Exod 27
27
rebbiy yessaḵen y muwsa mammeḵ ayeg mkan n teγrest
1yexs aggeḏ mkan n teγrest seg isγaren n ssenṭ, seṭeḥtis timrebbeƹt, ṭṭulis aḏ lƹerḍis 5 ḏruƹ, aḏ lƹulwis 3 ḏruƹ. 2we asteggeḏ 4 n leqruwn af trakenis. yexs ateneggeḏ lṣeqqen diyes. we atγelfeḏ lkul s nḥas.
3we aggeḏ seg nḥas reγeltis lkul, ibunyen y ulayem n iγeḍ, aḏ tiγenjeyin y uƹebbi n iγeḍ aḏ tmeƹejnin aḏ uzzal y umukes n yssum aḏ tmejemrinis.
4we asteggeḏ rredj n nḥas. diyes 4 n tḥelqeṯin n nḥas af treknis. 5we ateggeḏ adug lḥacit n mkan n teγrest mammeḵ ayeṣel al zegnis.
6we asteggeḏ sen igeḍman seg isγaren n ssenṭ we atenγelfeḏ s nḥas. 7we aseḏfeḏ igeḍman diyn g tḥelqeṯin af lejnab n mkan n teγrest bac ateqemem sisen. 8we aydel mkan n teγrest lliy seg isγaren d lfareγ g amas mammeḵ siḵenγeḵtiḏ dehnit af jbel.
siḵen n stareṯ n ussetur
9we aggeḏ settur yenneḍ af amas lḥuc s stareṯ n ustu n tefduxt ṣbiḥ ṭṭulis 100t n dereƹ seg ljiheṯ teqeblit. 10s 20 d tireslin aḏ 20 d tiqeƹƹeḏin n nḥas aḏ lemxeṭef aḏ uzzelaṯ d lfejreṯ. 11aḏ am idin ljiheṯ tebeḥrit, ṭṭulis 100t n dereƹ aḏ tireslinis 20 bbedneṯ af 20 d tiqeƹƹeḏin n nḥas aḏ lemxeṭfis aḏ uzzelaṯis d lfejreṯ.
12amma lƹerḍ n lḥuc s mγerreb ṭṭul n staris 50 dereƹ, aḏ iƹelleq af 10 n tireslin bbedneṯ af 10 n tqeƹƹeḏin, 13we aydel lƹerḍ n lḥuc s mcerreq 50 dereƹ. 14we aydel ṭṭul n stareṯ af jneb mezwar n imi n lḥuc 15 n dereƹ, ƹelqen af 3 n tireslin yid 3 n tqeƹƹeḏin. 15aḏ deqsis taydel ṭṭul n stareṯ n jneb wissen n imi n lḥuc lliy tatuƹelqen zada af 3 n tireslin bbedneṯ af 3 n tqeƹƹeḏin.
16amma ṭṭul n stareṯ n imi 20 dereƹ seg ustu n tefduxt ṣbiḥ yezda s ulman d izizewen aḏ d iḥberiyen aḏ d izuggaγen, ƹelqen af 4 n tireslin bbedneṯ af 4 n tqeƹƹeḏin. 17we adlen af tireslin n lḥuc uzzalaṯ n lfejreṯ s lemxeṭef n lfejreṯ aḏ tqeƹƹeḏin n nḥas. 18we aydel ṭṭul n amas lḥuc 100 n dereƹ, aḏ lƹerḍis 50 aḏ leƹlu n stareṯis 5 d leḏruƹ seg ustu n tefduxt aḏ tiqeƹdinis d nḥas. 19aḏ yexs addel reγleṯ lliy txedmem siyes g lḥuc lkulha seg nḥas, aḏ ṭwalaṯ n lƹecceṯ aḏ ṭwalaṯ n lḥuc zada.
uḏi n useγi n nnir
20we amleḏ y aṯ israyil afdeγen uḏi n nḍuḥ y useγi n nnir diyma. 21yexs haruwn aḏ ṭarwas lhan s useγi n nnir seg tmeddiṯ al tajji zzaṯ rebbiy g lƹecceṯ n umlaqi s barra y star lliy zzaṯ ttebuwt n luwṣayaṯ. we aydel ayuh d lwajeb af aṯ israyil ljiyl beƹd ljiyl diyma.
Currently Selected:
Exod 27: IGJ
Highlight
Share
Copy
Want to have your highlights saved across all your devices? Sign up or sign in
© 2025 Chutney Media Agency Ltd for the audio recording and for the text upon which the recording is based. The audio recording and the text are both released under a Creative Commons 4.0 CC BY-NC-ND license (Attribution - No-Commercial - No Derivatives).
