Luka 21

Sadaka lya madjû mukyêlwe

(Maluko 12.41-44)

1Yesû lwatûlwêle meso gage wêbamwene ba mpeta byababele babêka mulambû gwabo mukitala kya Kitotelo, 2umumwene byonka madjû gûmo mukyêlwe mulanda wakûbêka mukitala lûmea lûbêlê lûke lwamikûba. 3Wêsambile, “Sitê sitê nanimilombola madjû gûdjû mukyêlwe nanda wabêka bingê biiko mu kitala kulêmba bonse. 4Kibalo bange bonse baiminie mulambû gwabo kûlondana no bûngê bwa lûmea lwabo; mone gûdjû madjû mukyêlwe waimia kûlonda no bûlanda bwage, byonse byabele nabyo, nokine kilya kyabele mukûdjagêle.”

Yesû walagûla konwa kwa Kitotelo

(Matayo 24.1-2; Maluko 13.1-2)

5Bamo mubûkata bwa baana babûganga ba Yesû babele babanga kibalo kya Kitotelo, mwakibele kiimpêlwe no mabwe gasongwe no galengûlwe no milambû giimibwe kwê Kabesha Mpûngû. Mone Yesû wêbalombwele, 6“Gino gyonse gyamwakûmona ano hakûlê bwee likasigala egûlû lya linge; mone kintû kyonse kikonwa.”

Mudjembo no masûsû

(Matayo 24.3-14; Maluko 13.3-13)

7“Baana ba bûganga,” bamubulishe Yesû, “Mulangi mianda gigyo gya kaimina kyaba kê? Kabandêlêlo kê kekalangêsha kwana mianda gigyo agikûbwêhê kûlongeka?”

8Yesû wêbaêndwêle, “Mwilole namukasi mukebembe; kibalo bangê bekaimina. No kwêtûbêka musina lyan, nokwêsamba kwana, ‘Nene ûge!’ No kwêsamba, ‘Kuana kyaba kyashena!’ Mone benywe namukebalondi. 9Nfulo amulê kategelela musahû gwa lûgosi no byakwimina na mukatudjuki; kibalo kiyenene biimine bêlê, mone nfulo gya byonse abyalike.”

10Nfulo ûgêlêlêle kwêsamba, “Musoo gûmo gwêkalwa no musoo gûnge; bûkolo bûmo bwêkalwa no bûkolo bûnge. 11Kûntû konse kwêkaba no anda likata lya nsê, no ndjala no mitongo gya kûsambûkelana, antu hala hala; kwêkaba byesha bikata bya kûtûdjûla no kabandêlêlo kuima mwigûlû. 12Mone nghimba gya kuimina gigyo gyonse, bekemibêka bakwêkwe, bekemidjembya bekemibêka mumaboko ga bakûlû ba masese ga milombelo ga Bayuda no kwimibêka mubikûtû; mwikailwa kûgêbwa gya bamakolo ga babêkali; kibalo kya sina lyane. 13Lino likaba lyese lyenyu kûsahûla musahu gûsoga. 14#Lk 12.11-12Nfulo namukedjembya mumitêma gyenyu, hakûlê kuninga nghimba gya kyaba kibalo kya kwênenghenena gwee mwine, 15kibalo Nene mwine nankemitanga lango no mianda no lweni no mangi gyenyu hagikanyonghoni kwimilêmba no kwimiakania. 16Bange mubûkata bwenyû bekaimibwa no babyali babo, mbyalwa nenyu, bantû ba musoo gwenyu; amo no balûnda nenyu. Nobo bekeyaga bamo abûkata bwenyu. 17Bantû bonse bekemisikwa benywe kibalo kya sina lyane. 18Mone nolwêne lûnywene lûmo lwa matwe genyu halûkasimini. 19Kwa bulindili bwenyu, mwikahandya ngikeno gyenyu.

Yesû walagûla konwa kwa mwalo gwa Yelusalema

(Matayo 24.15-21; Maluko 13.14-19)

20“Amulê kamona mwalo gwa Yelusalema gwagalagalwa no basilêkale, nfulo mumanye kwana koonwa kwa gûgo mwalo kwaika. 21Kyaba kikyo balya bekaba ku Yuda batinine kûngûlû; balya bemumwalo gwa Yelusalema baime mumo, no balya bekûmabala nabakebwilili mu mwalo. 22#Osey 9.7Kibalo sigi lilyo ‘Nisigi lya kûebwa bûkalabale’, kûba gyonse gisintilwe mulusinto lûlûmbûlûke gigwanine. 23Musibo gwabo beno limi no bakonkya sigi lilyo! Kibalo kwêkaba masûsû gangê mu mwalo, no nsûngû gya Kabesha Mpûngû gikebashêla bantû ba kandje kano. 24Baangê bekeyagwa kwa bipanga, bange beka kwatwa kimakasa mu mwalo gonse; no mwalo gwa Yelusalema gwêkanyantwa no bantû ba misoo ginge kuikêla kyaba kyabo akilê kabidjêka.

Kûsha kwa Mwana wa muntû

(Matayo 24.29-31; Maluko 13.24-27)

25 # Isay 13.10; Esek 32.7; Mput 6.12-13 “Kwêkaba no kabandêlêlo kadjûba, kwesi, no tûmbalambala. Ano akandje misoo gikaba no masûsû, no kûkwatwa no kahaga kibalo kya nganingani kûlondana nonkugo gya mabêmbê ga siba. 26Bantû bekaûngêla mitêma kibalo kya mwenyo gûkata, bakûlwegelela mianda gikebakuma mukandje kibalo bûkome bwa mwigûlû bwêkaninghina. 27#Ndan 7.13; Mput 1.7Hûao bekamumona Mwana wa Muntû wakûsha mukile, wêno bûkome no ntumbo giingê. 28Kyaba mianda gigyo agilê kabamba kuimina, mwimane no kûtûlûla matwe genyu egûlû, kibalo lûhandêlo lwenyu lwaikêla.”

Milango kuima ku muntê gwa kikûdjû

(Matayo 24.32-35; Maluko 13.28-31)

29Kûwa Yesû wêbalombwele baana ba bûganga bage lûkênde lûlû: “Mulole mutê gwa kikûdjû no mitê giinge gyonse. 30Amwamona kwana gyabamba kuimia mani, musingûlûle kwana kyaba kya bûdjogo kyaikêla. 31Byonka nansho, amwakamona mianda gigyo gya longeka, samusingûlûle kwana Bûkolo bwa Kabesha Mpûngû bwaikêla.

32“Sitê sitê nanimilombola lûbyalo lûlû lwa ano mpe alukaiti ntê bibi byonse abyalilongeke. 33Gûlû no kandje bya kuêta, mone mianda gyane agikaiti mbela.

Kiyenene kûba meso

34“Mube meso! Mitêma gyenyu nagikasi kûnyemenwa nokûlya lyala, bûkolwa no mudjembo gwa ngikeno gino ntê anansho, sigi lilya lya kûsha Yesû likemiikêla kimpûlû mpandja 35kibalo kikemiikela nagwe kimpûlû mpandja kû bantu bonse bekane kokonse mukandje. 36Nfulo, mukelwe no kûlomba kyaba kyonse, kibalo mumone bûkome bwa kûlega mianda gyonse gino gikaimina, no benywe mwikamona kûba benyonghone kwêmana kûgêbwa kwa Mwana wa muntû.”

37 # Lk 19.47 Masigi gonse mugûndja Yesû ûbele walanga bantû mu Kitotelo, no masigi gonse lêngolo ûbele wagyata Kûlûgûlû lwakwêtwa lwa Mpasi no kwêkana kûko busigi bûgima mukûlomba. 38Bantû bonse baikile lukindwe bwee mu Kitotelo kibalo bamutegelele.

Currently Selected:

Luka 21: HBT

Highlight

Copy