Yelemiya 49
49
Mlaho wa Zumbe Mulungu kwa wantu wa Amoni
1Zumbe Mulungu aghamba ivi kwa mbuli ya Waamoni, “Kwani Izilaeli hana wana wa kibwanga? Hana wapazi wedaha kupaa inu shi? Kwai ushe wantu wemvika mulungu Moleki wazaghua shi ya Izilaeli na kuikala umo? 2Mishi yaaiza ndiho niwaeke wantu wa Laba waive vuzo ja nkondo kwa mbuli ya mzi wa Waamoni, newiituke kitui cha mahuzu, na vijiji vyakwe neviokwe kwa moto. Vikibinda Wazilaeli newawaghuushe waja wawaghuushawo. Ni miyo Zumbe Mulungu nilongiewo. 3Inywi wantu wa Heshiboni sininikai, kwa kuti mzi wa Ai uzabanighwa! Inywi wavyele wa Laba kemai! Zwikai shuke za magunia, musininike kwa kughuuka uko na uko ndai ya nkando za mzi, kwa kuti mulungu Moleki neaighawe kwe shi ya ugheni, ye hang'we na wavikizi wakwe na wantu wemghoshoela ndima. 4Kwai mwaakikomba kwa mbuli ya makoongo yenyu yeozoka? Inywi shiyo wakweli. Inywi mualila viiko vyenyu muvyekikombea kunu mukighamba, ‘Ni ndai mwedaha kutoana na ishwi?’ 5Nenimigee wogha kulawa kwa wantu woshe we hehi na inywi, nainywi nemughuushwe na se kia mng'we na sia yakwe, hekuna ndiye amiunganyanye na kumiika hantu hang'we.” Ni miyo Zumbe Mulungu nena nguvu zoshe nilongiewo.
6“Miya mishi yaaiza ndiho newauze vingi Waamoni na mwe shi yawe.” Ni miyo Zumbe Mulungu nilongiewo.
Mlaho wa Zumbe Mulungu kwa wantu wa Edomu
7Zumbe Mulungu mwena nguvu zoshe aghamba ivi kwa mbuli ya Waedomu, “Ivi hekuna vingi wantu wena viugho mwe mzi wa Temani? Ivi hekuna ashighaleye wa kuminka viugho? Ivi viugho vyawe viteshiya vigima? 8Hitukai na mughuuke inywi wantu wa Dedani mukakifishe mwe mpanga. Neniwaetee ntogho wavyawa woshe wa Esau, kwa kuti mishi ya kumitoa izabula. 9Wantu weiza kweshuma zabibu waashighaza na wabavi wakiiza nakio kwebawa, wabawa wavyekunda. 10Miya wavyawa wa Esau neniwahoke kia kintu na kughubula kia hantu ndiho wadahe kukifisha kunga washekifishe vingi. Wana wakwe na wandughu wakwe na wantu wakwe we hehi naye newakong'we na shi ya Edomu neibanighwe vigima. 11Niekeai wana wenyu wafiiwewo ni waishe zawe na wanine zawe neniwawelele, vingi niekeai wavyele wafiiwewo ni waghoshi wawe wanialile imi.”
12Zumbe Mulungu aghamba ivi, “Kati waja washikundighwawo kusungudishwa shuti wasungudishwe, inywi wantu wa Edomu shuti muisiize kusungudishwa. Hemudahe kunyiika uwo mlaho. 13Nizalapa kwa zina jangu kuti mzi wa Bosila newiituke mahuzu na hewiikawe ni wantu na newiituke hantu hegeza wogha na kubewa na mizi yakwe yoshe neiituke mahuzu kale na kale.” Ni miyo Zumbe Mulungu nilongiewo. 14Nizaiva mbuli kulawa kwa Zumbe Mulungu kuti azaaghiiza mntu akabiikile mwe shi zoshe kuti, “Kiunganyei hang'we mukautoe mzi wa Edomu, inukai mukautoe! 15Imi Zumbe Mulungu nenikughalushe iwe Edomu wiituke mdodo kuiko shi zoshe, wantu woshe we mwe shi newakubee. 16Kukikomba kwako kuti kia muntu aakuogoha utekilufya, iwe mweikala mwe mpanga za makuungu makulu, naiwe mweikala mwe vitui vya miima. Hata kati uzazenga nyumba yako uko ulanga sa ngwiizi ivyezenga sasa jakwe, miya nenikusheeze kulawa uko ulanga uiko.” Ni miyo Zumbe Mulungu nilongiewo.
17Zumbe Mulungu aghamba, “Shi ya Edomu neighaluke hantu hegeza wogha na woshe wezinka hehi naye newamake na kuogoha wakiona ivyo ibanighwevyo. 18Sa via shi ya Sodoma na Gomola hang'we na mizi ndiyo ii hehi naye ibanighwevyo, imi Zumbe Mulungu naghamba kuti, Edomu kohe hekuituke na mntu yoyoshe mweikala wala kuzenga. 19Sa shimba yelawa mwe mzitu mtana wa Yolidani na kufikizaita kwaishiiza, nee ndivyo nifikizewaghuusha Waedomu walawe mwe shi yawe. Na mgholokezi ndiye nimshaghule neagholokele shi. Kwa kuti, ni ndai mwedaha kuighana na imi? Ni ndai mwedaha kuhimana na imi? Ni mgholokezi ndai mwedaha kuhimana na imi? 20Kwa ivyoho, teghelezai fanyanyi zangu imi Zumbe Mulungu nifanyanyezo kuwatoa wantu wa shi ya Edomu na via nivyekunda kuwaghoshoela wantu wa Temani. Wana wawe wankebe newabuutwe na kia mng'we neaituke na wogha. 21Shi ya Edomu ikizagwa, nekuituke na shindo ndiyo itingishe shi ngima na kukema kwawe nekuivikane mpaka kwe bahai ya Shamu. 22Mnkuu neaize kweitoa Bosila sa ngwiizi ivyesheea kweghua maunde yakwe. Uwo mshi myoyo ya waghojo wa Edomu neiingiwe ni wogha sa mvyele mwekishungua.”
Mlaho wa Zumbe Mulungu kwa wantu wa Damesiki
23Ivi nee Zumbe Mulungu avyelonga kwa mbuli ya mzi wa Damesiki, “Mizi ya Hamasi na Alipadi ye hehi na Damesiki izaingiwa ni wogha kwa kuiva mbuli mbada. Kwa ivyoho watasangadika sa makumbo ya bahai yashitongomaayo. 24Wantu wa Damesiki wazaituka wakiwa na wantu woshe wataghuuka kwa wogha. Wazaituka na usoyoyo sa mvyele mwena mishango ya kukishungua. 25Viituka zeze mzi wetaikana na niwekunda uwekwe? 26Kwa ivyoho, mwe uwo mushi wabwanga wakwe newakong'we mwe sia na waghojo wakwe newakong'we. Ni miyo Zumbe Mulungu nena nguvu zoshe nilongiewo. 27Nenikoeze moto mwe nkando za Damesiki na neuwoke nyumba za zumbe Beni Hadadi.”
Mlaho wa Zumbe Mulungu kwa mbali ya Kedali na mzi wa Hazoli
28Ivi nee Zumbe Mulungu alongievyo kwa mbuli ya mbali ya Kedali na mizi ndiyo ikigholokewa ni zumbe wa Hazoli yatoighwayo ni Nebukadineza zumbe wa Babeli na kuidaha, “Inukai muite mukawatoe wantu wa mbali ya Kedali na kuwakoma wantu weikala wazu zua jikwelawiya. 29Makumbi yawe na mafyo ya ngoto yazaghuighwa. Vingi mapazia yawe na viiko vyawe vyoshe na ngamia zawe ntana zizaita, nekuivikane nkoo na wantu newaingiwe ni wogha kia hantu.”
30“Inywi wantu wa Hazoli ghuukai hale mukakifishe mwe mpanga, imi Zumbe Mulungu nizalonga. Kwa kuti Nebukadineza zumbe wa Babeli azafanyanya kuiza kwemitoa na kumikoma. Ataghamba, 31‘Gholokai tite kweitoa shi yena mpolele, shi ya wantu washinayo wogha. Iyo shi heizengeewe nkando za mizi na iikeike du wala heina ughojo wowoshe.’ ” Ni miyo Zumbe Mulungu nilongiewo.
32“Ngamia zawe na chuma chawe neighuighwe. Neniwaasakanye wantu weikala wazu zua jikwelawiya na neniwaetee ntogho kulawa kia wazu. Ni miyo Zumbe Mulungu nilongiewo. 33Mzi wa Hazoli neughaluke hemelo ja makui ya tundui na neughaluke mzi wena ukiwa kale na kale, hekuna mntu ndiye aikale umo vingi.” Ni miyo Zumbe Mulungu nilongiewo.
Mlaho wa Zumbe Mulungu kwa wantu wa shi ya Elamu
34Zumbe Sedekia aheandusha kugholokela shi ya Yuda, Zumbe Mulungu, Mulungu mwena nguvu zoshe atelonga na Yelemia kwa mbuli ya shi ya Elamu. 35Amghamba ivi, “Neniwakome watoa nyuta woshe waighalushewo shi ya Elamu iituke na nguvu. 36Neniete wankuu kulawa kia wazu wawatoe wantu wa Elamu na kuwaasakanya kia hantu mwe shi. Wohe newashamizwe na mwe shi zoshe ze mwe ngulu. 37Neniwagee wogha wantu wa Elamu kwa wankuu wawe wekunda kuwakoma. Neniwaetee ntogho kwa maya yangu makai. Neniwadoseeze kwa uhamba mpaka niwabinde woshe. Ni miyo Zumbe Mulungu nilongiewo. 38Nenimkome zumbe wawe hang'we na waambizi wakwe na kuika ufung'wa wangu uko Elamu. Ni miyo Zumbe Mulungu nilongiewo. 39Mwe mishi yeiza, neniwauze wantu wa mzi wa Elamu na kuwatoghesha vingi sa ndivyo waivyo.” Ni miyo Zumbe Mulungu nilongiewo.
Currently Selected:
Yelemiya 49: SHBV
Highlight
Copy
Compare
Share
Want to have your highlights saved across all your devices? Sign up or sign in
The Old Testament in Shambala, @The Word for The World International, and Shambala Language translation. All rights reserved.
