Ichedendik 38
38
Juda ọmaana Tamar
1Wa ny'ogbe nwo, Juda obin orik ivọkka pẹ ofona, od-oninga ọmaana ojinọng wanẹ kw'okpen Hira, kw'ofon Adulam. 2K'ose kw'opyirẹ za o, okebha ominanwa wanẹ kw'oKenaannọng kw'okpen Shua, ọtọk-ẹ k'ọbada. Minna kw'oyim ọmaan-ẹ, 3otima ibhọr ọmaan ojinọngnwa kw'makpẹ-ẹ Ẹr.
4Obira otima ibhọr ọmaan ojinọngnwa, ọkpẹ-ẹ Ọnan. 5Okwu ọmaan ojinọngnwa kw'ottong attaan, ọkpẹ-ẹ Shẹla. Wa ọmaan-ẹ ch'otim oning z'Kezib.
6Wa Juda ọtọk kwanọng kw'okpen Tamar, ọnang Ẹr kw'ode ochedennwa kwẹ k'ọbada. 7Okenaka, Ẹr kw'ode ochedennwa kw'Juda wa osi ẹyaaka k'ititika s'Ọvaar Ibinọkpaabyi. Ofona nya, Ọvaar Ibinọkpaabyi ọtọka akpen pẹ.
8Nya o, Juda oben Ọnan bẹ́, “Zọhng yima maana kwanọng kw'agbaanakka, k'ose kw'ẹmmaana chamina ede, ofha ọmaan iva ọnang agbaanakka kwọ.” 9Okenaka, ch'Ọnan ozong bẹ́, iva mbo m'iva pẹ màde, kẹ od-obyenga adima z'izek, k'ogbe kpenamkpen kw'oyim ọmaana kwanọng kw'ọgbaanọkka, mfha oning iva obhonọ ọnang ọgbaanọkka. 10Ọttọhk mvo f'osi nya, opyibhẹ mawuriji z'Ọvaar Ibinọkpaabyi k'ititika. Ofona nya, Ọvaar Ibinọkpaabyi obira ọtọka akpen pẹ.
11Juda okwu oben Tamar kw'ode kwanọng kw'nnwa kwẹ bẹ́, “Kpa nnam z'atte k'ọsọhm mach'opokwa, aninga za atik maa, Shẹla kw'ode ojinọngnwa kwaam ọbar.” Ọgbaak odik nwo okurọ ch'ojor-ẹ bẹ́, Shẹla m'obira ope mach'ivọkka pẹ mad-ape. Ofona nya o, Tamar obina od-oruk z'otte k'ọsọhm.
12Ogbe obhirẹ nya o, kwanọng kw'Juda kw'ode nnwa kw'Shua, ope. K'ogbe kw'Juda kk'kwanọng kwẹ obhoma maa, ọsẹ-ẹ z'ettem, otima Hira kw'ode oyok-odikkobh kw'ofon Adulam, ochina z'Timna, za ch'mad-aphyirẹ arọkimaan pẹ iphyabha.
13Magbaak Tamar bẹ́, “Otte kw'odim ochin z'Timna bẹ́, od-ophyirẹ arọkimaan pẹ iphyabha e.” 14Tamar ọwọra abarabina p'ọfọr, otima ọbaranwa obubha ititika, pira od-oninga ẹwọr nya ch'mad-azenga adim ny'obhon kw'mayerẹ Ẹnayim, kw'oning ny'eden ch'nd-azenga achina z'Timna. Osi minna okurọ ch'oze bẹ́, Shẹla kk'ọbara opyirẹ k'edimba, okenaka, nkacher bẹ́, matọk-ẹ anang-ẹ k'ọbada.
15Juda ọzẹ-ẹ nya, ọsẹ-ẹ bẹ́, ọzaza wọ, okurọ ch'obubh ititika sẹ.
16Okebh-ẹ nya adenkonga, oben-ẹ bẹ́, “Kwu nyima mmaan-ọ.” Kẹ kozong bẹ́, kwanọng kw'nnwa kwẹ wọ. Kwanọng nwo ọbọbh-ẹ bẹ́, “Manang-m mbọng, óde nyim mmaan-ọ?”
17Kẹ ọpọhn-ẹ bẹ́, “Kaam m'nrọhbha ovunwa wanẹ ny'avu paam, ntọhm nnang-ọ.” Kwanọng nwo ọpọhn-ẹ bẹ́, “Ina abhik-m ọttọhk vanẹ, pira atọhm ovunwa nwo achen-m?”
18Juda ọbọbh-ẹ bẹ́, “Bọng-ọttọhk vọ f'm'mbhik-ọ?” Tamar ọpọhn-ẹ bẹ́, “Ẹbaanga ch'ẹnọhna ch'etim ebhora chọ, ọttara ochikwura kw'atim ny'ọbọhk.” Juda ọtọka pyẹ maphyir ọnang-ẹ, oyima ọmaan-ẹ, ọkẹ-ẹ ibhọr.
19K'ogbe kw'Tamar obin ofona, ọd-ọwọra ọbaranwa nwo, ọfọra abarabina pẹ.
20Juda okwu ọtọhm Hira kw'ode oyok-odikkobh kwẹ kw'ofon Adulam bẹ́, ochena kwanọng nwo ovunwa nwo, ọfha ọtọka ekpo py'obhik-ẹ ochen-ẹ. Okenaka, kwanọng nwo koze. 21Ọbọbh ajinọng p'arukọ nya bẹ́, “Ọzazakwanọng nwo kw'od-oninga m'adenkonga p'Ẹnayim kẹ o?”
Mapọhn-ẹ bẹ́, “Ọzazakwanọng kpenamkpen ma otima od-oninga e.”
22Minna kw'ọkpa nnam od-otek Juda bẹ́, “Kaam kẹ kinze. Ajinọng p'arukọ nya ater atek-m bẹ́, ọzazakwanọng kpenamkpen nya otima od-oninga.”
23Juda o, oben bẹ́, “Ttẹ-ẹ ọbọhk otima ekpo mbyo, kinnorọ bẹ́, anọng amma mina asa. Mba kk'aza bẹ́, kk'ọ ovunwa nnanga bẹ́, achen-ẹ, okenaka, kẹ kaze.”
24Opyirẹ ọttọhk k'aphe attaan nya o, matek Juda bẹ́, “Tamar kw'ode kwanọng kw'nnwa kwọ nod-osi ẹzazamaana. Madidaanma, kk'ibhọr otima.”
Juda oben bẹ́, “Màtim-ẹ yin k'iyaan, mfha makwọm-ẹ maa, ope!”
25K'ose kw'mad-atim-ẹ ayinẹ k'iyaan o, ọtọhm ẹkkaabha ọnang otte kw'odim bẹ́, “Ojinọng kw'oyen ekpo mbya wọ oke-m ibhọr e. Kkerẹ, ode im'akpo atin ọnọng kw'oyen ẹbaanga nda ch'ẹnọhna, ọmaana ọttọhk f'ẹdọngọ f'otim ebhora, ọttara ochikwura nwa.”
26Juda okwu otin ekpo mbyo, oben bẹ́, “Kẹ wọ otorọ ọtam ọyọhnga kaam, ch'ina kẹ ntọk nnang nnwa kwaam Shẹla k'ọbada.” Juda o, ọdọk kẹ ábẹ̀ koyim.
27Okwu opyirẹ k'ogbe kw'im'ọmaan, maze bẹ́, ajinọngva afa bọ aning-ẹ z'ẹbhọr. 28Nya ch'imin'ọmaan, ọbọhk kw'oyok wanẹ oyin k'iyaan, okker-ọmaan otima edik-kora ọkpẹ-ẹ ny'ẹbọhkdọngọ, oben bẹ́, “Nwoma wọ ochi eden oyin.” 29Okenaka, nnwa nwo ọtọr ọbọhk kwẹ odim z'ẹtaanga, ọgbaanọkka ochi eden oyin. Okker-ọmaan nwo oben bẹ́, “Minna kw'azeng ayin o!” Ofona nya, makpẹ-ẹ Pẹrẹz#38.29 Pẹrẹz oyinẹ bẹ́, ose kw'ozeng oyin.. 30Ogbe kobhirẹ, ọgbaanọkka obira oyin ttara edik-kora ny'ọbọhk, makpẹ-ẹ Zẹra#38.30 Zẹra oyinẹ bẹ́, okorọ ọnna-ọnna..
Currently Selected:
Ichedendik 38: mfn-x-ad
Highlight
Copy
Compare
Share
Want to have your highlights saved across all your devices? Sign up or sign in
©️2025 West Africa Christian Mission
