Nzyeté 18
18
Cʉ̀apʉ̀a pÿě ngie Sǎlà ge gÿo zyé tàʼ múɔ mbàŋa
1Á gÿo ńgwɔ́ tsɔ́ lyɛ̌ʼ, á ntʉ̀ zsǒ tà jʉʼ ne ńdumo tɛʼ, á tsìŋe tsɔ́ memǎa metÿǒ mie mé tóŋ lê shÿɛ̂n we Mamlé, Ábalaham néŋe ncwò ntàb yé. Cʉ̀apʉ̀a kẅɛɛ mvfò yé. 2Ábalaham leen ńdíe, ńgyá mbàŋa yétá tyé mvfò yé, ńgyá wɔ́b púʼu, éfó ncwò ntàb yé, ńnɔ́ɔnte wɔ́b, ńŋwɔ́ʼ nnɛ́ mvfò pɔ́b tà zǐ yé kíbe ssé, 3ńgɔɔn ngie: «Cʉ̀apʉ̀a, á lɔɔn ńgwɔ́ gie ɔ̀ gyǎ, tà n gwɔ́ nyìŋ gẅie ńgwɔ́, ɔ̀ gÿo nò mbòŋo na mèŋ, shúshu, ɔ̀ pɔ́ɔn lécʉa té kúu ndá mèŋ, mèŋ ngàŋafàʼ gù. 4Mé ge lɔgɔ méjʉʼʉ ntse tó, pi lɔg sɔg mekwò mí, ḿbiŋ ńzẅɛte tsìŋe tÿǒ yɔɔn. 5Páʼ pi cʉ̌a mbʉ̀a mèŋ ngàŋafàʼ gẅi la, n ge gʉa faʼa mmó léjÿó, e lɔg tó pi lɔg ńtsẅága zẅɛ gí, tá ńgíŋe ńcʉ́me mánzsè.» Pɔ́ tsɔ́ʼ ngie: «Oon! Gÿo páʼ ɔ̀ gɔ̌ɔn lɛ̂.» 6Ábalaham gwóon ḿbiŋe tsɛ̀ɛ ntàb, ńgɔɔn né Sǎlà ngie: «Lwo ńdɔg fʉ̀ʼ lÿò, éfʉʼʉ pfɔbɔ́ ngesáŋ ntsíŋ ngʉ̀a ntá, ńtábte ńdɔg ńkáŋ mekèle.» 7Ábalaham gɔɔn púʼu, ńdeen ńgʉa jʉʼʉ menɔ̀ɔn, ńgwoon zyága fòŋ, gie áa mbòŋ, ńnáa mbwó tsɔ̌ ngàŋafàʼ we, á lwo ńdɔ́ɔn.
8Mé la lɔ́ɔn mbab zyága fòŋ ŋwɛ́ tà sẅíʼi, Ábalaham kaa ńtÿɔ́gɔ mvfò megʉ̀ pé, ńgíŋe ńtÿɔ́gɔ mélêg gẅie mé ka fóon pɔ́ gẅie mé nyé tà ńkyéen. Pɔ́ gwaa pfɛ́, Ábalaham tyé lejʉ́ŋ pɔ́b tsìŋe tÿǒ. 9Pɔ́ leen ńzɛ́te Ábalaham ngie: «Anzwě ɔ̀ Sǎlà aa nzɔ̌.» Á tsɔ́ʼ ngie: «Aa tsɛ̀ɛ ntàb.» 10Atsɔ̌ tàʼ na megʉ̀ gɔɔn ngie: «N ge gÿo tóo mbʉ̀a gù fʉ̀ʼ páʼɔɔn á ntyě fʉ̀ʼɔɔn páʼɔɔn. É gwaa tó púʼu, mbà nzwě ɔ̀ Sǎlà zyě tàʼ múɔ mbàŋa.» Ńne ńgɔɔn, Sǎlà tyé ncwò ntàb gẅie é laa nzèm Ábalaham ńjúʼ. 11Á laa púʼu, mbà Ábalaham pɔ́ Sǎlà pǔ ńzẅiŋ tɛʼ, tà Sǎlà te gíŋe ne ńgyá saŋ we wɔ́. 12Sǎlà júʼ, ńgẅe megɔ̀ʼ yé, ńgɔɔn ngie: «Afʉ̀ʼɔɔn gie m bǔ ńzẅiŋ, ngwɔ́ n gíŋe ńcwóŋo nzèmɔɔn lá! Ńzɔɔn ńgwaa gwɔ́, mbà ngàŋ mbʉ̀a wɔ̀ɔn gǐŋ ńzẅiŋ yé.» 13Cʉ̀apʉ̀a zɛ́te Ábalaham ngie: «Ńtí kɔ́ Sǎlà gẅe? Ńtí kɔ́ á sele ńzɛ́te twó mbùm yé ngie: “Tà à lɔɔn ńgwɔ́ n kwaʼ ńgíŋe ńzyé múɔ lá? Á wɔ́ɔn gẅie n zẅǐŋ nzẅìŋ wɔɔn lɔɔn?” 14Atsɔ́ mmó áa páʼa ńgwɔ́ wó gie ngwɔ́ á cʉa Ssé ka? N ge láʼ gwaa tóo mbʉ̀a gù fʉ̀ʼ páʼɔɔn ntyě fʉ̀ʼɔɔn, mbà Sǎlà zyě tàʼ múɔ mbàŋa.» 15Sǎlà lɔg cÿɔʼ, ńcÿɔ nò, ńgɔɔn ngie: «N kaa gẅe.» Táʼ, Cʉ̀apʉ̀a gɔɔn ngie: «Áa nénʉ́, ɔ̀ gẅě!»
16Mbàŋa ya lu ssé légʉa, ésele nnɛ́, ńdíe shÿó Sondɔm. Ábalaham cʉ́me nzèm pɔ́b, létsege wɔ́b, 17Cʉ̀apʉ̀a gɔɔn ngie: «N te lÿoon Ábalaham mmó gie n gee ńgÿǒ wɔ́. 18À ge gÿo gwɔ́ mángʉanjʉʼ máa ngwòŋ gẅie é tʉte. Mèŋ m biŋ fó na yé, ńnéŋ mbʉ́lè na mengwòŋ ntsèm mie ée ndùmo ssé tsetsáʼ. 19N tsɔʼɔ́ yé ngie à tsẅii mbwó penkʉ́ pé, mbɔɔ mbwó ngẅɛ̀ ye ntsèm gie e ge táa tá gwɔ́ wó ngie pɔ́ kúʼte membʉ̌ mɔ́ɔn, mèŋ Cʉ̀apʉ̀a, ńgiŋ páʼ á ne ńzɛ́te, ḿbiŋ ńgwɔ́ ndʉŋndʉŋ. À cʉa púʼu, mèŋ Cʉ̀apʉ̀a, n gÿo mmó gie n da kaʼ ńtí Ábalaham» 20Cʉ̀apʉ̀a leen ńké ńgɔɔn mbwó Ábalaham ngie: «Menò tepòŋ mie mé ne ńgɔɔn ngie pʉ̀a Sondɔm pâ pʉ̀a Ngomɔɔ ne éfʉʼʉ, é cʉ̌a, efʉ̌ʼ menò mɔ́b, é gyɔ̌ɔn tɛʼ. 21N ge sẅɛ́ʼɛ wó, é gyá kà menò mie mé laʼa wɔ́b mvfò mèŋ ńtí mɛ̌ lɔɔn, ée nénʉ́ wɔ́ɔ. Á lɔɔn ńtó á té púʼu wɔ́, mbà mèŋ n ge zsé.»
22Epʉ̀a mépʉ́a na mbàŋa ya yétá, é la fó jʉʼó, ńgee Sondɔm. Táʼ, Ábalaham ké ńgíŋe ńtyé pɔ́ mvfò Cʉ̀apʉ̀a. 23Ábalaham sẅɛʼte nnɛ́ né lejʉ́ŋ yé, ńzɛ́te yé ngie: «Ɔ̀ ge kwaʼ pú pyága ngàŋa nò nénʉ́ pɔ́ ngàŋa fʉ̌ʼnò lá? 24Ngwɔ́ tsɔ́, megàŋa nò nénʉ́ gwɔ́ tsɛ̀ɛ tÿǒsoŋ tà ńkuʼ móm tʉ̂a: mbà ɔ̀ ge kwaʼ pyág lá? Ngwɔ́ ɔ́ le lɔg pɔɔn pʉ̀a móm tʉ̂a ńtsɔ́ɔn mezìŋe mɔ́b jʉʼó wɔ́ lá? 25Ngǎŋ! Ngwɔ́ gù zɔ̌ le gÿo pɛ́ʼɛ̀ wɔ́. Ngwɔ́ mé le gyá, ɔ̀ zẅé ngàŋa nò nénʉ́ pɔ́ ngàŋa fʉ̌ʼnò, tà ngàŋa nò nénʉ́ kwé njǔ ngàŋa fʉ̌ʼnò wɔ́. Antsɔ̀ʼte mentsaŋ ndùmo ssé tsetsáʼ ntsèm, à té gẅiin pɔ́ lézáʼ ntsaŋ ndʉŋndʉŋ páʼ á ne ńzɛ́te wɔ́ le?» 26Cʉ̀apʉ̀a tsɔ́ʼ ngie: «N dɔɔn ńgyá megàŋa nò nénʉ́ wó tà ńkuʼ pʉ̀a móm tʉ̂a, mbà n ge lege mefʉa pʉ̀a metsèm tsɛ̀ɛ tÿǒsoŋ ńtí wɔ́b.»
27Ábalaham gíŋe ńgɔɔn ngie: «Shúshu, mèŋ gẅie n gwɔ̌ pɔ́ tsetsáʼ, ńgwɔ́ pfó, zẅíŋe, e shÿɔg ńzɛ́te Cʉ̀apʉ̀a wɔ̀ɔn yɔɔn. 28Mé lɔɔn ńkúu wó, megàŋa nò nénʉ́ cʉ́ʼʉ légwɔ́ móm tʉ̂a, ńgwɔ́ pɔ́ ntsɔ̀b tʉ̂a lé móm lekùɔ, mbà méntʉ̂a gẅie à zagá mǒ, à ge gÿo, ɔ̀ pú ḿbyága tÿǒsoŋ keen?» Cʉ̀apʉ̀a tsɔ́ʼ ngie: «N dɔɔn ńgyá pʉ̀a ntsɔ̀b tʉ̂a lé móm lekùɔ wó, mbà mèŋ n te pyága tÿǒsoŋ wɔ́.»
29Ábalaham gíŋe ńzɛ́te yé ngie: «Ngwɔ́ tsɔ́ mé tóo wó, ńgyá pɔ́ pʉ̀a móm lekùɔ.» Cʉ̀apʉ̀a tsɔ́ʼ ngie: «N dɔɔn ńgyá ngàŋa nò nénʉ́ wó tà é kuʼ pʉ̀a móm lekùɔ, n tsẅé jʉʼ, ńtí wɔ́b.»
30Ábalaham gíŋe ńgɔɔn ngie: «Tsetsɔ́ʼ me Cʉ̀apʉ̀a, n dɔɔn ńgíŋe ńgɔɔn nò né gù te gyáŋa lóŋ. Páʼ ngwɔ́ mé tóo wó ńgyá pɔ́ pʉ̀a móm tá.» Cʉ̀apʉ̀a tsɔ́ʼ ngie: «É lɔɔn ńgwɔ́ pʉ̀a móm tá wó, mbà mèŋ n te gíŋe gÿo tsɔ́ mmó wɔ́.»
31Ábalaham gɔɔn ngie: «Tà mèŋ n gíŋe shÿɔg ńzɛ́te gú me Cʉ̀apʉ̀a: Páʼ ngwɔ́ mé ńgyá pʉ̀a móm mbʉ́a wó.» Cʉ̀apʉ̀a tsɔ́ʼ ngie: «Mé lɔɔn ńgyá pʉ̀a móm mbʉ́a wó, ń de pyága tÿǒsoŋ wɔ́, ńtí wɔ́b.»
32Ábalaham gɔɔn ngie: «Cʉ̀apʉ̀a, shúshu, te gyáŋa lóŋ. N ge gɔɔn yɔɔn ń de gíŋe ńgɔɔn tsɔ́ wɔ́. Páʼ ngwɔ́ mé tóo wó ńgyá pɔ́ pʉ̀a legém.» Cʉ̀apʉ̀a tsɔ́ʼ ngie: «Mé lɔɔn ńgyá pʉ̀a legém wó, ń de pyága tÿǒsoŋ wɔ́, ńtí wɔ́b.»
33Cʉ̀apʉ̀a la gɔɔn nò mbwó Ábalaham tà ńtsẅé jʉʼ, ńgʉa, Ábalaham piŋ yé né mbʉ̀a yé.
Currently Selected:
Nzyeté 18: nnh
Highlight
Copy
Compare
Share
Want to have your highlights saved across all your devices? Sign up or sign in
© 2026, CABTAL
