Makətūbə̄ kə́ ta kəga dɔ ń Pol ndang adə̄ Korḛntə gə̄ ní 16
16
Yá̰á̰ kə́ kɔsə dɔ naā tə́ yā rāań kem majə
1Najə̄ kə́ dɔ yá̰á̰ kə́ kɔsə dɔ naā tə́ tām̄ yā de gə̄ yā Nə́ɓā tə́ ń m-ɔ́jə́ de gə̄ kə́ kem Egəlijə gə̄ kə́ Galasi tə́ ní, sḭḭ̄ ā ī-rāāī yāsí i tītə̄ yādə́ ō. 2Kə dɔ ndɔ̄ *dəmásə gə̄ malang ní, sḭḭ̄ kógə̄ḿ kógə̄ḿ malang, ā ɔ̄rī nar kadə̄ asə kə gō kənge ń ə́ngeī ní yā ngɔ̄m̄ ɓēé, yā kadə̄ ré m-ūgə̄ tá ī-kánī nar alé. 3Ba loo ń ré m-ūgə̄ anī, ngé gə̄ ń sḭḭ̄ ā ī-gə̄rāīdə́ ní, m-ā m-ādə̄də́ makətūbə̄ kadə̄ aw̄n̄neé kə kadə̄ karī yāsí gēé *Jerusalem. 4Ba ré i só tə́ kadə̄ mə̄kɔ́ m-āw̄ anī, nin̄ a aw̄n̄ seḿ.
Mbā ń Pol ɔjə kaw̄ ní
5Ré m-ə́nda dɔ nang kə́ Masedəwan m̄-gān̄g anī m-ā m-āw̄ loosí. Tɔdɔ̄ m-ā m̄-teē i gō nang ń noō tə́. 6Ba majanī, m-ā m̄-ndi sesí dan oy tām̄. Majanī m-ā m̄-ndi sesí ɓaraá bátə́ kadə̄ ɓāl̄ ndɔ̄ɔń, yā kadə̄ ī-rāāīneé seḿ kadə̄ m-únəń ta njə̄rā mbā yāḿ kum kə̄ kété. 7Ń toō m̄-gḛy i ka̰a̰sí kə njaḿ dɔɔ́ to̰ alé. Ré Kɔ́ɔ̄ɓē ndigə anī, m-ā m̄-ndi sesí dan təsó sḛ́ý.
8Ɓá tā ba m-ā m̄-ndi Epejə tə́ laā bátə́ nāā *Pa̰təkotə tə́. 9Tɔdɔ̄ ta róbə i kə́ teē bo ngá̰ý tām̄ yā kəla yāḿ tə́, ba ngé ba̰ā̰ḿ gə̄ i ngá̰ý.
10Ré Timote ugə̄ rɔ̄sí tə́ anī, ī-lōōī rāā kadə̄ ni-ndi kə ɓōló dansí tə́, tɔdɔ̄ ni a rāā i kəla yā Kɔ́ɔ̄ɓē tītə̄ yāḿ ō. 11I beé ní, ādī deē kógə̄ḿ kídə̄n alé. Ba ī-rāāī seneé ādə̄ ni-tél reē ugə̄ń gogə́ rɔ̄ḿ tə́ kə kem kə́ sɔl̄ lɔmɔɔ́, tɔdɔ̄ m-ā m̄-ngóōn naā tə́ kə ngákó̰ó̰jí gēé.
12Ba yā ngōkó̰ó̰jí Apolos tā anī, m-ɔ́sə seneé ngá̰ý ta kaw̄ loosí naā tə́ kə ngákó̰ó̰jí gēé, banī ni-gḛy kaw̄ ngɔr ń toō tə́ aĺ ɓáý. Ré ənge ta róbə́ tá a aw̄ ɓáý.
Ta ngóy kɔjə gə̄ yā Pol ō, lápə́ya yān ō
13Ī-ndiī dɔ rɔ̄sí tə́ ō, ī-raī ngan̄g dɔ taā kem tə́ ō, əhɔī rɔ̄sí tɔgə ō, ādī tɔ́gə́sí to ō. 14Ī-rāāī yá̰a̰ malang kə tárá.
15Ī-gerī Esətepanas nin̄ kə de kə́ kem kújə yān tə́ gə̄: Ī-gerī kadə̄ dɔ nang kə́ Akayi tə́ ní, i nin̄ n taān̄ kem kété ō, əndān̄ rɔ̄də́ ta kəla yā de gə̄ yā Nə́ɓā tə́ ō ní. 16I beé ní, ōōī ta de kə́ tītə̄ ń noō gə̄ ō, náā nəkɔ́ ń rāā kəla sedə́ ō, a̰a̰ tápə̄ sedə́ ō ní, ōōī ta kɔ́ɔ̄ ō.
17Rɔ̄ḿ nelə̄m̄ ngá̰ý najə̄ yā Esətepanas tə́ ō, Portunatus tə́ ō, Akaikus tə́ ō. Nin̄-adə̄mə̄n̄ yá̰á̰ ń m̄-nal̄ sɔɔ̄ń gətóo kə́ sḭḭ̄ ī-gətóoī rɔ̄ḿ tə́ ní. 18Nin̄-rāān̄ adə̄ kemḿ tetə kə̄ nang tə́, tītə̄ ń rāān̄neé adə̄ kemsí sḭḭ̄ tetə kə̄ nang tə́ ō ní. Majə kadə̄ i-gerī ndigə de kə́ beē gə̄.
19De gə̄ kə́ kem Egəlijə gə̄ kə́ dɔ nang kə́ Aji tə́ rāān̄sí lápə́ya. Akilas ō, Pərisil ō, naā tə́ kə de gə̄ kə́ kem Egəlijə tə́ ń a kánə̄n̄ naā kem kújə yādə́ nin̄ tə́ ní, rāān̄sí lápə́ya kə gō ɓoojí naā kə Kɔ́ɔ̄ɓēé. 20Ngákó̰ó̰sí gə̄ malang rāān̄sí lápə́ya, ī-ɓirī naā dagə ī-rāāīneé naā lápə́ya kə́ loo ngákó̰o̰ naā gə̄ tə́.
21I mā Pol n m̄-ndang lápə́ya gə̄ ń toō kə jīḿ mə̄kɔ́ m-ādə̄sí ní.
22Ré de kə́rēý táŕ Kɔ́ɔ̄ɓē Jeju *Kərist aĺ anī, ādə̄ ndɔ̄ĺ i dɔn tə́.
Marana ta#16.22 Marana ta i kə ta Aram, kumən na i Kɔ́ɔ̄ɓē yājí ī-reē! .
23Ādə̄ Kɔ́ɔ̄ɓē Jeju rāā kem majə sesí.
24m̄-táŕsí malang kə gō ɓoo naā yājí kə́ kə Jeju Kərist.
Currently Selected:
Makətūbə̄ kə́ ta kəga dɔ ń Pol ndang adə̄ Korḛntə gə̄ ní 16: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad