Nzyeté 19

Mé tagá Sondɔm, Lɔ̂d tsɔgɔ

1Ncwònzém la ne ńgwɔ́, memántúm pa mépʉ́a kúu Sondɔm. Á gwaa gwɔ́, Lɔ̂d néŋe ncú tÿǒsoŋ Sondɔm. À la leen ńgyá wɔ́b, ńdu ssé ńgʉa ńzáʼa wɔ́b, ńŋwɔ́ʼ nnɛ́ mvfò pɔ́b tà zǐ yé kíbe ssé. 2Ńdeen ńké ńgɔɔn ngie: «Shúshu me Ndè, mé tó ńnáʼa ńcʉa ndá mèŋ, ngàŋafàʼ gẅi mbà loo! Ńzsé ngie pi sɔ̌g mekwò, ńdáʼ, njÿó lʉ́a tá pi gíŋe ńcʉ́me mánzsè.» Pɔ́ tsɔ́ʼ ngie: «Ngǎŋ! Peg ge láʼ pɔ́ pǐ.» 3Lɔ̂d pú sẅíŋte wɔ́b, tà pɔ́ sele nnɛ́, ńgʉa né mbʉ̀a yé. Á shÿéenshÿěen ńcwoŋte shúm léjÿó, ḿbiŋ ńkáŋ mekèle té mvòŋ, ńná né pɔ́b, pɔ́ pfɛ́.

4Pɔ́ la nyé pɔ́ te nuŋe páʼ pɔ́ gee ndyě, epʉ̀a Sondɔm, léfó ngwàshùm ńkú mezẅìŋe pʉ̀a, epú ńcúʼte té vʉʼʉ nyìŋ, ḿbú ńkéle ndá. 5Ńtóŋo Lɔ̂d, ńzɛ́te yé ngie: «Epʉ̀a pie é kǔu mbʉ̀a gù ncwònzém wɔɔn, pɔ́ gwɔ́? Náa wɔ́b pǐ né peg, peg zeŋe mbùm yeg na pɔ́b!»

6Lɔ̂d gwaa kẅɛ, é tsɛ́ɛ wɔ́b pǐ, ńjÿɔ́ʼ ncwò ndá. 7Ńgɔɔn né pɔ́b ngie: «Ngǎŋ! Mefɛ̌ pɔ́ɔn, shúshu, tà pi fʉʼ yɛ̌ ntí nò! 8N gẅiin púɔngùɔ mépʉ́a pie é nyé pɔ́ te zsě mámbàŋa. N ge lɔgɔ wɔ́b tó, é ná né pi. Pi gÿo mmó gie pi kwoŋ na pɔ́b. Tá ńké ńgʉa na mbàŋa yɔɔn, ḿbɔ́ɔn gẅí légÿo lagá mmó na pɔ́b. Mélàʼmie pɔ́ zyɛ̌ʼ tà ńkúu ndá mèŋ.» 9Pɔ́ gɔɔn né yé ngie: «Tsíŋte nnɛ́ jʉʼɛ, à lɔɔn ngwɔ́ akÿoláʼ páʼ gù, á le shwóŋo wég páʼ peg ge gÿo, á láʼ peg wɔ́. Peg ge gÿo nò tepòŋ na gù, tà à cʉa gie peg ge gÿo na pɔ́b.» Ńgÿo púʼu, ńdɔg tʉ̀ ḿbeʼe Lɔ̂d, tà á cʉ́ʼ páʼ pɔ́ ge pwɔ́ʼ ncwò ndá. 10Mbàŋa ya yépʉ́a leen ńnáa pwó, éshwoŋo Lɔ̂d ńnáa ndá, ńgíŋe ńjÿɔ́ʼ ncwò ndá. 11Ńgʉa na pʉ̀a pie é laa ncwò ndá, léfó penkʉ́ ńkú melÿò, pɔ́ gÿo pɔ́ pú fʉ. Tà lagá nyìŋ na pɔ́b té gíŋe ńzsé jʉʼ gie ncwò ndá, ée wó wɔ́.

12Pamántúm pá pépʉ́a zɛ́te Lɔ̂d ngie: «Ngwɔ́ tsɔ̌ nyìŋ gù gíŋe ńgwɔ́ tÿǒsoŋ yɔɔn? N gɔɔn metákẅìʼ pú, é pʉ̀a pú pembàŋa, é pepanzwě, kà tsɔ̌ nyìŋ gẅie à tswéʼe na tsìŋendá jú wɔ́ɔ. Pɔ́ lɔɔn ńgwɔ́ wó, ɔ̀ lɔgɔ wɔ́b fó tÿǒsoŋ yɔɔn, ńkẅɛ. 13Mélàʼmie peg ge pyága tÿǒsoŋ yɔɔn. Menò tepòŋ mie é cʉaté wó, é gyɔ̌ɔn mvfò Cʉ̀apʉ̀a tà à tumó wég ngie peg tó ḿbyága tÿǒsoŋ.» 14Lɔ̂d gʉa ńgyá metákẅìʼ pé, é pie é lɔ́ɔn ńgee ńzɔ́ʼ gubé yé, ńgɔɔn né pɔ́b ngie: «Pi lwo fó jʉʼɔɔn ńgʉa; ńtí páʼ Cʉ̀apʉ̀a né ńgee ḿbyága tÿǒsoŋ.» Táʼ, pɔ́ kwaŋ ngie ndyɛ̀ʼ é gwɔ́ pɔ́ megʉa.

15Ejʉʼ la gwaa fɔ́g, memántúm pa tsóte Lɔ̂d ngie: «Lɔgɔ nzwě gù né púɔngùɔ pú mépʉ́a, ńgʉa. Tà á té púʼu wɔ́, mbà pi ge pú lége fʉ̀ʼ gie e Ssé ge néŋ ngʉ̀ngʉ̀ na yɔɔn tÿǒsoŋ, ńtí mefʉ̌ʼ menò pʉ̀a pé.» 16Táʼ, Lɔ̂d ne ḿmʉ́ʼte mʉʼté. Á cʉa púʼu, mbàŋa ya tɔ́ɔn pwó yé, ńtɔ́ɔn ye nzwě we, tà mbɔɔ ye penkʉ́ pé pepanzwě pépʉ́a, ńdɔgɔ wɔ́b fó tÿǒsoŋ ńkẅɛ. Ńtí nue Cʉ̀apʉ̀a la ne ńkwoŋo légÿo pɔ́ tsẅɛ́ yɔɔn ngʉ̀ngʉ̀.

17Pɔ́ la gÿo tà pa Lɔ̂d fó tÿǒsoŋ ńkẅɛ púʼu, atsɔ̌ tàʼ na mbàŋa ya gɔɔn ngie: «Zoŋo twó jú, ɔ̀ lɔɔn te kÿo, mbà ɔ̀ ge kwé, gʉa té líe nzèm. Te láte tsɔ́ jʉʼ tsɛ̀ɛ yɔɔn pàga ngwòŋ. Gʉa ńdyeen tsɛ̀ɛ lekwɛ́. Páʼ ɔ̀ lɔɔn ne ńtsɔ́ɔn létsẅɛ́.» 18Lɔ̂d tsɔ́ʼ né pɔ́b ngie: «Ngǎŋ! E sẅíŋte gú sẅiŋté me Cʉ̀apʉ̀a! 19E sẅíŋte gù, mèŋ ngàŋafàʼ ɔ̀, ɔɔ ngàŋa pòŋontʉ́m, ɔ̀ nyɛ̌ɛ pyennɛ́ jú yelÿò nzèm mèŋ, ńgÿo n tsẅɛ́ɛ legwé. Táʼ, ngwɔ́ ń de kÿo ńgʉa ńdyeen tsɛ̀ɛ lekwɛ́ té gwɔ́ gie anò tepòŋ lǎ wɔ́ɔn tà mèŋ kwé wɔ́. 20Shúshu! Gyá tÿǒsoŋ yɔɔn, á kɔ́g, ngʉ̀a piŋ ḿvɔ́g, tà ngwɔ́ n dyeen wó. Tsetsɔ́ʼ, á lɔɔn ńgwɔ́ gie ngwɔ́ n tsẅɛ́, ɔ̀ nyé wɔ́ɔn n gʉa né tsɛ̀ɛ múɔ métÿǒsoŋ ŋwɛ́, ńtsẅɛ́ɛ legwé.» 21Púʼu la, á tsɔ́ʼ ngie: «N tsɔ̌ɔn mezìŋe mú, n zẅǐŋ. N te tága tÿǒsoŋ gie ɔ̀ gɔɔn lɛ̂ wɔ́. 22Kÿo ńgʉa né wó. Ɔ̀ lɔɔn ńnyé te kǔu wó, mbà tsɔ́ mmó gie n ge gÿo, á té wó wɔ́.» Áa mmó gie á la gÿo mé tóŋo yɛ̌ tÿǒsoŋ lê Tsowa.

23Lɔ̂d la gwaa gʉa tà kúu Tsowa, nèm ne sáʼa. 24Á cʉa púʼu, Cʉ̀apʉ̀a fó tÿǒ ésẅíʼi mekʉ̀a pɔ́ mmɔ̌g páʼ mbʉ̀ŋ la, á na tÿǒsoŋ Sondɔm pɔ́ ye Ngomɔɔ. 25À la pú ńtág mɔɔn metÿǒsoŋ, ńtága pàga láʼ, ḿbiŋ ḿbú ḿbyág patsẅé tsɛ̀ɛ mɔɔn metÿǒsoŋ, tà mbɔɔ shúm sẅisẅê sie é sáʼa ndùmo ssé tsetsáʼ. 26Pa Lɔ̂d la ne fóo tÿǒsoŋ ńkẅɛɛ, anzwě we líe nzèm, ńgwóon sele ńcʉ́ʼʉ tútú ngwáŋ.

27Ábalaham gÿo ḿmʉ́ʉ tsɛ̀ɛ mbaʼámbaʼ, ńgʉa né jʉʼ gie pɔ́ Cʉ̀apʉ̀a ka shwóŋo wó. 28Ńdíe shÿó Sondɔm pɔ́ Ngomɔɔ tà mbɔɔ pàga láʼ ntsèm, ńdeen ńgyá páʼ ndyé fóo ssé ńkwɔ́ʼɔ páʼ ndyé gẅie éfóo tsɛ̀ɛ máamáa letẅì mmɔ̌g la.

29E Ssé la gwaa tág metÿǒsoŋ mie ée tsɛ̀ɛ yɔɔn pàga láʼ gie Lɔ̂d lɔ̌ɔn ńtsẅé wó, ńkímte Ábalaham, ḿvɔg fó wó ḿbeʼe Lɔ̂d tá ńtág.

Lɔ̂d pâ gubé yé yepanzwě

30Lɔ̂d pâ gubé yé yepanzwě yépʉ́a la fó Tsowa ńgʉa ńtsẅé tsɛ̀ɛ mvwɔ̀ʼ á lekwɛ́, ńtí nue à la ne ḿbɔ́gɔ létsẅé Tsowa. 31Á gÿo ńgwɔ́ tsɔ́ lyɛ̌ʼ, múɔ welÿò gɔɔn né ncʉ̀ʼnzèm we ngie: «Tá wɔ̀gɔ zẅǐŋ, mbàŋa piŋ te tsɛ̀ɛ wɔɔn ngwòŋ tà ngwɔ́ pɔ́ zɔ́ʼɔ wɔ́gɔ̀ páʼ tsẅé láʼ zɛ́te wɔ́. 32Tóo pɔ̀gɔ ná melùʼ né tá wɔ̀gɔ; ńzsé ngie à nǔ tà ḿbím, ńnuŋe wɔ́gɔ̀, tá ńdɔg ńzyéen ngẅɛ̀ gie e ge fó na yé.»

33Ńgÿo púʼu, ncwònzém gwɔ́, pɔ́ gÿo tá wɔ́b nú melùʼ tà ḿbím, awe lÿò gʉa, pɔ́ yé nuŋe. Melùʼ gÿo tà Lɔ̂d pú te zsé fʉ̀ʼ gie múɔ welÿò nuŋé lejʉ́ŋ yé wɔ́, ńké te zsé fʉ̀ʼ gie à lǔ ssé wɔ́. 34Njÿó lʉ́a, mvfò múɔ gɔɔn né nzèm ngie: «Peg tá wɔ̀ɔn ka nuŋe letsẅɛ́ʼ, pɔ̀gɔ gíŋe ńgÿo, à nú melùʼ ncwònzém wɔɔn, ɔ̀ gʉa pi yé nuŋe, tá ńdɔg ńzyéen ngẅɛ̀ tá wɔ̀gɔ.» 35Ńgÿo púʼu, ncwònzém gwɔ́, pɔ́ gíŋe ńgÿo tá wɔ́b nú melùʼ, awe kʉ́ gʉa, pɔ́ yé nuŋe. Melùʼ gÿo tà Lɔ̂d pú te zsé fʉ̀ʼ gie múɔ wenkʉ́ nuŋé lejʉ́ŋ yé wɔ́, ńké te zsé fʉ̀ʼ gie à lǔ ssé wɔ́.

36Wɔɔn aa páʼ á la cʉate púʼu, tá Lɔ̂d néŋ penkʉ́ lepfòm gubé yé yepanzwě yépʉ́a. 37Múɔ welÿò la gÿo ńzyé múɔ mbàŋa, ńtsẅi lezíŋ sé lê Mowab#19:37 Áa na shwóŋè Ébɛ̀ lezíŋ Mowab gɔɔn ntí legɔ̀ɔn gie e lɔgɔ ngie fó na tá fó na tá Epʉ̀a Mowab lá néŋe tsɛ̀ɛ pàga láʼ gie á laa shÿó sǎʼnèm ye pfó máŋʉ́., aa yé gẅie aa mángʉanjʉʼ pʉ̀a Mowab tà ńkú lyɛ̌ʼɔɔn. 38Ncʉ̀ʼnzèm wé la gÿo ńzyé yé tàʼ múɔ mbàŋa, ńtsẅi lezíŋ sé lê Mbɛŋ-Ami, áa yé gẅie aa mángʉanjʉʼ pʉ̀a Amoŋ#19:38 Áa na shwóŋè Ébɛ̀ lezíŋ Mbɛŋ-Ami ngwɔ́ é lɔgɔ ńgɔɔn ngie míŋ tá wɔɔn Epʉ̀a Amoŋ lá néŋe na tsɔ́ gwóŋ tsɛ̀ɛ pàga láʼ gie á laa shÿó sǎʼnèm Juundʉŋ, á saŋa na yetsɔ̌ nzìŋ ntse Juundʉŋ. tà ńkú lyɛ̌ʼɔɔn.

Currently Selected:

Nzyeté 19: nnh

Highlight

Copy

Compare