Galasiɛ́ŋ 3

Gibilígis giá mpuán ya Gileénde

1Éyi, biegu biá Galatí! Ányá uwaánúag gilɔg giá gileénde uguá nuɔ́l? Henyé bɔ́mɔnúɔyɔ́n nigué niá Yésuse Klístus uguá nuag hana númabá hɔ́. 2Buand ubuɔ́ yámbanɔ́ áneé nuŋóbie búbúényé: numadáŋáab Gileénde giá Budányɛ uguá guɔ́b naá uguá guágɔdɛ́m uguá Ginɔ́g giá Nsɔ́m lí uguá binen bigodi? 3Naánanyá núnya nuábá biegu ninam niáguɔ́? Ubuɔ́ númagɔns na Gileénde giá Budányɛ nuáguamba áneé nuyib buɔ́ na bugaga buánɔ mbánan a? 4Muand gidigid umúmenúegénín uguánɔ guá nusɔ́da, kásɛ búmabá gá gilé a? Ɛ́ɛɛ́, búdibá búábá gá gilé! 5Agaá Uhaluá únúhuánaá Gileénde giég wond wala biseyi uguánɔ guá ɔlɔŋ, kásɛ waáguala gá giagiá nuébinen bigodi lí ugúnya ana nuɔ́guɔ́bɔn nuond nuádáaban Ginɔ́g giá Nsɔ́m?

Gigodi gídióguondonye mɔndɔ gindényé agá eŋís ya Uhaluá

6Ana bɔ́mɔyá gá buónyi buá Áblahám: «Áblahám umaág ɔdɛ́m huég uguá Uhaluá, buand buáguɔ́ únya haná mɔndɔ wa gindényé.» 7Ɔ́bɔ́nɔ́n buɔ́ gɔg: beédébi bɔ́ bánya bunɔŋ buá Áblahám. 8Ŋŋɔ́ŋɛ símɔyɛd áneé Uhaluá wonóndie abádiabá bayúdɛn gindényé egég gá eŋís gá busió buɔ́b buá guágɔdɛ́m. Buand buáguɔ́ símodógínyé gisiósio gá Áblahám ginɔ́g giá nsɔ́m igiɛ́: «Uhaluá wanáfɔn maán má guísi gidigid uguáhɔ guélém.» 9Anagányɛ gɔg, abánya beédébi bányɛ abafunánɔ ɔlɔŋ na Áblahám, eŋédébi. 10Muɛ́d, ebébineneé gigodi, gilɔm gíébinen bɔ́, gá giagiá búnyɛ ubúɔ́ŋɔ́n áneé: «Údiébinen kanda nidɔgíná umúnya umuɔ́ŋɔ́n gidigid uguá yubu hiá bigodi, ugányɛ wanábia gilɔm.» 11Búnyɛ muɛ́d agá budányɛ áneé, ta mɔndɔ udióguólon gindényé agá eŋís ya Uhaluá uguélém guá gigodi, gá giagiá búnyɛ ubúɔ́ŋɔ́n áneé: «Unyaá gindényé uguá guágɔdɛ́m, wanábia nusɔ́da.» 12Gɔgaá, gigodi gídigódi buónyi na guágɔdɛ́m, émébinen bibídína gidigid biá gigodi, ɔnɔ́sɔ́dɔn uguélém guá biɛ́. 13Klístus umasuá gá díháŋídɛn gá gilɔm giá gigodi. Umuányɛ yɔ́ gilɔm gímégimbin gásɔ gá busió. Gá giagiá, búnyɛ ubúɔ́ŋɔ́n áneé: «Bámásɔŋ mɔndɔ uguá budɛ́, tábɔ́ áneé gilɔm gínyɛ naá waáguɔ́.» 14Gá giagiá, gifɔn igiɛ́ Uhaluá úmaádánɛ́n Áblahám, abádiabá bayúdɛn súsɔ́n bánádáŋáab giɛ́ uguélém guá Yésuse, guond didáŋáab Gileénde igiɛ́ Uhaluá úmaádídánɛ́n uguá guágɔdɛ́m.

Na gigodi na ndán

15Beliméen, ŋŋɔ́l nulinsa uguá gual guá bandɔ: Mɔndɔ úmal gibídína uguá gindényé, ta mɔndɔ udibá wa sulie giɛ́ ugúnya ana ta guɔ́hígɛn buand. 16Búnyɛ gá Áblahám naá gá busió buá uwenébíbíénenu uguég guá nugɔg Uhaluá úmal ndán. Búdibá ubúɔ́ŋɔ́n áneé: «Naá gá busió buá abánya uguég guá nugɔg,» hana búmabá gá bandɔ giod. Ɛ́ɛɛ́, búnyɛ gá mɔndɔ omoómi. Ɛɛ́ɛ, Ŋŋɔ́ŋɛ síɔ́guɔya áneé: «Naá gá busió buá ugebíbíénenu uguáhɔ guá nugɔg.» Anagányɛ gúnya áneé Klístus. 17Nugedie nuámɛ núnuényé: Uhaluá umaágágual gibídína giá gindényé. Gigodi igímosiól duɔŋ duɔns dútánɔ dúníhi na nitín na dúad egélém gá ndán ya Áblahám, gídibá giá sulie gibídína igigányɛ gíónd gísúgie ndán. 18Mmába gɔg budáŋ ubuɔ́ Uhaluá úmadídánɛ́n búóguólonin uguélém guá gigodi, búdibánd uguá ndán. Henyé, búnyɛ uguá ndán Uhaluá úmedíyé Áblahám ginɔ́nɛ́n giég 19Agányɛ gɔg, kasɛ́ bubuand uyɔɔ́ gigodi gíálanɔ́? Gímɔbíɔ́hígɛn gá guág bigua agá budányɛ, gueneg hana unyaá uguá nugɔg unuɔ́ Uhaluá úmadánɛ́n Áblahám wónólésiegénú. Gigodi igigányɛ, búnyɛ bilúna bíbímág giɛ́ agá budányɛ uguélém guá edúmbínyi. 20Gɔgaá, búdiónduguóhon edúmbínyi uguá ginɛŋ igiɛ́ mɔndɔ únya omoómi, guond, Uhaluá, úmuanyɛ, unyɛ omoómi. 21Gigodi gɔg gíánuanan na ndán ya Uhaluá a? Búdibá nɔ́! Uhaluá wéméŋin bandɔ gigodi giá huán bɔ́ nusɔ́da, késie búnyɛ gímuanyɛ gígíóndonyeé mɔndɔ gindényé egég gá eŋís. 22Gɔgaá, Ŋŋɔ́ŋɛ símɔyá áneé bandɔ gidigid bá guísi bányɛ biɔ́lɛ biá gilɔga, gá gueleé beédébi bádáŋáab ndán iyɛɛ́ Uhaluá úmahuá bɔ́ uguɔ́b guá guágɔdɛ́m uguá Yésuse. 23Gá gueleé guágɔdɛ́m gúésieg, dimabá uguá buɔ́lɛ buá gigodi na gígan áneé Uhaluá udídambunɛn guágɔdɛ́m guáguɔ́. 24Anagányɛ gɔg, gigodi gímabá egíg wasɔ gueneg hana Klístus úmesíeg, gá gueleé dibá gindényé agá eŋís ya Uhaluá uguá guágɔdɛ́m. 25Gɔgaá, egélém gá guágɔdɛ́m guesieg, didiɔ́nduguɔ́bɔnɛn na egíg ugányɛ. 26Gá giagiá, uguá guágɔdɛ́m nunyɛ banuá gidigid baán bá Uhaluá uguá Yésuse Klístus. 27Ɛɛ́ɛ, banuá gidigid numeébíyúmínyé uguá Klístus, nuganyɛ mpónyé siég. 28Búdibánd áneé ugándɔ uyeényé, ɔnúmɔndɔ unó, udiábá giɔ́lɛ uyeényé, giɔ́lɛ gíné, udiábá wa bayúdɛn uyeényé, wa bayúdɛn unó, gá giagiá, banuá gidigid nunyɛ omoómi uguá búlada na Klístus. 29Hana núɔ́bɔ́bɔninaá na Klístus, nunyɛ gɔg uguá nugɔg nuá Áblahám, uguá guɔyɛd guá ndán, nunyɛ begíndigind.

Currently Selected:

Galasiɛ́ŋ 3: EKM

Highlight

Copy