Exod 28
28
rdawaṯ n lkuhhan
1we altwaziḏ haruwn uwaḵ aḏ ṭarwas; nadab aḏ abiyhuw aḏ liƹazer aḏ iṯamer bac adlen d lkuhhan seg aṯ israyil. 2we aggeḏ y uwaḵ haruwn ṣireḍ d meqdus bac asyerni lwehreṯ aḏ lmejd. 3temleḏ y kul yjen seg indin lliy uciγasen rruwḥ n uquddu g uzeṭṭi bac aggen ṣireḍ n haruwn bac aydel y neči d lkahen. 4qa d ayuh lliy yexs aggen seg uṣireḍ y haruwn; tmeṣdurt aḏ rdi aḏ tḏellukt aḏ tsurit s llexṭuṭ aḏ tezmelt aḏ cemleṯ. yexs ateneggen d ṣireḍ d meqdus y haruwn aḏ ṭarwas bac aledlen d lkuhhan. 5aḏ yexs atenneszen seg tnelwin n wureγ aḏ ulman d izizewen aḏ d iḥberiyen aḏ d izuggaγen aḏ seg ustu n tefduxt ṣbiḥ.
rdi naγ lefuwd
6amma rdi adj ategnan indin lliy tquddun agenna seg tnelwin n wureγ aḏ ulman d izizewen aḏ d iḥberiyen aḏ d izuggaγen aḏ seg ustu n tefduxt lliy yeḏra yeqƹeḏ. 7we aqnen leḍrafis s nnaj bac adyas af tγerdin.
8aḏ leḥzemis aydel yelṣeq diyes. aḏ yemmug am netta seg tnelwin n wureγ aḏ ulman d izizewen aḏ d iḥberiyen aḏ d izuggaγen aḏ seg ustu n tefduxt ṣbiḥ.
9we aneqceḏ af sen tγuγa n ljizeƹ ismawen n ṭarwa n yeƹquwb. 10kul 6 sisen af tγuγa af leḥsab n as n tleliṯesen. 11we aḏeγzeḏ ismawen n aṯ israyil af tγuγa mammeḵ iteg lliy ineqqec af txuṯam n uṣeḥḥeḥ. tegetent g lḥaweci n wureγ. 12we aggeḏ ayuh n tγuγa af tγerdin n lufud bac adleneṯ d tγuγa n usmiti y aṯ israyil. we ayqam haruwn ismawnesen af tγerdinis y usmita zzaṯ rebbiy. 13we aggeḏ sent leḥluq n wureγ, 14aḏ sen tselslin seg wureγ ṣbiḥ ḏreneṯ am tezra bac atentƹelqeḏ g leḥluq.
temeṣdurt n lḥukem
15mmel y lliy gennan yeqƹeḏ agnan tmeṣdurt n lḥukem bac ayssen siyes haruwn matta yexs rebbiy. atetteggen mammeḵ ggen lufud seg tnelwin n wureγ aḏ ulman d izizewen aḏ d iḥberiyen aḏ d izuggaγen aḏ ustu n tefduxt ṣbiḥ. 16we addel timrebbeƹt aḏ ṭuḍi af sen aḏ ṭṭulis am lƹerḍis cebber. 17we asteggeḏ 4 n ḏuren n tγuγa tiṣbiḥin; ḏur mezwar d leƹqiq zuggaγ aḏ lyaquwt awreγ aḏ zmurreḏ, 18ḏur wissen d lburehman aḏ lyaquwt zizaw aḏ leƹqiq mellal, 19ḏur wi 3 seg tγuγa n ƹin lhir aḏ lyecmu aḏ jemmectu. 20ḏur 4 seg tγuγa n zberjeḏ aḏ lyecb aḏ ljizƹ. amyuh ateneggeḏ g lḥacit n wureγ. 21we aḏeγzeḏ af kul tγuγa teṣbiḥt ysem n yjen seg 12 n aṯ israyil mammeḵ aγezzen af txeṯemt n uṣeḥḥeḥ.
22we aggeḏ y tmeṣdurt sen tseleslin ḏreneṯ seg wureγ ṣbiḥ am tezra lliy teḏra. 23we aggeḏ g ṭṭerf n tmeṣdurt sen tḥelqeṯin n wureγ. 24we aqneḏ tiseleslin lliy ḏreneṯ g tḥelqeṯin n tmeṣdurt. 25we atenteqneḏ g tḥelqeṯin n tγerdin n lufud s zzaṯ.
26we aggeḏ sen tḥelqeṯin n wureγ g ṭṭerf n tmeṣdurt s jjaj mani telṣeq af rdi. 27we aggeḏ sen tḥelqeṯin iḍen n wureγ adug ṣder mani inetged leḥzam. 28we atenteqneḏ al tḥelqeṯin n tmeṣdurt s ulman izizewen lliy ḏren, bac ateqqim temeṣdurt nnaj rdi aḏ witettuṭṭic.
29we ayqam haruwn ismawen n aṯ israyil g tmeṣdurt n lḥukem af ulis d smiti diyma zzaṯ rebbiy almiy tayeḏef al lquds. 30we aggeḏ g tmeṣdurt luwriym aḏ ttemiym bac ateniqam haruwn af ulis almiy tayebbed zzaṯ rebbiy. aḏ amyuh aywiy haruwn diyma af ṣedris d lemereṯ n lḥukem bac ayssen lxiyr n aṯ israyil.
tḏellukt
31amma tḏellukt yexs addel lkulha seg leqmac d zizew. 32γares imi n iγef g amas aḏ lburcman yeṣḥiḥ bac witetkeṣṣic. 33aḏ adrjeḥneṯ g ṭṭerfis s dday tirummanin s ulman d izizewen aḏ d iḥberiyen aḏ d izuggaγen, we aƹelqeḏ jareseneṯ dnaden n wureγ. 34jar kul sen tirummanin dendan. aḏ yexs ateneggeḏ lkul af ṭṭerf n tḏellukt. 35we ayireḍ haruwn tḏellukt kul man ayeḏef y lxeḏmeṯ, we ayemmusel lḥes n dnaden g iḏafis aḏ iffaγis al lquds zzaṯ rebbiy bac wiyetmettic.
36we aggeḏ teḥdit n wureγ ṣbiḥ, teγzeḏ fellas mammeḵ yetweγez af txaṯemt n uṣeḥḥeḥ: «lquds y rebbiy.» 37teqnetteṯ s tnelli tezizewt af tezmelt n haruwn s zzaṯ. 38we addel diyma af ujebbuh n haruwn, bac ayqam bekkeḍu n aṯ israyil almiy ucen y rebbiy teγrest witeqƹic. aḏ yexs haruwn ayeg teḥdit diyma almiy tayebbed zzaṯ rebbiy bac ayerla rebbiy fellasen.
39we aggeḏ tsurit s llexṭuṭ aḏ tezmelt y haruwn seg leqmac n tefduxt, amma cemleṯ yexs atetṭerzeḏ ṭrizeṯ teṣbiḥt. 40we aggeḏ zada y ṭarwa n haruwn tisuriyin aḏ cmali aḏ tizmelin bac asenterniḏ lmejd aḏ lwehreṯ. 41we atenṣirdeḏ y haruwn aḏ ṭarwas. we aneγleḏ uḏi n uzemmur af ixfewnesen. we ateneggeḏ y lxeḏemtiw, we atenqedseḏ bac aḏulen d lkuhhan y neči.
42we asenteggeḏ yserwalen n tefduxt bac asetren imanesen seg irewnesen al teγmiwinesen. 43yexs atenirden haruwn aḏ ṭarwas adug tisuriyinesen almiy taḏeḏfen al lƹecceṯ n umlaqi aḏ almiy taqerben al mkan n teγrest bac aggen lwejbesen g lquds. aḏ amyuh wilγeldenc aḏ witmetinc. we aydel ayuh d lferḍ diyma af haruwn aḏ ṭarwas ljiyl beƹd ljiyl.
Currently Selected:
Exod 28: IGJ
Highlight
Share
Copy
Want to have your highlights saved across all your devices? Sign up or sign in
© 2025 Chutney Media Agency Ltd for the audio recording and for the text upon which the recording is based. The audio recording and the text are both released under a Creative Commons 4.0 CC BY-NC-ND license (Attribution - No-Commercial - No Derivatives).
