Nzyeté 22

Ábalaham tyě páʼ à ge lɔgɔ Ésàg é nuŋe pwɔʼ

1Á tǎa ńgwɔ́ tsɔ́ fʉ̀ʼ, e Ssé lʉŋte Ábalaham, ńtóŋo Ábalaham, á tsɔ́ʼ ngie: «Oon, wɔ́ɔn wɔɔn!» 2E Ssé gɔɔn ngie: «Lɔgɔ míŋ gù Ésàg, á míŋ gù wémɔʼɔ́ gẅie ɔ̀ kwoŋo yé tɛʼ, ńgʉa né ngwòŋ Moliya. Ɔ̀ ge kúu wó, é gʉa ndùm tsɔ́ lekwɔʼɔ́ sie n ge tó tá laʼte gú, é lɔgɔ yé é nuŋe pwɔʼ ntuɔtuɔ.» 3Ábalaham gÿo ḿmʉ́ mbaʼámbaʼ, éshʉ́a nkẅíŋ gẅie à ge lɔg nuŋe pwɔʼ ntuɔtuɔ, ńdɔgɔ mmó ńzye nkàʼ nzikáasè ye, pɔ́ míŋ we Ésàg pâ ngàŋafàʼ yé yépʉ́a, é cʉ́me mánzsè légʉa né jʉʼ gie Ssé ka laʼte yé. 4Ńgiŋ giŋ tà é gwɔ́ lyɛ̌ʼ sétá, Ábalaham tyé tsɔ́ jʉʼ, ḿmaʼa lejÿɔ́g tàa ngʉ̀a shʉ̀shʉ̀a, ńgyá jʉʼó. 5Ńgɔɔn né ngàŋafàʼ yé ngie: «Pi lâ nzikáasè zẅíʼte jʉʼɔɔn, peg míŋ wɔ̀ɔn gʉa ndùm lekwɛ́ sɛ̂, ńguʼte Ssé, tá ḿbiŋ nzèm ńtsɛ́ɛ gẅí.» 6Ábalaham gɔɔn púʼu, ńkaa nkẅíŋ gẅie à ge lɔg nuŋe pwɔʼ ntuɔtuɔ, ńzába twó míŋ we Ésàg. Kwàʼ yé pí mmɔ̌g pɔ́ pùʼ ńgẅiin. Pɔ́ míŋ we pú ńgʉa mépʉ́a. 7Pɔ́ la né ńgee púʼu, Ésàg zɛ́te tá we Ábalaham ngie: «Tá wɔ̀ɔn!» Á tsɔ́ʼ ngie: «Oon, n ne ńjúʼu mbà míŋ wɔ̀ɔn!» Ésàg zɛ́te ngie: «Pɔ̀gɔ gẅiin mmɔ̌g pɔ́ nkẅíŋ, nɔ̀ɔn gẅie ɔ̀ ge lɔg nuŋe pwɔʼ ntuɔtuɔ, à gwɔ̌ pɔ́ nzɔ̌?» 8Ábalaham tsɔ́ʼ ngie: «Míŋ wɔ̀ɔn, e Ssé yé máŋwɛ́ ge náa nɔ̀ɔn gẅie n ge lɔg nuŋe pwɔʼ ntuɔtuɔ!»

Ńgɔɔn púʼu, pɔ́ yé mépʉ́a teme kwò ńké ńgiŋ pɔ́ páʼ pɔ́ kɔʼɔ́ ne ńgiŋe. 9Pɔ́ la gʉa tà ńkúu jʉʼ gie Ssé la laʼte mbwó Ábalaham, Ábalaham nyɛte jʉʼʉ lenuŋé pwɔʼ ńzáb nkẅíŋ ndumó. Ńdeen ńké ńkwɛ́ɛ kwàʼ míŋ we Ésàg, ńkaa yé ńzába ndùm nkẅíŋ. 10É náa pwó ḿbíi pùʼ, lélɔg shʉ́ʉ lóŋ míŋ we Ésàg. 11Táʼ, cÿɔ́ʼ Cʉ̀apʉ̀a fó lefaŋ ńtóŋo Ábalaham ngie: «Ábalaham, Ábalaham!» Ábalaham tsɔ́ʼ ngie: «Wɔ́ɔn wɔɔn!» 12Cÿɔ́ʼ Cʉ̀apʉ̀a gɔɔn ngie: «Te zába pwó na múɔ, te gÿo tsɔ́ nò tepòŋ na yé. N zsě fʉ̀ʼɔɔn ngie ɔ̀ pɔ́g Ssé tà ɔ̀ kaa lʉʼʉ wɔ́ɔn míŋ gù, á míŋ gù wémɔʼɔ́ wɔ́.» 13Ábalaham pʉʼʉ twó yé, ńgyá kùkwòon gie mendóŋ mé ně ńgÿo á léʼe tsɛ̀ɛ tsẅɛʼɛ́ legǐ menzóŋ. Ńdeen ńké ńgʉa ńgwoon, ńdɔg ńnuŋe pwɔʼ ntuɔtuɔ, ńdɔg ńkúbe twó míŋ we ŋwɛ́. 14Ábalaham tsẅi lezíŋ yɛ̌ jʉʼ ŋwɛ́ lê: «Andonaye-jʉre» (ńdɔgɔ ńgɔɔn ngie: Cʉ̀apʉ̀a ge ná). Áa mmó gie á gÿo, mé ée lyɛ̌ʼɔɔn ńgɔɔn ngie: Mé ge kúu lekwɛ́ Cʉ̀apʉ̀a, à ná.

15Cÿɔ́ʼ Cʉ̀apʉ̀a fó lefaŋ, ńgíŋe ńtóŋo Ábalaham na mbɔ́ɔntè yépʉ́a, 16ńgɔɔn né yé ngie: «Ammó gie Cʉ̀apʉ̀a tsẅǐ tà ńkʉa, ayɔɔn: Páʼ ɔ̀ gÿǒ mmó gie mèŋ n tsẅǐi, tà ɔ̀ te lʉʼʉ míŋ gù, á míŋ gù wémɔʼɔ́, á mbwó mèŋ gẅie n gee Ssé wɔ́ la, 17n ge cÿɔʼɔ gú, é gÿo ngẅɛ̀ jù shʉ́a, ńgyɔ́ɔn páʼ mecÿɔ́ʼsaŋ lefaŋ, mbɔɔ páʼ sàŋasáŋa gie áa ngʉ̀ŋe ntse máŋʉ́. Engẅɛ̀ jù ge láʼ jÿó metÿǒsoŋ megàŋmbù pɔ́b. 18N ge láʼ fó na ngẅɛ̀ jù, é néŋ mbʉ́lè na mengwòŋ ntsèm ndùmo ssé tsetsáʼ. Ńtí nue ɔ̀ jǔʼ ncwò wɔ́ɔn.» 19Ábalaham piŋ nzèm, ńtsɛ́ ngàŋafàʼ yé, pâ pɔ̌ leen ńké ḿbú ḿbiŋ nzèm né Mbɛɛshÿeba, ńtí nue Ábalaham lɔ̌ɔn ńtsẅé wó.

20Mɔɔn menò la tɔ́g, mé shwóŋo Ábalaham ngie: Mileka pɔ́ fɛ̌ gù Nahɔɔ la zyé yɔ́b púɔ mbàŋa. 21Wɔɔn laa Ud múɔ letwó we, wɔɔn gwɔ́ fɛ̌ we Mbúuzè, wɔɔn gwɔ́ Kemuɛ tá pa Alam, 22wɔɔn gwɔ́ Kesɛd, wɔɔn gwɔ́ Azɔɔ, wɔɔn gwɔ́ Pindáshÿè, wɔɔn gwɔ́ Yindelab, ńgÿo Mbetuwɛ. 23Mbetuwɛ la gÿo ńzyé yé Lɛpékà. Pɔɔn lɔgɔ ńgwɔ́ púɔ mbàŋa lefɔ̌ɔn pie Mileka pɔ́ Nahɔɔ fɛ̌ Ábalaham la zyé. 24Nahɔɔ la gíŋe ńgẅiin tsɔ̌ manzwě, á gwɔ́ mágàb we; lezíŋ sé gwɔ́ lê Leguma. À la gíŋe ńgẅiin yé penkʉ́: wɔ́ɔn laa Tébà, wɔɔn gwɔ́ Ngaham, wɔɔn gwɔ́ Taháshÿè ńgÿo Maaka.

Currently Selected:

Nzyeté 22: nnh

Highlight

Copy

Compare