Nzyeté 23
23
Sǎlà kwě, Ábalaham júu jʉʼ gie mé ge túŋo yé wó
1Sǎlà la tsẅé ndùm njÿó ngùʼ ntsɔ̀b sɔɔnmbʉ́a lé móm mbʉ́a nzèm nkÿo. 2Sǎlà la kwé á Embeloŋ gẅie mé lɔ́ɔn ńgíŋe ńtóŋo lê Kiliyad-Alemba á tsɛ̀ɛ ngwòŋ Kánàhan. Ábalaham lúŋ legwé nzwě we, ńdʉa. 3Ábalaham leen ńké fó jʉʼ gie apfó nzwě we áa wó, ésẅɛʼte nnɛ́, ńgɔɔn né pʉ̀a Hɛ́d ngie: 4«N tsẅé láʼ pi, ńgwɔ́ kÿoláʼ, pi náa wɔ́ɔn jʉʼ, n túŋo nzwě wɔ̀ɔn wó, tà á le gíŋe ńnuŋe pɛ́ʼɛ̀ wɔ́.» 5Epʉ̀a Hɛ́d gɔɔn né Ábalaham ngie: 6«Shúshu mè ndè, zẅíʼte nò yɔɔn! Ɔɔ tsetsɛ̀ɛ peg ńgwɔ́ múɔ ntɔ́ʼ Ssé. Túŋo pfó nzwě gù tsɛ̀ɛ lesyè sie ée na mesyè még, ḿbú ḿboŋ. À lɔɔn ngwɔ́ tsɔ̌ nyìŋ weg, á le tɔʼɔ gú létúŋo pfó nzwě gù tsɛ̀ɛ lesyè sé wɔ́.»
7Ábalaham lu ssé tsetsɛ̀ɛ pʉ̀a Hɛ́d, ńŋwɔ́ʼ nnɛ́ mvfò pɔ́b tà zǐ yé kíbe ssé, 8ńgɔɔn né pɔ́b ngie: «Shúshu, á lɔɔn ńgwɔ́ gie pi kwǎʼ ńzẅíŋ ngie n túŋo pfó nzwě wɔ̀ɔn jʉʼɔɔn, tà ń de gíŋ ńgyá páʼ á nuŋe lejÿɔ́g mèŋ wɔ́, pi júʼu nò yɔɔn, pi sẅíŋte Efeloŋ, míŋ Tsowa né mèŋ, 9ngie à ná mvwɔ̀ʼ yé gie ée lesẅé nkáʼ yé Mágpèla né mèŋ. Ngie à ná né mèŋ á mvfò pi, ḿbiŋ shwóŋo wɔ́ɔn kwàʼ nzẅìŋ nkáb gẅie n ge náa mǒ, n ná né yé, à cʉ́ʼʉ yɔ́ɔn jʉʼʉ ntùŋ mepfó.» 10Ńgwaa gɔɔn púʼu, Efeloŋ nyìŋ Hɛ́d néŋe tsetsɛ̀ɛ mefɛ̌ pé pʉ̀a Hɛ́d, Efeloŋ ŋwɛ́ tsɔ́ʼɔ mbwó Ábalaham, á mvfò pʉ̀a Hɛ́d ńgÿo pʉ̀a pie é la né fóo ncú tÿǒsoŋ yé ńkúu, ńgɔɔn ngie: 11«Ngǎŋ me cʉ̀apʉ̀a, júʼu! N tyě mvfò pʉ̀a pɔ́ɔn, ńná nkáʼ, ḿbiŋ ńná mvwɔ̀ʼ gie ée jʉʼó, á mbwó gù, túŋo pfó nzwě gù wó.»
12Ábalaham ŋwɔ́ʼ nnɛ́ mvfò pʉ̀a pe wɔɔn ngwòŋ tà zǐ yé kíbe ssé. 13Ńgɔɔn mbwó Efeloŋ tà láʼ pú ne ńjúʼu ngie: «Shúshu vɔg ńjúʼu yɔɔn. N ge jú nkáʼ, zẅíŋ púʼu, ńzsé ngie n túŋo pfó nzwě wɔ̀ɔn wó.» 14Táʼ, Efeloŋ tsɔ́ʼ né Ábalaham ngie: 15«Júʼu me ndè, atsetsáʼ gie ngwɔ́ á gwɔ́ mepàg nkáb nkÿo lekùɔ, áa páʼɔɔn ńkuʼu kɔ́ mbwó pɔ̀gɔ? Túŋo pfó nzwě ɔ̀ wó.»
16Ábalaham pɔ́ Efeloŋ lʉʼte tà ńgwɔ́ tàʼ ncwò. Ábalaham la sáŋ nkáb, ńnáa mbwó Efeloŋ, é gwɔ́ pàg nkÿo lekùɔ, é nzẅìŋ gẅie à gɔ̌ɔn tà pʉ̀a Hɛ́d júʼ la; é gwɔ́ ntí nkáb gie e laa ndùm metʉ̌a fʉʼó, mé lɔgɔ ńtáŋa sɔ̌ɔn. 17Éfó púʼu, enkáʼ Efeloŋ gẅie ée Mágpèla á shÿó Mamlé, é nkáʼ pɔ́ mvwɔ̀ʼ, ńgÿo metÿǒ mie é pú ńgwɔ́ nkáʼ, 18é cʉ́ʼ shúm Ábalaham, epʉ̀a Hɛ́d ńgÿo pʉ̀a pie é la né fóo ncú tÿǒsoŋ yé ńkúu, gwɔ́ pajÿòngyá.
19Á cʉa púʼu, Ábalaham túŋo nzwě we Sǎlà tsɛ̀ɛ mvwɔ̀ʼ gie ée nkáʼ Mágpèla, á ngʉ̀ŋe Mamlé gẅie mé tóŋ lê Embeloŋ á Kánàhan. 20Enkáʼ pɔ́ mvwɔ̀ʼ gie e laa jʉʼó, é leen fó na mbwó pʉ̀a Hɛ́d, ńcʉ́ʼʉ jʉʼ gie Ábalaham ge láʼa cʉ́ʼʉ túŋo pʉ̀a pé wó.
Currently Selected:
Nzyeté 23: nnh
Highlight
Copy
Compare
Share
Want to have your highlights saved across all your devices? Sign up or sign in
© 2026, CABTAL
