Makətūbə̄ kə́ ta kəga dɔ ń Pol ndang adə̄ Korḛntə gə̄ ní 15
15
Kərist oy ba ndól̄
1Ngákó̰ó̰ḿ gə̄, Najə̄ kə́ Majə ń m-ɔ́jə́sí á ī-ndigiī ō, ī-tāāī kem mámák ō ní, ngɔlaā m̄-ndigə ter̄ kemsí dɔ tə́. 2Sḭḭ̄ ájiī i kə ta kūl̄neé, loo ń ə́hɔniī sásáp adə̄ ni-to i kə gō jī loo kɔjə ń m-ɔ́jəńsí ní. Ré i beé aĺ anī, sḭḭ̄ ī-taāī kem i ndāńg.
3Yá̰á̰ ń m-ɔ́jə́sí ta kəga dɔ no yá̰á̰ gə̄ tə́ malang ní, i yá̰á̰ ń ɔjəmə̄n̄ mā kə̄ kété ō ní. Ɔjəmə̄n̄ kadə̄ *Kərist oy tām̄ majaĺ yājí tə́, i kə gō najə̄ ń ndangən̄ kem makətūbə̄ yā Nə́ɓā tə́ ní. 4Dubə̄nən̄ ba Nə́ɓā ndólə̄n kə ndɔ̄ kə́ nge ko̰ mətá tītə̄ ń ndangən̄neé kété kem makətūbə̄ yā Nə́ɓā tə́ ní. 5Ni-teē hɔy kə̄ rɔ̄ Piyer tə́ ō, gō tə́ anī teē hɔy kə̄ rɔ̄ ngámbang kəla gə̄ kə́ kutə gidə i jōó tə́ ō. 6Kutə gō anī ni teē hɔy kə̄ rɔ̄ ngé ndóō yá̰a̰ yān gə̄ kə́ mānə̄n̄ ɓú mí ń noō tə́, adə̄ nin̄ malang a̰a̰nən̄ kə kumdə́ ō. Ngá̰ý gə̄ dandə́ tə́ ndin̄ kə kumdə́ laā ɓáý ō, ngé kə́rēý gə̄ oyn̄ kɔ̄ɔ́ ō. 7Gō tə́ anī ni-teē hɔy kə̄ rɔ̄ Jakə tə́. Kutə gō anī ni-teē hɔy kə̄ rɔ̄ ngámbang kəla gə̄ tə́ malang.
8Ta tɔ̄l̄ ta anī, mā ń m̄-to i tītə̄ ngōn̄ kə́ ndɔ̄ kojən na̰y ɓáý ba ojənən̄ ní, ni teē hɔy kə̄ rɔ̄ḿ tə́ gōdə́ nin̄ malang tə́ ō. 9Tɔdɔ̄ mā i kə́ dūú ngá̰ý dan ngaḿbang kəla gə̄ tə́ malang. Kə́ rɔ̄kum tə́ ɓáa m-ásə kadə̄ ɓāŕmə̄n̄ ngōmbang kəla alé, tɔdɔ̄ m̄-rāā Egəlijə yā Nə́ɓā yá̰á̰ kə́ tōr̄. 10Banī Nə́ɓā rāā seḿ adə̄ m̄-tél de kə́ m̄-to beé. Ba rāā ń Nə́ɓā rāā seḿ ní gotə to karī alé, tām̄ m̄-rāā kəla tɔȳ gotə ngámbang kəla gə̄ malang. Kə́ rɔ̄kum tə́ ɓáa i mā alé, banī i rajə kə́ Nə́ɓā rajəm̄. 11Adə̄ ká i mā aké i nin̄ gə̄gē anī, yá̰á̰ ń j-ɔjə ní n noó ō, yá̰á̰ ń sḭḭ̄ ī-taāī kem ní n noó ō.
J-a j-oyiī ba Nə́ɓā a ndól̄jí
12Adə̄ j-ɔjə de gə̄ najə̄ j-əda na *Kərist ń oy ní na ndól̄. Anī i ba̰ý á ngé kə́rēý gə̄ dáńsí tə́ ədan̄ ɓáý to̰ na de kə́ koy gə̄ na a ndólə̄n̄ aĺ ní? 13Ré ngé kɔy gə̄ a ndólə̄n̄ aĺ anī, Kərist ń oy ní ndól̄ aĺ ō. 14Ba ré Kərist ndól̄ aĺ anī, najə̄ ń j-ɔjə ní i najə̄ kə́ kanjə̄ kumən ō, taā kem yāsí i taā kem kə́ kanjə̄ kumən ō. 15Ré de kə́ koy gə̄ a ndólə̄n aĺ rɔ̄kum anī, jḭḭ i de kə́ kum tə́ kə́ rɔ̄kum aĺ gə̄ yā Nə́ɓā, tɔdɔ̄ j-əda na Nə́ɓā ndól̄ *Kərist, tá ni ndólə̄n alé. 16Tɔdɔ̄ ré de kə́ koy gə̄ a ndólə̄n̄ aĺ anī, Kərist ń oy ní ndól̄ aĺ ō. 17Tá ré Kərist ń oy ní ndól̄ aĺ anī, taā kem yāsí i taā kem kə́ kanjə̄ kumən ō, sḭḭ̄ i kum majaĺ yāsí gə̄ tə́ ɓáý ō. 18Loo ń noō tə́ ní, ngé gə̄ ń taān̄ kem *Kərist pá tá kadə̄ nin̄ oyn̄ ní, tadə́ tḭ̄ḭ̄ kɔ̄ɔ́ ō. 19Ré j-əndaī kemjí dɔ Kərist tə́ i yā kadə̄ jə-ndiīneé dɔ nang tə́ laā ngóy anī, jḭḭ̄ i ngé rɔ̄ ndoō gə̄ kə́ rɔ̄ ndoō yājí tɔȳ yā gotə de gə̄ malang.
20Ba Kərist ń oy ní ndól̄ rɔ̄kum. Adə̄ ni i tītə̄ dɔ yá̰á̰ kə́ teē kété no madə̄ gə̄ tə́, kə́ ɔjə kadə̄ ngé gə̄ ń oyn̄ ní a ndólə̄n̄ rɔ̄kum tītə̄ ń ni-ndóləń ní ō. 21Tɔdɔ̄ yo reē i kə ta kūl̄ de kə́ kógə̄ḿ beē, adə̄ de gə̄ ń oyn̄ ní a ndólə̄n̄ i kə ta kūl̄ de kə́ kógə̄ḿ beē ō. 22Tītə̄ ń de gə̄ malang oyn̄ sɔɔ̄ń i Adam ní, de gə̄ malang a ndin̄ kə kumdə́ sɔɔ̄ń i Kərist ō. 23Banī nin̄ a ndólə̄n̄ i kə gō naá: Kərist i kə́ kété yādə́ malang. Kutə gō anī i deē yān gə̄, ndɔ̄ ń ni a tél yā reēń tə́ ní. 24Gō tə́ anī i ta tɔ̄l̄ ta yá̰a̰ malang dan ń *Kərist a nujə ko̰o̰ ɓē gə̄ malang ō, ngé ko̰o̰ ɓē gə̄ malang ō, a nujə tɔ́gə yā ndíĺ kə́ majaĺ gə̄ malang ō, ba tél kə ko̰o̰ ɓēé yā kəla gír jī Bɔbə̄n Nə́ɓā tə́ ní. 25Tɔdɔ̄ i gáŕ kadə̄ ni-o̰o̰ ɓē bátə́ kadə̄ Nə́ɓā tetə madə̄ ba̰ā̰n gə̄ malang rɔ̄ɔ̄, ba əladə́ gír njan tə́#15.25 K. 25: Á̰a̰ī Pā 110.1 . 26Madə̄ ba̰ā̰ kə́ gō gogə́ ń a nujən̄ seneé kɔ̄ɔ́ ní i yo. 27Tɔdɔ̄ makətūbə̄ yā Nə́ɓā əda na:
Nə́ɓā əla yá̰a̰ malang gír njan tə́.
Ba dan ń əda na əla yá̰a̰ malang gír njan tə́ ní, nəkɔ́ Nə́ɓā i gír njan tə́ ō alé. Nge ń noō to i kə̄ dɔ ndágá adə̄ unjə̄ ngá̰ý. 28Ba dan ń Nə́ɓā əla yá̰a̰ gə̄ malang gír njan tə́ oy anī, Ngōn̄ nəkɔ́ a əla dɔn gíŕ Nə́ɓā ń əla yá̰a̰ malang gír njan tə́ ní, yā kadə̄ Nə́ɓā i dɔ yá̰a̰ gə̄ tə́ malang ō, tū yá̰a̰ gə̄ tə́ malang ō.
29Ré i beé aĺ anī ngé gə̄ ń rāān̄də́ *batém tām̄ yā de gə̄ ń oyn̄ tə́ ní a rāān̄ i ba̰ý? Ré de gə̄ ń oyn̄ ní a ndólə̄n̄ aĺ anī i tām̄ rí tə́ á rāān̄ de gə̄ batém tām̄ yādə́ tə́ ní? 30Ba jḭḭ̄ kɔ́ gə̄, i tām̄ rí tə́ á jḭḭ̄ i ta yo tə́ kə kum mbang gə̄ malang ní? 31Ngákó̰ó̰ḿ gə̄, rɔ̄kum, mā i ta yo tə́ kə dɔ ndɔ̄ gə̄, tītə̄ ń sḭḭ̄ i yá̰a̰ kɔr ta rɔ̄ yāḿ kə gō ɓoo naā yājí kə Kɔ́ɔ̄ɓē yājí Jeju *Kərist ní. 32Rɔ̄ɔ̄ ń m̄-rɔ̄ɔ̄ kə dā̰ gēé kem ɓē kə́ Epejə tə́ ní, ré m̄-ra i dɔ gír̄ yā deē ndul gə̄ tə́ anī a teēm̄ i rí? Ré de gə̄ ń oyn̄ ní a ndólə̄n̄ aĺ anī, ādə̄ j-əsaī ō, j-a̰yī ō, tɔdɔ̄ bírí anī j-a j-ɔyiī#15.32 K. 32: Á̰a̰ī Ij 22.13 .
33Ādī síndə̄sí alé: De kə́ háĺdə́ majaĺ gə̄ ń deē njə̄rā sedə́ ní a nujən̄ háĺ kə́ majə yā deē. 34Ādī asəsí mbóo ō, ī-lōōī rāā majaĺ ō. Tɔdɔ̄ de kə́rēý gə̄ kə́ dáńsí tə́ gerə̄n̄ Nə́ɓā alé. M-ə́da nge ń noō i yā kəlań rɔ̄sɔl̄ dɔsí tə́.
Ngé gə̄ ń oyn̄ ba ndólə̄n̄ ní rɔ̄də́ a to i ba̰ý?
35De kə́rēý a dəje na ké de kə́ koy gə̄ a ndólə̄n̄ i ba̰ý wa? Ké rɔ̄də́ a to i ba̰ý wa?
36Ḭ̄ i mbóo deē. Kum kōō ń ī-dubə̄ ní, ré oy aĺ anī a əɓa alé. 37Yá̰á̰ ń ī-dubə̄ kadə̄ əɓa ní, i kádə́ yá̰á̰ alé banī i kumən, i kum gémē, aĺ anī i kum kōō kə́ rang. 38Gō tə́ anī Nə́ɓā adə̄ kum kōō ń ī-dubə̄ ní kádən ń kemən ndigə ní. Ni-adə̄ kum kōō kə́ tayā tayā gə̄ kádə́də́ gə̄.
39Dā̰ gə̄ ton̄ tītə̄ naā malang alé, dā̰ de gə̄ i tayā ō, dā̰ dā̰ gə̄ i tayā ō, dā̰ yel̄ gə̄ i tayā ō, dā̰ kānjə̄ gə̄ i tayā ō.
40Rɔ̄ yá̰á̰ kə́ dɔ rā̰ tə́ gə̄ to ō, rɔ̄ yá̰á̰ kə́ dɔ nang tə́ gə̄ to ō. Yá̰á̰ kə́ dɔ rā̰ tə́ gə̄ ō, yá̰á̰ kə́ dɔ nang tə́ gə̄ ō ní majən̄ tītə̄ naā alé. 41Majə yā mbang i tayā ō, majə yā nāā i tayā ō, majə yā tə́yō̰ gə̄ i tayā ō, tá dan tə́yō̰ gə̄ tə́ nəkɔ́ ní, majədə́ gə̄ tītə̄ naā aĺ ō.
42A to i beé ndɔ̄ ń de kə́ koy gə̄ a ndólə̄n̄neé tə́ ní ō. Rɔ̄ ń dubə̄n̄ ní i rɔ̄ kə́ a oy, banī rɔ̄ ń oy tá ndól̄ ní, i rɔ̄ kə́ a oy to̰ alé. 43Rɔ̄ ń dubə̄n̄ ní i rɔ̄ kə́ to kadə̄ deē kídə̄n ō, i rɔ̄ kə́ tɔ́gən gətóo ō. Banī rɔ̄ ń oy tá ndól̄ ní, i rɔ̄ kə́ to *kɔsə gɔn ō, i rɔ̄ kə́ tɔ́gən to ō. 44Rɔ̄ ń dubə̄n̄ ní, i rɔ̄ kə́ rāānən̄ i kə yá̰á̰ kə́ deē a̰ā̰ kə kumneé. Dan ń ndól̄ anī, i rɔ̄ kə́ i *Ndíl kə́ Táĺ n i nge rāā kadə̄ a ndi kə kumneé. Tītə̄ ń rɔ̄ kə́ rāā kə yá̰á̰ kə́ deē a̰ā̰ kə kumneé to ní, rɔ̄ kə́ i Ndíl n i nge rāā kadə̄ a ndi kə kumneé a to ō. 45I beé n ndangən̄ kem makətūbə̄ yā Nə́ɓā tə́ na:
De kə́ ta kəga dɔ ń i Adam ní, téĺ yá̰á̰ kə́ ndi kə kumneé.
Banī Adam kə́ gogə́ i Ndíl kə́ nge rāā kadə̄ deē ndi kə kumneé. 46I yá̰á̰ kə́ rāā kə ndílí n i nge kə́ ta kəga dɔ ní alé, banī i nge kə́ rāā kə yá̰á̰ kə́ deē a̰ā̰ kə kumneé. Yá̰á̰ kə́ rāā kə ndílí utə̄ i gō. 47De kə́ ta kəga dɔ ń rāānən̄ kə nángāá ní i de kə́ dɔ nang tə́, ba Adam kə́ nge ko̰ jōó ḭḭ dɔ rā̰ tə́ n reē. 48De kə́ dɔ nang tə́ gə̄ a ton̄ i tītə̄ de kə́ dɔ nang tə́ ō, *de kə́ dɔ rā̰ tə́ gə̄ a ton̄ i tītə̄ de kə́ dɔ rā̰ tə́ ō. 49Tītə̄ ń jə-toī tītə̄ de kə́ dɔ nang tə́ ní, j-a jə-toī tītə̄ de kə́ dɔ rā̰ tə́ ō.
50Ngákó̰ó̰ḿ gə̄, yá̰á̰ ń m̄-gḛy kəda ní n toó: Dā̰ rɔ̄ ō mósə ō asən̄ kənge *Ɓē ko̰o̰ yā Nə́ɓā aĺ ō, yá̰á̰ kə́ ndum asə kənge yá̰á̰ kə́ a ndum aĺ aĺ ō.
51Á̰a̰ī, m-ā m-ə́dásí yá̰á̰ kógə̄ḿ kə́ to loo mundə̄ tə́ kadə̄ ī-gerī. J-a j-oyiī malang alé, banī jḭḭ̄ malang ní rɔ̄jí a tūr̄ kɔ̄ɔ́, 52a tūr̄ i láẃ ngá̰ý tītə̄ kum de kə́ kənda sapə beé, dan ń bərúnjə́ kə́ ta tɔ̄l̄ ta tə́ a ɓār̄ ní. Tɔdɔ̄ kōō bərúnjə a ɓār̄, anī de gə̄ ń oyn̄ ní a ndólə̄n̄ ō, rɔ̄də́ a ndum to̰ aĺ ō, ba jḭḭ̄ ní rɔ̄jí a tūr̄. 53Tɔdɔ̄ i gáŕ kadə̄ rɔ̄ kə́ a ndum ń toō tél rɔ̄ kə́ a ndum aĺ ō, rɔ̄ kə́ a oy ń toō tél rɔ̄ kə́ a oy aĺ ō. 54Dan ń rɔ̄ kə́ a ndum ń toō a tél rɔ̄ kə́ a ndum to̰ aĺ ō, rɔ̄ kə́ a oy ń toō a tél rɔ̄ kə́ a oy to̰ aĺ ō anī, najə̄ ń ndangən̄ kem makətūbə̄ yā Nə́ɓā tə́ ní, a reē yā kudə gírí. Ndangən̄ na:
Gír rɔ̄ɔ̄ gān̄g kɔ̄ɔ́ tɔdɔ̄ rɔ̄ɔ̄ i kə́ tetə.
55Yo ń toō, tetə rɔ̄ɔ̄ yāí i rá?
Yo ń toō, yá̰á̰ kə́ ta katə yāí i rá?
56Yá̰á̰ kə́ ta katə yā yo i majaĺ, ba tɔ́gə yā majaĺ i *ndū najə̄. 57Banī jə-ndadī Nə́ɓā, tɔdɔ̄ ní adə̄jí tetə rɔ̄ɔ̄ kə ta kūl̄ Kɔ́ɔ̄ɓē yājí Jeju *Kərist.
58I beé ní, sḭḭ̄ ń i ngákó̰ó̰ḿ gə̄ kə́ m̄-táŕsí ngá̰ý ní, ə́hɔī rɔ̄sí ngan̄g ō, ādī yá̰á̰ yókə̄sí aĺ ō. Ī-rāāī kəla yā Kɔ́ɔ̄ɓē kum kə̄ kété kété kanjə̄ dəba. Tɔdɔ̄ ī-gerī kadə̄ kəla ń ī-rāāī kə gō ɓoo naā yāsí kə́ kə Kɔ́ɔ̄ɓēé ní, i kəla kə́ ndāńg alé.
Currently Selected:
Makətūbə̄ kə́ ta kəga dɔ ń Pol ndang adə̄ Korḛntə gə̄ ní 15: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad