Ceepaw 2

Pentekuk ka Muikhaw Cim Lunyak

1Pentekuk hnguːp phawlu hnguva, duːn huat pyttyng jummeitih tomti ym dyynnei. 2Yn hnguva cacatnawva huankhu kuːh thai ce pyibuki thai dy cyppei theila yn ha ngoah nyak imm tomti a luih. 3Yn hnguva yn ha na kakei tih mei lei byang kawlu theila yn ha pahuat cuːm huanna y awmmei. 4Yn hnguva yn ha tomti ce Muikhaw Cim myng kuːm awla Muikhaw na bei bawva acya be ja khyau vy ym phuːn.

5Yn hnguva huankhu dyang nga myitih pe tomti kuːh Nuatpaw kyhtih Judah khyang ha ce Jerusalem luh a ym myi. 6Yn thai ym jyak hnguva, khyangpuː ha huattyng dyynnei awla ym muːnnyak, ibawthawnyngma tijyngcee jummeitih ha pahuat la pahuat ym be hngaw vyng khyauvei khyang ym jyak. 7Yn ha tomti na ym muːnnyak: “Myn hyautih ha ce Galilee be ja khyau tih ha kaw vei? 8Yn pynnyng ni ce ibaw ma, mymi tomti na pahuat cuːm na my be hngaw my jyak lawh si? 9Parthia pe, Media pe la Elamit pe, Mesopotamia pe kuːh ha na khy, Judah pe la Cappadocia pe, Pontus pe la Asia pe, 10Phrygia pe la Pamphulia pe, Egypt pe la Lipya kika Cyrene lyaamma khy, Rom kuːh lynglutih ha khy, 11Judah ha la Judai jum nyak kyng jummei lutih ha khy, Cretan la Arap ha na khy mymi be ja Nuatpaw puhcai khyang muːnnawsetih ha yn ha cenga my jyak lawh,” ym ti. 12Muːnnaw theila ym lucing, pahuat la pahuat, “Myn ce ibaw ma?,” tila ym hngiei tong.

13Khyang ciya ha na, yn ha nuih naw awla, “Yn ha ce miksu ju ym moih,” tila ym hyau.

Pitar na Susaihnyak

14Yn hnguva Pitar ce hngulawnglyktih kulaihuat dy tung theila, khyangpuː ha eyng yn nih na, “Judah khyang la Jerusalem luh a myitih tomti, nyangmi jyng ni khyaukhaw ky saih maw vy, kei na i hyau vy khyang poaija ngei byih jyt. 15Myn khyang ha nyangmi uːtnyak bawva outih si joaw. Ni ce angu acuːn gu myi hngyh. 16Hngawpaw Joel na susaih hnguːt khyang ha ce:

17“ ‘A pyih hnguːp pyng Nuatpaw na,

khyang tomti huanna ky Muikhaw ky hlyn nyak khy.

Nyangmi zawehngu la zawpaw ha na khy kei khyau ym saih jy;

Nyangmi compyang khyang ha na khy hnguːnn khyang ym hnguh ey,

nyangmi khyang lianzang ha na khy ym myaang nga myaang nyak ky.

18Ky ma ha hngutaw la putaw huanna khy si seh,

yn hnguːp pyng ky Muikhaw hlyn naw thei nga,

ym hngawei giah ey.

19Kei na huan na myitih huankhu va muːnnawseetih la

dyangnga myitih somdek huanna mikhnguh khyang,

thii, mei la meikhu ha ky duan ny.

20Mawhpaw phungan hnguːp

phawlu hngyh ey hnguva khumik khy hung theila,

khawtha khy thii bawva thawn ny.

21Yn hnguva Mawhpaw ming biat tih khyang tomti ce lilovei nyak ym lawh ey.’

22“Isreal khyang ha aw, myn khyau ngei jyt. Nazareth luh zaw Jesuh ce khyang pahuat ta Nuatpaw na nyangmi cenga y thuːhlu khyang ce, nym hnguat bawva ynih khiannyng nyangmi dukka y cai hnguːt khyang ce muːnnawseetih la nuːtnyak khyang Nuatpaw na nyangmi jyng y duan hnguːt. 23#Mat 27.35; Mar 15.24; Luk 23.33; Jaw 19.18Yn khyang ce Nuatpaw hnguːnn khyang la y hnguat jyai nyak kyng nyangmi cenga yap theila khyang see ha phui nyak kyng tala kawva tangtyng huanna kha eyng shun awla ym tuk. 24#Mat 28.5,6; Mar 16.6; Luk 24.5Ynbawlakhy Nuatpaw na ynih byt nyak kyng kuːh lyt shyak theila bytnyak kuːh thoo bya shyak. Bytnyak kyng kuːh ynih thoo bya vy, ibawthawnyngma tijyngcee yn ce bytnyak na ynih khawnhyan nyn ti jo. 25David na ynih bawng y saih:

“ ‘Mawhpaw ce kei dy y myi hah shoi khyang ky hnguh;

Ibawthawnyngma tijyngce yn ce kei khep lyaama y myi, kei na kyhkhiyan jonga.

26Yn khiannyng ky lung ce jy theila

ky mong khyce jyjo nyak kyng kuːm.

Ynpynnyng ce ky pum khy

uːtnyak kyng duːm my,

27ibawthawnyngma tijyngce Mawhpaw na kei muikhaw ngalai duːn nyng dyyi hai si jo,

ny khyang cim khyce thuuhli shyak hai si jo tii.

28Kei jyng syak hiyan lyam hnguat nyak ny bei hnguːt;

ny hngoaimaw va jyjo nyak kyng kei ny hluihhlem shyak.’

29“Benau ha aw, nyangmi jyng kei na ky hyau nyn, mymi shyaa David ce byt theila ym khuːh hnguːt. Ynih zu ce tuhhnguːp cyp mynija myi hyam. 30Ynbawlakhy yn ce hngawpaw pahuat ta thawn khiannyng, Nuatpaw na ynih juːjawng dukkuːh pahuat tyng ynih nuanimm huanna y ngoa shyak ky tila setzaw vyng juannei hnguːt khyang hnguat pyn. 31David na ni ha y hnguat jyai khiannyng Messiah thoo bya khyang ngyng cyppei theila hyau khyang ce:

“ ‘Yn a thuuk tih ngalai pe duːn na dyyiutit hai si jo;

ynih pum thuuhli shyak jo nga,’ tila y hyau hnguːt.

32Nuatpaw na Jesuh hiyang syak bya khiannyng mymi myitih tomti ce yn tawk saksi ja my thawn giah. 33Yn hnguva Nuatpaw khep lyaamma juːhshon khyam lawh tih ce, Mawhpaw cengkuːh setzaw tyak khyang Muikhaw Cim khyam lawh theila nyangmi hnguh nyn khyang la jyak lawh khyang mymi jyng Muikhaw Cim khuːh nyak pyn. 34David ce huankhu lyaamma khoi hnguːt jo, ynbawlakhy yn na hyau,

‘Mawhpaw na ky Mawhpaw vyng:

“Kei khep lyaamma ngoah

35Kei na nyang shunpui ha nyang khudyang nga ky tyak cyp,” y tinyak.’

36“Yn khiannyng Isreal khyang tomti ha aw, tangtyng huanna nyangmi na tuk hnguːt khyang yn Jesuh ce Nuatpaw na Mawhpaw la Messiah duːn nyng y yap hnguːt khyang poaija hnguat byih jyt!” tila y hyau.

37Khyang ha na yn ym jyak hnguva, ym lung ngyamiang theila Pitar la cya ceepaw ha eyng ym hyau, “Beenau ha vo, ibaw my cai jy ma?” ym tii.

38Pitar na, “Nyangmi tomti pet hluːh nyak lawh haija jubaijei theila Jesuh Khrist ming ngyng baptisma lovei byih jyt. Ynbaw hnguce Muikhaw Cim tinyak khyang kuːtpuan nym lawh ey. 39Yn setzaw ce nyangmi la nyangmi zawnau ha la apan nawva myitih tomti tawk a si. Mymi Nuatpaw Mawhpaw panneitih ha tomti tawk a si.”

40Peter na, “Yn ha huattyng pannei theila acya be ha panukung ngyng yn ha eyng sathih bei theila, cimpak theitih myn khyang juːjawng ha eyng kuːh nym pumhngaw lilovei jyt,” tila y hyau. 41Yn khyaukhaw dynnei tih ha ce baptisma khyammei theila yn hnguːp pyng khyang 3,000 byang baptisma ym khyammei. 42Yn ha ce ceepaw tih ha cawkhyau khyang dynnei theila lyngdyiuei khyang ha, phee pyi la hngihminnei nyak ym cai.

Jummeitih ha Shyak hyang Nyak

43Ceepaw ha na muːnnawseetih la mikhnguh khyang ha ym duan khiannyng khyang tomti na ym kyh giah. 44#Cee 4.32–35Jummeitih ha tomti huattyng dynnei theila ym tyakkei khyang tomti ym phyaihjyattei hah. 45Ym tyakkei khyang la utzaw ha jy theila ym lawh khyang a muat ha ce luːeitih ha eyng ym bei. 46Hnguːp tyng biatimm ma huattyng ym kawmmei shoi. Yn ha ce ym imm ma phee pyi theila, jy nyak lung kyng ym ei hah. 47Jummeitih ha na Nuatpaw khuːhbia awla khyang tomti cenga luhngoai ym lawh. Yn pynnyng Mawhpaw na lilovei nyak lawhtih ha hnguːp tyng y kawng shyak.

Currently Selected:

Ceepaw 2: NTHTB25

Highlight

Copy

Compare