Nzyeté 20

Ábalaham pɔ́ Abimelɛg

1É cʉa tsɔ́ ntyě fʉ̀ʼ, Ábalaham fó Mamlé ńgʉa ńtsẅé Nengɛb; á tsetsɛ̀ɛ Kandɛ́shÿè pɔ́ Shûu. Ḿbiŋ fó wó ńkÿo ńgʉa ńnáʼa ńtsẅé Ngelaa. 2Ábalaham lɔ̌ɔn shwóŋo pʉ̀a Ngelaa ngie nzwě we Sǎlà, aa fɛ̌ we. Abimelɛg fùɔ Ngelaa gÿo ńtúm, mé saʼa Sǎlà. 3Táʼ, á gÿo ńgwɔ́ letsẅɛ́ʼ, e Ssé tóo tsɛ̀ɛ njÿòon, ńgɔɔn né Abimelɛg ngie: «Ɔ̀ ge kwé, ńtí manzwě gẅie ɔ̀ ka saʼ. Aa nzwě nyìŋ.» 4Abimelɛg gẅie pɔ́ Sǎlà ka nyé pɔ́ te zséte, tsɔ́ʼ ngie: «Cʉ̀apʉ̀a, peg lâ pʉ̀a láʼ yɔ́ɔn gwɔ́ pɔ́ membǔʼ. Ɔ̀ ge kwàʼ ké zẅé wég zẅě lá? 5Kwàʼ yé Ábalaham né twó mbùm yé zɔ ka gɔɔn né mèŋ ngie Sǎlà aa fɛ̌ we! Ńgɔɔn púʼu, Sǎlà, yé máŋwɛ́ ńgɔɔn yé ngie Ábalaham aa fɛ̌ we! N ka gwaa gÿo púʼu, n gẅiin pɔ́ nkwaŋá mbòŋo. Ḿbiŋ ńké te fʉa tsɔ́ nò wɔ́.»

6E Ssé tsɔ́ʼ né yé ngie: «N ne ńzsé mboŋó, ɔ̀ ka gwaa gÿo, ńgẅiin ntʉ́m mbòŋo. Mèŋ zɔ ka piŋ ńgíŋe ńtáte gú léfʉa nò mbwó mèŋ. Áa mmó gie á ka gÿo, n te zẅíŋ ngie ɔ̀ kíbe yé wɔ́. 7Afʉ̀ʼɔɔn la, tsɔ́ʼɔ nzwě we ńná, aa ntsẅìnkʉ̀ Ssé; à ge gÿo sẅíŋte Ssé twó gù, tá ɔ̀ tsẅɛ́. Táʼ, ɔ̀ lɔɔn te tsɔ́ʼɔ nzwě we, ńná wɔ́, mbà ɔ̀ ge kwé, tà mbɔɔ pʉ̀a pú ntsèm.»

8Abimelɛg lu ssé lèmeléme, ńtóŋ pʉ̀a pé, ḿbú ḿbíte mɔɔn menò, éshwóŋo wɔ́b, ecÿɔʼ pú ńgwoon wɔ́b. 9Abimelɛg gÿo púʼu, ńtóŋo Ábalaham ńzɛ́te yé ngie: «Yɔɔn ée yɛ̌ ntí nò gie ɔ̀ tɔ̌ɔn na peg? N ka fʉa kɔ́ mbwó gù, tà ɔ̀ tɔ́ɔn yɔɔn ntí nò na mèŋ, ńgÿo máa nò tepòŋ kúu wég lâ láʼ yɔɔn páʼɔɔn? Ɔ̀ ka tɔ́ɔn menò mie mé ée těen ńtɔ́ɔn na nyìŋ mesoŋ wɔ́ na mèŋ.» 10Abimelɛg gíŋe ńzɛ́te Ábalaham ngie: «Yɛ̌ ntí nkwaŋá ka tóo twó gù tá ɔ̀ fʉʼ yɔɔn ntí nò?» 11Ábalaham tsɔ́ʼ ngie: «N ka kwaŋ yɔ́ɔn pɔ́ ngie epʉ̀a té pɔ́g Ssé láʼ yɔɔn wɔ́, ngie ngwɔ́ mé zẅé wɔ́ɔn ńtí nzwě wɔ̀ɔn. 12Á zɔɔn ńgwaa gwɔ́, á gwɔ́ pɔ́ fɛ̌ wɔ̀ɔn, peg yé gẅiin tàʼ tá, ńké te teme má wɔ́. Áa mmó gie á la gÿo, tá peg yé zɔ́ʼ. 13Á laa fʉ̀ʼ gie Ssé la gÿo n gwáʼ lesaʼá ség ngʉ̀a shʉ̀shʉ̀a, ńgwá ḿbúu, n gɔɔn né Sǎlà ngie: “Pɔ̀gɔ lɔɔn ńkúu nzɔ̌ jʉʼ wɔ́ɔ, ɔ̀ shwóŋ pʉ̀a pɔ́ ngie n gee fɛ̌ gù.”»

14Á cʉa púʼu, Abimelɛg líe menjʉ̀njÿò, ńdíe mvfó, ńdíe mefòŋ, ńdíe menkwɔɔn pembàŋa mbɔɔ pepanzwě ńná né Ábalaham, ḿbiŋ ńtsɔ́ʼɔ nzwě we Sǎlà ńná né yé, 15ńgɔɔn né Ábalaham ngie: «Ngwòŋ wɔ́ɔn wɔɔn, ńké ńtyé tyé. Líe jú jʉʼ gie á poŋó gú, ńgʉa ńnéŋe wó.» 16Ńgʉa na Sǎlà, Abimelɛg gɔɔn né yé ngie: «N ge ná mepàg nkáb tàʼ ntsáʼ né fɛ̌ gù. É ge gwɔ́ páʼ nkùa á menÿɔ́g pʉ̀a pie pi lâ pɔ̌ gwɔ̌, pɔ́ lɔg fó mǒ ńzsé ngie ɔ̀ kaa fʉa tsɔ́ nò wɔ́, à cʉa púʼu, ɔ̀ le pyé mekùʼ mú wɔ́#20:16 Áa tsɛ̀ɛ ŋwàʼne Ébɛ̀ wɔɔn nkàŋ gwaa cʉ́me, é té kẅɛ tà ńkẅɛ wɔ́, áa mmó gie á gÿo lekyàgte te zeŋe..» 17Ábalaham la sẅíŋte Ssé, e Ssé gÿo Abimelɛg pɔ́ nzwě we, ńgÿo ngàŋafàʼ yé yepanzwě, é sẅéte, tà ńkuʼu légíŋe ńzyéte gubé. 18Ńtí nue á la gwaa gwɔ́, mbà Cʉ̀apʉ̀a ka fó na nò Sǎlà, nzwě Ábalaham, ńgÿo Abimelɛg pɔ́ nzwě we, tà mbɔɔ menkwɔɔn pé pepanzwě, é cʉ́ʼ menkǐŋ.

Currently Selected:

Nzyeté 20: nnh

Highlight

Copy

Compare