Efesiɛ́ŋ 2

Guonoólín uguá nigué gá nusɔ́da

1Nsuá, numabá hana ebéguén gá busió buánɔ buá bifal na bilɔga. 2Numabá nusɔ́dɔn uguá bilɔŋ biá bandɔ bá guísi, numabá núɔ́bɔnɛn ofuŋ huá bilɔg biá maŋaŋa, ibígilébenú uguá gihínyi, ofuŋ huáguɔ́, búnyɛ gileénde igíéndenyeé dabdab abádiabá ɔlɔŋ na Uhaluá. 3Basuá gidigid dimabá hana bámuanyɛ, dimɔsɔ́dɔn uguá niída niá mmegu siásɔ naá umuɔ́ idɛ́m siásɔ símabá sídídúman, dimabá diala ubuɔ́ nuɔ́l nuásɔ na dugedie duásɔ múmabá múɔya. Nɔ́ gɔg, gá bugué buásɔ buá bunyɛ bandɔ dimanígímanan áneé didúmbɛ́n uguá ilúnd hiá Uhaluá hana bɔsɔ́gá. 4Gɔgaá, guánanɛn bulɔ́b guá Uhaluá gúnyɛ giandá, ginɔ́nɛ́n giég gínyɛ áneé, 5uguá ginɛŋ igiɛ́ dímabá hana ebeguén uguá gileénde gá busió buásɔ buá bilɔga, uwadihuá nusɔ́da uguá Klístus, búnyɛ uguá magɔg má Uhaluá numabia gisódie. 6Uguá búlada na Yésuse Klístus, Uhaluá umedíhémie uguá gibɛ́l ɔlɔŋ neéneg uwond uwedíduguminye ugumɔn. 7Nɔ́ súsɔ́n, uguég guá beseé uyɔɔ́ úmedídíyé uguá Yésuse Klístus, umambá gudídíye bunɛ́m buég buá magɔg ubuɔ́ bádiábá bá hana uguá nnyɔ́m isíóloneé. 8Ɛɛ́ɛ, búnyɛ uguá magɔg má Uhaluá númabiá gisódie uguá giásɛ giá guágɔdɛ́m. Numasúgual ta buand, búnyɛ mpuán ya Uhaluá. 9Gisódie igigányɛ gídióguólonin uguánɔ guá melélíe gá gueleé núbígide gisasɔ. 10Ɛɛ́ɛ, Uhaluá umadílɔ́ŋ, umadílɔ́ŋ uguá Yésuse Klístus gá guala buóli buá beseé: Melélíe má beseé amagányɛ, Uhaluá úmaádiáŋánɛ́n mɔ́ gá gueleé diala mɔ́.

Bem abábígúdánɔ uguá Klístus

11Ánaá núbídúmdenye bubuand ubuɔ́ númabá nsuá, nudibá bayúdɛn uguá bíbíén, bayúdɛn bɔ́núdɔ́ŋɔn áneé bobólból, henyé bámuanyɛ bɔ́bídɔ́ŋɔn áneé ababíansán gá busió buá gilɛns igiɛ́ bámaág bɔ́ na ɔmbɔ́g uguá nuɔ́l. 12Ɛɛ́ɛ, uguá ginɛŋ igigányɛ numabá hádɛ na Bémeyíde, numabá benyi, numasábá nuɔ́bɔnɛn na buán buá Uhaluá, bámanúsayɔ́n uguá nigál niá ndán ya Uhaluá, numabá nusɔ́dɔn uguísi kanda nubídágídɛ́n kanda Uhaluá. 13Gɔgaá, dabdab uguá búlada na Yésuse Klístus, banuá numaábá hádɛ, Klístus umoód manɔ́ŋ még weénúkílíe mɔdɔg neéneg. 14Gá giagiá, búnyɛ Klístus únyaá bumbénu buásɔ, úmuanyɛ úmáal áneé na bayúdɛn na bindiádába bónd buán búmomi, uwodóŋínye nuɔ́l nuég gá gad nimás inímabá nídándúna bɔ́, níála áneé bɔ́diɔbɔnɛn. 15Uwesúlie gigodi, gibídína na ŋŋenyi ya bayúdɛn. Úmamba áneé ta bayúdɛn ta bindiádába bónd buán ubugɔ́sɛ búmomi uguég guá búlada, anagányɛ úmedénígínyé bumbénu. 16Uguég guá nigué uguá nuag, Klístus umalad bɔ́ uguá nuɔ́l númomi uwaŋan bɔ́ na Uhaluá. Uguá nuag, uwagad mbina. 17Klístus umoól gɔg gá dógónye Ginɔ́g giá Nsɔ́m giá bumbénu gánɔ núnya hádɛ naá abánya mɔdɔg. 18Ɛɛ́ɛ, búnyɛ uguég basuá gidigid ta bayúdɛn ta bindiádába dínya diá bídíye agá eŋís ya Uhaluá Síe, uguélém guá Gileénde giá Budányɛ giáguɔ́ táŋ gímomi. 19Anagányɛ gɔg, nudibánda benyi ugúnya ana bomonólé, gɔgaá, nuganyɛ dabdab bandɔ bá gidɔŋ naá ɔbɔ́bɔninaá na Uhaluá, bandɔ bá niíd niá giansɛ niá Uhaluá. 20Nunyɛ hana bilɔ́mbia gá nuhág unuɔ́ na medenyi na bebunebúné bánya bibunda, búnyɛ Yésuse Klístus mbánan únyaá igɔn hiá mbímba. 21Búnyɛ uguég nuhág gidigid núgɔ́lɔninaá gulal gá bíbúlígie gá guáyɛ gidányɛdányɛ giá idúl gá bídéníginye uguá Ɔgúná. 22Búnyɛ uguá búlada na Klístus banuá súsɔ́n núbíŋeneé gá hága. Guond núáguáyan na bɔsɔ́gá gidigid giansɛ igiɛ́ Uhaluá ugíganɔ́ guɔ́ uguá Gileénde.

Currently Selected:

Efesiɛ́ŋ 2: EKM

Highlight

Copy