka tsẅé mbʉ̀a Lambaŋ páʼ kÿoláʼ tà ńkú fʉ̀ʼɔɔn. 6N gẅiin mefòŋ, ńgẅiin menzikáasè, ńgẅiin menjʉ̀njÿò pâ mvfó, ńgẅiin ngàŋafàʼ yembàŋa tà mbɔɔ yepanzwě. Ngie ndè wɔ̀ɔn mɔ́ɔ, m vɔgɔ ńtúmo memántúm mbwó gù ngie pɔ́ shwóŋo gú páʼɔɔn, légwɔ́ gie ɔ̀ lɔgɔ pòŋontʉ́m jú ńkẅé wɔ́ɔn.» 7Memántúm gʉa tà ḿbiŋ, ńgɔɔn né Yakwɔ̂b ngie: «Peg gʉ̌a ńgyá fɛ̌ gù Ezagẅi. À ne ńtóo lézáʼa gú né pʉ̀a nkÿo lekùɔ nzèm yé.» 8Yakwɔ̂b júʼ púʼu, ḿbú ḿbɔ́g, ecÿɔʼ gwoon yé; tà á gab pʉ̀a pie ée nzèm yé nzsè pʉ́a. Ńgab menjʉ̀njÿò nzsè pʉ̀a, ńgab mvfó, ńgab mefòŋ ńgíŋ ńgab mekamɛɛ pɔ́ púʼu. 9Ńne ńkwaŋa ngie: «Ezagẅi lɔɔn ńdɔg ncù ńtó, ńtága tàʼ nùɔ, mbà yetsɔ́ ge tsẅɛ́.» 10Ńgíŋe ńgɔɔn ngie: Cʉ̀apʉ̀a, e Ssé Ábalaham, e Ssé tá wɔ̀ɔn Ésàg, gù gẅie ɔ̀ ka gɔɔn né mèŋ ngie: «Piŋ né tsɛ̀ɛ ngwòŋ gẅí, á lesaʼá pi, n gÿo mboŋó na gù.» 11M bǔ ńkɔ́g tɛʼ á na pyennɛ́ pɔ́ mekùʼ mie ɔ̀ ka nyɛɛ nzèm mèŋ, ngàŋafàʼ gù. N da gwaa túm ntse Juundʉŋ, ńgẅiin pɔ́ ndàʼ tÿǒ yɔ́ɔn. Mèŋ wɔɔn fʉ̀ʼɔɔn ńne ńkwɔ́ʼɔ, mbà pʉ̀a pɔ́ɔn lâ shúm sɔ́ɔn kéen ńgyɔ́ɔn tà n gab nzsè pʉ́a. 12Tsetsɔ́ʼ, Kẅé wɔ́ɔn mbwó fɛ̌ wɔ̀ɔn Ezagẅi. N ne ḿbɔ́gɔ ngie ngwɔ́ á tó ńzẅé wɔ́ɔn, ńzẅé penkʉ́ pâ memá pɔ́b. 13Gù gẅie ɔ̀ la gɔɔn né mèŋ ngie: «N ge gÿo gÿo mboŋó na gù, ngie n ge gÿo gÿo ngẅɛ̀ jù gwɔ́ páʼ sàŋasáŋa gie áa tsɛ̀ɛ ntse máŋʉ́, á gie ngwɔ́ mé le sáŋ!»

14Yakwɔ̂b gɔɔn púʼu, ńdáʼa jʉʼó. Ńgʉa na shúm sé sie à ka lab, ńdíe sie à ge lɔg náa mmó nanǎ mbwó fɛ̌ we Ezagẅi. 15À la gʉa na mvfó gie ée mezwě, ńkẅile nkÿo pʉ́a, ńgÿo mepwɔ́b móm mbʉ́a; ńkẅile mezwě menjʉ̀njÿò nkÿo pʉ́a, ńgÿo mekùkwòon móm mbʉ́a; 16ńgʉa na mezwě mekamɛɛ, ńkẅile móm tá, pâ púɔ pie é la nyé ńnóŋo lepʉ́; ńgʉa na mezwě mefòŋ, ńkẅile móm lekùɔ, ńgÿo melúm legém; ńkẅile mezwě menzikáasè móm mbʉ́a, ńgÿo melúm legém. 17Ńnáa mbwó ngàŋafàʼ yé yembàŋa. Yɛ̌ ntí nɔ̀ɔn wɔ́ɔ, é gẅiin yé nùɔ. Ḿbiŋ ńgɔɔn né ngàŋafàʼ yé ngie: «Pi cʉa ńgwɔ́ mvfò mèŋ, ayɛ̌ nùɔ menɔ̀ɔn wɔ́ɔ, à giŋ yé kwò.» 18Ńtsẅi né mvɔ̀gmvfò ngàŋafàʼ ngie: Ɔ̀ lɔɔn ńgiŋ tà ńgyá fɛ̌ wɔ̀ɔn Ezagẅi, á zɛ́te gú ngie: Ɔɔ nyìŋ wɔ̌ wɔ́ɔ? Ńgee né nzɔ̌ wɔ́ɔ? Menɔ̀ɔn pie ée mvfò gù lɔɔn, ée pe wɔ́ wɔ́ɔ? 19Ɔ̀ tsɔ́ʼ ngie: «Ée me ngàŋafàʼ gù Yakwɔ̂b. À ka túm ngie peg ná né gù me ndè. Kwàʼ yé máŋwɛ́, aa nzèm peg ńne ńtóo.»

20Ḿbiŋ ńgʉa na ngàŋafàʼ mbɔ́ɔntè yépʉ́a pɔ́ ngàŋafàʼ mbɔ́ɔntè yétá lâ petsɔ́ pʉ́a pie é laa nzèm menùɔ menɔ̀ɔn, Yakwɔ̂b tsẅi né pɔ́b ngie: Wɔɔn aa páʼ pi ge gyá Ezagẅi, é gɔɔn né yé púʼu. 21Pi ge cwoŋo gɔɔn né yé ngie: «Yakwɔ̂b ngàŋafàʼ gù, aa nzèm peg ńne ńtóo.» Ńtí páʼ à la ne ńkwaŋte ngie: «N ge gwaa tó tà ńgyá yé, é vɔg túm shúm nanǎ tà e kúu mbwó yé, é lɔg sẅéte letʉ́m sé. Kà à lɔɔn ńgwɔ́ á fó ńkẅé wɔ́ɔn mboŋó wɔ́ɔ.» 22Á gÿo púʼu, ńtsẅi, mé lɔg menɔ̀ɔn pie à ge ná né fɛ̌ we Ezagẅi, ńgʉa. Yé gíle yé zɔ̌ cʉ́ʼ ńdáʼa jʉʼ gie pɔ́ ka jwóŋ mentàb wó.

Yakwɔ̂b pɔ́ Ssé cǔɔ melàʼ

23Yakwɔ̂b lu ssé letsẅɛ́ʼ lyɛ̌ʼ ŋwɛ́, ńtóŋ mezwě pé pépʉ́a, ńtóŋ megàŋafàʼ pepanzwě pépʉ́a pie é léen ńcʉ́ʼ mezwě pé, ńgÿo gubé yé ntsɔ̀b wémɔʼɔ́, ńtsege wɔ́b, ńgÿo pɔ́ túm ntse Yambɔg#32:23 Yambɔg: lɔgɔ ńgwɔ́ métàʼntse gẅie à fóo shÿó sǎʼnèm ńcʉ́me tsɛ̀ɛ Juundʉŋ.. 24Ńgwaa túm ntse, ńgẅiin shúm Yakwɔ̂b ntsèm. 25Yakwɔ̂b cʉ́ʼ ńnéŋe jʉʼó pɔ́ gíle yé. Pɔ́ letsẅɛ́ʼ ŋwɛ́, Yakwɔ̂b pɔ́ tsɔ̌ mámbàŋa láʼa láʼ, ńcúɔ melàʼ tà njÿó cʉ́ʼʉ ńdʉ́a lʉ̌a. 26Andÿò ŋwɛ́ gyá ngie ngwɔ́ á le jÿó Yakwɔ̂b wɔ́, ńcúɔ zẅɛ́ʼ yé, ńkwɔg. 27Ńgɔɔn né yé ngie: «Enjÿó yɔɔn ńcʉ́ʼʉ ńdʉ́a lʉ̌a, nyé wɔ́ɔn, n gʉa.» Yakwɔ̂b tsɔ́ʼ ngie: «Ngwɔ́ ń de nyé gú, ɔ̀ gʉa, té gwɔ́ gie ɔ̀ něŋ mbʉ́lè na mèŋ wɔ́.» 28Á leen ńké ńzɛ́te Yakwɔ̂b ngie: «Lezíŋ shú ée lê wɔ̌?» Á tsɔ́ʼ ngie: «Yakwɔ̂b,» 29Á gíŋe ńgɔɔn ngie: «Mé té gíŋe tóŋo gú lê Yakwɔ̂b wɔ́. Mé ge cʉ́ʼ tóŋo gú pɔ́ lê Ésàlayɛ. Ńtí páʼ pi Ssé lâ pʉ̀a mesoŋ cǔɔ melàʼ, ɔ̀ jÿó.»

30Yakwɔ̂b gíŋe ńzɛ́te yé yé ngie: Shúshu, shwóŋo wɔ́ɔn lezíŋ shú. Á tsɔ́ʼ ngie: «Ńtí kɔ́ ɔ̀ zɛ́te lezíŋ sɔ́ɔn?» Ńgɔɔn púʼu, ńnéŋ mbʉ́lè na Yakwɔ̂b jʉʼó. 31Yakwɔ̂b tsẅi lezíŋ yɛ̌ jʉʼ ŋwɛ́ lê Penuwɛ (ńdɔgɔ ńgɔɔn ngie «eshÿó Ssé»). Áa mmó gie á la gÿo, á gɔɔn ngie: «N gyǎ Ssé né menÿɔ́g mɔ́ɔn, wɔ́ɔn wɔɔn ńké ńnyé ńgwɔ́ pɔ́ tentʉ́.» 32Yakwɔ̂b la gwaa cʉa Penuwɛ, á fʉ̀ʼ gie nèm la né sáʼa, ńgiŋe ńnyíʼi nyiʼí. Ńtí zẅɛ̌ʼ yé gie mé ka kwɔg. 33Áa mmó gie á gÿo tà fó fʉʼó, ńkú lyɛ̌ʼɔɔn, epʉ̀a Ésàlayɛ ée těen ḿpfɛ́ɛ jʉʼʉ mbab gie á jwoŋ lejÿɔgɔ́ zẅɛ̌ʼ nɔ̀ɔn wɔ́. Ńtí páʼ áa jʉʼ gie mé la cúɔ Yakwɔ̂b tà néŋ fʉ̌ŋ jʉʼó, á tsɛ̀ɛ zẅɛ̌ʼ yé.

Currently Selected:

Nzyeté 32: nnh

Highlight

Copy

Compare