KUM KEDƏ̄ 10
10
Kəla ń kum kedə̄ rāā tū yá̰a̰ gə̄ ń rāān̄ yá̰á̰ tə́ ní
1I Kum kedə̄ n i nge ngɔ̄m̄ kaa de kə́ dɔ nang tə́ gə̄ malang,
dan ń Nə́ɓā əndān kə kérneé ní.
Gō tə́ anī kum kedə̄ ɔrə̄n kɔ̄ɔ́ tū mān̄ dɔ ndū najə̄ yān tə́,
2ba adə̄n tɔ́gə kadə̄ ndiń dɔ yá̰a̰ gə̄ tə́ malang.
3Banī de kə́ nge rāā yá̰á̰ kə́ gōtə́ aĺ ń tūr̄ gidən tan tə́ kɔ̄ɔ́ kə wūngūú ní,
oy sɔɔ̄ ń wūn̄g kə́ rāan kɔ̄r̄ tə́ adə̄ tɔ̄l̄ ngōkṵ́ṵn.
4Dɔ nang ń man̄ kaw̄ un dɔ malang najə̄ yān tə́ ní,
kum kedə̄ ajən ɓáý tṵ.
I yá̰á̰ ń i kāgə̄ karī ní n kum kedə̄ ngɔ̄m̄nəń dɔ man̄ tə́ ní.
5Ba dan ń gíŕ nápar de gə̄ ń tadə́
i gō naā tə́ rāānəń yá̰á̰ kə́ majə aĺ ní əngen̄ rɔ̄sɔl̄ anī,
i kum kedə̄ n a̰a̰ de kə́ súūmú gerə̄n ō,
ngɔ̄mən kanjə̄ najə̄ dɔn tə́ ta kum Nə́ɓā tə́ ō,
rāā adə̄ tɔ́gən tɔȳ tɔ́gə́ táŕ ń ni tárəń ngōnən ní ō.
6Dan ń ngé rāā yá̰a̰ kə gō kem ndigə yā Nə́ɓāá aĺ gə̄ a oyn̄ i mbé ní,
ni ajə de kə́ súūmú
ń a̰ȳ hor ń əsō dɔ ɓē kə́ mí gə̄ tə́ ní.
7Yá̰á̰ kə́ kum tə́ gə̄ kə́ ton̄ ngándáńg kə́ ɔjən̄ kadə̄ háĺdə́ i súūmú aĺ n toó:
i dɔ nang kə́ tutə káḿ káḿ ō, kə́ əɓa saa guy guy ō,
i kan̄ kāgə̄ gə̄ kə́ kərēn̄ dan ń kan̄ kāgə̄ gə̄ a kərēnəń ní aĺ ō,
i sīl̄ katə̄ kə́ ra kə ngālāá ɓururu kum kə̄ dɔɔ́ kadə̄ əgań kem de gə̄ dɔ nge taā kem aĺ tə́ ō.
8Ngé gə̄ ń idən̄ tadə́ gír kum kedə̄ tə́ ní,
i yá̰á̰ kə́ majə ngóy n nin̄ asən̄ ger̄ aĺ ní alé,
banī nin̄ əya̰n̄ yá̰á̰ kə́ yā kadə̄ əgań kem de gə̄ kə́ gír kojə yādə́ tə́ dɔ kəla rāā kə́ to mbóo yādə́ tə́ ɓáý tṵ,
yā kadə̄ nin̄ asənəń ɓɔ̄ɔ̄ rɔ̄də́ tū yá̰a̰ rāādə́ gə̄ kə́ gōtə́ aĺ tə́ alé.
9Banī kum kedə̄ ajə ngé kəla yān gə̄ tū yá̰a̰ gə̄ ń nāān̄də́ tə́ ní.
10De kə́ súūmú ń a̰ȳ ta wūn̄g yā ngōkṵ́ṵn tə́ ní,
kum kedə̄ ɔjən ngáń róbə́ kə́ súūmú gə̄ kadə̄ un.
Ni ɔjən lo kṵ ɓē yā Nə́ɓā ō,
rāā adə̄ ger̄ yá̰á̰ kə́ rɔ̄kum kə́ táĺ gə̄ ō.
Kum kedə̄ rāā adə̄ ni ənge yá̰á̰ gír kəla kə́ ngan̄g gə̄ ń ni rāā tə́ ní ō,
rāā adə̄ kan̄ kəla yān gə̄ ojən̄ naā ngá̰ý ō.
11Ngé rāā ta nar gə̄ ń a əsan̄ tətō de gə̄ karī ní, kum kedə̄ ngɔ̄m̄ de kə́ súūmú adə̄ əsan̄ nar yān aĺ ō,
ta tɔ̄l̄ ta anī ni rāā adə̄ ənge yá̰á̰ ngá̰ý ō.
12Kum kedə̄ ngɔ̄mən ta madə̄ ba̰ā̰n gə̄ tə́ ō,
ta ngé kəyā gūmbə̄ róbən gə̄ tə́ ō.
Ni tetə rɔ̄ɔ̄ kə́ ngan̄g ngá̰ý gə̄gē adə̄n,
yā kadə̄ ni gerə̄ń kadə̄ rāā yá̰a̰ gō yā Nə́ɓā tə́ i yá̰á̰ kə́ tɔ́gən tɔȳ tɔ́gə́ yá̰a̰ malang.
13De kə́ súūmú ń gātə̄n̄ seneé ní gə̄gē ni əya̰n kɔ̄ɔ́ alé,
banī ni ɔrə̄n kɔ̄ɔ́ kum majaĺ tə́.
14Ni aw̄ seneé dəngáyá ō,
əya̰n kɔ́ɔ̄ aĺ ō.
Kété tá kadə̄ əla kāgə̄ kṵ ɓē yā mban̄g jīn tə́ ō,
rāā adə̄ ndi dɔ de gə̄ ń kété nin̄ i ngolən gə̄ ní tə́ ō.
Lo ń nuū tə́ kum kedə̄ əhɔ ngé tétə̄ najə̄ gə̄ adə̄ nin̄ gerə̄n̄ sor̄ yādə́ ō,
adə̄n kɔsə go̰n kə́ to ngándáńg ō.
15Gír de kə́ táĺ gə̄ ń i gír kaa yā de gə̄ kə́ najə̄ gətóo dɔdə́ tə́ gə̄ ní,
gāngə̄n̄ dɔdə́ jī nápar de gə̄ kə́ ngé rāā kum de gə̄ ndoō tə́ gə̄ tə́ i kə ta kūl̄ kum kedēé.
16Kum kedə̄ udə kem nge rāā kəla yā Kɔ́ɔ̄ɓē kógə̄ḿ tə́
ba mbātə́ najə̄ gō mban̄g gə̄ kə́ majən̄ aĺ ngá̰ý gə̄ tə́ kə kūl̄ yá̰á̰ kə́ to kɔr kum gə̄ ō, yá̰a̰ kɔjə yá̰a̰ gə̄ ō.
17Ni adə̄ de kə́ táĺ gə̄ nar gír kəla kə́ ngan̄g gə̄ ń nin̄ rāān̄ tə́ ní.
Ni rāā adə̄ unən̄ róbə́ kə́ to kɔr kum ō,
ni tél i ndíl yādə́ kə́ kadaá ō,
ndɔ̄ɔ́ anī ni tél i tíyō̰ gə̄ kə́ ndə́lēn̄ tām̄ yādə́ tə́ ō.
18Ni rāā adə̄ nin̄ teēn̄ Bā katə̄ kə njadə́ ō,
rāā adə̄ mānə̄n̄ kum man̄ kə́ ngá̰ý tə́ ō.
19Banī madə̄ ba̰ā̰də́ gə̄ ɓáa ni rāā adə̄ man̄ tíbə dɔdə́ kɔ̄ɔ́.
Gō tə́ anī, man̄ kə́ nēgə́ wut wut aw̄ sedə́ gírí nang tə́ pá tá ɓōkə́də́ ndágá ɓáý.
20I tām̄ ń toō tə́ n de kə́ sew gə̄ taānəń yá̰a̰ kənge yā ngé rāā yá̰a̰ kə gō kem ndigə yā Nə́ɓāá aĺ gə̄ jīdə́ tə́ kɔ̄ɔ́ ní.
Kɔ́ɔ̄ɓē, nin̄ ənīn̄ pā tɔ̄ȳnəń rīí kə́ táĺ ō,
ɔsən̄ go̰n jīí ń ī-rɔ̄ɔń dɔdə́ tə́ ní naā tə́ malang ō.
21Tɔdɔ̄ kum kedə̄ teē ta de gə̄ ń kəlā ndo̰də́ dṵṵ̄ naā ní ō,
rāā adə̄ ta ngáń kə́ dūú ngá̰ý gə̄ ndɔ̄w̄ adə̄ ɔrə̄n̄ najə̄ kum unjə̄ ō.
Currently Selected:
KUM KEDƏ̄ 10: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.