Makətūbə̄ kə́ ta kəga dɔ ń Pol ndang adə̄ Korḛntə gə̄ ní 14
14
Najə̄ kə́ rang kə́ dɔ yá̰a̰ gə̄ ń Ndíĺ kə́ Táĺ adə̄ de gə̄ karī tə́ ní
1Adə̄ ī-sāāī tár kadə̄ ə́ngeī kété no yá̰a̰ gə̄ tə́ malang. Ī-sāāī yá̰a̰ gə̄ ń *Ndíĺ kə́ Táĺ a adə̄ de gə̄ karī ní kadə̄ ə́ngeī ō. Ba mandang ɓáa ādī i tɔ́gə *kəda najə̄ kə́ Nə́ɓā əndā tasí tə́. 2Deē ń ɔr̄ najə̄ kə ta kə́ tayā ní, ɔr̄ i kə de gēé alé, banī i kə Nə́ɓāá, tɔdɔ̄ de kə́ ger̄ kum najə̄ kɔrə̄n gətóo. Ni-əda najə̄ kə́ rɔ̄kum gə̄ kə́ ton̄ loo mundə̄ tə́ i kə ta kūl̄ tɔ́gə́ Ndíl. 3Banī *nge kəda najə̄ kə́ Nə́ɓā əndā tan tə́ ní, ɔr̄ najə̄ i kə de gēé kadə̄ nin̄-taān̄ kem kum kə̄ kété kété ō, i yā kəlań go̰ kemdə́ tə́ ō, i yā sɔlə̄ń kemdə́ ō. 4Nge ń ɔr̄ najə̄ kə ta kə́ tayā ní, mbūsə̄ i gír taā kem yān nəkɔ́ kadə̄ ngan̄g. Ba nge ń əda najə̄ kə́ Nə́ɓā əndā tan tə́ ní, mbūsə̄ i gír taā kem yā ngé kán̄ naā gə̄ malang kadə̄ ra ngan̄g.
5m̄-ndigə ngá̰ý kadə̄ sḭḭ̄ malang ɔ̄rī najə̄ kə ta kə́ tayā gə̄. Banī ré ə́daī najə̄ kə́ Nə́ɓā əndā tasí tə́ anī, a nelə̄m̄ ngá̰ý tɔȳ ɓáý to̰. *Nge kəda najə̄ kə́ Nə́ɓā əndā tan tə́ tɔȳ nge kɔr̄ najə̄ kə ta kə́ tayā gə̄. Ba ré nge kɔr̄ najə̄ kə ta kə́ tayā gə̄ əda kum najə̄ ní adə̄ ngé kán̄ naā gə̄ malang əngen̄neé tɔ́gə anī, *nge kəda najə̄ kə́ Nə́ɓā əndā tan tə́ tɔȳn alé. 6Ngákó̰ó̰ḿ gə̄, tītə̄ ń toō ré m-āw̄ loosí, ba m-ɔ̄r̄ najə̄ sesí i kə ta kə́ tayā gə̄ ní, a ə́ngeī i rí tū najə̄ ń m-ɔ̄r̄ sesí tə́ ní? Ā ə́ngeī yá̰á̰ kógə̄ḿ tū tə́ alé. Ba ré m-ə́dásí yá̰á̰ kə́ Nə́ɓā teē kumḿ dɔ tə́, aláa yá̰á̰ kə́ m̄-ger̄, aláa najə̄ kə́ Nə́ɓā əndā taḿ tə́, aláa m̄-ndóōsí yá̰á̰ kógə̄ḿ anī, ā ə́ngeī yá̰a̰ tū najə̄ kɔrə̄ḿ tə́.
7Yá̰á̰ kə́ ɓār̄ gōsə̄ gə̄ kə́ tītə̄ nal, aláa kənde ní, ré ɓārə̄n̄ unjə̄ aĺ anī, deē a ger̄ ɓār̄ nal i ba̰ý ō, ɓār̄ kənde i ba̰ý ō. 8Ba ré bərúnjə ɓār̄ kə gōó aĺ anī, i náā n a ndi dɔ rɔ̄n tə́ tām̄ yā rɔ̄ɔ̄ tə́ ní? 9I tītə̄ ń noō tām̄ yāsí sḭḭ̄ tə́ ō: Ré najə̄ ń ɔ̄rī kə ta kə́ tayāá ní kumən unjə̄ aĺ anī, deē a ger̄ kum najə̄ kɔr̄sí i ba̰ý? Tɔdɔ̄ najə̄ ní ɓār̄ i kə̄ ɓōdə̄ loo tə́ karī.
10Gír ta gə̄ i ngá̰ý dɔ nang tə́ laā, banī ta gə̄ ń noō kógə̄ḿ kógə̄ḿ malang ní, i kə kumdə́ gēé. 11Ré ta ń deē ɔr̄ ní m̄-ger̄ kum aĺ anī, nge kɔr̄ najə̄ ní a rāām̄ mā i tə̄rā tə́ ō, mā m-ā m̄-rāān ni i tə̄rā tə́ ō. 12I beé ní, tītə̄ ń sḭḭ̄ ī-sāāī kənge yá̰a̰ gə̄ ń Ndíl a adə̄ de gə̄ karī ngá̰ý ní, ādə̄ ī-sāāī i ngé gə̄ ń a rāān̄ kadə̄ ngé kán̄ naā gə̄ taān̄ kem kum kə̄ kété kété ní.
13I tām̄ najə̄ ń noō tə́ n majə kadə̄ nge kɔr̄ najə̄ kə ta kə́ tayā dəje Nə́ɓā kadə̄ adə̄n tɔ́gə kəda kum najə̄ kɔrə̄n gə̄ ní. 14Tɔdɔ̄ ré m̄-ndɔ̄ȳ Nə́ɓā kə ta kə́ tayā gə̄ anī, ndílə́ḿ ndɔ̄ȳ Nə́ɓā ɓá tā, banī kur̄ dɔḿ rāā kəla alé. 15I beé ní m-ā m̄-rāā i ba̰ý tā? M-ā m̄-ndɔ̄ȳ Nə́ɓā kə ndílə́ḿ ō, m-ā m̄-ndɔ̄ȳ Nə́ɓā kə kur̄ dɔḿ ō. M-ā m-ə̄nā pā kə ndílə́ḿ ō, m-ā m-ə̄nā pā kə kur̄ dɔḿ ō. 16Tām̄ ré ḭ̄ ī-ndadə̄ ādə̄ Nə́ɓā i kə ta kə́ *Ndíĺ kə́ Táĺ adī ngóy anī, de kə́ karī ń ndi dan ngé kán̄ naā gə̄ tə́ á ni-ger̄ kum najə̄ kɔrīí aĺ ní, a ndigə najə̄ gōí tə́ yā kəda na: *Adə̄ i tītə̄ ń noō i ba̰ý? 17Ḭ̄ ī-ndadə̄ majə ngá̰ý ādə̄ Nə́ɓā rɔ̄kum, banī ndadə̄ yāí ní mbūsə̄ gír taā kem yā de kə́ rang adə̄ ra ngan̄g alé.
18m̄-ndadə̄ Nə́ɓā najə̄ kɔr̄ ń m-ɔ̄r̄ najə̄ kə ta kə́ tayā gə̄ tɔȳsí malang ní. 19Banī dan ngé kán̄ naā gə̄ tə́ anī, m̄-gḛy kɔr̄ najə̄ kə́ kadə̄ deē ger̄ kum gə̄ ní yā kɔjəń de gə̄ yá̰a̰ kadə̄ gerə̄n̄, tɔȳ kɔr̄ najə̄ dūbú kutə kə ta kə́ tayā gə̄.
20Ngákó̰ó̰ḿ gə̄, najə̄ kə́ dɔ ger̄ najə̄ tə́ ní, ādə̄ sḭḭ̄ i ngáń kə́ dūú gə̄ loon tə́ alé, ba ré i najə̄ kə́ dɔ yá̰á̰ kə́ majaĺ tə́ ɓáa, ādə̄ sḭḭ̄ i ngáń kə́ dūú gə̄ loon tə́. Najə̄ kə́ dɔ ger̄ najə̄ tə́ ní ādə̄ sḭḭ̄ i de kə́ tɔgə gə̄ loon tə́. 21Najə̄ ń ndangən̄ kem makətūbə̄ *ndū najə̄ tə́ ní n toō:
I de kə́ ta yādə́ i ta kə́ rang n m-ā m-ɔ́ýdə́ yā kɔrə̄ń najə̄ kə gír de gə̄ ń toō ní.
I tə̄rā gə̄ n m-ā m̄-ndə̄mā tām̄ tadə́ yā kɔrə̄ń najə̄ sedə́ ní.
Ká i tītə̄ ń noō gə̄gē anī, nin̄ a ndigə̄n̄ koō najə̄ yāḿ alé. Najə̄ ń Kɔ́ɔ̄ɓē əda ní n noó#14.21 K. 21: Á̰a̰ī Ij 28.11-12.
22Adə̄ ta kə́ tayā gə̄ i yá̰a̰ kɔjə yá̰a̰ tām̄ yā ngé taā kem gə̄ tə́ alé, banī i yá̰a̰ kɔjə yá̰a̰ tām̄ yā ngé taā kem aĺ gə̄ tə́. Ba *kəda najə̄ kə́ Nə́ɓā əndā ta deē tə́, i yá̰a̰ kɔjə yá̰a̰ tām̄ yā ngé taā kem gə̄ tə́, banī i yá̰á̰ kɔjə yá̰a̰ tām̄ yā ngé taā kem aĺ gə̄ tə́ alé.
23Adə̄ tītə̄ ń toō ngé taā kem gə̄ malang kánə̄n̄ naā, ba nin̄ malang udən̄ kə̄ rɔ̄ kɔr̄ najə̄ tə́ kə ta kə́ tayā gə̄. Anī de kə́ ger̄ yá̰a̰ aĺ gə̄, aláa i kə́ ngé taā kem aĺ gə̄ ń udən̄ kújú gōsí tə́ ní, a rāān̄sí ngé kɔ̄r̄ gə̄ tə́ aĺ a? 24Ba ré ngé taā kem gə̄ malang ədan̄ i najə̄ kə́ Nə́ɓā əndā tadə́ tə́, tá nge taā kem aĺ kógə̄ḿ, aláa i de kə́ ger̄ yá̰a̰ aĺ kógə̄ḿ, udə gōdə́ tə́ anī, najə̄ ń ni-oō ní rāā adə̄ ni-ger̄ majaĺ yān. Najə̄ malang ń ni-oō ní rāā sarya seneé ō, 25yá̰a̰ gə̄ ń ton̄ kemən tə́ loo mundə̄ tə́ ní, gíŕdə́ teē dɔɔ́ malang ō. Loo ń noō tə́ ni-ɔsə non nang tə́ no Nə́ɓā tə́ rɔȳn ba əda wáńg kə̄ ndágá na Nə́ɓā i dansí tə́ rɔ̄kum.
Yá̰á̰ kə́ rāā loo kán̄ naā tə́ kadə̄ yá̰a̰ gə̄ njə̄rān̄neé kə gōó majə
26Loo ń noō tə́ ní ngákó̰ó̰ḿ gə̄, ā ī-rāāī i ba̰ý? Dan ń a ī-kanī naā anī, ré deē kógə̄ḿ aw̄ kə pā kógə̄ḿ ō, de kə́rēý aw̄ kə yá̰á̰ kógə̄ḿ kə́ yā kadə̄ ni-ndóō de gə̄ ō, de kə́ rang aw̄ kə yá̰á̰ kə́ Nə́ɓā teē kumən dɔ tə́ ō, de kə́ rang ɓáý to̰ aw̄ kə najə̄ kógə̄ḿ kə́ yā kɔr̄ kə ta kə́ tayāá ō, de kə́ rang ger̄ kum najə̄ ní yā kəda ō anī, ādə̄ i kə́ yā rāā yá̰a̰ gə̄ ń noō malang yā kadə̄ ngé kán̄ naā gə̄ taān̄neé kem Kɔ́ɔ̄ɓē kum kə̄ kété kété. 27Ré a ɔrə̄n̄ najə̄ i kə ta kə́ tayā gə̄ anī, ādə̄ de gə̄ jōó, aláa mətá ɔrə̄n̄ kə gō naá, ba ādə̄ deē kógə̄ḿ əda kum najə̄ gə̄ ń nin̄-ɔrə̄n̄ ní. 28Ré de kə́ yā kə́da kum najə̄ gə̄ ní gətóo anī, ādə̄ nin̄ kógə̄ḿ kógə̄ḿ lōōn̄ gír kun ndūdə́ kə̄ dɔɔ́ kɔrə̄ń najə̄ dan ngé kán̄ naā gə̄ tə́, ba ādə̄ ɔrə̄n̄ najə̄ kə rɔ̄də́ nin̄ kɔ́ gɔ̄ɔ́ ō, kə Nə́ɓāá ō. 29Ba yā *ngé kəda najə̄ kə́ Nə́ɓā əndā tadə́ tə́ gə̄ ní, ādə̄ de gə̄ jōó aláa mətá dandə́ tə́ ɔrə̄n̄ najə̄, ba ādə̄ gotə gə̄ əndān̄ ma̰ȳ najə̄ gə̄ ń nin̄-ɔrə̄n̄ ní. 30Banī ré Nə́ɓā teē kum de kə́rēý kə́ ndi dandə́ tə́ dɔ yá̰á̰ kógə̄ḿ tə́ anī, ādə̄ de kə́ kété ní lōō najə̄ yān. 31Tɔdɔ̄ sḭḭ̄ malang ásiī *kəda najə̄ kə́ Nə́ɓā əndā tasí tə́ kə gō naá kógə̄ḿ kógə̄ḿ, yā kadə̄ de gə̄ malang gerə̄n̄neé yá̰a̰ ō, əngen̄neé tɔ́gə ō. 32Ndíl *nge koō ta i nge kəla dɔn gíŕ tɔ́gə yā *nge koō ta tə́. 33Tɔdɔ̄ Nə́ɓā i Nə́ɓā kə́ nge rāā yá̰á̰ kə́ a̰a̰ gō naā aĺ alé, banī ni i Nə́ɓā kə́ nge rāā kadə̄ lápə́ya to.
Tītə̄ ń a rāān̄neé loo kán̄ naā gə̄ malang yā de gə̄ yā Nə́ɓā tə́ ní, 34majə kadə̄ dəyá̰ gə̄ ndin̄ tadə́ mbóo loo kán̄ naā tə́, tɔdɔ̄ adə̄n̄də́ ta róbə kɔr̄ najə̄ alé. Tītə̄ ń *ndū najə̄ yā Nə́ɓā ədań ō ní, ādə̄ nin̄-sɔlə̄n̄ dɔdə́. 35Ré nin̄-sāān̄ ger̄ kum yá̰á̰ kə́rēý anī, ādə̄ dəjen̄ ngaadə́ gə̄ kújú ɓēé. Tɔdɔ̄ kadə̄ dəyá̰ ɔr̄ najə̄ dan ngé kán̄ naā gə̄ tə́ ní, i yá̰á̰ kə́ to rɔ̄sɔl̄.
36Najə̄ yā Nə́ɓā teē i loosí a? Aké i sḭḭ̄ ngóy n najə̄ yā Nə́ɓā ugə̄ loosí ní a? 37Ré de kə́rēý taā kem kadə̄ ni i *nge koō ta, aláa ni i de kə́ nge rāā yá̰a̰ gō yā Ndíl tə́ anī, majə kadə̄ ni-ger̄ kadə̄ yá̰á̰ ń m̄-ndang m-ādə̄sí ní i gō míndə́ Kɔ́ɔ̄ɓē. 38Ba ré de kə́rēý ger̄ kadə̄ i ndū Kɔ́ɔ̄ɓē aĺ anī, kumən na Nə́ɓā ger̄ deē ní alé#14.38 K. 38: De kə́rēý gə̄ tūrə̄n̄ kum najə̄ ń toō ədan̄ na: Kadə̄ usə gotə de gə̄ dɔ deē ní tə́ alé..
39I beé ní ngákó̰ó̰ḿ gə̄, ādī kemsí gḛy kadə̄ ī-téliī *ngé koō ta gə̄ ō, ī-lōōī kɔgə̄ de gə̄ kɔr̄ najə̄ kə ta kə́ tayā gə̄ ō. 40Ba ī-rāāī yá̰a̰ malang kə gōó ō, ādī yá̰a̰ malang un gō naā jerere ō.
Currently Selected:
Makətūbə̄ kə́ ta kəga dɔ ń Pol ndang adə̄ Korḛntə gə̄ ní 14: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad