KUM KEDƏ̄ 9
9
Ndɔ̄ȳ kə́ yā kəngeń kum kedə̄
1Nə́ɓā yā kaaḿ gə̄ ō, Kɔ́ɔ̄ɓē kə́ nge ka̰a̰ kum tō ndoō yā deē ō,
ḭ̄ ń ə̄ndā yá̰a̰ malang i kə najə̄ kə́ taí tə́ ní,
2ḭ̄ ń ī-rāā deē i kə ta kūl̄ kum kedə̄ yāí
kadə̄ ndi dɔ yá̰a̰ malang ń ī-rāā tə́ ní,
3kadə̄ ṵṵ ɓē dɔ de kə́ dɔ nang tə́ gə̄ tə́ kə gō ń Nə́ɓā ɔjəń ní ō, kə yá̰a̰ rāā kə́ gō tə́ ō,
kadə̄ gān̄g sarya kə kem kə́ súūmú ō ní,
4ādə̄m̄ kum kedə̄ ń ndi seí dɔ kōr̄ kāgə̄ mbang yāí tə́ ní ō,
ɔ̄rə̄m̄ kɔ̄ɔ́ dan ngání gə̄ tə́ aĺ ō.
5Á̰a̰ā̰, mā i nge kəla yāí kə́ dəngam ō, mā i ngōn̄ nge kəla yāí kə́ dəyá̰ ō,
mā i de kə́ tɔ́gən gətóo ō, ndiḿ kə kumḿ dan i ngá̰ý aĺ ō,
m̄-ger̄ yá̰á̰ kə́ súūmú aĺ ō, m̄-ger̄ ndū najə̄ aĺ ō.
6Dan ngán de gə̄ tə́ ní, deē ń i kə́ majə ɔtə̄ kə taá mák mák gə̄gē,
ba ənge kum kedə̄ kə́ ḭḭ rɔ̄í tə́ aĺ ní, i de kə́ deē a tə́dan alé.
7I ḭ̄ n ī-gə̄rām̄ kadə̄ m̄-ndi mban̄g dɔ gír deē yāí gə̄ tə́ ní,
kadə̄ m̄-gān̄g sarya dɔ ngání kə́ dəngam gə̄ tə́ ō, kə́ dəyá̰ gə̄ tə́ ō ní.
8Ḭ̄ ə́dam̄ na kə m̄-rāā kújə yā Kɔ́ɔ̄ɓē dɔ mbal̄ kə́ táĺ yāí tə́ ō,
dabə tun̄ yá̰a̰ kem ɓē ń ī-rāā loo ndi yāí tū tə́ ní tə́ ō,
kadə̄ kə to tītə̄ kújə tandā kə́ táĺ ń ə̄ndā dɔ danaá ta kəla gíŕ tə́ ní.
9Kum kedə̄ ń ger̄ kəla rāāí gə̄ ní, ni i kadií tə́ ngɔr ō,
dan ń ā ī-rāā dɔ rā̰ ō, dɔ nang ō ní, ni i kum tə́.
Ni ger̄ yá̰á̰ ń i yá̰á̰ kə́ nel̄ kumií ní,
yá̰á̰ ń i yá̰á̰ kə́ súūmú kə gō ndūí ní.
10Ī-rāā ādə̄ kum kedə̄ ḭḭ dɔ rā̰ kə́ táĺ tə́ risə,
ə́lan ādə̄ ḭḭ dɔ kōr̄ kāgə̄ kɔsə go̰n yāí tə́
reē ndi kadəḿ tə́ dḭḭ̄m̄ ō,
rāā seḿ adə̄ m̄-ger̄ yá̰á̰ kə́ nelī ō.
11Ni ń ger̄ yá̰a̰ malang ō, ger̄ kum yá̰a̰ malang ō ní,
ni a ɔr noḿ lo njə̄rāḿ tə́ kə róbəneé ō,
ni a ngɔ̄mə̄m̄ kə ta kūl̄ kɔsə go̰n yān ō.
12I beé n kəla rāāḿ gə̄ a nelīiń ní ō,
m-ā m̄-gāngəń sarya kə́ gōtə́ dɔ gír deē yāí gə̄ tə́ ní ō,
m-ā m-ásəń ndi dɔ kōr̄ kāgə̄ mbang yā bɔbə́ḿ tə́ ní ō.
Kum kedə̄ i yá̰á̰ kə́ majə ngá̰ý tām̄ yā deē tə́
13I de kə́ rá n asə ger̄ kem ndigə yā Nə́ɓā ní?
I náā n asə ger̄ yá̰á̰ ń Nə́ɓā sāā rāā ní?
14Ngé gə̄ ń a oyn̄ ní, gír̄ yādə́ ra gotə kógə̄ḿ alé,
adə̄ jḭḭ̄ malang ní, gír̄ yājí gə̄ aw̄n̄ sa̰y alé.
15Dā̰ rɔ̄jí ń i yá̰á̰ kə́ a ndum ní i yá̰á̰ kə́ ɔȳjí.
Ndíl deē ń i yá̰á̰ kə́ gḛynən̄ kə̄ ta gə̄ tə́ ní, rāān̄ hɔ̄ɔn i kə nángāá. Ba hɔ̄ɔn ní i yá̰á̰ kə́ ɔȳn.
16Yá̰á̰ kə́ rɔ̄kum gə̄ kə́ dɔ nang tə́ gə̄gē ní, lo ger̄də́ tōr̄ rɔ̄jí.
Yá̰á̰ kə́ to rɔ̄jí tə́ ngɔr gə̄gē ní, j-əhɔī i rɔ̄jí tɔgə tá kumjí teē dɔ tə́.
Ní, yá̰á̰ kə́ rɔ̄kum gə̄ kə́ dɔ rā̰ tə́ ní, i náā n ndo̰ gíŕdə́ a̰ā̰ ní?
17Nə́ɓā, ré ḭ̄kɔ́ ādə̄jí kum kedə̄ aĺ ō,
ə́la kə ndíĺ kə́ táĺ yāí dɔ rā̰ tə́ ādə̄jí aĺ ō anī, i náā n a ger̄ kem ndigə yāí ní?
18Ba i dan ń ādə̄ ngé gə̄ ń ndin̄ dɔ nang tə́ ní kum kedə̄ ō, Ndíĺ kə́ táĺ ō ní
n róbə yādə́ tél ra súūmú ní.
I tītə̄ ń toō n de gə̄ ndóōn̄ yá̰á̰ kə́ nelī ō, kum kedə̄ ajədə́ ō ní.
Currently Selected:
KUM KEDƏ̄ 9: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.