Makətūbə̄ yā Ejekiel 4
4
Nə́ɓā gān̄g sarya dɔ ɓē kə́ Jerusalem tə́
(4-24)
Ejekiel ō, ɓē kə́ Jerusalem kə́ a ənīnən̄ rɔ̄ɔ̄ ō
1Kɔ́ɔ̄ɓē ədam̄ ɓáý to̰ na:
Ḭ̄ ngōn̄ deē, ún bəríkə kógə̄ḿ ə̄ndā nang tə́ noí tə́, ī-rāā yá̰á̰ kə́ to tītə̄ ɓē beé dɔ tə́. Ɓē ní i kum gotə ɓē kə́ Jerusalem. 2Gō tə́ anī ɔ́jə kadə̄ madə̄ ba̰ā̰ gə̄ gīrə̄n̄ gidən. Ī-ndēr̄ bəlo gə̄ kə́ yā rɔ̄ɔ̄nəń ō, ɔ́ý nán̄g kə̄ nja ndogə̄ mbal̄ tə́ ādə̄ ra dɔ naā tə́ bing yā kənīnəń rɔ̄ɔ̄ ō, ī-tə́ndā gérger gə̄ kə yá̰a̰ rɔ̄ɔ̄ gə̄ ādə̄ gīrə̄n̄ gidən ō.
3Gō tə́ anī ún gində̄ kə́ laa kógə̄ḿ ə̄ndā tītə̄ ndogə̄ gində̄ beé, dɔ dáńsí tə́ kə ɓē ní. Ə̄ndā kumií dɔ ɓē tə́ á̰a̰n sew: Ni i kə́ ənīnən̄ rɔ̄ɔ̄. I ḭ̄ n ə̄nīn rɔ̄ɔ̄ ní. Yá̰á̰ ń ī-rāā noó i yá̰á̰ kə́ yā tāań ngán *Israel gə̄.
4Ī-to dɔ jīí kə́ geleé tə́. Kum mbang malang ń ā ī-toń dɔ jīí kə́ geleé tə́ ní, ún i yá̰a̰ rāā kə́ gōtə́ aĺ gə̄ yā ɓē ko̰o̰ kə́ *Israel tə́ dɔí tə́ ō, ī-tə́gā taí i gír kɔȳn tə́ ō. 5m̄-mērī rāā yá̰á̰ ń noō kadə̄ asə ndɔ̄ kóndóńg wań. Ndɔ̄ gə̄ ní a asən̄ naā kə kutə ɓāl̄ gə̄ ń ɓē ko̰o̰ kə́ *Israel tə́ rāań majaĺ ní. Adə̄ ā ī-tə́gā taí gír kɔȳ yá̰a̰ rāān kə́ gōtə́ aĺ gə̄ tə́ bátə́ ndɔ̄ ɓú mətá kə kutə ndōhó. 6Dan ń ndɔ̄ gə̄ ní a təgān̄ anī, ā ī-to dɔ jīí kə́ ko̰ó̰ tə́ ba ā ə̄tō yá̰a̰ rāā kə́ gōtə́ aĺ gə̄ yā ɓē ko̰o̰ kə́ *Juda ń i yá̰á̰ kə́ ɔy ní ndɔ̄ kutə sɔ́, ɓāl̄ gə̄ malang ń Juda rāań majaĺ ní, m̄-gān̄g kógə̄ḿ dɔí tə́ kə dɔ ɓāl̄ kógə̄ḿ gə̄. 7Gō tə́ anī ə̄ndā kumií dɔ ɓē kə́ Jerusalem ń ənīnən̄ rɔ̄ɔ̄ ní tə́ ō, ī-sə́ra jīí kə́ to karī kanjə̄ kūbə̄ kum kə̄ dɔ tə́ ō, ɔ̄r̄ najə̄ kə ɓē ní ādə̄m̄. 8Kum mbang malang ń ā ɔ̄rəń najə̄ kə́ yā rɔ̄ɔń kə ɓē kə́ Jerusalem ní, mā m-ā m̄-tó̰ō̰ī kə kəlaá yā kadə̄ ásə tūr̄ rɔ̄í dām̄ kə́ rang tə́ alé.
9Ɔ́ý gémē ō, kōō ɔ́rjə ō, mənjo ō, kum la̰tíi ō, tḛ̄ȳ ō, gémē kə́ ngan̄g ō, ī-ɓōkə́də́ gō naā tə́ kem səmbē kə́ kógə̄ḿ beē tə́ ō, ba ī-rāā mápá tə́. Nge ń noō i yá̰a̰ kəsa yāí kə́ kem ndɔ̄ 390 ń ā ī-toń dɔ jīí kógə̄ḿ ní tə́. 10Yá̰á̰ ń ā ə́sá ní a asə kem lāngá kə́ dūú kógə̄ḿ kə dɔ ndɔ̄ gə̄. Yá̰á̰ ń kadə̄ ā ə́sa yā ndiń bátə́ ndɔ̄ kə́ rang tə́ ní n noó. 11Ā ā̰ȳ man̄, ba ā ī-mbɔ̄jə́ man̄ ní i kem lítər kógə̄ḿ tá ā ā̰ȳ kə dɔ ndɔ̄ gə̄. 12Yá̰á̰ ń ā ə́sá ní a to tītə̄ makəla kōō ɔ́rjə beé. Ā ɔ̄r̄ makəla ní i ta kum de gə̄ tə́ malang, dɔ hor kə́ rāā kə yedə̄ de gēé#4.12 Yedə̄ deē: Rāān̄ yedə̄ deē i yá̰á̰ kə́ yḛr tə́. Adə̄ yá̰a̰ kəsa kə́ ndīr̄ dɔ hor kə́ rāā kə yedə̄ deé ní, yedə̄ rāā yá̰á̰ ní adə̄ téĺ yá̰á̰ kə́ yḛr. tə́. 13Kɔ́ɔ̄ɓē əda ɓáý to̰ na:
*Israel gə̄ a əsan̄ yá̰á̰ kə́ yḛr dan nápar de gə̄ ń m-ā m̄-tə̄ndā m̄-tḭ̄ḭ̄də́ dandə́ tə́ ní i tītə̄ ń noō. 14Loo ń noō tə́ m̄-tél m-ə́da na:
Kɔ́ɔ̄ɓē Nə́ɓā, m̄-tél de kə́ yḛr nja kógə̄ḿ alé. Əla gíŕ dūúḿ bátə́ ngɔlaā ní, dā̰ kə́ oy, aláa kə́ yá̰a̰ əhɔ rə́yā̰n naā tə́ ní, m-ə́sa aĺ ɓáý. M-ə́la dā̰ kə́ yḛr taḿ tə́ aĺ ɓáý. 15Ni-tél ədam̄ na:
Beé ɓá, m-ādī ta róbə kadə̄ ī-mbál gír yedə̄ deē kə yedə̄ man̄gá yā rāań hor ndīrəń yá̰a̰ kəsa yāí. 16Ni-əda ɓáý to̰ na:
Ḭ̄ ngōn̄ deē, ōō! M-ā m̄-rāā kadə̄ yá̰a̰ kəsa ō, man̄ ō i ngá̰ý aĺ kem ɓē kə́ Jerusalem tə́. De gə̄ a mbɔ̄jə́n̄ i yá̰a̰ kəsa ō, man̄ ō adə̄ de gə̄ a ndin̄ i kə sōlōó kə dɔ ndɔ̄ gə̄. 17Yá̰a̰ kəsa ō, man̄ ō a gətóon̄. Adə̄ jī de gə̄ a ur̄ wak kɔ̄ɔ́ ō, tɔ́gə́də́ a gətóo sɔɔ̄ń yá̰a̰ rāādə́ kə́ gōtə́ aĺ gə̄ ō.
Currently Selected:
Makətūbə̄ yā Ejekiel 4: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad