Makətūbə̄ kə́ ta kəga dɔ yā Mban̄g gə̄ 2
2
Kɔjə̄ gə̄ ń Dabid adə̄ Salomo̰ pá tá kadə̄ oy ní
1Dan ń Dabid a rāā yā koy ngɔr anī ɔr̄ najə̄ kə ngōnən Salomo̰, ədan na:
2M-ā ə́yá̰ dɔ nang ń toō ngɔr, ə́hɔ rɔ̄í ngan̄g, ī-ra dəngam. 3Ī-ngɔ̄m̄ yá̰a̰ gə̄ ń Kɔ́ɔ̄ɓē Nə́ɓā yāí əda kadə̄ yā ngɔ̄m̄ ní ō, ún gō róbə yān gə̄ ō, ī-ngɔ̄m̄ *ndū najə̄ yān gə̄ ō, gō míndə gə̄ ń ni-əda kadə̄ yā rāā ní ō, jī bēl̄ loo rāā yá̰a̰ yān gə̄ ō, ī-rāā yá̰a̰ gə̄ ń ni-ɔsə seí ta rāā ní ō, tītə̄ ń i kə́ ndangəń kem *ndū najə̄ yā Moijə tə́ ní. I beé tá yá̰a̰ malang ń ā ī-rāā ní a teē yá̰a̰ majə. 4Loo ń noō tə́ Kɔ́ɔ̄ɓē a rāā yá̰á̰ ń ni-ənī míndən yā rāā kadə̄m̄ ní. Ni ədam̄ na ré ngánə́ḿ gə̄ ngɔ̄mə̄n̄ háĺdə́ majə ba njə̄rān̄ kə́ de kə́ sew gə̄ tə́ kə̄ non tə́ kə ngarā̰ kemdə́ mámák ō, kə dā̰ rɔ̄də́ malang ō anī, na m-ā m̄-nal deē kógə̄ḿ kə́ gír yāḿ tə́ dɔ kōr̄ kāgə̄ mbang kə́ *Israel tə́ alé. 5Tá ɓáý to̰ ní, yá̰á̰ ń Joab kə́ ngōn̄ Seruya rāā seḿ ní ī-ger̄ majə. I ni n tɔ̄l̄ ngol ngé rɔ̄ɔ̄ kə́ jōó gə̄ kə́ Israel tə́ ń i Abner kə́ ngōn̄ Ner ō, Amasa kə́ ngōn̄ Yeter ō ní. Ni-tɔ̄l̄də́ ndɔ̄ kə́ karī tə́ daləń ba̰ā̰#2.5 Daləń ba̰ā̰: Deē a rāā ba̰ā̰ de kə́ tɔ̄l̄nən̄ ndɔ̄ rɔ̄ɔ̄ tə́ alé. mósə́ kə́ ndɔ̄ rɔ̄ɔ̄ tə́, adə̄ mósə́ ní to ɓōdə̄n tə́ ō, tū sāā yān tə́ ō. 6Ī-rāā kə gō kum kedə̄ yāí, ba ī-lōō kəya̰n kadə̄ oy yo ɓə́ga aw̄ń ɓádá kə kem sɔlɔ́. 7Banī ī-rāā kem majə kə ngán Barjilai kə́ Galaad. Ādə̄ nin̄ i dan de gə̄ ń a əsan̄ yá̰a̰ ta tábəl yāí tə́ ní. Tɔdɔ̄ nin̄ rāān̄ kem majə seḿ dan ń m-ā m-ā̰yń ngōkó̰ó̰í Absalom ní. 8Ba á̰a̰ā̰, Simei ngōn̄ Gera kə́ Bahurim ń i de kə́ gír kaa yā Benjamḛ tə́ ní, ni i ngɔr rɔ̄í tə́. Ndɔ̄ ń m-ā̰yń ta kaw̄ kə̄ Mahanaim ní, ni ndɔ̄lə́m̄ kə najə̄ kə́ tōr̄ ngá̰ý gēé. Banī ni-reē kɔjə noḿ tə́ bā Jurdḛ tə́, adə̄ m-ə̄nī míndə́ḿ kə rī Kɔ́ɔ̄ɓēé m-ādə̄n, m-ə́da na m-ā m̄-tɔ̄lən alé. 9Banī ḭ̄ ń i de kə́ nge kum kedə̄ ní, ā ī-rāān de kə́ najə̄ gətóo dɔn tə́ tə́ alé. yá̰á̰ ń kadə̄ ī-rāā seneé ní, ā ī-ger̄. Ni i de kə́ tɔgə ngá̰ý ɓá tā ba ādə̄ oy yo mósə.
Dabid oy adə̄ Salomo̰ un gotən
(Á̰a̰ī 1 Yá̰a̰ 29.26-28)
10Dabid oy aw̄ gō kaan gə̄ tə́. Dubə̄nən̄ i kem ɓē yā Dabid tə́ Jerusalem. 11Ni-o̰o̰ ɓē dɔ *Israel gə̄ tə́ ɓāl̄ kutə sɔ́. O̰o̰ ɓē kem ɓē kə́ Hebron tə́ ɓāl̄ sīrí ō, kem ɓē kə́ Jerusalem tə́ ɓāl̄ kutə mətá gidə i mətá ō. 12Salomo̰ ndi dɔ kōr̄ kāgə̄ mbang yā bɔbə̄n Dabid tə́, ba əhɔ ko̰o̰ ɓē yān adə̄ ngan̄g.
Salomo̰ tɔ̄l̄ Adonia
13Ndɔ̄ kógə̄ḿ tə́ Adonia kə́ ngōn̄ Hagit aw̄ ənge Batəseba kə́ kó̰o̰ Salomo̰. Anī Batəseba dəjen na ké reē i reē kə́ lápə́ya nəkɔ́ wa. Anī Adonia ndigən na a̰á̰ā̰, 14ba tél ra dɔ tə́ ədan na n-sāā kɔr̄ najə̄ seneé. Anī Batəseba ədan na kə əda. 15Loo ń noō tə́ Adonia əda na:
Īkɔ́ ī-ger̄ kadə̄ ko̰o̰ ɓē i yāḿ mā. Tá *Israel gə̄ malang ndi a ngóōn̄ kadə̄ i mā n i mban̄g ní. Banī kōr̄ kāgə̄ mbang mān̄ taḿ kɔ̄ɔ́ adə̄ i ngōkó̰ó̰ḿ Salomo̰ n ndi mban̄g ní, ba i mā alé, tɔdɔ̄ i Kɔ́ɔ̄ɓē nəkɔ́ n ndigə kəndān mban̄g ní. 16N toō m-ā m̄-dəjeī yá̰á̰ kə́ kal kógə̄ḿ beē, ba ī-lōō kɔgə̄m̄.
Anī Batəseba ədan na: Əda! 17Adonia tél ədan na: Mban̄g Salomo̰ ndigə ndílí ngá̰ý ní, m̄-rāāī ɓɔ́ ba ə́dan ādə̄ adə̄m̄ Abisag kə́ Sunem kadə̄ tél dəyá̰ jīḿ.
18Batəseba əda na:
Majə, mə̄kɔ́ m-ā m-āw̄ yā kɔr̄ najə̄ kə mbangāá tām̄ yāí tə́.
19Adə̄ Batəseba aw̄ rɔ̄ mban̄g Salomo̰ tə́ yā kɔr̄ najə̄ seneé tām̄ yā Adonia tə́. Mban̄g ḭḭ dɔɔ́ tə́nī tan ba ɔsə non nang tə́ non tə́. Gō tə́ anī tél ndi nang tə́, ba adə̄ əndān̄ kōr̄ kāgə̄ mbang kógə̄ḿ kadən tə́ dɔ jī ko̰n tə́ adə̄ kó̰o̰n ndi dɔ tə́. 20Batəseba ədan na:
I yá̰á̰ kə́ sḛ́ý beē ngóy n m-ā m̄-dəjeí ní ba ī-lōō kɔgə̄m̄.
Mban̄g tél ədan na:
Kó̰ḿ, ī-dəjem̄ yá̰á̰ ń kemií gḛy ní na m-ā m-ɔ̄gī alé.
21Batəseba əda na:
Abisag kə́ Sunem ní deē a adə̄n kə ngōkó̰ó̰í Adonia kadə̄ tél nə̄yá̰n karī aĺ a? Salomo̰ tél əda kó̰o̰n na:
22Ī-dəje Abisag kə́ Sunem tām̄ yā Adonia tə́ i tām̄ yā rí tə́? Dan ń ni i nga tɔ́gə́ḿ ní, yá̰á̰ ń kadə̄ ī-dəje tām̄ yān tə́ ní i ko̰o̰ ɓē, i tām̄ yān tə́ ō, tām̄ yā Abiatar nge tun̄ yá̰á̰ tə́ ō, Joab ngōn̄ Seruya tə́ ō!
23Mban̄g Salomo̰ túbə kə rī Kɔ́ɔ̄ɓēé əda na:
Adonia ń ɓōĺ aĺ ba nāā dəje yá̰á̰ kə́ beé ń noó, ré m-ādə̄ oy aĺ anī, ādə̄ Nə́ɓā rāām̄ yá̰á̰ kə́ tōr̄ kə́ beé ba tél rāām̄ nge kə́ beé! 24Tītə̄ ń Kɔ́ɔ̄ɓē ndiń kə kumneé noō ō, mbūsə̄m̄ adə̄ m̄-ndi ngan̄g, dɔ kōr̄ kāgə̄ mbang yā bɔbə́ḿ Dabid tə́ ō, rāā adə̄ m-údə dan gír kaa yā ngār gə̄ tə́ tītə̄ ń ədań kété ō ní, ɓōólaā nəkɔ́ ń toō Adonia a oy.
25Mban̄g Salomo̰ əla Benaya ngōn̄ Yoyada adə̄ aw̄ tɔ̄l̄ Adonia. I tītə̄ ń noō n Adonia oyń ní.
Salomo̰ tə̄ɓā Abiatar Jerusalem kɔ̄ɔ́
26Gō tə́ anī mban̄g əda Abiatar *nge tun̄ yá̰a̰ na:
Āw̄ ī-ndi dɔ nang yāí tə́ Anatot, tām̄ ḭ̄ i de kə́ majə kadə̄ óy tā ba m-ā m̄-tɔ̄lī ɓōólaā alé, tɔdɔ̄ ə̄tō sandúkə yā Kɔ́ɔ̄ɓē Nə́ɓā ɓāl̄ yā bɔbə́ḿ Dabid tə́ ō, ī-tápī naā tə́ ō.
27Salomo̰ tə̄ɓā Abiatar kɔ̄ɔ́ kem kəla *tun̄ yá̰a̰ yā Kɔ́ɔ̄ɓē tə́, adə̄ najə̄ ń Kɔ́ɔ̄ɓē əda dɔ gír kojə yā Eli#2.27 Gír kojə yā Eli: Á̰a̰ī 1 Sam 2.30-36 tə́ kem ɓē kə́ *Silo tə́ ní udə gírí.
Salomo̰ tɔ̄l̄ Joab
28Najə̄ ní əsō mbī Joab tə́, tām̄ kété Joab ndigə i najə̄ yā Adonia, ba i Absalom n ni ndigə najə̄ yān aĺ ní, adə̄ ni-aw̄ ɓɔ̄ɔ̄ rɔ̄n kem kújə tandā yā Kɔ́ɔ̄ɓē tə́, ba nam̄ gajə kə́ dɔ *loo tun̄ yá̰á̰ tə́. 29Ədan̄ mban̄g Salomo̰ na Joab na a̰ȳ aw̄ ɓɔ̄ɔ̄ rɔ̄n kem kújə tandā yā Kɔ́ɔ̄ɓē tə́, na ra na i kadə̄ *loo tun̄ yá̰á̰ tə́. Anī Salomo̰ əla Benaya ngōn̄ Yoyada, ədan na kə aw̄ kə tɔ̄lən. 30Benaya udə kem kújə tandā yā Kɔ́ɔ̄ɓē tə́ ba əda Joab na:
Mban̄g əda na kə ī-teē!
Banī Joab tél ədan na:
M-ā m̄-teē alé, m-ā m-óy i loo ń toō tə́.
Benaya tél aw̄ əda mban̄g najə̄ ń Joab tūr̄ ədan ní.
31Mban̄g əda Benaya na:
Ī-rāā tītə̄ ń ədaīń noō. Ī-tɔ̄lə̄n ba ī-dubə̄n. I tītə̄ ń noō n ā únəń najə̄ yo de kə́ jōó gə̄ ń Joab tɔ̄l̄də́ kanjə̄ kumən ní kɔ̄ɔ́ dɔ gír kojə yā bɔbə́ḿ tə́ ō, dɔḿ mā tə́ ō ní. 32Kɔ́ɔ̄ɓē tél kə mósəneé ənī i dɔn tə́. Ni tɔ̄l̄ de gə̄ jōó kə́ nin̄ i de kə́ súmūú tɔȳn gə̄ ō, kə majə tɔȳn gə̄ ō. Ni-tɔ̄l̄də́ kə kaskaraá i gidə bɔbə́ḿ tə́ jəke kanjə̄ kadə̄ bɔbə́ḿ ger̄ gō. De gə̄ ń ni-tɔ̄l̄də́ ní i Abner kə́ ngōn̄ Ner ń i ngol áskar gə̄ kə́ *Israel tə́ ní ō, Amasa ngōn̄ Yeter ń i ngol áskar gə̄ kə́ *Juda tə́ ní ō. 33Ādə̄ mósə́də́ tél əsō dɔ Joab nəkɔ́ tə́ ō, dɔ ngánən gə̄ tə́ ō, ngán kaan gə̄ tə́ ō, ta kaw̄ jóo. Ba ādə̄ Kɔ́ɔ̄ɓē rāā adə̄ Dabid ō ngánən gə̄ ō, ngán kaan gə̄ ō, gír kojə yān ō, mban̄g gə̄ ń a o̰o̰n̄ ɓē gotən tə́ ō ní, ndin̄ majə ngándáńg.
34Adə̄ Benaya tél aw̄ gogə́ aw̄ ɔsə Joab tɔ̄lən, ba dubə̄n kem kújə yān nəkɔ́ Joab ń ra i kem dəla loo tə́ ní tə́. 35Mban̄g əndā Benaya gotə̄ Joab tə́ dɔ ngé rɔ̄ɔ̄ gə̄ tə́ ō, əndā Sadok *nge tun̄ yá̰a̰ gotə Abiatar tə́ ō.
Salomo̰ tɔ̄l̄ Simei
36Salomo̰ ɓāŕ Simei ba ədan na:
Ī-rāā kújə yāí Jerusalem, ī-ndi kem ɓēé, ba ī-teē āw̄ loo kə́ rang tə́ alé. 37Ndɔ̄ ń ā ī-teē tə́, adə̄ ī-teē wól man̄ Sedəron kə̄ gidə kə́rēý tə́ anī ā óý ní m-ə́daī m-ādə̄ gān̄g. Mósí a tél yā kəsō i dɔí īkɔ́ tə́.
38Simei tél əda mban̄g na:
I najə̄ kə́ majə! Kɔ́ɔ̄ḿ, m-ā m̄-rāā tītə̄ ń ə́dań noō.
Adə̄ Simei ndi Jerusalem dan i ngá̰ý. 39Kem ɓāl̄ kə́ nge ko̰ mətá tə́ anī, ɓəlo yān gə̄ jōó a̰ȳn̄ naā, aw̄n̄ ɓē Akis kə́ ngōn̄ Maaka ń i mban̄g kə́ Gat ní tə́. Dan ń Simei oō kadə̄ ɓəlo yān gə̄ i ɓē Akis anī, 40əndā síŕdí gidə kərō yān tə́ ba aw̄ Gat rɔ̄ Akis tə́, gō ɓəlo yān gə̄ tə́ tél reē sedə́ gogə́ Jerusalem. 41Ədan̄ Salomo̰ na Simei na ḭḭ Jerusalem aw̄ Gat ba na tél dɔ tə́ reē ugə̄ gogə́ ɓēé. 42Loo ń noō tə́ mban̄g əla gōn tə́ adə̄ reē ba ədan na:
m̄-ra seí adə̄ ə̄nī ndūí ta kum Kɔ́ɔ̄ɓē tə́ yā teē loo alé. Tām̄ m̄-tāī m-ə́da na ré ī-teē kem ɓēé āw̄ loo kə́rēý tə́, ká i rá gə̄gē anī a óy. Anī ī-tél ə́dam̄ na i najə̄ kə́ majə. 43Ba rāā i ba̰ý á ī-ra dɔ ndūí ń ə̄nī ta kum Kɔ́ɔ̄ɓē tə́ ní aĺ ní? I tām̄ rí tə́ á ī-dum̄ naā ba ī-rāā gō míndə ń m-ə́daī kadə̄ ī-rāā ní aĺ ní?
44Gō tə́ anī mban̄g əda Simei na:
Yá̰á̰ kə́ majaĺ gə̄ malang ń ī-rāā kə bɔbə́ḿ Dabid ní īkɔ́ ī-ger̄ majə. Kɔ́ɔ̄ɓē a rāā kadə̄ kem ndul yāí tél əsō dɔí īkɔ́ tə́, 45ba kadə̄ tɔ́r̄ ta i dɔḿ mā tə́ ō, kadə̄ kōr̄ kāgə̄ mbang yā Dabid ndi ngan̄g ta kumən tə́ ngándáńg ō. 46Mban̄g adə̄ Benaya kə́ ngōn̄ Yoyada ndūn, adə̄ teē kə Simei aw̄ tɔ̄lən. Yá̰á̰ ń Salomo̰ rāā á ndiń ngan̄g dɔ kōr̄ kāgə̄ mbang tə́ ní n noó.
Currently Selected:
Makətūbə̄ kə́ ta kəga dɔ yā Mban̄g gə̄ 2: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad