Yelemiya 50
50
Mbuli ya Zumbe Mulungu kwe mzi wa Babeli
1Inu nee mbuli Zumbe Mulungu alongieyo kuzinkia mteghanyi Yelemia, kwa mbuli ya mzi wa Babeli na shi ya Wakalidayo
2“Biikilai mwe shi zoshe
inuai biamu kuonyesha ntangilo ya kubiikila,
mushefishe kintu chochoshe, mughambe,
mzi wa Babeli neugwiwe,
na Beli mulungu wakwe neaingiwe ni shoni,
mulungu Melodaki neaingiwe ni wogha,
vinyago vyakwe nevigee usei,
na milungu yakwe neiingiwe ni wogha.”
3“Kwa kuti mbali kulawa wazu wa kasikazini izaiza kweutoa mzi wa Babeli na kuieka iyo shi ibanighwe na kuituka ukiwa. Hekuna mweikala umo, wantu na vizama nevighuuke viite hale.”
Kuuya kwa Waizilaeli
4Zumbe Mulungu aghamba ivi, “Mwe iyo mishi na muda uwo, wantu wa Izilaeli na wa Yuda newavungane hang'we kunivika imi Zumbe Mulungu, Mulungu wawe na kuuya kunu waakema. 5Newauze sia ya kuita Sayuni na kuandusha ntambo ya kuuya na uko. Newaghambiane, ‘Soi tiuye kwa Zumbe Mulungu.’ Newaike kilagha na imi cha kale na kale ndicho chishejaighwe.”
6“Wantu wangu wazaituka sa ngoto ziazighwezo ni walishi wawe na kuwaeka wasangadike kwe vitui vya miima, wakajata kulawa kwe kitui king'we mpaka kwe kitui kituhu, wakajaa sia ya kuuya kaya kwawe. 7Wantu woshe wawabuizawo wazawakoma na wankuu wawe wakaghamba, ‘Ishwi hetina masa kwa kuwatoa, kwa kuti wo watemghoshoela uhuza Zumbe Mulungu ndiye akiwainka kia kintu, yohe nee ndiye ai kialilo cha baba zawe.’ ”
8“Ghuukai kulawa Babeli! Lawai mwe shi ya Wakalidayo, vingi muituke sa mbuzi zeongoea weae. 9Kwa kuti, neniwahimbile wantu wa mbali nkulu zekidaha kulawa wazu wa kasikazini waitoe shi ya Babeli. Newakiighanye kuitoa shi ya Babeli na kuighua. Waghojo wawe newaituke watoa maosa wekidaha sa mghojo mwena ntae. 10Shi ya Wakalidayo neighuighwe na awo weighua newaonee.” Ni miyo Zumbe Mulungu nilongiewo.
Kugwa kwa Babeli
11Zumbe Mulungu aghamba ivi, “Inywi wantu wa Babeli mughuiyewo kiiko changu, hata kati mwaatamiwa na kuja nyemi na kuumbia sa ng'ombe yeheta uhemba na kukema sa faashi ya ngoshi, 12miya shi yenyu ya Babeli muvyaiweho neiingiwe ni shoni na kubewa. Babeli neighaluke shi ndodo mwe shi zoshe na neighaluke nyika vingi shi nkazu na ishiikawayo ni wantu. 13Babeli heiikalwe ni mntu kwa mbuli ya maya ya Zumbe Mulungu. Heiikawe ni kintu chochoshe, na kia mwezinka hehi nayo neamake na kuiva wogha kwa ivyo ibanighwevyo.”
14“Inywi nyoshe mwedaha kutoa maosa, kiighanyei kuudenga mzi wa Babeli. Utoei kwa maosa yenyu yoshe, kwa kuti uzanighoshoela uhuza imi Zumbe Mulungu. 15Tuai vuzo ja nkondo kia hantu, wantu wa Babeli newakilavye wenye kunga wagwiwe. Ngome zawe nezigwe na nkando zawe nezigandulwe, kwa kuti imi Zumbe Mulungu neniihiize nkuu. Waghosholeei sa via wo waghosholevyo kwa wantu wa mizi mituhu. 16Mushezaeka wantu wahande mbeyu uko Babeli, wala kueka wantu washume, kwa kuti mnkuu neaize kwewatoa na kia mng'we neaghuuke kuuya na mwe shi yakwe.”
Waizilaeli newauye kaya
17Zumbe Mulungu aghamba ivi, “Izilaeli ni sa fyo ja ngoto ziasakanezo zeghuushwa ni shimba. Wavoka kutoighwa ni zumbe wa Ashulu na iviaha ushe wazatoighwa ni Nebukadineza zumbe wa Babeli. 18Kwa ivyoho, imi Zumbe Mulungu nena nguvu zoshe, Mulungu wa Izilaeli nenimtoe zumbe wa Babeli na shi yakwe sa namtoavyo zumbe wa Ashulu. 19Neniwauze Waizilaeli na mwe shi yawe, wohe newaje nkande zeimighwa kwe kitui cha Kalimeli na Bashani na newaighushwe ni nkande zelawa kwe vitui vya Efulahimu na Gileadi. 20Mwe iyo mishi na muda uwo, wantu newaondeeze ubada mwe shi ya Izilaeli miya hewauwone, wantu newaondeeze uhuza mwe shi ya Yuda, miya heuwoneke, kwa kuti nizawaushiiza uhuza wawe waja wagheke nishighazewo.” Ni miyo Zumbe Mulungu nilongiewo.
Zumbe Mulungu neawalahe wantu wa Babeli
21Zumbe Mulungu aghamba ivi, “Kweai mukaitoe shi ya Melasaimu na waja weikala uko Pekodi, mukawakome vigima wantu wakwe woshe. Ghosholai kia kintu nimiaghiizecho. Ni miyo Zumbe Mulungu nilongiewo. 22Vuzo ja nkondo jizaivikana mwe shi na kuna ubanasi mkulu. 23Shi ya Babeli ndiyo iina nguvu kuzinka shi zoshe, izakinywa na kubondeka! Mbali zosheni mwe shi zitamaka kwa ivyo vilawiiyevyo mwe shi ya Babeli. 24Iwe Babeli naakuikila mtegho ukakugwila, hang'we na kuti nee uishitaile kuti uzagwiwa kwa mbuli ya kuhimana na imi Zumbe Mulungu. 25Nizazughua taa ja mata yangu na kwa maya niyena nayo nizaghua mata yangu, kwa kuti imi Zumbe Mulungu nedaha mbuli zoshe nina ndima ya kughoshola mwe shi ya Wakaldayo. 26Itoei kulawa kia wazu, bondai mataa yakwe ya nkande, umbikai vintu mughuiyevyo sa vizuumu vya mbeyu! Ibanei vigima shi yoshe musheshighaze kintu chochoshe! 27Wakomei waghojo wakwe woshe! Waghuei waghojo wa kibwanga muwaighale machinjoni sa ng'ombe ivyeighawa kwechinjwa! Chawe ndicho! Kwa kuti mshi wawe wa kulahwa uzabula!”
28Wateghelezei wantu wanyiikewo na kughuuka kulawa Babeli, wakibiikila kunu Yelusalemu ivyo Zumbe Mulungu, Mulungu weshu awaihiizevyo nkuu wantu wa Babeli wabaniewo nyumba yakwe.
29“Waitangei watoa Maosa waitoe shi ya Babeli. Ighalai kia mntu mwedaha kutoa uta. Udengei mzi kunga kushezanyiika mntu hata mng'we. Ulihei kuighana na mbuli zakwe, muughoshole sa via ughosholeevyo wantu watuhu, kwa kuti uzamghoshoela utii Zumbe Mulungu yuja mg'azi wa Izilaeli. 30Kwa ivyoho wabwanga wa mzi wa Babeli newakine mwe sia na waghojo wakwe wosheni newakong'we mshi uwo uwo.” Ni miyo Zumbe Mulungu nilongiewo.
31“Imi Zumbe Mulungu, Mulungu nena nguvu zoshe, nitoana na iwe mwena utii kwa kuti mshi wako uzabula, mshi ndiwo nikutoe. 32Mntu mwena utii neakitoe na kukina na hekuna yoyoshe ndiye amuinue, neniashe moto mwe mizi yakwe, ndiwo uwoke kia kintu che hehi naye.”
33Zumbe Mulungu, Mulungu mwena nguvu zoshe aghamba ivi, “Wantu wa Izilaeli na wantu wa Yuda wataoneewa. Wosheni wawagwiziewo waiwatozize kweli, wataemela kite kuwaekea. 34Miya mvunizi wawe nina nguvu, Zumbe Mulungu nena nguvu zoshe nee zina jangu. Neniwavunile vigima kunga niete hemelo mwe shi yawe, miya neniete sungu kwa wantu weikala Babeli.”
35Zumbe Mulungu aghamba ivi,
“Wakalidayo newafe!
Wantu wakwe newafe,
na wagholokezi wakwe hang'we na wena viugho wohe newafe.
36Wateghanyi wakwe wa lufyo newafe
newaituke madashi!
Waghojo wakwe wekidaha newafe,
wohe newabulwe ni wogha!
37Faashi zakwe nezife na magai yakwe ya nkondo neyabanighwe.
Waghojo wakwe wosheni wa kigheni weikala umo
newaituke wanyonge sa wavyele.
Kiiko chakwe choshe nechibanighwe
na kia wachena nacho nechighuighwe.
38Zua nejiake
na mazi yakwe neyahwe.
Kwa kuti Babeli ni shi ya milungu ya vinyago,
na wantu waakunda vinyago vyawe sa wakilalu.”
39“Kwa ivyoho, vizama vya tundui mangugwa na mbuni neviikale Babeli. Kale na kale wantu hewaikale umo vivyazi na vivyazi vyoshe vyeiza. 40Sa via imi Zumbe Mulungu niwakomievyo wantu wa mzi wa Sodoma na Gomola hang'we na mizi yehakana nayo, vivyoho hehaituke na mntu yoyoshe ndiye aikale umo.” Ni miyo Zumbe Mulungu nilongiewo.
41“Welela waghojo waaiza kulawa shi ya kaskazini,
ni mbali nkulu yena wazumbe wangi,
waakuizila kulawa mwe bontokelo ja shi.
42Waitozize nyuta na maguha,
ni wantu makatii na hewana mbazi.
Shindo zawe ni sa bahai ye boha,
wakiendesha faashi zawe.
Wazakiighanya kwa nkondo kunga wakutoe iwe mzi wa Babeli.
43Zumbe wa Babeli azaiva mbuli zawe,
mikono yakwe izaegheeka.
Mishango izamgwila,
aasumia sa mvyele mwekunda kukishungua.”
44“Waaiza, sa shimba ivyelawa mwe mashafi ya Yolidani na kugwia ngoto ze hantu hakuishiiza. Imi Zumbe Mulungu neniwaghuushe wantu wa Babeli mwe shi yawe. Neniwashaghuiye mgholokezi mtana ndiye niyemkunda. Ni ndai mwedaha kuighanywa na imi? Ni ndai mwedaha kuhimana na imi? Vingi ni mgholokezi ndai mwedaha kuniemeza? 45Kwa ivyoho niteghelezai nichefanyanya imi Zumbe Mulungu kughoshola kwe wantu wa Babeli, chia nichefanyanya kwa mbuli ya shi ya Wakalidayo. Hata wana wawe wadodo newabuutwe sa maghoto na nyumba zawe nezigandulwe. 46Shindo za kugwiwa kwa wantu wa Babeli nekueke ngulu ngima izingize na kiiyo chakwe nechiiivikane kwe shi zoshe.”
Currently Selected:
Yelemiya 50: SHBV
Highlight
Copy
Compare
Share
Want to have your highlights saved across all your devices? Sign up or sign in
The Old Testament in Shambala, @The Word for The World International, and Shambala Language translation. All rights reserved.
