Exod 29
29
qeddes n lkuhhan
1ayuh matta yexs aggeḏ bac arreḏ haruwn aḏ ṭarwas d lkuhhaniw. adeγeḏ fwunes aḏ sen iberkas widdisenc lula. 2we aggeḏ s ren n irden yeldeḍ aḏ uḏi tqurset man γiyr lexmireṯ we aƹejneḏ ren s uḏi bac aggeḏ tqurset iḍen man γiyr lexmireṯ aḏ aggeḏ tqurset n ṭedjen teḏhen s uḏi man γiyr lexmireṯ. 3we ateneggeḏ g tƹellegt ijeṯ we atenuceḏ y rebbiy nihnin aḏ ufwunes aḏ sen iberkas. 4wembeƹd asγuyeḏ y haruwn aḏ ṭarwas al imi n lƹecceṯ n umlaqi we asentemleḏ azizdiyen s aman. 5we asṣirdeḍ haruwn tsurit aḏ tḏellukt aḏ lufud aḏ tmeṣdurt we aqneḏ lufud s leḥzam lliy yeṭrez. 6we asteggeḏ tezmelt af ixfis, we asteggeḏ s zzaṯ teḥdit temeqdust. 7we aqemeḏ uḏi meqdus atneγleḏ af ixfis bac atnumreḏ.
8wembeƹd asγuyeḏ af ṭarwas we asentirḍeḏ tisuriyin n lkuhhan, 9aḏ cmalisen aḏ tizmelinesen bac aḏulen d lkuhhaniw y diyma. aḏ amyuh arreḏ haruwn aḏ ṭarwas d lkuhhan.
teγrest y umukes n ubekkeḍu
10wembeƹd sebbed fwunes zzaṯ lƹecceṯ n umlaqi bac aggen haruwn aḏ ṭarwas ifesnesen s sen af ixfis. 11we atγerseḏ zzaṯ rebbiy af imi n lƹecceṯ n umlaqi. 12we awyeḏ seg iḏemmen n ufwunes, we ateggeḏ af leqruwn n mkan n teγrest s daḍiḵ, we aneγleḏ lliy yefdelled g tqeƹatis. 13wembeƹd aqemeḏ rdi n duwert aḏ teḏumt n tessa aḏ tijjal s teḏumtesen we atenḥerqeḏ af umkan n teγrest. 14amma yessum n ufwunes aḏ ylimis aḏ lusexis atenḥerqeḏ s barra y lmuxeyyem. rahiy netta d teγrest d tekuffert.
ḥreq n uberkus mezwar y rebbiy
15we adeγeḏ yjen seg iberkas bac aggen haruwn aḏ ṭarwas ifesnesen s sen af ixfis. 16atγerseḏ we arucceḏ seg iḏemnis af 4 n lejnab n mkan n teγrest. 17we ateqedƹeḏ, we asirdeḏ leḍrafis idexleniyen aḏ idernis we ateneggeḏ nihnin yid ixfis yid yessumis nnaj mkan n teγrest. 18we astesiγeḏ timsi af mkan n teγrest, we addel rriḥtis d ṣṣedqeṯ n ḥreq y rebbiy bac ayerla. rahiy d ṣṣedqeṯ n ḥreq y rebbiy.
berkus n uqeddes n haruwn aḏ ṭarwas
19we adeγeḏ berkus wissen bac aggen haruwn aḏ ṭarwas ifesnesen s sen af ixfis. 20wembeƹd atγerseḏ we aqemeḏ seg iḏemnis. ateggeḏ af tleflufin n tmezzuγin n limin n haruwn aḏ ṭarwas, aḏ af idudan imeqqaren n ifesnesen n limin, aḏ af tifdinin timeqqarin n idernesen limin. we arucceḏ iḏemmen af 4 n lejnab n mkan n teγrest. 21we aqemeḏ fercu seg iḏemmen lliy af mkan n teγrest aḏ seg uḏi meqdus we aqeṭreḏ siyes af haruwn aḏ ṭarwas aḏ af leḥweyjesen bac amqudsen nihnin aḏ leḥweyjesen y rebbiy.
22we awyeḏ teḏumt n berkus aḏ llitis aḏ uselsu aḏ teḏumt n tessa aḏ tijjal aḏ teḏumt lliy fellesneṯ aḏ lektef n limin afelxaḍert netta d berkus n uqeddes n lkuhhan.
ṣṣedqeṯ y userli n rebbiy
23we aqemeḏ tqurset ijeṯ aḏ ijeṯ seg tiqurset lliy teƹjenteṯ s uḏi aḏ tqurset n ṭedjen ijeṯ seg tƹellegt lliy teggiteṯ zzaṯ rebbiy. 24we ateneggeḏ lkulhum jar ifesn n haruwn aḏ ṭarwas bac atenderejḥen zzaṯ rebbiy. 25wembeƹd atenelqiḏ s γarsen we asentessiγeḏ af mkan n teγrest bac ateli rriḥeṯ we ayerla rebbiy. rahiy d ṣṣedqeṯ n ḥreq y rebbiy. 26we aqemeḏ ṣder n uberkus n uqeddes n haruwn we atderejḥeḏ zzaṯ rebbiy. we aydel aydin d lbeyiḵ seg teγrest. 27aḏ yexs aqedseḏ ṣder aḏ lektef n uberkus n uqeddes n haruwn aḏ ṭarwas lliy derejḥenten zzaṯiw 28bac adlen d lbay n haruwn aḏ ṭarwas. aḏ d lwajeb af aṯ israyil y diyma atucen d lbay n lkuhhan seg teγrest n slemeṯ lliy tatetucen y rebbiy.
mammeḵ aqedsem lkuhhan ijdiḏen seg ṭerwa n haruwn
29aḏ aḥḥerzeṯ leḥweyej imeqdusen n haruwn bac aggem mam beƹdis d lkahen seg ṭarwas we aneγlem uḏi meqdus af ixfewnesen bac atenqedsem. 30aḏ yexs lliy tadyas beƹdis d meqqar n lkuhhan atenyireḍ 7 d ussanaṯ almiy tayeḏef al lƹecceṯ n umlaqi bac ayeḏwel d lkahen y rebbiy g umeqdus.
31we awyeḏ yessum n uberkus n uqeddes we atesdiybeḏ g umkan d meqdus. 32aḏ yexs haruwn aḏ ṭarwas atečen netta aḏ tiqurset lliy g tƹellegt af imi n lƹecceṯ n umlaqi. 33witet siyes ḥetta d yjen afelxaḍert d meqdus. yexs weḥdesen ačan siyes afelxaḍert netta d tekuffert n ibekkaḍnesen bac aḏulen d lkuhhan. 34aḏ kan yefdelled fercu seg yessum n uqeddes naγ seg tiqurset al tajji, yexs atḥerqeḏ s timsi. witet siyes ḥed afelxaḍert d meqdus.
35amyuh aggeḏ y haruwn aḏ ṭarwas mammeḵ uwiγeḵ, atenqedseḏ 7 d ussanaṯ bac atenerreḏ d lkuhhan. 36aγerseḏ kul as disen fwunes d teγrest d tekuffert. we aqedseḏ mkan n teγrest s teγrest d tekuffert aḏ nγal n uḏi. 377 d ussanaṯ aγerseḏ d tekuffert af mkan n teγrest we atqedseḏ bac aydel d lquds n leqdas. aḏ kul ḥed naγ ḥaja ayeṭṭef diyes ayeḏwel d meqdus.
matta yexs aγersen kul as
38yexs aγerseḏ af mkan n teγrest sen iberkas kul as diyma. 39yjen ateγerseḏ tajji aḏ yjen temeddiṯ. 40we aḏuceḏ kul yjen sisen yid lgelbeṯ seg ren lleṭuḍ lliy yerwi s litreṯ aḏ wezgen n uḏi n uzemmur, we aneγleḏ fellas deqsis d crab. 41we aγerseḏ berkus wissen temeddiṯ. we atuceḏ netta aḏ ren lleṭuḍ d ṣṣedqeṯ n tiγwaw aḏ crab mammeḵ teggiḏ tajji bac ateli rriḥeṯ n ṣṣedqeṯ we ayerla rebbiy. rahiy nettaṯ d ṣṣedqeṯ n ḥreq y rebbiy.
42we aḥerqem amyuh diyma zzaṯ rebbiy af tmeddurt n lejyeluwem af imi n lƹecceṯ n umlaqi mani tafleqiγ aḏ mani duggiγaḵ. 43aḏ mani tamleqiγ yid aṯ israyil zada, we ayemqudes mkan s lmejdiw.
44we aqedseγ lƹecceṯ n umlaqi aḏ mkan n teγrest mammeḵ taqedseγ haruwn aḏ ṭarwas d lkuhhan. 45we asekneγ jar aṯ israyil we asenedleγ d rebbiy, 46bac asennen lliy d neči d rebbiy, rebbiysen lliy sefγexten seg miṣr bac asekneγ jaresen. rahiy neči d lliy diyma yella, rebbiysen.
Currently Selected:
Exod 29: IGJ
Highlight
Share
Copy
Want to have your highlights saved across all your devices? Sign up or sign in
© 2025 Chutney Media Agency Ltd for the audio recording and for the text upon which the recording is based. The audio recording and the text are both released under a Creative Commons 4.0 CC BY-NC-ND license (Attribution - No-Commercial - No Derivatives).
