Yelemiya 51
51
Zumbe Mulungu atahimba kuwalaha wantu wa Babeli
1Zumbe Mulungu aghamba ivi, “Neniwahimbile waghojo wakaitoe shi ya Babeli na kuwakoma wantu wa Babeli na wantu weikala Lebu Kamai sa mpeho nkai. 2Neniaghiize wagheni wakaibane shi ya Babeli, sa mpeho nkai yeinua mantu. Uwo mshi ukizabula newaitoe kia hantu na kuiyeka shi bia kintu. 3Seniwaeke watoa maosa wa Babeli wazute nyuta hambu wazwike shuke zawe za nkondo. Seniwaivile mbazi wabwanga wakwe, waghojo wakwe woshe neniwakome vigima. 4Newakine na kukong'wa mwe shi yawe wenye na newaumizwe mwe sia za mizi yawe. 5Imi Zumbe Mulungu nena nguvu zoshe, siwaekile wantu wa Izilaeli na wantu wa Yuda, hang'we na kuti nee waina masa na imi mng'azi wa Izilaeli. 6Ghuukai mulawe kwa Wababeli! Kia mng'we avunile ugima wakwe! Mushezakong'wa kwa mbuli ya masa yawe. Kwa kuti iyo nee mishi ya imi Zumbe Mulungu kuihiiza nkuu na kuilaha Babeli sa ivyekundighwa. 7Babeli nee ni sa kikombe cha zahabu chimemilecho divai ya maya yangu, wantu wa mbali zoshe waachivatia icho kikombe wakatengea na kughaluka madashi. 8Babeli neifikizegwa na kubondekabondeka. Isininikiei! Iighaiyei mzighi wa kuihoza ngea neihone. 9Wagheni weikala uko wataghamba, ‘Tizagheza kuihonya Babeli, miya vizaema kuhona. Iyekei titei kaya, kwa kuti mlaho wakwe uzabula kwe lwingu.’ ”
10“Zumbe Mulungu azaonyesha kuti ishwi hetina masa. Titei tikabilikile uko Yelusalemu chia Zumbe Mulungu aghosholecho.”
11Zumbe Mulungu aawahimbila wazumbe wa Waamedi, kwa fanyanyi zakwe za kuuubana mzi wa Babeli. Ivi nee ndivyo Zumbe Mulungu aihiize nkuu kwa waja wabanilewo nyumba yakwe ya mviko.
Wagholokezi wa waghojo wataaghiza, “Noai maosa yenyu! Ghuai ngao zenyu! 12Kwezai biamu za nkondo ulanga ya nkando za Babeli! Togheshai ughojo na ikai waghojo! Ikai weteghea!”
Kwa kuti, Zumbe Mulungu neabontole mbuli yakwe afanyanyeyo kwa wantu wa Babeli. 13Shi yena mito mingi na viiko vingi, bontokelo jakwe jizabula na mishi yakwe izashiya. 14Zumbe Mulungu mwena nguvu zoshe, azalapa kuti neaete waghojo wangi sa fumba ja nyovu, wautoe mzi wa Babeli na kutoa nkeeghee kwa kukudaha.
Imbo ja kumtogola Zumbe Mulungu
15Zumbe Mulungu nee aumbileye shi kwa nguvu zakwe,
akaitoghesha shi kwa viugho vyakwe
na kwa utalizi wakwe akashaaiza lwingu.
16Ahelonga, kuboha kwa mazi ye kwe lwingu kukaivikana,
aakweza zunde kulawa mwe bontokeo ja shi.
Aaghoshola mmweko fua zikigwa
na kukuntisha mpeho kulawa mwe taa jakwe.
17Kia mntu ni dashi hana viugho,
kia mweshongola vinyago azagewa shoni ni milungu yakwe
kwa kuti vinyago vyakwe ni vya lufyo na hevina ugima.
18Heviambiza kintu ni vya lufyo du,
wakizalahwa nevibanighwe.
19Mulungu wa Yakobo shiyo sa ivyo vinyago,
nee aumbileye vintu vyoshe
na Izilaeli nee mbali yakwe ashaghuleyo.
Zumbe Mulungu, Mulungu mwena nguvu zoshe nee zina jakwe.
Bontokelo ja uzumbe wa Babeli
20Zumbe Mulungu aghamba ivi,
“Iwe Babeli u kiboi changu na mata yangu ya nkondo.
Kwa iwe naazitoa mbali na kuzibana zumbe,
21naakonyoa faashi na uja mweikwea,
gai ja nkondo na uyo mwejiendesha.
22Kwa iwe naawakoma waghoshi na wavyele,
wadaa na wadodo,
wabwanga na wandele.
23Kwa iwe naawakoma walishi na ngoto zawe,
waimi na ng'ombe zawe za kuimia,
wakulu na wagholokezi.”
Kulahwa kwa wantu wa Babeli
24Zumbe Mulungu aghamba ivi, “Neniitoe Babeli na woshe weikala umo kunu muiwelele kwa mesho yenyu wenye kwa mbuli ya uhuza wawe waghosholewo uko Yelusalemu. 25Iwe Babeli u sa zintu jebana wantu wa mbali zosheni mwe shi. Miya imi Zumbe Mulungu nenikutoe kwa nguvu zangu na kukukinya kulawa uko ulanga uiko na kukughalusha kitui chihyeecho. 26Hekuna iwe jako ndijo jighuighwe mwe icho kiugha ndijo jizengee na hekuna iwe ndijo jighuighwe jizengee msingi. Shi yako heiikawe ni wantu kale na kale. Ni miyo Zumbe Mulungu nilongiewo. 27Inuiai biamu ya nkondo mwe shi, toai magunda ya nkondo mwe shi, ziighanyei shi zitoane na Babeli, ziitangei izi zumbe kunga zikatoe naye, zumbe za Alalati na Mini na Ashikenazi. Shaghulai mghojo mkulu aongole kutoana naye, ighaai faashi nyingi sa nyovu. 28Ighanyai shi zoshe zitoane na Babeli, waighanyei wazumbe wa Waamedi na wagholokezi wawe na waambizi wawe woshe, ighanyai waghojo we mwe shi zoshe wazegholokela. 29Wantu wa shi ya Babeli watazingiza na kunyaghaika kwa wogha, kwa kuti fanyanyi zangu imi Zumbe Mulungu kwa wantu wa Babeli ziitoghile. Neniighalushe shi ya Babeli ughongo na hekuna ndiye aikale umo. 30Waghojo wa Babeli wazahewa kutoana, wateikala mwe nkambi zawe. Nguvu zawe zizashiya hewana wachedaha. Nyumba za Babeli zizaokwa na nyuvi zakwe za chuma zizabondighwa. 31Ntung'wa ng'wenga na nyiae newateongozana kughuuka kwemnghambila zumbe wa Babeli, kuti mzi wakwe woshe uzaghuighwa. 32Hantu hakuombokea hazaghuighwa na nkando zizaokwa kwa moto na waghojo wazaingiwa ni wogha. 33Mishi inuinu wankuu newawakome na kuwajata sa shumo je mwe chengo. Ni miyo Zumbe Mulungu, Mulungu nena nguvu zoshe, Mulungu wa Izilaeli nilongiewo.”
34Nebukadineza, zumbe wa Babeli azaubana na kuutiha mzi wa Yelusalemu,
akatieka tivuugikiwe.
Akatieka tiituke sa igha je bue,
azaumeza mzi sa zoka.
Akaighusha ifu jakwe kwa vintu vyeshu vitana,
vikibinda akatiusha mwe shi yeshu.
35Wantu wa Yelusalemu waghambe,
“Babeli itoighwe kwa mbuli ya ubada ujauja,
watighosholeewo ishwi hang'we na wandughu weshu!”
Waeke wantu wa Yelusalemu waghambe,
“Babeli itoighwe,
kwa ivyo watisungudishevyo!”
Zumbe Mulungu neawavunile Waizilaeli
36Zumbe Mulungu awaghamba wantu wa Yelusalemu, “Nenimivunile mwe masa yenyu na kuihiza nkuu yenyu. Nenihweeshe mito ya Babeli na kueka shoko zakwe zikaaghale. 37Shi ya Babeli neiituke viugha vya mahuzu, neighaluke hemelo ja mbweha. Neiituke yaagea usei na kintu cha kubewa, hekuna mtu ndiye aikale uko. 38Wantu woshe wa Babeli newagumie sa shimba na newatoe mghono sa wana shimba. 39Wakiituka na ushu wa nkande, neniwaghosholee mvigha, neniwatengeze waituke waasheka na kukutika. Vikibinda newalale na hewainuke vingi. 40Neniwaikize sa maghoto yeighawa kwechinjwa, sa makosoghoo na mavuata.” Ni miyo Zumbe Mulungu nilongiewo.
Bontokelo ja wantu wa Babeli
41Zumbe Mulungu awaghamba wantu wa Babeli kuti, “Mzi uteikanewo mwe shi ngima uzagwiwa! Babeli itagea usei mwe shi ntuhu! 42Wankuu wa Babeli newaughubike mzi sa makumbo ya Bahai. 43Mizi yakwe neiituke kintu chegeza wogha vingi neiituke ughongo ushinawo mazi, shi ishiikawayo ni mntu yoyoshe, wala hekuna mntu mwezinka. 44Nenimlahe mulungu Beli wa wantu wa Babeli, neauze vintu abaiyevyo. Mbali hezimvike vingi.”
“Ukando wa Babeli neugwe. 45Inywi wantu wangu, haawei waiho, muhonye ugima wenyu na mughuuke maya yangu makai imi Zumbe Mulungu. 46Mushefighwe ni myoyo na kuogoha, kwa mbuli muzeiva mwe shi, kwa kuti mwe vui iji kuivikana ivi na vui tuhu muiva mbuli ntuhu, mbuli za kikatii na zumbe uyu akitoana na zumbe mtuhu. 47Mishi yaaiza ndiho niwatoe wantu wa unu mzi na vinyago vyawe. Shi ngima neiingiwe ni shoni na wantu wakwe woshe weikala umo newakong'we. 48Nee lwingu na shi na vintu vyosheni vyeumo neviimbe kwa nyemi ya kugwa kwa Babeli, waghojo newaize kulawiya wazu wa kasikazini kweutoa. 49Sa via Babeli awakomievyo wantu wa Izilaeli na wantu watuhu mwe shi ngima, kwa ivyoho, wantu wakwe woshe newakong'we.” Ni miyo Zumbe Mulungu nilongiewo.
Mbuli ya Zumbe Mulungu kwa Waizilaeli weikala Babeli
50Zumbe Mulungu aghamba ivi kwa Waizilaeli weikala Babeli, “Inywi muhoniewo kwe nkondo, lawai ushe, mushegugeguge! Nifukilai imi Zumbe Mulungu hata kati muhale, vingi muufukile mzi wa Yelusalemu. 51Mutaghamba, ‘Tizagewa shoni na kukankwa, shoni izaghubika vyeni vyetu, kwa kuti wagheni wazaingila hantu hang'azi he nyumba ya Zumbe Mulungu wakaieka ishetame kwa mviko.’ 52Kwa ivyoho imi Zumbe Mulungu naghamba kuti mishi yaaiza ndiho niwatoe wantu wa Babeli na vinyago vyawe na kukema kwa waja waumiewo nekuivikane mwe shi ngima. 53Hata kati Babeli neakwee kwe lwingu na kuzitoghesha nkando zakwe, neniaghiize wankuu wakamtoe.” Ni miyo Zumbe Mulungu nilongiewo.
Vifa vitaisiiza uko Babeli
54Zumbe Mulungu aghamba ivi,
“Tegheleza nkoo zaivikana uko Babeli,
shindo za ubanasi mkulu kulawa mwe shi ya Wakalidayo.
55Nizawakoma wantu wa Babeli
na kutongomaza vuzo jakwe kulu.
Waghojo wataingila sa makumbo ya mazi mangi,
vuzo ja nkondo jaaivikana mwe mzi.
56Mkomi ataiza kweibana Babeli,
waghojo wakwe wazagwiwa,
nyuta zawe zitadwishwa.
Imi ni Zumbe Mulungu, Mulungu nelaha masa,
neniighosholee Babeli sa ivyekundighwa kughoshoewa.
57Neniwatengeze wakulu wakwe na wena viugho,
wagholokezi wakwe na waambizi wakwe hang'we na waghojo wakwe.
Newalale na hewainuke vingi.
Nilonga imi zumbe,
Zumbe Mulungu, Mulungu nena nguvu zoshe nee zina jangu.
58Ukando wa Babeli neukinywe shi na kuasakanywa
na nyuvi zakwe ntai neziokwe.
Wantu newakisungudishe bue du,
wantu wa mbali newakitibue kwa kuti bontokelo jawe ni moto.” Ni miyo Zumbe Mulungu nena nguvu zoshe nilongiewo.
Uteghanyi wa Yelemia utaighawa Babeli
59Inu nee mbuli ya Zumbe Mulungu amuaghiizeyo mteghanyi Yelemia amnke Selaya ng'wana wa Nelia, ng'wezukuue ja Maaseya, aheita Babeli hang'we na Sedekia zumbe wa Yuda, mwe vui ja ne ja ugholokezi wa Sedekia zumbe wa Yuda. Selaya nee ni mndima mweituka hang'we na zumbe. 60Imi Yelemia nee nigondile mwe gondwe ntogho ndizo ziubule mzi wa Babeli, hang'we na mbuli ntuhu zosheni ndizo ziigondighwe kwa mbuli ya Babeli. 61Nikamghamba Selaya kuti, “Ukizabula Babeli shuti uwafyomee wantu kwa sauti nkulu izi mbuli zoshe. 62Vikibinda uvike, ‘Iwe Zumbe Mulungu uzaghamba neuubane unu mzi usheikalwe ni kintu chochoshe, mntu hambu vizama na inu shi neiituke ughongo kale na kale.’ 63Ukibinda pee kufyoma iji gondwe, jishunge na iwe vikibinda jihomee na mwe mto Eufulate kunu ukighamba, 64‘Ivi nee ndivyo Babeli igongooke na heiinuke vingi kwa mbuli ya ntogho ndizo niete kwakwe.’ ”
Mbuli za Yelemia zibontokela aha.
Currently Selected:
Yelemiya 51: SHBV
Highlight
Copy
Compare
Share
Want to have your highlights saved across all your devices? Sign up or sign in
The Old Testament in Shambala, @The Word for The World International, and Shambala Language translation. All rights reserved.
