Nzyeté 31

1Yakwɔ̂b la júʼ páʼ penkʉ́ Lambaŋ ne ńzẅɛ́te ngie: «Yakwɔ̂b kéen ńjÿó shúm tá wege ntsèm. À ka fó pɔ́ na shúm tá wege tá ḿbú ńgẅiin shúm sie à gẅiin lɛ̂.» 2Yakwɔ̂b gyá ngie Lambaŋ kéen sele nzèm yé. 3Cʉ̀apʉ̀a leen ńgɔɔn né yé Yakwɔ̂b ngie: «Piŋ né láʼ pà tá gù, á lesaʼá pi. N ge gwɔ́ né gù!» 4Yakwɔ̂b tsẅi mé tóŋo Lǎshÿɛ̂ pɔ́ Léyà pie é laa nkáʼ, á jʉʼ gie menɔ̀ɔn ée wó. 5Ńgɔɔn né pɔ́b ngie: «N ne ńgyá ngie tá gẅi kéen sele nzèm mèŋ. Táʼ, e Ssé tá wɔ̀ɔn kaa né mèŋ. 6Kwaʼ pi gí ne ńzsé ngie n ka faʼa mbwó tá gẅi, né metʉ̀ mɔ́ɔn ntsèm. 7Táʼ, tá gẅi ka fʉte wɔ́ɔn, ńkúbe ntí gie à lɔgɔ ḿbéen wɔ́ɔn ngʉ̀a legém. Táʼ, e Ssé ka te zẅíŋ ngie ngwɔ́ á gÿo tsɔ́ nò tepòŋ na mèŋ wɔ́.» 8Á lɔ̌ɔn ńgwɔ́ gie Lambaŋ lɔɔn ńgɔɔn ngie: «Menɔ̀ɔn pie é gẅiin mepǎb áa pèen jú.» Menɔ̀ɔn ntsèm zyé pɔ́ púɔ pie é gẅiin mepǎb. Ḿbiŋ ńgwɔ́ gie à lɔɔn ńgɔɔn ngie: «Menɔ̀ɔn pie ée menzàʼ menzàʼ aa pèen jú.» Menɔ̀ɔn ntsèm zyé pɔ́ púɔ pie é gẅiin menzàʼ.

9E Ssé ka kẅé menɔ̀ɔn tá gẅi, ńná né mèŋ. 10Á kaa fʉ̀ʼ gie menɔ̀ɔn ka ne ńkiɛ, n dyé njÿòon ńgyá páʼ mepwɔ́b kà mekùkwòon wɔ́ɔ pie é gwoon mezwě, é gẅiin menzàʼ, ńgẅiin mepǎb. 11Cÿɔ́ʼ Ssé tóŋo wɔ́ɔn tsɛ̀ɛ njÿòon ngie: «Yakwɔ̂b!» N zẅíŋ ngie: «Oon!» 12Á gɔɔn ngie: «Shúshu, líe menɔ̀ɔn ńgyá! Mepwɔ́b pie é ne ńgwoon mezwě, é gẅiin menzàʼ, ńgẅiin mepǎb. Ńtí páʼ n gyǎ mmó ntsèm gie Lambaŋ gÿǒ na gù. 13N gee Ssé gie e la kẅɛɛ mvfò gù á Mbetɛɛ, á jʉʼ gie ɔ̀ la pʉʼʉ tóon wó ńtÿɔ́g tÿɔ́g, ḿpfɛte mevɛ́ mǒ na lezíŋ sɔ́ɔn, á jʉʼ gie ɔ̀ la pÿé wɔ́ɔn lécʉ́me nzèm mèŋ wó. Afʉ̀ʼɔɔn la, fó tsɛ̀ɛ wɔɔn ngwòŋ, ńgʉa né tsɛ̀ɛ ngwòŋ gẅie lesaʼá sí, ée wó.» 14Lǎshÿɛ̂ pɔ́ Léyà gɔɔn ngie: «Peg cʉʼʉ́ ńgẅiin yég mmó mbʉ̀a tá weg wɔ́, tà mbɔɔ tÿɔgɔ́. 15Tá weg te cʉ́ʼʉ ńdíe wég pɔ́ páʼ megʉ̀ wɔ́ le? Á ka te sẅiŋe wég tà ḿpfɛ́ nkáb waa? 16Púʼu la, eshúm tʉ̀nzẅìŋ ntsèm sie e Ssé ka kẅé mbwó tá weg, é cʉ́ʼ ńgwɔ́ pɔ́ ség lâ gubé yég. Afʉ̀ʼɔɔn la, gÿo kwàʼ páʼ Ssé ka tsẅi né gù.» 17Yakwɔ̂b gÿo penkʉ́ pé lâ mezwě pé kwɔ́ʼ ńnéŋe nkàʼ mekamɛɛ. 18Pâ pɔ̌ gwaa gʉa né mbʉ̀a tá we Ésàg á tsɛ̀ɛ ngwòŋ Kánàhan, á lɔg menùɔ menɔ̀ɔn pé pie à ka faʼa fàʼ tá ńgẅiin, lâ shúm tʉ̀nzẅìŋ sie à ka gẅiin á kwòŋo Alam ńgʉa. 19Ńgʉa na Lambaŋ, mbà á la gwaa gwɔ́, mbà à gʉ̌a, lékwóon menoŋ na menjʉ̀njÿò mé. Lǎshÿɛ̂ zẅɛ́ʼ púʼu, ńjʉ metútú mie é laa messé Lambaŋ. 20Yakwɔ̂b la fʉte Lambaŋ, nyìŋ Alam, ńgwaa gʉa, ńdÿoon yé, tà à te yé shwóŋ. 21Ńgwaa kÿo púʼu, ńdɔgɔ kɔ̀ɔkɔ́ɔ gie á laa yé ńgʉa. Ńtúmo máa mí Efalad, ńdɔg ye lekwɛ́ Ngalad.

22Mbɔ́ɔntè lyɛ̌ʼ tá gwɔ́, mé shwóŋo Lambaŋ ngie Yakwɔ̂b ka kÿo. 23Lambaŋ pâ mefɛ̌ pé, cʉ́me nzèm Yakwɔ̂b, ńnɔ́ɔn yé nɔ́ɔn melyɛʼɛ́ láʼ sɔɔnmbʉ́a, tà ńkẅɛ́te yé tsɛ̀ɛ lekwɛ́ Ngalad. 24Táʼ, letsẅɛ́ʼ gÿo ńgwɔ́, e Ssé lɔg njÿòon, ńtsẅi né Lambaŋ nyìŋ Alam ngie: «Te gɔɔn tsɔ̌ nò, á yembòŋo kà yetepòŋ wɔ́ɔ né Yakwɔ̂b.» 25Lambaŋ la gwaa nɔ́ɔn Yakwɔ̂b tà tsɛ́ɛ yé púʼu, mbà Yakwɔ̂b jwǒŋ ntàb ye tsɛ̀ɛ pàga láʼa lekwɛ́ Ngalad. Lambaŋ pâ pʉ̀a pé, jwóŋ mɔ́b yɔ́b jʉʼó. 26Lambaŋ leen ńké ńzɛ́te Yakwɔ̂b ngie: «Yɔɔn ée yɛ̌ ntí nò gie ɔ̀ ka gÿo páʼɔɔn? Ɔ̀ ka fʉte wɔ́ɔn. Ńdɔg penkʉ́ pɔ́ɔn pepanzwě, ńgʉa páʼ megàŋatsǎŋ ncù la! 27Ńtí kɔ́, ɔ̀ shú shǔ ńkÿo? Tsye ɔ̀ ka fʉʉ wɔ́ɔn ka? Ɔ̀ kaa péʼe éshwóŋo wɔ́ɔn, mbà n ka nyé gù, ɔ̀ gʉa, ńgwaa gʉa, ńgÿo mé zɔb mentse, ḿbúʼu làmbì, ḿbúʼu kèkÿɛ̀, ńdɔg ńtsege gú tsɛ̀ɛ lekág. 28Ɔ̀ ka zɔɔn fó te nyé wɔ́ɔn, e faŋte gubé yɔ́ɔn yembàŋa, lâ yepanzwě kʉ́kʉ́b mèŋ, lélɔg ńdeʼe wɔ́b wɔ́. Ɔ̀ ka kwaʼ ńgÿo fʉ̀ʼɔɔn páʼ tesaŋánò. 29N gẅiin metʉ̀ lélɔg ńgÿo nò tepòŋ na gù. Táʼ, e Ssé tá gẅi ka gɔɔn né mèŋ, á letsẅɛ́ʼ ngie: Te gɔɔn tsɔ́ nò, á yembòŋo kà yetepòŋ wɔ́ɔ né Yakwɔ̂b. 30Oon! Ɔ̀ ka gʉa ntemetemé, ńtí nue ɔ̀ ka séen ne ńtsɔ́ɔn légyá mbʉ̀a gi tɛʼ, mélàʼakɔ́, ɔ̀ ka piŋ ńgwaa gʉa, ńjʉ messé mɔ́ɔn?» 31Yakwɔ̂b tsɔ́ʼɔ mbwó Lambaŋ ngie: «N ka ne ḿbɔ́gɔ ngie ngwɔ́ ɔ̀ kẅé mezwě pɔ́ɔn pie ée penkʉ́ pú.» 32Táʼ, pɔ̀gɔ tyě páʼɔɔn mvfò mefɛ̌ pɔ́gɔ̀. Líe mmó gie áa jú, ńkaa ńdɔg ńgʉa. Ɔ̀ lɔɔn ńgyá messé mú, á mbwó tsɔ̌ nyìŋ wɔ̀ɔn, mbà ngàŋ te tsẅɛ́ wɔ́. Yakwɔ̂b la gwaa gɔɔn púʼu, à te ne ńzsé ngie Lǎshÿɛ̂ ka jʉ messé wɔ́.

33Lambaŋ kúu tsɛ̀ɛ ntàb Yakwɔ̂b, ńkúu tsɛ̀ɛ ntàb Léyà, ḿbiŋ ńkúu tsɛ̀ɛ ntàb megàŋafàʼ pé pepanzwě pépʉ́a, à te tsɔ́ mmó gyá. Éfó tsɛ̀ɛ ntàb Léyà ńkẅɛ ńkúu tsɛ̀ɛ ye Lǎshÿɛ̂. 34Á gwaa gwɔ́, mbà Lǎshÿɛ̂ zɔ ka jʉ metútú mie é laa messé Lambaŋ. Ńnéŋe tsɛ̀ɛ ngùb gie mé lɔgɔ ńzye nkàʼ mekamɛɛ tá ńnéŋe mǒ. Ńzába ssé, ésẅɛ́ʼ ńnéŋe mǒ. Lambaŋ pú ḿmwoon ntàb Lǎshÿɛ̂ jʉʼ ntsèm, à te gyá. 35Lǎshÿɛ̂ gɔɔn né tá we ngie: «Pɔ́ɔn légyáŋa lóŋ na páʼ ɔ̀ kǔu ndá, n te lu ssé wɔ́, me ndè wɔ̀ɔn. N kaa kuʼu lélu ssé wɔ́, ńtí páʼ n ne ńgyá saŋ wɔ̀ɔn.»

Lambaŋ la pú faʼ metútú mie ée messé mé, à te gyá. 36Yakwɔ̂b pú ńgyáŋa lóŋ, ńdaʼa Lambaŋ, ńzɛ́te yé ngie: «Ammó gie e fʉ̌a mbwó gù, áa kɔ́? Anò tepòŋ gie e fʉʼʉ́ na gù, á gwɔ́ pɔ́ yɛ̌, tà ɔ̀ pú ńnɔ́ɔn wɔ́ɔn na yɔɔn ntí? 37Tà ɔ̀ pǔ ńtaʼ shúm sɔ́ɔn ntsèm pɛ́ʼɛ̀, ńgyá kɔ́ gie áa jú? Nyɛɛ yɛ̌ mmó jʉʼɔɔn, á mvfò pʉ̀a pɔ́gɔ̀, pɔ́ gyá, éshwóŋo wɔ́gɔ̀ nyìŋ gẅie à fʉ̌a nò tsetsɛ̀ɛ pɔ̀gɔ mépʉ́a. 38N ka tsẅé mbʉ̀a gù ngùʼ móm mbʉ́a, atsɔ̌ tàʼ na mvfó jú, tà mbɔɔ na menjʉ̀njÿò mú te láʼa lyɛ̌ʼ ńtsege múɔ wɔ́. N te láʼa lyɛ̌ʼ ésɔbɔ tsɔ̌ na mekùkwòon mú ńdɔ́ɔn ḿpfɛ́ wɔ́. 39N ke laa lɔgɔ pfó nɔ̀ɔn gẅie menɔ̀ɔn mbàʼ gwǎ ńdɔg ńtó, ńná né gù wɔ́. Mèŋ zɔ kɔ̌ɔn ńtoŋo mɛ̌ mepyé. Á kɔ́ɔn ńgwɔ́ gie mé lɔɔn ńjʉʉ wɔ́ɔn, á zsǒ kà pɔ́ tsẅɛ́ʼ wɔ́ɔ, ɔ̀ kʉ́a tà mèŋ n toŋ. 40N kɔ̌ɔn ńkwé nèm zsǒ, ńkwé fÿág tsẅɛ́ʼ, tà n těen ńkuʼu lélyé wɔ́. 41N da zẅíŋ, ńtsẅé mbʉ̀a gù ngùʼ móm mbʉ́a: ngùʼ ntsɔ̀b lekùɔ lé legém, mèŋ faʼa mbwó gù lélɔg ńzɔ́ʼ gubé jú yepanzwě yépʉ́a, ngùʼ ntɔgɔ́ gwɔ́ lélɔg ńgẅiin yɔ́ɔn nùɔ menjʉ̀njÿò lâ mvfó. Mbɔɔ púʼu, ɔ̀ piŋ ńkúbe pèen yɔ́ɔn ngʉ̀a legém. 42E Ssé tá wɔ̀ɔn, é Ssé Ábalaham, é gie Ésàg#31:42 Lezíŋ mekùʼ mie mé náa mbwó Ssé; etsɔ́ ntí lekyàgte Metá Ésàg. pɔ̌g, e laa péʼe, e te né mèŋ wɔ́, mbà ɔ̀ kɔ̌ɔn ge nyé wɔ́ɔn, m biŋ mbwó mesẅɛ̀ɛ. E Ssé ka gyá ngɔ́ʼ yɔ̀ɔn, ńgyá ntí gie n kɔ̌ɔn ńdɔgɔ faʼa, tà á kaa letsẅɛ́ʼ jǔɔ, ngwò yɔ̀ɔn saʼa.» 43Lambaŋ tsɔ́ʼɔ mbwó Yakwɔ̂b ngie: «Mezwě pú pɛ̂ mépʉ́a, ée penkʉ́ pɔ́ɔn, epenkʉ́ pɔ́b é gwɔ́ penkʉ́ pɔ́ɔn. Anùɔ menɔ̀ɔn yɛ̂ gwɔ́ yɔ́ɔn. Tà mbɔɔ kɔ̀ɔkɔ́ɔ gie ɔ̀ gyá lɛ̂, á gwɔ́ pɔ́ yɔ́ɔn. Egubé yɔ́ɔn yɛ̂ lyɛ̌ʼɔɔn, ńgẅiin penkʉ́, ngwɔ́ n gíŋe ńgÿo lêkɔ́? 44Afʉ̀ʼɔɔn la, tóo pɔ̀gɔ gwa kʉ̀a. Akʉ̀a ŋwɛ́, ge gwɔ́ jÿòngyá tsetsɛ̀ɛ pɔ̀gɔ.»

45Yakwɔ̂b kaa tóon, ḿbʉʼʉ ńtÿɔ́g tÿɔ́g, 46ńgɔɔn né mefɛ̌ pé ngie pɔ́ lagte metǒon. Pɔ́ lagte metǒon, ńcúʼte tàʼa jʉʼ, ńnéŋe ndùm wó, ḿpfɛ́ɛ mmó. 47Lambaŋ tsẅi lezíŋ jʉʼó lê, Yengâ-Sahanduta. Yakwɔ̂b tsẅi yé lezíŋ jʉʼó ŋwɛ́ lê Ngalɛd. 48Lambaŋ gɔɔn ngie: «Tà fó lyɛ̌ʼɔɔn, atsẅɛʼɛ́ metǒon yɔɔn, áa jÿòngyá tsetsɛ̀ɛ pɔ̀gɔ.» Áa mmó gie á la gÿo, mé tóŋo jʉʼó lê Ngalɛd «ńdɔgɔ ńgɔɔn ngie: tsẅɛʼɛ́ jÿòngyá.» 49Mé la gíŋe ńtóŋo jʉʼó lê Misepa «ńdɔgɔ ńgɔɔn ngie jʉʼʉ náŋ.» Ńtí páʼ Lambaŋ la gɔɔn ngie: «Á ne ńzɛ́te ngie, pɔ̀gɔ lɔɔn ńgwɔ́ tà fege, Cʉ̀apʉ̀a gwɔ́ ngàŋanáŋ tsetsɛ̀ɛ pɔ̀gɔ. 50Ɔ̀ lɔɔn ńná gubé yɔ́ɔn ngɔ́ʼ, kà ńzɔ́ʼ pɔ́ tsɔ́ panzwě, ńkẅiʼi na pɔ́b wɔ́ɔ, ɔ̀ zsé ngie tsɔ̌ nyìŋ mesoŋ te ne ńtsaʼa wɔ́gɔ̀ wɔ́. E Ssé yé máŋwɛ́ zɔɔ tsetsɛ̀ɛ pɔ̀gɔ, ńgwɔ́ njÿòngyá.»

51Lambaŋ gɔɔn né Yakwɔ̂b ngie: «Líe tsẅɛʼɛ́ metǒon gie n cuʼté tsetsɛ̀ɛ pɔ̀gɔ lɔɔn. Líe tóon gẅie m bʉʼʉ́ ńtÿɔ́g tÿɔ́g lɔɔn. 52Atsẅɛʼɛ́ metǒon pɔ́ tóon gẅie m bʉʼʉ́ ńtÿɔ́g tÿɔ́g lɔɔn, ée pajÿóngyá ngie n těen ńdáʼa ńzyɛ́ʼɛ tsẅɛʼɛ́ metǒon yɔ́ɔn, ḿpfó gú shÿó né nkwaŋá tepòŋ wɔ́. Ɔ̀ piŋ ńké le zyɛ́ʼ jú, ńtó né wɔ́ɔn shÿó#31:52 né nkwaŋá tepòŋ: tsɔ́ pʉ̀a kyagte yɔ́b ngie mbà à ge kaa ndòon. né kwaŋá we tepòŋ wɔ́. 53Á ne ńzɛ́te ngie Ssé Ábalaham, e Ssé Nahɔɔ, e gwɔ́ nzàʼntsaŋ tsetsɛ̀ɛ pɔ̀gɔ.»

Yakwɔ̂b lɔg lezíŋ Ssé gie tá we Ésàg kɔ̌ɔn ḿbɔ́gɔ, ńkʉa. 54Yakwɔ̂b nuŋe pwɔʼ á lekwɛ́, ńtóŋ mefɛ̌ pé, pɔ́ tó, pâ pɔ̌ pfɛ́ɛ mmó. Pɔ́ la pfɛ́ɛ mmó púʼu, ńdáʼa jʉʼó.

Currently Selected:

Nzyeté 31: nnh

Highlight

Copy

Compare