Makətūbə̄ yā Ejekiel 3
3
1Deē ń a ɔr̄ najə̄ seḿ ní əda na:
Ḭ̄ ngōn̄ deē, ə́sa ndāŕ ndang najə̄ kə́ ɓír̄ gidə naā tə́ ń adīn̄ toó, ba gō tə́ anī aw̄ ɔr̄ najə̄ kə ngán *Israel gēé. 2m̄-tḛḛ̄ taḿ anī, ni-rāā adə̄ m-ə́sa ndāŕ ndang najə̄ kə́ ɓír̄ gidə naā tə́ ní. 3Gō tə́ anī ni ədam̄ na:
Ḭ̄ ngōn̄ deē, ə́sa ndāŕ ndang najə̄ kə́ ɓír̄ gidə naā tə́ ń m-ādī ní ādə̄ ndān̄ kemií ō, ūləń rɔ̄í ō. Adə̄ m-ə́sa ndāŕ ndang najə̄ ní. Anī ndāŕ ní nel̄ kem taḿ tə́ tītə̄ yibə̄ tejə beé.
4Deē ń a ɔr̄ najə̄ ní ədam̄ na:
Ḭ̄ ngōn̄ deē, āw̄ rɔ̄ ngán *Israel gə̄ tə́, ba ə́dádə́ najə̄ ń m-ā m-ə́daī ní. 5Tɔdɔ̄ gír de gə̄ kə́ ta kɔr̄də́ i ta tə̄rā kə́ loo ger̄ kum ngan̄g ngá̰ý n m-ə́laī kə̄ rɔ̄də́ tə́ ní alé. I ngán *Israel gə̄ n m-ə́laī kə̄ rɔ̄də́ tə́ ní. 6Ré i gír de kə́ ngá̰ý gə̄ kə́ ta kɔr̄də́ i ta tə̄rā kə́ loo ger̄ kum ngan̄g ngá̰ý, adə̄ ḭ̄ ī-ger̄ ta yādə́ ní alé n m-ə́laī kə̄ rɔ̄də́ tə́ ní anī, nin̄ a oōn̄ najə̄ yāí. 7Banī ngán *Israel gə̄ a ndigən̄ koō najə̄ yāí alé, tɔdɔ̄ nin̄ ndigən̄ koō najə̄ yāḿ alé. Tām̄ nin̄ malang ní dɔdə́ ngan̄g ngá̰ý ō, dumə̄n̄ naā ngá̰ý ō. 8Ba m-ā m̄ rāā kadə̄ dɔí a ngan̄g tītə̄ yādə́ ō, ā ī-dum̄ naā tītə̄ yādə́ ō. 9M-ā m̄-rāā dɔí kadə̄ a ngan̄g tītə̄ mbal̄ diyamā̰a̰#3.9 Diyamā̰a̰: Á̰a̰ī tū «Kum Najə̄ kə́ Ngón̄g Ngón̄g gə̄» tə́. beé ō, kadə̄ a ngan̄g mān̄ kɔkərɔ ō. Ī-lōō ɓōĺdə́ ō, ī-lōō ra ta kumdə́ tə́ a ndew ō. Tām̄ i gír de kə́ ngé mbātə́ najə̄ gə̄. 10Ni na̰y kə̄ loo kɔr̄ najə̄ tə́ seḿ ɓáý, əda na:
Ḭ̄ ngōn̄ deē, ī-nēl̄ mbīí majə ōoń najə̄ ń m-ā m-ə́daī ní ō, ī-taā najə̄ yāḿ ə̄ndā ngarā̰ kemií tə́ ō. 11Ba gō tə́ anī āw̄ rɔ̄ ngákó̰ó̰í gə̄ ń i ngán *Israel ní tə́, nin̄ ń ɔyn̄də́ dɔ gúú tə́ reēn̄ sedə́ laā ní. Ɔ̄r̄ najə̄ sedə́, ə́dádə́ na: Najə̄ ń Kɔ́ɔ̄ɓē Nə́ɓā əda ní n toó: Ká nin̄ oōn̄ najə̄ yāí aáā, oōn̄ aĺ aáā, ɔ̄r̄ najə̄ sedə́.
12Loo ń noō tə́ Ndíĺ Nə́ɓā unəm̄ nang tə́ kum kə̄ dɔɔ́, anī m-ōō najə̄ kə́ kun ndū kə̄ dɔɔ́ ngá̰ý kədań ń toō gidəḿ tə́: J-ənī pā tɔ̄ȳ Kɔ́ɔ̄ɓē loo ń ni-rāā yá̰á̰ kə́ to *kɔsə gɔn yān tū tə́ ní. 13M-ōō kōō bɔ̄gə̄ yá̰á̰ kə́ kə kumuú gə̄ ń a ɔdə naā ní ō, kōō nja púsə gə̄ kə́ kadədə́ tə́ ō. Kōō yá̰a̰ gə̄ ní ɓār̄ to ɓōĺ ngá̰ý. 14Ndíĺ unəm̄ nang tə́ kum kə̄ dɔɔ́ ní, aw̄ seḿ. Kɔ́ɔ̄ɓē əhɔm̄ kə tɔ́gəneé i kəhɔ kə́ m-ásə dum̄ tan aĺ ō, m-āw̄ i kə kemḿ kə́ nelə̄m̄ aĺ ō, wōn̄g rāām̄ ō. 15M-ūgə̄ Telabib, rɔ̄ de gə̄ ń əhɔn̄də́ aw̄n̄ sedə́ dɔ gúú tə́ adə̄ ndin̄ kadə bā Kebar tə́ ní. m̄-ndi sedə́ ndɔ̄ sīrí kə ángaləḿ kə́ nujə sák sák kɔ̄ɔ́.
Ejekiel a tél nge kum̄ loo tām̄ yā ngán Israel gə̄ tə́
(Á̰a̰ī 33.1-9)
16Gō ndɔ̄ kə́ sīrí gə̄ tə́ anī, Kɔ́ɔ̄ɓē ɔr̄ najə̄ seḿ, əda na:
17Ḭ̄ ngōn̄ deē, m-ə̄ndāī i nge kum̄ loo tə́ tām̄ yā ngán *Israel gə̄ tə́. Ā ōō najə̄ kɔrə̄ḿ ō, ā ī-tāā ngán *Israel gə̄ yā kadə̄m̄ ō. 18Dan ń m-ā m-ə́da nge rāā majaĺ na: Ā óy rɔ̄kum, ba ré ī-tāān adə̄ tūr̄ hálən ba ndiń kə kumneé alé anī, nge rāā majaĺ ní a oy sɔɔ̄ń yá̰a̰ rāān kə́ gōtə́ aĺ gə̄, banī m-ā m-ə̄ndā najə̄ yon i dɔí ḭ̄ tə́. 19Ba ré ḭ̄ ī-tāān banī ni-lōō gíŕ yá̰a̰ rāān kə́ gōtə́ aĺ gə̄ tə́ aĺ ō, lōō gíŕ hálən kə́ majaĺ tə́ aĺ ō anī, ni a oy sɔɔ̄ń yá̰a̰ rāān kə́ gōtə́ aĺ gə̄, banī ḭ̄ ā ájə rɔ̄í 20Yá̰á̰ kə́ rang ń a rāā yá̰a̰ to̰ ní n toó: Ré de kə́ gōtə́ tūr̄ gidən kɔ̄ɔ́ ta yá̰á̰ kə́ majə tə́, ba rāā yá̰á̰ kə́ majanī, m-ā m̄-rāā kadə̄ ni a əsō kum gūmbə̄ tə́ ō, ni a oy ō. Ré ḭ̄ ī-tāān najə̄ yá̰á̰ kə́ to yo ń to kété non tə́ ní aĺ anī, ni a oy sɔɔ̄ń yá̰a̰ rāān kə́ majaĺ gə̄. M-ā m-āw̄ gíŕ yá̰a̰ rāān kə́ majə kə́ kété gə̄ tə́ to̰ alé, banī m-ā m-ə̄ndā najə̄ yon i dɔí ḭ̄ tə́. 21Ba ré ī-tāā de kə́ gōtə́ ní kadə̄ rāā yá̰á̰ kə́ majaĺ alé ō, ni-lōō gírí ō anī, ni a ndi kə kumneé sɔɔ̄ń tāā ń ī-tāān ní ō, ḭ̄ ā ájə rɔ̄í ō.
Nə́ɓā əndā gúu dɔ Ejekiel tə́ kadə̄ ndi tan mbóo
22Kɔ́ɔ̄ɓē əhɔm̄ kə tɔ́gəneé ɓáý to̰ ba ədam̄ na:
Ḭ́ḭ dɔɔ́ āw̄ kem wól loo tə́, na m-ā m-ɔ̄r̄ najə̄ seí loo ń noō tə́.
23M-ḭ́ḭ dɔɔ́ m-āw̄ kem wól loo tə́ ō, anī *kɔsə gɔn yā Kɔ́ɔ̄ɓē ɔjə rɔ̄n kə̄ ndágá loo ngeé ń noō tə́. *Kɔsə gɔn ní to tītə̄ nge ń m-á̰a̰ kadə bā Kebar tə́ ní. Loo ń noō tə́ m-ə̄sō m̄-sébə kumḿ nang tə́. 24Anī Ndíĺ Nə́ɓā udə kemḿ tə́ ba un udəm̄ dɔɔ́ gogə́. Kɔ́ɔ̄ɓē ədam̄ na:
Āw̄ údə́ kújú looí ba ūtə̄ ta kújə dɔí tə́. 25Ḭ̄ ngōn̄ deē ōō! De gə̄ a tṵ́ṵ̄īn̄ kə kəlaá. Loo ń noō tə́ ā ásə teē ndágá yā ndi sedə́ to̰ alé. 26M-ā m̄-rāā kadə̄ ndo̰í a tə́ya̰ kem taí tə́, kadə̄ gír kəla ndo̰í do̰ō̰ naā yā kadə̄ ā ɔ̄r̄ najə̄ alé, adə̄ ā ásə́ ndán̄g gír de kə́ ngé dum̄ naā gə̄ ń noō to̰ alé. 27Ba ré m-ā m-āw̄ kə yá̰á̰ kógə̄ḿ yā kədadə́ kə ta kūlīí anī, m-ā m̄-rāāī ásə kɔr̄ najə̄ gogə́. Loo ń noō tə́ ā ə́dádə́ na: Najə̄ ń Kɔ́ɔ̄ɓē Nə́ɓā əda ní n toó. Ngé kə́rēý gə̄ a oōn̄ ō, ngé kə́rēý gə̄ a mbātə́n̄ koō ō. Tām̄ nin̄ i gír de kə́ ngé dum̄ naā gə̄.
Currently Selected:
Makətūbə̄ yā Ejekiel 3: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad