Ceepaw 1

1 # Luk 1.1–4 Ky khiat khyang Theophilus:

Acuːk ky cawuk dukka ky jok hnguːt khyang tomti ha ce Jesuh na y cai hnguːt khyang la y cawk hnguːt khyang 2huankhu lyaamma y zet bya pyn cyp, y luihngyahei hnguːt khyang ceepaw ha eyng Muikhaw Cim na hnguishin hnguːt khyang y si. 3Ynih byt pynnyng, y hiyang khyang yn ha cengnga y pumhngaw y duannei voih. Yn ha cenga khuhnguːp phikip podyang theila Nuatpaw teengpe bawng y saih hnguːt. 4#Luk 24.49Yn ha dy eiou hah hnguva,#1.4 Yn ha dy eiou hah hnguva; sikawvyngcee yn ha dy y myi hnguːt hah hnguva, sikawvyngcee yn ha dy eiou hah hnguva. yn ha eyng yn hnguishin ha y bei hnguːt “Jerusalem kuːh zet bya kawva, ky Pawaw bei jy khyang setzaw zong ngyt, yn ce nyangmi jyng ky saih pyn khyang a si. 5#Mat 3.11; Mar 1.8; Luk 3.16; Jaw 1.33Jawhan na tuii jyng baptisma y bei, ynbawlakhy khuhnguːp div kawva Muikhaw Cim myng baptisma nym khyammei lawh ey,” tila y hyau.

Jesuh Huankhu Lyamma Khuainyak

6Yn pynnyng Jesuh kika a huattyng khawmmei lutih ceepaw ha na, “Mawhpaw vo, tuh cuːn na Isreal pe ny thooh bya vy vei?” tila ym hngii.

7Jesuh na yn ha eyng, “Paw na ynih uppyng ngy khyang khuhnguːp la acuːn nyangmi na hnguat ty luː jo. 8#Mat 28.19; Mar 16.15; Luk 24.47,48Ynbawlakhy phungan nym dynnei hnguva Muikhaw Cim ce nyangmi huan na lu vy. Ynpynnyng nyangmi ce Jerusalem la Judah pee tomti, Samaria pe la somdek pyihnyak cyp kei tawk saksi ja nym thawn giah ey,” y tinyak. 9#Mar 16.19; Luk 24.50,51Yn y hyau pynnyng, yn ha hngoaimaw va Mawhpawaw ce huankhu va zehei y khyam lawh. Ynpynnyng yn ha mikjawm hnguva khusiat na ynih kyyn.

10Ynbawva Mawhpawaw huankhu lyaamma zet bya khyang ym to hnguva apoktih phaang vuvei tih hyih khyang pahngih saisikung yn ha ka a ym tungei. 11“Galilee khyang ha aw, Ibawthawnnyng mynija tung zawla nei lyaam nym to ma? Nyangmi cengkuːh huankhu va zehei khyam lawh tih yn Jesuh ce huankhu va zet bua khyang nym hnguh bawva yn tyng shyak hyang tih a y lu bya ey,” y tinyak.

Judah Duːn Nyng Matthia Luijei Nyak

12Ynpynnyng Olive cung tinyak khyang yn cung kuːh Jah hnguːp pyng Jerusalem luh a ceepaw ha ym hlei bua. Yn cung ce Jerusalem luh eyng mile khoi byang a kauvei. 13#Mat 10.2–4; Mar 3.16–19; Luk 6.14–16Ym phawlu hnguva, imm akhyn huanna koi awla ynija ym myi. Kunglu tih ha ce, Pitar, Jawhan, James la Andrew; Philip la Thomas; Barthomew la Matthai; Alphaeus na zawpawaw James, juːkhiat Simon la James zawpawaw Judah ha ym si. 14Yn ha tomti ce Jesuh nu Marih la hngutawaw ha ce y benau ha dy huattyng duːm kawva ym hngihminnei.

15Yn hnguːp pyng phawhuat sila khua myi tih jummeitih ha khawmmei awla benau duːduːm myng Pitar tung 16theila y hyau, “Benau la Cinau tih ha aw, Jesuh muantih ha lyam duantih Judah hnguːn theila, Muikhaw Cim na David tyng y hyau hnguːt jyai khyang khutjokcaw a kuːm. 17Yn ce mymi dukkuːh pahuat theila mymi khutbi nawva susaihtih y si.”

18 # Mat 27.3–8 (Yn na tala tih kaw eyng y lawh khyang tyangkhaw vyng Judah na lai pahuat y hleih, ynija y luke shutung tih a y byt. Y hngynnu ark theila y kya tomti hawkei giah. 19Yn khiannyng Jerusalem ma myitih khyang ha na yn sityang ym jyak. Yn khiannyng yn lai ce ym be hngaw a Akeldama ym tinyak. Yn ce “Thii punyak lai,” a si.)

20Psalm cawuk dukka,

“ ‘Y duːn ce khyang hievnyak thawn seh;

ynija ukhy myi kaw seh,

Yn khy,

Ynih duːn aciya na loovei seh,’ tila a jok hnguːt.

21-22 # Mat 3.16; Mar 1.9; Luk 3.21; Mar 16.19; Luk 24.51 “Yn khiannyng Mawhpaw Jesuh thoo bya khyang mymi dy saksi khyam hai Judah duːn na aciya pahuat huat my hngyah lawh ey. Yn na Jesuh ce Jawhan na bei khyang baptisma#1.21–22 Jawhan na bei khyang baptisma; sikawvyngcee Ynih eyng Jawhen na Baptisma bei hnguːt. khyammei cuːn nyng kuːhthuh mymi cengkuːh huankhu va zehei khyam cyp mymi dy bawngei tih thawn lawh ey.”

23Ynkhiannyng khyang pahngih dukkuːh pahuat ym hngyah, Barsabbas tinyak khyang Josep, yn ce Justus tila ym hyau khyang la Matthia tinyak khyang pahngih ce ym tun shyak. 24Yn pynnyng hngihminnei nyak ym cai, “Mawhpaw aw, khyang tomti lungbawng ny hnguat, yn khiannyng ym luihngyahei khyang pahngih dukkuːh ubyang ny hngyah tinyak khyang duan piat. 25Judah na duːn khyamtyak pyn khiannyng, Judah myih hnguːt na duːn na ceepaw pahuat bawva khutpi hai duan piat,” ym hngihminnei. 26Yn pynnyng yn hyih tawk zungkiak eh ym hiyah hnguva Matthia huanna zungkiak eh khyang a khaw, khiannyng yn ce ceepaw kulaihuat tyng ym bawng.

Currently Selected:

Ceepaw 1: NTHTB25

Highlight

Copy

Compare