KUM KEDƏ̄ 8
8
1Kum kedə̄ un lo kə tɔ́gɔ́, ḭḭ ta ngóy dɔ nang kə́rēý tə́ bátə́ gān̄g ta ngóyn kə́ dām̄ kə́ rang tə́ ō,
ṵṵ ɓē dɔ rā̰ tə́ ō, dɔ nang tə́ ō kə kem majaá ō.
Kum kedə̄ i dəyá̰ kə́ majə ɔtə̄ kə taá tām̄ yā Salomo̰ tə́
2I ni n m̄-tárən ō, m-ə́lá gír sāan kə balsááḿ ní ō,
m̄-sāā rāan nə̄yá̰ḿ tə́ ō,
tām̄ ni mandə ta kumḿ tə́.
3Kɔsə go̰n yān tɔȳ yā gír de kə́ bo gə̄, tɔdɔ̄ ni ndi i kə Nə́ɓāá.
Adə̄ kɔ́ɔ̄ dɔ rā̰ ō dɔ nang ō ń de kə́ dɔn tə́ gətóó ní tárən.
4I yá̰a̰ ger̄ yā Nə́ɓā nəkɔ́ n ndóōnən̄ ní,
adə̄ ni gḛy rāā kəla yān gə̄.
5Ba ré yá̰a̰ kənge i yá̰á̰ kə́ deē gḛy dan ń ndiń kə kumneé dúnya̰ tə́ ní anī,
i yá̰a̰ kənge kə́ rá n tɔȳ kum kedə̄ ń i nge rāā yá̰a̰ gə̄ malang ní?
6Ré yá̰á̰ ń kur̄ dɔjí ger̄ ní tɔ́gən i ngá̰ý anī,
nge rāā yá̰a̰ gə̄ ní tɔ́gən tɔȳ nge ń nuū aĺ a?
7Deē gḛy yá̰á̰ kə́ súūmú a?
Háĺ kə́ majə gə̄ teēn̄ i tū kəla rāan gə̄ tə́.
Tɔdɔ̄ ni ndóō de gə̄ lo rāā yá̰á̰ kə́ kadə̄ mān̄ dɔ loon aĺ ō,
lo kəndā kum kedə̄ dɔ rɔ̄ tə́ ō,
lo rāā yá̰á̰ kə́ gōtə́ ō, lo kəhɔ rɔ̄ tɔgə ō.
Yá̰á̰ kə́ rang kə́ majə tɔȳ nge ń nuū kə́ tām̄ yā de gə̄ tə́ dúnya̰ tə́ gətóo.
8Yá̰á̰ kə́ rāā dan i ngá̰ý adə̄ deē ger̄ gō majən ní,
deē sāā kənge yá̰á̰ kə́ majə tū tə́ ɓáý a?
Kum kedə̄ ger̄ yá̰á̰ kə́ mān̄ kɔ̄ɔ́ gə̄ ō, yá̰á̰ kə́ a reē ɓáý kə́ ɓájə̄ gə̄ ō.
Ni ger̄ kɔjə kum sarya kə́ gān̄g gə̄ ō, ger̄ kum səngó gə̄ ō.
Ni əndā dɔ yá̰á̰ kə́ yā kɔjəń yá̰a̰ gə̄ danaá kété ō,
yá̰á̰ kə́ to kɔr kum gə̄ danaá kété ō,
əndā dɔ kum mbang kə́ majə gə̄ danaá kété ō.
9Adə̄ m̄-gḛy rāā kum kedə̄ i madə̄ njə̄rāḿ kə́ dəyá̰ tə́ dɔ nang tə́ laā bátə́ kadə̄ m-óyń.
Tɔdɔ̄ m̄-ger̄ kadə̄ ni i dəyá̰ kə́ nge kadə̄m̄ kɔjə̄ dɔ yá̰á̰ kə́ majə tə́ ō,
nge sɔl̄ kemḿ dan ń m̄-ndi i kə gír̄ najá ō, dan wur kɔl tə́ ō ní.
10M-ə́da rɔ̄ḿ na kə ta kūl̄neé ní kósə de gə̄ a ɔsən̄ go̰nəḿ ō,
mā i balsáá ɓá tā ba rɔ̄ḿ nelə̄m̄ tɔdɔ̄ de kə́ tɔgə ɓə́ga gə̄ rāāmə̄n̄ i de kə́ ngáā tə́.
11Lo gān̄g sarya kə́ gōtə́ tə́ anī,
de gə̄ a a̰a̰n̄ kadə̄ mā i de kə́ m-á̰á̰ yá̰á̰ kə́ rɔ̄kum ngá̰ý ō,
ngār gə̄ ń ndin̄ noḿ tə́ ní a ɔr kumdə́ ngá̰ý ō.
12Ré m̄-ndi kə taḿ kə́ mbóó anī, nin̄ a ngóōn̄ ō,
ré m-ɔ̄r̄ najə̄ anī, nin̄ a nēlə̄n̄ mbīdə́ ō,
ré najə̄ kɔrə́ḿ ngāl̄ ngá̰ý anī,
nin̄ a əndān̄ jīdə́ tadə́ tə́ ō.
13Kə ta kūl̄ kum kedə̄ ní, m-ā m-ə́nge kajə kə́ ngándáńg ō,
m-ā m-ə́yá̰ yá̰á̰ kə́ a to ngándáńg yā kadə̄ əgań kem de gə̄ kə́ gír kojə yāḿ tə́ gə̄ dɔḿ tə́ ō.
14M-ā m-ṵ́ṵ ɓē dɔ gír de gə̄ tə́,
nápar de gə̄ a əlan̄ dɔdə́ gíŕ tɔ́gə yāḿ tə́.
15Dan ń mban̄g kə́ majə aĺ ngá̰ý gə̄ a oōn̄ rīḿ anī a ɓōlə́n̄.
Dan kósə de gə̄ tə́ anī, m-ā m-ɔ́jə kadə̄ mā i de kə́ majə ō,
ta rɔ̄ɔ̄ tə́ anī, m-ā m-ɔ́jə kadə̄ mā i nge wurkil ō.
16Dan ń m̄-tél m-āw̄ gogə́ ɓēé anī, m-ā m-ɔ̄r̄ koō i kadə kum kedə̄ tə́ ngɔr.
Tɔdɔ̄ ré ni ndi kə deé anī, wur deē a ɔlən aĺ ō,
ré ni i madə̄ deē kə́ ngak anī, rɔ̄ de a nelə̄n aĺ aĺ ō,
banī i yá̰á̰ kə́ nel̄ deē ō, i rɔ̄nel̄ ō tá a to.
Salomo̰ dəje kum kedə̄
17Dan ń m̄-gír̄ yá̰a̰ tītə̄ ń nuū kemḿ mə̄kɔ́ tə́ ō, m̄-ger̄ kemḿ tə́
kadə̄ rāā ngee naā kə kum kedēé i yá̰á̰ kə́ adə̄ deē kajə kə́ ngándáńg ō,
18kadə̄ tár yān i yá̰á̰ kə́ adə̄ deē rɔ̄nel̄ kə́ majə ō,
kəla gə̄ ń ni rāā kə jīneé ní, i yá̰á̰ kə́ a adə̄ deē yá̰a̰ kənge kə́ a təgā aĺ ō,
kaw̄ loneé kə ta naá, i yá̰á̰ kə́ a reē kə tereé kem deē tə́ ō,
deē ń a ənī najə̄ yān mbī de gə̄ tə́ ní, a ənge rī ɓār̄ ō anī,
m-āw̄ kə̄ lo gə̄ tə́ m̄-sāań ta róbə, ké m-ā m̄-rāā i ba̰ý n m-ā m̄-taāń kum kedə̄ kə́ dəyá̰ tə́ ní wa.
19Mā i ngōn̄ kə́ ojəmə̄n̄ majə rɔ̄kum ō,
ndíĺ ń m-ə́ngé ní i ndíĺ kə́ majə ō.
20Aláa tītə̄ ń mā i de kə́ majə ní, m̄-reē i kem dā̰ rɔ̄ kə́ yá̰á̰ kə́ yḛr ɔdə rɔ̄ aĺ tə́.
21Tá m̄-ger̄ róbə́ kə́ rang ń m-ā m-ə́ngeń kum kedə̄ ní alé, ba i kə kūl̄ kadə̄ karī yā Nə́ɓāá ngóy.
Tá ger̄ deē ń adə̄ deē tɔ́gə kadə̄ rāań majə ní, nge ń nuū i yá̰á̰ kə́ ɔjə kadə̄ deē ger̄ kɔr̄ kam̄ yá̰a̰ naā tə́ ɓáý tṵ.
Lo ń nuū tə́ m̄-tūr̄ rɔ̄ḿ kə̄ rɔ̄ Kɔ́ɔ̄ɓē tə́ m̄-ndɔ̄ȳn
kə ngarā̰ kemḿ gēé malang m-ə́da na:
Currently Selected:
KUM KEDƏ̄ 8: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.