KUM KEDƏ̄ 4
4
1Rāā yá̰á̰ kə́ majə ba kojə ngōn̄ aĺ i sóótə́,
tɔdɔ̄ i yá̰á̰ kə́ majə kə́ gotən a to ngándáńg.
Tām̄ nge ń nuū i yá̰á̰ kə́ Nə́ɓā ndigə ō, de gə̄ ndigən̄ ō.
2Ré deē rāā yá̰á̰ kə́ majə kə́ gotən a to ngándáńg anī, de gə̄ a ndájə̄n̄ ō,
ré deē rāā aĺ anī, de gə̄ a ndə̄ngān̄ i gotən ō.
Kem dúnya̰ kə́ ngándáńg tə́ ní, ni tetə rɔ̄ɔ̄ ō, əlan̄ jākā tetə rɔ̄ɔ̄ dɔn tə́ ō.
Ni tetə rɔ̄ɔ̄ lo nējə̄ naā kənī gambəla kə́ sɔɔ̄ dɔ yá̰á̰ kə́ majə aĺ tákə̄ aĺ tə́ ō.
3Banī ngáń kə́ kojə ngá̰ý yā ngé rāā yá̰a̰ kə gō kem ndigə yā Nə́ɓāá aĺ gə̄ i yá̰á̰ kə́ kanjə̄ kumən.
Nin̄ i ngáń kə́ bɔbə̄ gətóo gə̄,
adə̄ ngəradə́ a əhɔ nang aĺ ō,
gír gisədə́ a ra ngan̄g aĺ ō.
4Ká ré ta jīdə́ tɔ̄ɔń kum mbang kə́rēý tə́ gə̄gē anī,
nél a tétə̄də́ kɔ̄ɔ́ tām̄ nin̄ ngangə̄n̄ aĺ ō,
nél bo a ró̰ȳdə́ kə ngəraá kɔ̄ɔ́ ō.
5Ta bal jīdə́ gə̄ a tétə̄ kɔ̄ɔ́ no ndɔ̄ yādə́ gə̄ tə́ ō,
ta kan̄də́ a tḭ̄ḭ̄ kɔ̄ɔ́ tɔdɔ̄ to ɓogə́ro ngá̰ý adə̄ deē a əsadə́ aĺ ō,
yá̰á̰ kə́ yā rāań gətóo ō.
6Tɔdɔ̄ ngáń kə́ kojədə́ lo kaya tə́ gə̄ ní,
ɔjən̄ i háĺ kə́ gōtə́ aĺ gə̄ yā ngé kojədə́ gə̄ kə̄ ndágá ndɔ̄ sarya tə́.
Kum koy ń de kə́ gōtə́ oy kété no ndɔ̄n tə́ ní
7Ba de kə́ gōtə́ tā anī, ká ré ni oy kété no ndɔ̄n tə́ gə̄gē anī, ni a ɔr̄ koō.
8Tɔdɔ̄ tɔgə ɓə́gá kə́ nel̄ deē ɔjə i dɔ ɓāl̄ deē kə́ ngá̰ý alé,
tām̄ i kutə ɓāl̄ gə̄ kə́ ngá̰ý n a rāā kadə̄ deē a ger̄nəń ní alé.
9Tām̄ yā deē tə́ ní, kum kedə̄ i dɔ ndaa.
Kum tɔgə ɓə́gá kə́ rɔ̄kum i ndi kə́ kanjə̄ kadə̄ yá̰á̰ kə́ majə aĺ tákə̄ deē.
10Ni tél de kə́ nel̄ Nə́ɓā seneé, ādə̄ Nə́ɓā tárən ō.
Ba dan ń ni ndi i dan ngé rāā majaĺ gə̄ tə́ ní,
unnən̄ aw̄n̄ seneé lo kə́ rang tə́.
11unən̄ kɔ̄ɔ́ na sōgə́ yá̰á̰ kə́ majə aĺ nujə gír̄ yān,
aláa sōgə́ gólə̄n̄ ndílən kə ngamaá.
12Tɔdɔ̄ yá̰á̰ kə́ kanjə̄ kumən ń a gól̄ deē ní,
i yá̰á̰ kə́ a ənī til dɔ yá̰á̰ kə́ rɔ̄kum kə́ kə kumneé tə́ ō,
ngur ń i yá̰á̰ kə́ a wēl̄ deē ní,
i yá̰á̰ kə́ a nujə gír̄ kə́ ngam gətóó tū tə́ ō.
13Ni ugə̄ tū majə kə́ ɔtə̄ kə taá tə́ i láẃ ngá̰ý ō,
ndi majə kə́ rɔ̄ rɔ́ɔ̄ gə̄ tə́ dan i ngá̰ý ō.
14Nel̄ Kɔ́ɔ̄ɓē seneé,
i tām̄ ń nuū tə́ n ni nāgə̄rā láẃ teē seneé kɔ̄ɔ́ dan ngé rāā yá̰a̰ majə aĺ gə̄ tə́ ní.
De gə̄ a̰a̰n̄ ba gerə̄n̄ kum alé,
yá̰á̰ kə́ deē ger̄ loon alé ń toō ní, nin̄ sāān̄ ger̄ alé:
15Yá̰á̰ ní i kadə̄ Nə́ɓā rāā kem ndaa kə deē ń ni gə̄rān ní ō,
a̰a̰ kum tō ndoō yān ō,
i kadə̄ ni dḭḭ̄ ngé kə́ táĺ yān gə̄ ō.
16Yo de kə́ gōtə́ i yá̰á̰ kə́ gān̄g sarya dɔ ngé rāā yá̰a̰ kə gō kem ndigə yā Nə́ɓāá aĺ gə̄ ń ndin̄ kə kumdə́ ní ō,
balsáa ń majə ɔtə̄ kə taá ní,
hálən əndā najə̄ dɔ deē ń tɔgə ɓə́ga kem háĺ kə́ gōtə́ aĺ tə́ ní ō.
17I beé ní, nin̄ a a̰a̰n̄ yo de kə́ nge kum kedə̄
kanjə̄ ger̄ kum yá̰á̰ ń Kɔ́ɔ̄ɓē ndigə tām̄ yān tə́ ní ō,
kanjə̄ ger̄ kum yá̰á̰ ń Kɔ́ɔ̄ɓē əndānəń lo kə́ ni a sōl̄ yá̰á̰ kógə̄ḿ tū tə́ aĺ tə́ ní ō.
18Nin̄ a a̰a̰n̄ ō, a kídə̄n̄ i mbé ngóy ō,
banī Kɔ́ɔ̄ɓē a əgōdə́.
19Dan ń nin̄ a oyn̄ anī, deē a rɔȳ nīńdə́ alé,
nin̄ i yá̰a̰ rɔ̄sɔl̄ kə́ ngándáńg dan de kə́ koy gə̄ tə́.
Ni a mbə́rē tə́nīdə́ kadə̄ dɔdə́ a ur nang kété kanjə̄ kadə̄ nin̄ ədan̄ yá̰á̰ kógə̄ḿ ō,
ni a yéȳdə́ bátə́ ngəradə́ tə́ ō,
a ton̄ tītə̄ bur bátə́ ta tɔ̄l̄ ta tə́ ō,
rɔ̄də́ a tōr̄də́ ō,
a əga kem deē dɔdə́ tə́ aĺ ō.
Ndə̄ngā rɔ̄ yā ngé rāā yá̰a̰ kə gō kem ndigə yā Nə́ɓāá aĺ gə̄
20Dan ń a tə́dan̄ kutə majaĺ yādə́ gə̄ anī, nin̄ a reēn̄ i kə ɓōló ō,
mósə de gə̄ ń nin̄ ɓōkə́n̄ nang tə́ ní, a tetə yā kənda dɔdə́ nin̄ kɔ́ gə̄ ō.
Currently Selected:
KUM KEDƏ̄ 4: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.