Ichedendik 37
37
Ọdachen f'Josẹph ọttaar
1Wa Jekọb orukọ z'Kenaan, za ch'iwa otte ikk'oruka.
2Ma wọ ode ose kw'ọmaan Jekọb, ọmaana ẹsọhmmọr chẹ.
Ny'ogbe nwo, wa Josẹph ode icho ichikkamfa. Wa kẹ od-otor iva p'Bilha, ọmaana p'Zilpa p'ade ivotte pẹ, mad-akkerẹ etirakpo py'otte. Kẹ wa ọd-ọpọhra ayok ọnang otte.
3Ny'iva p'Jekọb obhonọ maphyir, wa Josẹph wọ ọdaak-ẹ ọtam, okurọ ch'obhon-ẹ k'atam. Ofona nya o, okwum-ẹ ọnọhma kw'osi ase. 4Ch'ivotte mboza maze bẹ́, Josẹph ọdaakẹ otte ọtam, mawun-ẹ maa, m'ọkkọkka kad-agbaak amaan-ẹ.
5K'ogbe wanẹ, Josẹph ọttaara idachen, ọtọka otek ivotte pẹ, osi bẹ matera adẹ-ẹ awun-owuna. 6Josẹph oben bẹ bẹ́, “Màyonga itọhng bhaanga idachen s'ntaar. 7Z'idachen, moning z'owonọ nd-ọdaabh abarli-ke. Minna kw'ẹbarli-ke chaam ebin ebe-obe, pira abarli-ke pabọnga nabira abina abe, makọbha ndo chaam, mabira araka nso anang-ẹ.”
8Ivotte abhaang nya o, mapọhn-ẹ bẹ́, “Nya kọ nachibhẹ bẹ́, kọ m'abaabha mina yirẹ? Ma, mina mmin'oninga izek-izek kwọ yirẹ?” Minna kw'madẹ-ẹ awun-owuna okurọ idachen sẹ, ọmaana idik sẹ.
9Wa Josẹph obira okwu ọttaara idachen ọdọk-ọdọk, otek ivotte bẹ́, “Màyong-m itọhng, mbira nttaara idachen e. Mọkpanda, nttaar ch'ewuchen, ọmaana ophe, ọmaana ndidorọ ijobh kawanẹ id-irak nso inang-m.”
10K'ogbe kw'Josẹph otek otte idachen njo, otte ọkwọhr-ẹ ẹmọng, ọpọhn-ẹ bẹ́, “Bọng-idachense s'attaar ma? Oyinẹ bẹ́, akka, ọmaana kaam, ọttara ivotte, mm'okwu ọraka nso ọnang kọ o?” 11Wa ivotte ayen ottemma amaan-ẹ, okenaka, otte oye odik nwo z'ettem.
Ivotte p'Josẹph makpẹ-ẹ anang aphyanọng p'Ishmayẹl
12K'ogbe wanẹ, ivotte p'Josẹph matima etirakpo py'otte mad-anang bẹ azizaarẹ za ch'ọnyọm Shẹkẹm. 13Israẹl oyerẹ Josẹph oben-ẹ bẹ́, “Kọ azong ma bẹ́, ivotte atim etirakpo ad-anang azizaarẹ za ch'ọnyọm Shẹkẹm. Kwu ntọhm-ọ akebha bẹ za.”
Josẹph ọpọhn-ẹ bẹ́, “Atte, kirẹ kaam ma.”
14Nya o, oben-ẹ bẹ́, “Zọhng baana óde ivotte ọmaana etirakpo maning za k'ọkkọkka, akwu atek-m.” Minna kw'oning ny'ilokodo s'Hẹbrọn ọtọhm-ẹ za.
Ch'Josẹph kk'opyira z'Shẹkẹm, 15ojinọng wanẹ ọzẹ-ẹ nya ch'od-ottena ny'owonọ wanẹ, ọbọbh-ẹ bẹ́, “Ad-aror mbọng?”
16Josẹph ọpọhn-ẹ bẹ́, “Nd-nnor ivotte paam e. Ma, azong ibyi s'maning anang etirakpo azizaarẹ ma yirẹ?”
17Ojinọng nwo ọpọhn-ẹ bẹ́, “Nkk'abina ma e. Wura mmaang ch'mad-aben bẹ́, mm'achina z'Dọtan.”
Nya o, Josẹph okebh ivotte pẹ za ch'ọnyọm Dọtan. 18K'ose kw'mazẹ-ẹ za ch'od-okwu-okwu, pira okwu opyirẹ nya, nkk'attọhna bẹ́, mafhẹ-ẹ.
19Maben ayok bẹ́, “Ọttaar-ọdachen nwo okwuma ka! 20Makwu mọfhẹ-ẹ ọbharẹ k'esipe danẹ ma ch'edung-odung, moben bẹ́, ẹgbaten-tama danẹ dọ ẹbọk-ẹ ẹyaakẹ k'akpa-k'akpa, mfha moze ose kw'ọdachen fẹ im'oyin-ẹ k'eden.”
21Reubẹn ọbhaang nya o, ọkaam-ẹ z'ayok k'mbọhk, oben bẹ bẹ́, “Tte moning-ẹ ofhufhọ ọfhọ. 22Tte ọnọng oning izẹ okibhẹ. Tte motera ọtọk-ẹ ọbharẹ k'esipe danẹ ch'edung-odung m'ibyi s'anọng nna arukọ.” Wa Reubẹn ọd-ọgbaak minna, ọfha ọkkaan-ẹ, ọtọk-ẹ ochena otte.
23Ch'Josẹph opyirẹ nya ch'ivotte maning, mabọk-ẹ awọra ọnọhma-baba ọkkọkka nwo kwẹ, 24pira nnatọk-ẹ abharẹ z'esipe ch'edung-odung. Wa asi ny'epe ndo kade.
25K'ogbe kw'nkk'ẹwọr aninga bẹ́, machi ọttọhk, matinẹ ichen aze ẹkaan ch'aphyanọng p'Ishimayẹl p'abin z'Gilead. Nkk'ẹchattọhk-kpo py'elebhẹ eruk, ọmaana ina s'ifor s'ilebhẹ eruk, adabha k'akamẹl bẹ́, matima azeng z'Ijip.
26Juda oben ivotte pẹ bẹ́, “Ma, bọng-ọttọhk vọ im'ode iru samina óde m'ọfhọ agbaanatte kwamina mobubha odik nwo? 27Tte motera ọkpẹ-ẹ ọnang anọng mba p'Ishimayẹl. Mba kẹ obir ode agbaanatte kwamina, kw'izẹ majanẹ isi mina.” Ivotte machera amaan-ẹ.
28K'ogbe kw'aphyanọng mbo p'Ishimayẹl, p'abir ade anọng p'Midiyan, mmin'akpan, ivotte p'Josẹph marọhbh-ẹ z'esipe ndo, makpẹ-ẹ anang aphyanọng mbo k'ashẹkẹl p'silva ẹrọbh. Aphyanọng mbo matim-ẹ azeng z'Ijip.
29K'ogbe kw'Reubẹn ọkpa nnam ny'epe ndo, ọdọk Josẹph nya koze, ọyaakẹ ekpo py'ọfọr ny'ifor. 30Ofona od-otek ivotte bẹ́, “Nnwa nwo ọdọk za kode. Ma min'nsi yen?”
31Minna kw'mafhọ evu, matọka ọnọhma-baba kw'Josẹph alọhbh ny'ivu-zẹ njo. 32Matima ọnọhma-baba nwo kw'osi ase ad-akọhka otte. Maben otte bẹ́, “Kirẹ ọttọhk f'moze e. Baana, óde ọnọhma kw'nnwa kwọ wọ.”
33Otte otin ọnọhma nwo oben bẹ́, “K'odik ọkkọkka, ọnọhma kw'nnwa kwaam wọ ma! Oyinẹ bẹ́, ẹgbaten-tama danẹ kk'ẹ ẹyaaka k'akpa-k'akpa.”
34Minna kw'Jekọb ọyaakẹ ekpo py'ọfọr z'ifor ọbharẹ, ọfọra akpobina otima obhom nnwa kwẹ k'iwu k'ẹkaan. 35Ajinọngva ọttara panọngva pẹ maphyir makwu afok-ẹ nttem. Oben bẹ bẹ́, “Màtte-m ọbọhk. Kaam m'nchina ororo mbhom nnwa kwaam maa, mpe ntor-ẹ.”
36Anọng mbo p'Midiyan mapyirẹ z'Ijip, makpe Josẹph anang Pọtipha kw'ode osonọng wanẹ kw'Phero, obira ode oso kw'anọng p'ad-akkerẹ Phero.
Currently Selected:
Ichedendik 37: mfn-x-ad
Highlight
Copy
Compare
Share
Want to have your highlights saved across all your devices? Sign up or sign in
©️2025 West Africa Christian Mission
