Makətūbə̄ yā Ejekiel 2
2
Nə́ɓā əla Ejekiel kə̄ rɔ̄ ngán Israel gə̄ tə́
1Ni ədam̄ na:
Ḭ̄ ngōn̄ deē, ḭ́ḭ ī-ra dɔɔ́, tɔdɔ̄ m-ā m-ɔ̄r̄ najə̄ seí. 2Dan ń ni ədam̄ najə̄ ń noō anī, Ndíl udə kemḿ tə́ ba un udəm̄ dɔɔ́. Adə̄ m-ōō najə̄ yā deē ń a ɔr̄ najə̄ seḿ ní. 3Ni ədam̄ na:
Ḭ̄ ń i ngōn̄ deē ní, m-ā m-ə́laī kə̄ rɔ̄ ngán *Israel gə̄ tə́. Nin̄ i ɓūtə̄ de kə́ ngé mbātə́ najə̄ gə̄ kə́ mbātə́mə̄n̄ kɔ̄ɔ́. Nin̄ gə̄gē, kaadə́ gə̄gē, mbātə́mə̄n̄ bátə́ ɓōólaā. 4I de kə́ ngé dɔ ngan̄g gə̄ ō, kə́ ngé kem ngan̄g gə̄ ō ń noō n m-ā m-ə́laī kə̄ rɔ̄də́ tə́ ní. Ā ə́dádə́ na: Najə̄ ń Kɔ́ɔ̄ɓē Nə́ɓā əda ní n toó: 5Ká ré nin̄ oōn̄ aáā oōn̄ aĺ aáā tām̄ nin̄ i gír de kə́ mbātə́ najə̄ gə̄ ní, a gerə̄n̄ kadə̄ *nge koō ta kógə̄ḿ i dandə́ tə́.
6Ní, ḭ̄ ngōn̄ deē ndul, ī-lōō ɓōĺdə́ ō, ī-lōō ɓōĺ najə̄ kɔr̄də́ ō. Nin̄ a ədan̄ najə̄ kə́ mbātə́ yāí ḭ̄. Adə̄ ā ɔ́jəń na ī-ndi i dan kōn̄ gə̄ tə́, aláa na i dan kókə́rang gə̄ tə́. Banī ī-lōō ɓōĺ najə̄ kɔr̄də́ ō, ī-lōō ɓōĺ ta kumdə́ ō. Tɔdɔ̄ nin̄ i gír de kə́ ngé mbātə́ najə̄ gə̄. 7Sɔɔ̄ń dɔ ngan̄g yādə́ ní, ká nin̄ oōn̄ najə̄ yāí aáā, oōn̄ najə̄ yāí aĺ aáā, yá̰á̰ ń m-ā m-ə́daī ní, ə́dádə́.
8Ba ḭ̄ Ngōn̄ deē ndul, ī-lōō rāā dɔ ngan̄g tītə̄ yādə́, banī ōō yá̰á̰ ń m-ā m-ə́daī ní. Ī-teē taí ba ə́sá yá̰á̰ ń m-ā m-ādī ní.
9Loo ń noō tə́ m-á̰a̰ jī deē kógə̄ḿ kə́ kəla kum kə̄ rɔ̄ḿ tə́ ō, jī deē ní əhɔ ndāŕ ndang najə̄ kógə̄ḿ kə́ ɓír̄ gidə naā tə́ ō. 10Jī deē ní tútə ndāŕ ndang najə̄ ní gidə naā tə́ ta kumḿ tə́. Ndangən̄ najə̄ kemeé ō, gidə tə́ ō. Yá̰á̰ ń ndangən̄ ní i pā rɔ̄nel̄ aĺ gə̄ ō, i pā yo gə̄ ō, nōō rɔ̄ gə̄ ō.
Currently Selected:
Makətūbə̄ yā Ejekiel 2: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad