Makətūbə̄ kə́ ta kəga dɔ yā Mban̄g gə̄ 3
3
Salomo̰ taā ngōn̄ Parao̰
1Salomo̰ tél um *Parao̰, mban̄g kə́ Ejiptə. Ni-taā ngōnən əhɔń madə̄ naā seneé. Ni-aw̄ kə nə̄yá̰neé əndān kem ɓē yā Dabid tə́ Jerusalem, bátə́ kadə̄ rāań kújə mban̄g yān ō, *kújə yā Kɔ́ɔ̄ɓē ō, ndogə̄ mbal̄ kə́ gidə ɓē kə́ Jerusalem tə́ ō, adə̄ oy.
2Dan ń noō tə́ ní ngán *Israel gə̄ a tunən̄ yá̰a̰ i loo ndɔ̄ȳ gə̄ tə́ ɓáý. Tɔdɔ̄ bátə́ ɓāl̄ ń noō tə́ ní, deē rāā *kújə yā Kɔ́ɔ̄ɓē aĺ ɓáý. 3Salomo̰ rāā jī bēl̄ loo rāā yá̰a̰ gə̄ ń bɔbə̄n Dabid ədan na kə rāā ní ɔjəń tár yān kə́ tām̄ yā Kɔ́ɔ̄ɓē tə́ kə̄ ndágá. Banī ni tun̄ yá̰a̰ adə̄ Nə́ɓā ō, róō ndujə̄ nō kāgə̄ kə́ kotə majə ō, i loo ndɔ̄ȳ gə̄ tə́.
Salomo̰ dəje Nə́ɓā kum kedə̄ kə́ yā ko̰o̰ń ɓē
(Á̰a̰ī 2 Yá̰a̰ 1.2-13)
4Ndɔ̄ kə́rēý tə́ mban̄g aw̄ tun̄ yá̰a̰ Gabaon. Tɔdɔ̄ loo kə́ kḭḭ kə̄ dɔɔ́ kə́ bo tɔȳ gotə madə̄ gə̄ malang i noó. Salomo̰ tɔ̄l̄ dā̰ gə̄ dūbú kógə̄ḿ róō horoó dɔ loo ní tə́ tām̄ yā Kɔ́ɔ̄ɓē tə́. 5Dan ń Salomo̰ i Gabaon ní, Kɔ́ɔ̄ɓē Nə́ɓā ndɔ̄bən kem nī tə́ dan ndɔ̄ɔ́, ədan na kə dəjen yá̰á̰ ń kemən gḛy ní na n-a n-adə̄n. 6anī Salomo̰ tél əda Kɔ́ɔ̄ɓē na:
Kɔ́ɔ̄ɓē, ī-rāā kem ndaa ngá̰ý kə bɔbə́ḿ Dabid nge kəla yāí. Tɔdɔ̄ ni-ra dɔ ndūn tə́ ō, kə́ gōtə́ ō, kə́ súmūú ō seí. Kem ndaa yāí kə́ ngá̰ý ní to gotoó tām̄ yān tə́, adə̄ ɓōólaā ādə̄n ngōn̄ kógə̄ḿ adə̄ ndi dɔ kōr̄ kāgə̄ mbang yān tə́ gotən tə́. 7Ngɔlaā ní, Kɔ́ɔ̄ɓē Nə́ɓā yāḿ, i ḭ̄ n ə̄ndām̄ mā nge kəla yāí mban̄g gotə bɔbə́ḿ Dabid tə́ ní. Ba mā i ngōn̄ ɓáý, adə̄ m̄-ger̄ loo rāā kəla mban̄g alé. 8Tá m̄-ndi i dan gír deē yāí gə̄ ń ī-gə̄rādə́ ní tə́. Nin̄ i ngá̰ý, adə̄ deē asə tə́da kutədə́ kə gōó alé. 9Ní Kɔ́ɔ̄ɓē, ādə̄m̄ kem kə́ ger̄ najə̄ ādə̄ m̄-ndiń dɔ gír deē yāí gə̄ tə́ ō, kadə̄ m̄-gerə̄ń kɔr̄ kam̄ yá̰á̰ kə́ majə ō, kə́ majaĺ ō naā tə́. Tɔdɔ̄ kanjə̄ nge ń noō anī, de kə́ asə ndi dɔ gír deē yāí gə̄ tə́ gətóo, tām̄ nin̄ i ngá̰ý.
10Yá̰á̰ ń Salomo̰ dəje ní nel̄ Kɔ́ɔ̄ɓē, 11adə̄ ni-tél əda mban̄g na:
Ḭ̄ ī-dəjem̄ i kutə ɓālīí kə́ kadə̄ reē ta madə̄ tə́ aĺ ō, i yá̰a̰ kənge aĺ ō, i yo madə̄ ba̰ā̰í gə̄ aĺ ō, ba ī-dəje i kadə̄ kə ī-ger̄ kɔr̄ kam̄ yá̰á̰ kə́ majə ō, kə́ majaĺ ō, naā tə́ yā ko̰o̰ń ɓē kə gō gēé ní, 12m-ā m̄-rāā yá̰á̰ ń ī-dəjem̄ ní: M-ā m-ādī kum kedə̄ ō, kem kə́ ger̄ najə̄ ō. M-ā m-ādī i kadə̄ kə́ deē ənge kété noí tə́ aĺ ō, a ənge gotií aĺ ō. 13Tá yá̰a̰ gə̄ ń ī-dəjem̄ aĺ ní gə̄gē m-ā m-ādī: M-ā m-ādī yá̰a̰ kənge ō, kɔsə gɔn ō. Adə̄ bátə́ kadə̄ óyń ní, mban̄g kə́ tītīí a gətóo. 14Tá ɓáý to̰ ní, ré ún gō róbə yāḿ gə̄, adə̄ əhɔ *ndū najə̄ yāḿ gə̄ kemií tə́ ī-rāań yá̰a̰ ō, ī-rāā gō míndə gə̄ ń m-ə̄ndā dɔí tə́ kadə̄ ī-rāā ní ō, tītə̄ yā bɔbí Dabid anī, m-ā m̄-rāā kadə̄ ī-ndi kə kumií ɓāl̄ ngá̰ý.
15Salomo̰ ndól̄, banī nī yān ní n noó. Ni-tél aw̄ gogə́ Jerusalem, ba aw̄ ra ta kum Kɔ́ɔ̄ɓē tə́ no *sandúkə madə̄ naā tə́. Ni ndējə̄ Nə́ɓā *yá̰a̰ tun̄ kə́ róō horoó kə taá malang gə̄ ō, *yá̰a̰ tun̄ kə́ tām̄ yā kem kógə̄ḿ tə́ gə̄ ō, ba ta tɔ̄l̄ ta anī rāā yá̰a̰ kəsa kə́ ngá̰ý tām̄ yā de kə́ bo yān gə̄ tə́ malang.
Salomo̰ gān̄g sarya kə kum kedēé
16Ndɔ̄ kógə̄ḿ tə́ dəyá̰ ájə́ba gə̄ jōó aw̄n̄ rɔ̄ mban̄g Salomo̰ tə́, ndin̄ non tə́. 17Nge kə́ kógə̄ḿ əda na:
Kɔ́ɔ̄ ɓē gə̄, ɓɔ́ ōō najə̄ yāḿ. Mā ō, dəyá̰ ń toō ō, jə-ndi i kem kújə́ kə́ kógə̄ḿ beē tə́. Dan ń m-ójə ngōn̄ ní ni i noó kem kújə́ ní tə́. 18Rāā ndɔ̄ mətá gō tə́ anī ni ojə yān ō. De kə́ rang kə́ sejí gətóo, i jḭḭ kɔ́ jōó ngóy n jə-ndi kem kújə́ ní tə́. 19Ndɔ̄ɔ́ ndɔ̄ kógə̄ḿ tə́ anī ni to dɔ ngōnən tə́ adə̄ ngōnən oy. 20Ba dan ń m̄-to mā m̄-ɓīī anī, ni-ḭḭ dɔɔ́ dan ndɔ̄ɔ́, un ngōnə̄ḿ ń to kadəḿ tə́ ní aw̄ ənī kem tə̄rá yān tə́ ba un ngōnən ń oy kɔ̄ɔ́ ní reēń ənī kadəḿ tə́. 21Dan ń m-ḭ́ḭ dɔɔ́ kə ndɔ̄ý laā yā kadə̄ ngōnə̄ḿ mba anī, ngōn̄ i kə́ oy kɔ̄ɔ́. M-ə̄ndā ma̰ȳn kum loo kə́ unjə̄ kow tə́ anī m-á̰a̰ m̄-ger̄ kadə̄ i ngōnə̄ḿ ń m-ójən ní alé.
22Anī dəyá̰ madə̄n ní əda na:
Rɔ̄kum alé, ngōn̄ kə́ kə kumuú i ngōnə̄ḿ mā, ba ngōn̄ kə́ koy i ngōnīí ḭ̄!
Ba dəyá̰ kə́ kété ní tél əda na:
Rɔ̄kum alé, ngōn̄ kə́ koy i ngōnīí ḭ̄, ba ngōn̄ kə́ kə kumuú i ngōnə̄ḿ mā!
Dəyá̰ gə̄ ní nējə̄n̄ naā najə̄ ta kum mban̄g tə́ i tītə̄ ń noō. 23Mban̄g un najə̄ ɔr̄, əda na:
Dəyá̰ ń toō əda na: Ngōn̄ kə́ kə kumuú i ngōnə̄ḿ mā, ba ngōn̄ kə́ koy i ngōnīí ḭ̄. Dəyá̰ madə̄n əda na: Rɔ̄kum alé, ngōn̄ kə́ koy i ngōnīí ḭ̄, ba ngōn̄ kə́ kə kumuú i ngōnə̄ḿ mā.
24Tā anī mban̄g əda na kə reēn̄ kə kaskaraá kə̄ adə̄nən̄. Reēn̄ kə kaskaraá adə̄n̄ mban̄g. 25Mban̄g əda na kə gāngə̄n̄ ngōn̄ kə́ kə kumuú ní naā tə́ kə kaskaraá, kə adə̄n̄ dəyá̰ gə̄ ní. 26Anī dəyá̰ ń ngōn̄ kə́ kə kumuú i yān ní kumən o̰o̰n ngá̰ý tām̄ yā ngōnən tə́, adə̄ əda mban̄g na:
Kɔ́ɔ̄ ɓē gə̄, m̄-rāāī ɓɔ́, ādə̄n ngōn̄ kə́ kə kumuú ní ba ī-lōō tɔ̄lən!
Banī dəyá̰ madə̄n əda na:
Ī-gāngī ngōn̄ ní danaá, ādə̄ i yāḿ aĺ ō, i yān aĺ ō!
27anī mban̄g əda na kə adə̄n̄ dəyá̰ kə́ kété ní ngōn̄ ba kə tɔ̄lə̄n̄ alé, tɔdɔ̄ i ni n i kó̰o̰ ngōn̄ ní. 28Ngán *Israel gə̄ malang oōn̄ sarya ń mban̄g gān̄g ní adə̄ rɔȳn̄ mban̄g. Tɔdɔ̄ a̰a̰n̄ kadə̄ Nə́ɓā adə̄n kum kedə̄ yān yā gāngəń sarya.
Currently Selected:
Makətūbə̄ kə́ ta kəga dɔ yā Mban̄g gə̄ 3: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad