Efesiɛ́ŋ 3
3
Póle, mɔndɔ wa buóli buá Klístus
1Buand buáguɔ́ yaŋuá Póle, nnya gimbɔg giá Yésuse Klístus gánɔ bindiádába. 2Ala numɔɔ́b bɔ́ya buóli ubuɔ́ Uhaluá uguég guá magɔg úmandúgɛ́n gánɔ gá busió. 3Uhaluá umaádáab gundíye muand muá dudádɛ duá giseyi, hana mmɔnúɔ́ŋɛ́ɛn gidám. 4Nugaágánúna mbɔba igíganyɛ, nugabá nualɛns hana mmúnyanaá dudádɛ duá gisódie igíbíyiganaá Klístus. 5Giseyi igigányɛ, Uhaluá umesédíyé bandɔ bá nsuá, hana waásídámbúnɛ́n badányɛdányɛ medenyi még na bebunebúné giɛ́ dabdab uguá Gileénde. 6Ndénu gɔg gisódie giáguɔ́: Uguá Ginɔ́g giá Nsɔ́m, na bindiádába na bayúdɛn bádáŋáab beseé waáguɔ́ omoómi uyɔɔ́ Uhaluá ugáganaá buán buég. Báyɛ maláŋ má nuɔ́l númomi, bádáŋáab súsɔ́n ndán iyɛɛ́ Uhaluá úmal uguá Yésuse Klístus.
7Iyaáyɛ edúmébi wa Ginɔ́g giá Nsɔ́m uguá mpuán ya magɔg iyɛɛ́ Uhaluá, úmaŋádáabɛ́n uguég guá buŋaŋa. 8Uguá beédébi gidigid, yaŋuá nnyaá wa nsúgie, iyadáŋáab magɔg má dógónyinye bindiádába bunɛ́m buá Klístus ubúdiámanan. 9Mmadáŋáab súsɔ́n mpuán ya díye agá búdanyɛ, hana Uhaluá úhónonyeé giseyi igigányɛ. Úmuanyɛ únyaá Eluŋi muand gidigid, úmaánamb giɛ́ uguég feké. 10Gugɔns dabdab gɔg, muhiligine na maŋaŋa má gumɔn, uguélém guá Gimbi giá beédébi bá Klístus málinsan magasa wa nugedie nuá Uhaluá. 11Buá gidigid, búánigimanan ná dudádɛ duá ságásagá duá Uhaluá, uduɔ́ úmalɔŋ uguá Yésuse Klístus Ɔgúná wasɔ. 12Uguá búlada buásɔ na Klístus na guágɔdɛ́m guásɔ uguég, digódi buhélélé buá kilɛn Uhaluá kanda bugádɔ. 13Súsɔ́n yɔɔ́núɔyɔn, nudibíníhínɛ́n meyú ɔmɔɔ́ ŋŋódiónú gánɔ gá busió áneé mánúnyɛ́n, mányɛ nigúmi niánɔ.
Gulɛns ginɔ́nɛ́n giá Klístus
14Buand buáguɔ́ ŋŋunsigeníneé Uhaluá Síe dunúnú. 15Úmuanyɛ gɔg úgimbenú eŋíd ya biansɛ gidigid ugumɔn naá uguísi. 16Yɔɔ́guɔŋɔn yɔ́ áneé, uguég guá bilɔŋ biá bá nnuɛ́m na nigúmi niég, ugunínie gubá guánɔ uguá idɛ́m uguég guá buŋaŋa buá Gileénde. 17Ánaá waál áneé Klístus ugíga uguánɔ guá idɛ́m uguánɔ guá guágɔdɛ́m. Luánánánɔ iŋaŋ uguá ginɔ́nɛ́n, nubíhágɛn uguá ginɔ́nɛ́n uguɔ́g. 18Agányɛ núgabianɔ́ bugaga buá guɔ́bɔnɛn na beédébi gidigid, hana ginɔ́nɛ́n giá Klístus gínya saámbagadagada, guyah, buyáŋ na súluúm. 19Nuonónd nulɛns gɔg ginɔ́nɛ́n giá Klístus igídúmbanaá gulɛns gidigid, gá gueleé nubá obóhónón na muand gidigid umúnya agá ɔdɛ́m huá Uhaluá. 20Gá Uhaluá, úgódionu buŋaŋa buá gual buand gidigid gudɔ́mb ubuɔ́ diɔ́ŋɔnaá yɔ́ ugúnya ana ubuɔ́ dígedenyeé, uguég guá buŋaŋa ubúbiálanɔ́ uguásɔ, 21úmuanyɛ úgódionu nigúmi uguá Gimbi giá beédébi bá Klístus naá uguá Yésuse Klístus, gá dunam gá dunam naá gá nnyɔ́m na nnyɔ́m. Anagányɛ.
Currently Selected:
Efesiɛ́ŋ 3: EKM
Highlight
Share
Copy
Want to have your highlights saved across all your devices? Sign up or sign in
