KUM KEDƏ̄ 5
5
1Lo ń nuū tə́ de kə́ gōtə́ a ra dɔɔ́ ō, a ger̄ gō rɔ̄n majə ō,
no ngé gə̄ ń rāānən̄ ndoō tə́ ō,
idən̄ tadə́ gírən tə́ dan ń ni əhɔń rɔ̄n tɔgə tə́ ní ō.
2Dan ń nin̄ a a̰a̰nən̄ anī, ɓōĺ kə́ ngá̰ý a rāādə́ adə̄ a ndewn̄.
Nin̄ gírə̄n̄ kadə̄ a ajə alé, ba dan ń a̰a̰n̄ kadə̄ ajənən̄ anī, ɔr kumdə́ ngá̰ý.
3Nin̄ a ədan̄ naā dɔ dáńdə́ tə́ kə ndə̄ngā rɔ̄ɔ́ ō,
kə to̰ó̰ ō, kə koō kə́ tetə pḭḭ́ ō na:
4i ni n jə-mbóoī seneé kété ō,
jə-luriin̄ ō ní.
Kə gō ger̄ yá̰a̰ aĺ yājí ní, jə-rāāin̄ i de kə́ dɔn ndi kə gōó aĺ tə́ ō,
yon to rɔ̄sɔl̄ ō.
5Rāā i ba̰ý n tə́dannə̄ń dan ngáń Nə́ɓā gə̄ tə́ ō,
udəń tū kɔsə go̰n yā de kə́ dɔ rā̰ tə́ gə̄ tə́ ō ní?
6I beé n jə-ndúmīiń sa̰y ngá̰ý kɔ̄ɔ́ kadə róbə najə̄ kə́ rɔ̄kum tə́ ō,
lo kunjə̄ yā yá̰a̰ rāā kə́ gōtə́ teē kumjí aĺ ō,
mbang əɓa tām̄ yājí tə́ aĺ ō ní.
7Jə-njə̄rāī dɔ róbə́ yá̰a̰ rāā kə́ gōtə́ aĺ tə́ ō, dɔ róbə́ ndúm̄ tə́ ō, bátə́ adə̄ nel̄jí tṵ alé,
j-ənda dəla lo kə́ kanjə̄ róbə gə̄ jə-gān̄g,
banī jə-ger̄ róbə yā Kɔ́ɔ̄ɓē alé.
8Kɔjə rɔ̄ yājí ní teējí i rí?
Yá̰a̰ kənge yājí ń j-ɔjiīń rɔ̄jí ní teējí i rí?
9Yá̰a̰ malang ń nuū ní sində̄ lim kɔ̄ɔ́ tītə̄ ndíl kāgə̄ beé ō,
tītə̄ najə̄ kə́ mān̄ kə nélé beē ō.
10Tītə̄ to bo ń njar dan bəngál man̄,
kanjə̄ kadə̄ deē a̰a̰ gō tóon ní beē ō,
aláa gō tóo njan kə́ kum man̄ tə́ beē ō.
11Tá ɓáý tṵ ní, i tītə̄ yel̄ kə́ ḭḭ bɔ̄gə̄ ɓōdə̄ rā̰ tə́
kanjə̄ kadə̄ deē a̰a̰ yá̰á̰ kógə̄ḿ kə́ ɔjə dɔ tóon beé.
Tɔdɔ̄ bɔ̄gən gə̄ ń a əndań nél kə tɔ́gəneé njar ba mānəń ní,
deē a̰a̰ gō tóon alé.
12Tītə̄ gərā kə́ deē ur kum kə̄ dɔ yá̰á̰ kógə̄ḿ tə́ á njar nél anī néĺ tél əla naā gogə́ láẃ ngá̰ý adə̄ deē ger̄ tóon aĺ ní,
13Jḭḭ̄ gə̄gē ní, dan ń ojən̄jí hapə anī, jə-hindī kɔ̄ɔ́ ō,
gō tóó háljí kə́ majə gətóo ō,
háĺ kə́ majə aĺ ṵṵjí tītə̄ hor beé ō.
14A̰á̰ā̰, kəndā kem dɔ tə́ yā de kə́ nge rāā yá̰a̰ gō yā Nə́ɓā tə́ aĺ i tītə̄ təsá əwā kə́ nél balway ɔy aw̄ń kɔ̄ɔ́ beē.
Ni udə lim tītə̄ saa hor kə́ nél tə̄ndā tḭ̄ḭn kɔ̄ɔ́ beē.
Ni sində̄ kɔ̄ɔ́ tītə̄ mbā kə́ ndɔ̄ kógə̄ḿ kə́ əga kem deē dɔn tə́ aĺ beé.
Kɔsə go̰n yā de kə́ sew gə̄
15Banī de kə́ sew gə̄ ndin̄ ngándáńg ō,
i Kɔ́ɔ̄ɓē n i nge kəndā njadə́ ní ō,
Nge Ndi dɔ rā̰ tə́ a̰a̰ gōdə́ ō.
16Adə̄ nin̄ a əngen̄ ɓē kṵ kə́ majə ngá̰ý ō,
jākā mbang kə́ to ngol ō jī Kɔ́ɔ̄ɓē tə́.
Tɔdɔ̄ ni a ngɔ̄m̄də́ kə jīn kə́ kṵṵ́ ō,
ni a séw bɔ̄gən dɔdə́ tə́ ō.
17Təngā lo dal ba̰ā̰ tə́ yān i tītə̄ kə́ ni un i kūbə̄ rɔ̄ɔ̄ n əla rɔ̄n tə́ beē ō,
yá̰a̰ malang ń Nə́ɓā əndā ní, ni adə̄də́ yá̰a̰ rɔ̄ɔ̄ yā kəndań madə̄ ba̰ā̰n gə̄.
18Ni a əla yá̰á̰ kə́ gōtə́ rɔ̄n tə́ tītə̄ kūbə̄ gində̄ beé ō,
ni a séw sarya kə́ deē a ndɔ́təń kə̄ kété tṵ alé jākā tə́ dɔn tə́ ō.
19Der rɔ̄ɔ̄ yān i hálən kə́ táĺ kə́ dum̄ tetən rɔ̄ɔ̄ ō.
20Wūn̄g yān kə́ al̄naā kə́ tītə̄ kaskar kə́ de ɔl kum beé ní, ni a lōō gírí aĺ ō,
yá̰a̰ malang ń ni əndā ní a reē yā rɔ̄ɔ̄ de kə́ mbóo gə̄ seneé ō.
21Tel̄ man̄ gə̄ a teēn̄ yā kaw̄ tītə̄ gərā kə́ kəndā majə tū ga̰ gərā tə́ beē,
nin̄ teēn̄ tū kil̄ man̄ gə̄ tə́ tītə̄ kə́ teēn̄ i tū ga̰ gərā kə́ kɔr gō majə tə́ beē, kumdə́ sɔɔ̄ yá̰á̰ ń serən̄ ní.
22Yá̰a̰ rɔ̄ɔ̄ kógə̄ḿ a tə́nī kɔ̄sə̄ kə wūngūú ngá̰ý ō,
bā bo gə̄ a ḭḭn̄ sedə́ kə wūngūú ō,
man̄ bā gə̄ a tíbən̄ dɔdə́ kanjə̄ kadə̄ kumdə́ ṵṵdə́ ō.
23Néĺ kógə̄ḿ kə́ tɔ́gən i ngá̰ý a əla kum kə̄ dɔdə́ tə́ ō,
a tə̄ndā yā tḭ̄ḭ̄də́ tītə̄ nél balway beé ō.
Yá̰a̰ rāā kə́ gōtə́ aĺ rāā adə̄ dɔ nang kə taá tél dəla lo ō,
yá̰a̰ rāā kə́ majə aĺ mbəre kōr̄ kāgə̄ mbang yā ngé tɔ́gə gə̄ ənī kɔ̄ɔ́ ō.
Currently Selected:
KUM KEDƏ̄ 5: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.