Ichedendik 39
39
Josẹph ọmaana kwanọng kw'Pọtipha
1Ny'ogbe nwa, anọng p'Ishimayẹl nkk'Josẹph atima achina z'Ijip, makpẹ-ẹ anang oJipnọng kw'okpen Pọtipha, kw'ode osonọng wanẹ kw'Phero, obira ode oso kw'anọng p'ad-akkerẹ Phero.
2Ch'iwa Josẹph orukọ ọmaana atte nwo z'Ijip, Ọvaar Ibinọkpaabyi oning ọmaan-ẹ, osi idik ijibh inang-ẹ. 3Pọtipha oze bẹ́, Ọvaar Ibinọkpaabyi oning ọmaana Josẹph, ọttọhk kpenamkpen f'ọsi ojibh ọnang-ẹ, 4nya o, Josẹph okwu ọdaak-ẹ idik maa, osok-ẹ mach'ọtọhmnọng kwẹ oyenẹ. Pọtipha ọtọka ẹsọhmmọr chẹ, ọttara ọttọhk kpenamkpen f'oyen ọkẹ-ẹ ny'mbọhk bẹ́, okkerẹ. 5Tọma ny'ogbe kw'Pọtipha otte ẹsọhmmọr chẹ ọbọhk ọnang Josẹph, Ọvaar Ibinọkpaabyi ozeng Josẹph ábẹ̀, odo ẹsọhmmọr ch'Pọtipha ọmaana oyena kwẹ maphyir maa, ozeng z'owonọ kwẹ. 6Ofona nya, Pọtipha otte oyena kwẹ ọbọhk maphyir, oke Josẹph k'mbọhk, ettem kọyọhnọ k'ọttohk kpenamkpen, kw'ọkpanẹ ọchattọhk f'im'ochi.
Kẹ Josẹph wa ofu k'ifor bẹ́ gbuk obira ojibh ojinọng. 7Ogbe kobhirẹ, kwanọng kw'otte ọtọm-ẹ adaakẹ-chen okkikkerẹ, oben-ẹ bẹ́, “Kwu yim-m ábẹ̀!”
8Josẹph obhum. Oben-ẹ bẹ́, “Mma e, atte kw'nrukọ ábẹ̀ ọdọk achibhẹ pẹ maphyir-phyir k'ẹsọhmkpo pyẹ koyik. Kk'pyẹ maphyir ọtọka oke-m k'mbọhk bẹ́, nkkerẹ. 9Ọnọng kw'oyen ẹfa ọyọhng-m m'ọsọhm nwa kode. Atte kwaam kaam ọttọhk kpenamkpen m'ọsọhm nwa kọchọn, kw'ọkpanẹ kọ kwanọng kwẹ. Kayen kw'kaam m'nsi itama, ọmaana epyibhase ndo z'ititika s'Ibinọkpaabyi o?” 10Chibhẹ ch'ọyak-ẹ odik k'ewu k'ewu, Josẹph kocher bẹ́, oyima ọmaan-ẹ. Kobir ochera bẹ́, ọnyọm-ẹ k'ifor.
11Ewu danẹ, Josẹph odim z'ọsọhm bẹ́, od-osi ọtọhm fẹ. Ny'ewu ndo, ayok-atọhmnọng pẹ nya kade. 12Kwanọng nwo okwu ọbọka Josẹph ny'ẹbarakpa ch'ọpaabh, oben-ẹ bẹ́, “Kwu yim-m ábẹ̀!” Josẹph ọrọbh oyin z'iyaan, orik ẹbarakpa chẹ ny'mbọhk s'kwanọng nwo.
13K'ogbe kw'kwanọng nwo oze bẹ́, Josẹph kk'ọrọbha orik ẹbarakpa chẹ ny'ikẹ k'mbọhk oyin z'iyaan, 14oyerẹ atọhmnọng pẹ, oben bẹ bẹ́, “Makirẹ oHiburu-nọng nwa e! Matim-ẹ akwu ma bẹ́, olukọ mina e! Kẹ odimẹ okebh-m z'ọsọhm ẹtaanga bẹ́, oyim-m ábẹ̀, okenaka, mbok ẹmọng k'ẹrọng. 15Ọbhaang-m ch'nd-mbok ẹmọng k'ẹrọng nya o, ọrọbh oyin k'iyaan, orik ẹbarakpa chẹ m'kaam k'mbọhk.”
16Kwanọng nwo osok ẹbarakpa ndo maa, otte kw'Josẹph okwuna. 17Ọtọka odik nwo ọgbaak-ẹ bẹ́, “OHiburu-nọng nwoma kw'asokọ m'ọsọhm, ọkamẹ bẹ́, oyim-m ábẹ̀ k'ẹfa. 18Mbok ẹmọng k'ẹrọng nya o, ọrọbh oyin k'iyaan, orik ẹbarakpa chẹ m'kaam k'mbọhk.”
19K'ogbe kw'otte kw'Josẹph ọbhaang odik kw'kwanọng kwẹ ọgbaakẹ nya, ettem epyibh-ẹ mawuriji, ch'kwanọng kwẹ obenẹ bẹ́, “Minna wọ kw'obira kwọ, osi-m e.” 20Ofona nya, ọnang ẹfa bẹ́, make Josẹph mgbakkọhbhọ, masok-ẹ za ch'agbakkọhbhinọng p'ọvaar Phero, aning.
Chibhẹ ch'Josẹph oning ny'mgbakkọhbhọ, 21wa Ọvaar Ibinọkpaabyi, ochin ororo oninga ọmaan-ẹ, osi ọphyaam ọnang-ẹ, obira osi okker-agbakkọhbhinọng oyena ọdaakẹ ọmaan-ẹ. 22Minna kw'okker-agbakkọhbhinọng ọtọk agbakkọhbhinọng maphyir oke Josẹph k'mbọhk, obir ọsẹ-ẹ oso kw'ọttọhk okpenamkpen f'oyinẹ nya. 23Okker-agbakkọhbhinọng nwo ọrọhbha ichen k'idik maphyir s'ining Josẹph k'mbọhk, okurọ ch'Ọvaar Ibinọkpaabyi oning ọmaana Josẹph, obira osi idik ijibh inang-ẹ.
Currently Selected:
Ichedendik 39: mfn-x-ad
Highlight
Copy
Compare
Share
Want to have your highlights saved across all your devices? Sign up or sign in
©️2025 West Africa Christian Mission
