Luka 20

Bûshoo kibalo kya kitenta kya Yesû

(Matayo 21.23-27; Maluko 11.27-33)

1Sigi limo Yesû ûbele walibalanga bantû mukitotelo no kûsaûla mwanda gûsoga, Balambwili bakûlû, no Balangi babisila amo no bemeni babantû, baikile 2bamubulishe: “Wêtûlombole, walonga mianda gino kwa kitenta kêê? Byonka nani ûkûele kitenta kino?”

3Yesû wêbaêndwêle: “No nene shanimibûshe bûsho. Munombole, 4kitenta kya Yoana kya kûbatisha kiimine kwê Kabesha Mpûngû ao kûbantû?”

5Mone boo bebûsenie bobene kwa bobene, “Besambile ntê betwe kwêsamba, ‘Luimine kwê Kabesha Mpûngû,’ Gee shaetûbûshe: ‘Mwanda gwakêê hamwibamwitabêshe?’ 6Mone betwe kwêsamba, ‘Luimine kwê muntû,’ bantû bonse shabetwase mabwe, kibalo bonse betabêshe kwana Yoano ûbele mumoni.” 7Kwanansio bamuêndwêle, “Hatwêdjê kitenta kikyo ntê kiimine kwêê.”

8Yesû wêbalombwele, “No mwine nene nsimilomboli, nanonga mwianda gino, kwa kitenta kêê.”

Lûkêndê lwa balimi babê

(Matayo 21.33-46; Maluko 12.1-12)

9 # Isay 5.1 Yesû ûgêlêlêle kwêbalombola bantû lûkêndê lûlû: “Muntû gûmo ulimine bala lya misabibu, lwabawêle kûwana kûsigêlana no balimi bamo bekasigala munkûempa bala lyage, ûgêle kûnse giinge no kwêkana kûko kyaba kila. 10Kyaba kya kwêmbûla akiikile, muntû gûdjo umutumine mwingili wage kûbalya balimi atwale kiba kya bimbûlwa bya bala lya misabibû. Mone balya balimi bamuhulile mwingili gûdjo bamukumbile wimine minie samba. 11Gûlya mwine bala umutumine byonka mwingili gûnge; mone babo bamuhulile gûdjo byonka nansilya, bamulongele bintû bya nsoni, no kumwibwêlêsha minie samba. 12Umutumine byonka wabûsatû; gûdjo noge, bamukomine, no kumukûmba minie samba. 13Kûwa mwine bala lya misabibu wêsambile, ‘Sanonge ntêê? Samutume mwanane wamwana mulûme, ange sabamukokele gee!’ 14Mone balimi lwabamumwene, besongenie, ‘Gûdjû umuyanii, nfulo. Tumwiyage kûba bûyana bwage bûbe bwetû!’ 15Kwanansho bamutele andje gya lilya bala lya misabibu bamwiyagile.

“Yesû wêbabulishe, gûlya mwine bala, lya misabibu wêkebalonga ntê?” Balya balimi. 16“Wakasha kwêbatobesha balimi babo, no kwêbaa balimi bange lilya bala lya misabibu.”

Bantû lwabategelele mianda gigyo, besambile, “Nagikaimini no eneasho!”

17 # Nghib 118.22 Mone Yesû wêbakwenenie meso no kwêbabûsha, “Lusinto, lûlû lûlûmbûlûke, lwêno nsintûlwe kê?

‘Bwe libengilwe no baimpi,

Alibwe liyenene lya mubambo.’

18Muntû gegense kûgwêla egûlû lya bwee lilyo wakatimuka bihêndê bihêndê; nolyo kumugwêlêla muntû gegense, likamuhele.”

Bûsho kibalo kya kuimia mulambû kwê Kaisali

(Matayo 22.15-22; Maluko 12.13-17)

19Balangi babisila no Balambwili bakûlû bakebile kumukwata, onkao kibalo basingûlwêle kwana lûkêndê lûlo wêsambêle kibalo kyabo, mone batudjukile bantû.

20Kwanasho babele bamukedja Yesû no kutuma bakedji. Belonge kûba basitê, kibalo bamutêgêle ku mianda gyalê mukwêsamba, kûba bamubêke ansê gya bûkome no kitenta kya babêkali. 21Nansho babo bakedji bamubulishe, “Mulangi, twêdjê kwana wakwêsamba no kûlanga bya sitê. Twêdjê kwana gwee wênghe ndekeni, gwee walanga sitê kibalo kya ndjêla gya Kabesha Mpûngû. 22Wêtûlombole, ntê bisoga no habisoga kuimia mulambû, kwê Kaisali?”

23Mone Yesû ûsingûlwêle bulimuke bwabo wêbalombwele, 24“Munangêshe lûmea lûmo. Kûwa wêbabulishe lûkebo no sina lili byani?”

“Nobo bamuêndwêle,” lwa Kaisali.

25Hûao Yesû wêbaendwêle, “Bya Kaisali, mumue Kaisali, no bya Kabesha Mpûngû, mumue Kabesha Mpûngû.”

26Habanyonghwene kumusongela kwa mwanda gogonse alya kûgêbwa kwa bantû, no nansho begalagenie no bekene talala, kibalo kya mpêndwe gyage.

Bûshû kibalo kya kûshûka kwa baki

(Matayo 22.23-33; Maluko 12.18-27)

27 # Bilb 23.8 Bamo ba basandukayo, ûbantû balya bakwêsamba kwana baki habakashuki, bamuikêle Yesû no kumubûsha, 28#Ngib 25.5“Mulangi, Musa wêtusintêle kwana: ‘Ntê mwanabo wakya no kumusiga mukasi alê mwana, nfulo, gûlya mwinage wasigala muyenene amuyane gudjo mukyêlwe, kûba amubyalêle mwanabo wage baana.’ 29Nfulo kûbele no balûnda kiloba. Gûlya mutangi ûkwelile mukasi; mone muntû gûdjo ukile akusiga mwaana. 30Gûlya mulûnda wabûbêlê umuyanine gûlya mukyêlwe, 31no mulûnda wa bûsatû byonka nansilya. Mianda gibele byonka nansho kûbonse kiloba bonse bakile kûbûla kusiga baana. 32Nfulo, gûlya mwana mukasi ukile byonka nansho. 33Onka, sigi baki abalê kashûlwa, mwana mukasi gûlya wêkaba mukasi wa nii? Kibalo bonse kiloba babele bamukwele.”

34Yesû wêbaêndwêle: “Mungikeno gya kyaba kino, bantû bakûkwela no kûkwelana, 35mone balya babalwe kûba no ngikeno mukyaba kyakasha no mukûshûka kwa baki habakakweli no kûkwelwa. 36Bekaba nagwe masalagûlû. Habakaki byonka no banaa ba Kabesha Mpûngû, kibalo bashukile kuima kûbaki. 37#Esl 3.6Mone ku musahû gwa kihûdja kya kûnka kaya. No Musa ûlangêshe kwana bantû bakûshûka kibalo umuitile Kolo ‘Kabesha Mpûngû wa Bûlaimu, Kabesha Mpûngû wa Isaka, no Kabesha Mpûngû wa Yakobo.’ 38Nfulo gee ha Kabesha Mpûngû wabaki, nambo Kabesha Mpûngû kabalya bepoo, kibalo kwage bonse bepoo.”

39Bamo mubalya Balangi babisila: besambile, “Mulangi, waêndûla bisoga mbeela!” 40Nghimba gya hao hakûbele muntû wakumubûsha byonka mianda giinge.

Bûsho kibalo kya Kilisitu

(Matayo 22.41-46; Maluko 12.35-37)

41Kûwa Yesû wêbabulishe, “Kibalo kyakê gwa kwêsambwa kwana Kilisitu mwana wa Daudi? 42#Nghib 110.1Daudi mwine wêsambile mubûkû lya lwêmbo:

‘Kolo umulombwele Kolo wane:

Gikana kûboko kwane kwa kûlûme

43kwikêla andêkegibêka mangi gyobe kûba kikanwa kya kûbêkêla magûlû gobe.’

44Kyokûba Daudi wamwita: ‘Kolo,’ bibûba ntê, byonka Kilisitu, abe mwana wa Daudi?”

Malêngê kibalo kya Balangi babisila

(Matayo 23.1-36; Maluko 12.38-40)

45Kyaba bantû bonse lwababele bamutegelela Yesû, wêbalombwele baana babûganga bage, 46“Mwiempe no Balangi babisila kwana bakûkampwa kûêta hêta bashale mankanso gala, no kûkampwa kwimunwa kwa bûnyeme ebûlû ebantu bengê; bakûkampwa kwêkana kubikanwa bya kûgêbwa mu masese ga milombelo gya Bayuda no kwêkana hantû anyeme kukikwe; 47boo bakwêbaswinia bintû mu nsese ga bakyêlwe, mwanda bakwêmonia kwakûlonga milombelo gila! Bantû nagwe baba bekamona bûkalabale bûkata mbeela!”

Currently Selected:

Luka 20: HBT

Highlight

Copy