KUM KEDƏ̄ 6
6
Majə kadə̄ mban̄g gə̄ sāān̄ kum kedə̄
1Ādə̄ sḭḭ̄ mban̄g gə̄ ōōī najə̄ ń toō ba ī-gerī kum. Ādə̄ ndóōn̄sí yá̰a̰, sḭḭ̄ ń ā ī-gāngī sarya dɔ de gə̄ malang kə́ dɔ nang tə́ ní.
2Sḭḭ̄ ngé ndi dɔ kósə de gə̄ tə́ gə̄ ī-nēlī mbīsí ōōiń,
sḭḭ̄ ń ā ɔ́jiī rɔ̄sí kə kutə nápar de gə̄ yāsí kə́ i ngá̰ý ní,
3i Kɔ́ɔ̄ɓē n adə̄sí tɔ́gə kṵ ɓē ní ō,
i Nge Ndi dɔ rā̰ tə́ n rāā adə̄ ī-téliī kɔ́ɔ̄ rɔ̄sí gə̄ ní ō,
i ni n i nge kəndā ma̰ȳ yá̰a̰ rāāsí gə̄ ní ō, nge gṵ́ṵ̄ yá̰a̰ gə̄ ń ī-númī yā rāā ní kə ta njaá ō ní.
4Ré sḭḭ̄ de kə́ bo gə̄ kə́ kem ɓē kṵ yān tə́ ī-gāngī sarya kə gō róbəneé aĺ ō,
ī-ɓōlíī ndū najə̄ aĺ ō,
ī-rāāī yá̰a̰ kə gō kem ndigə yā Nə́ɓāá aĺ ō anī,
5ni a teē rétə́ gēé yā ra nosí tə́ kəra kə́ to ɓōĺ ngá̰ý,
tɔdɔ̄ a rāān̄ sarya kə́ gō ngan̄g kə de kə́ bo gēé.
6De kə́ dūú ní, a māȳn̄ rɔ̄də́ dɔn tə́ ō, asə kadə̄ a̰a̰n̄ kum tō ndoō yān ō,
banī a əndān̄ ma̰ȳ ngé tɔ́gə gə̄ i kə ngangá ngá̰ý.
7Mban̄g kə́ bo kə́ dɔ de gə̄ tə́ malang a tél kə gōneé no de kógə̄ḿ tə́ aĺ ō,
a usən dɔ bo deē tə́ aĺ ō.
Ni rāā de kə́ dūú tītə̄ ń rāań de kə́ bo ní ō,
ni a ɔr̄ kam̄ deē lo rāā kem ndaa yān tə́ aĺ ō.
8Ngé gə̄ ń tɔ́gə́də́ i ngá̰ý ní, a ndəlen̄ gír najə̄ yādə́ i kə ngangá ngá̰ý.
9Sḭḭ̄ ngār gə̄, m-ɔ̄r̄ najə̄ i sesí sḭḭ́,
yā kadə̄ ī-ndóōiń kum kedə̄ ō, bə̄dē əgańsí aĺ ō.
10Ngé gə̄ ń əndān̄ kumdə́ gír ndū najə̄ kə́ táĺ tə́ majə ní, a gerə̄n̄də́ kadə̄ nin̄ i de kə́ táĺ gə̄ ō,
ngé gə̄ ń ndóōn̄də́ ndū najə̄ kə́ táĺ adə̄ gerə̄n̄ ní, a əngen̄ nge rɔ̄ɔ̄ dɔdə́ tə́ ō.
11I beé ní, ādī ɓōō najə̄ yāḿ rāāsí,
ādī ngurdə́ i kemsí tə́ kə ngangá ō, anī sḭḭ̄ i de gə̄ kə́ ɔjə̄n̄sí.
Kum kedə̄ əya̰ rɔ̄n adə̄ deē əngen
12Kum kedə̄ ndə́lē ō, ndə́lē yān a təgā aĺ ō.
Ni əya̰ rɔ̄n hɔliyɔ adə̄ ngé gə̄ ń tárnən̄ ní a̰a̰nən̄ ō,
adə̄ ngé gə̄ ń sāānən̄ ní əngenən̄ ō.
13Ngé gə̄ ń gḛynən̄ ní, nəkɔ́ aw̄ ɔjədə́ rɔ̄n kété adə̄ ger̄nən̄ kɔ̄ɔ́.
14Náā nəkɔ́ ń aw̄ kum kə̄ rɔ̄n tə́ ɓatə ní, kɔr a rāan alé:
a ndi ta kújə yān tə́ adə̄ a əngen.
15Gḛy kum kedə̄ ngá̰ý i kəndā ma̰ȳ yá̰á̰ kə́ majə ɔtə̄ kə taá.
Náā nəkɔ́ ń ɔgə̄ rɔ̄n ɓīī najə̄ yā kum kedə̄ tə́ ní, sḛ́ý laā anī, a ndi kanjə̄ sōl̄ yá̰á̰ kógə̄ḿ.
16Tɔdɔ̄ ni ra yān nuú, njə̄rā a sāań ngé gə̄ ń asən̄ loon tə́ tām̄ yān tə́ ní.
Ni teē hɔy kə̄ rɔ̄də́ tə́ dɔ róbə yādə́ tə́ kə kem majə yāneé ō,
reē ra nodə́ tə́ kem gír̄ yādə́ gə̄ tə́ kógə̄ḿ kógə̄ḿ ō.
17Ta kəla gír kum kedə̄ i dan ń deē gḛy rɔ̄kum kadə̄ kum kedə̄ ndóōn yá̰á̰ ní ō,
18ndigə kadə̄ kum kedə̄ ndóō deē yá̰a̰, i tár kum kedə̄ ō,
tár kum kedə̄ i ngɔ̄m̄ ndū najə̄ yān gə̄ ō,
deē ń ngɔ̄m̄ ndū najə̄ yān gə̄ ní, kɔ́ɔ̄ ger̄ kadə̄ ni a oy aĺ bátə́ ō,
19deē ń ger̄ kadə̄ ni a oy aĺ bátə́ ní, ni i rɔ̄ Nə́ɓā tə́ ngɔr ō.
20Gḛy kum kedə̄ i yá̰á̰ kə́ aw̄ kə deé yā kəndān dɔ ɓē kṵ tə́.
21Adə̄ ré sḭḭ̄ ngār gə̄ ń ī-ndiī dɔ de gə̄ tə́ ní, kōmbēr̄ ngār nel̄sí ō, kāgə̄ ngār nel̄sí ō anī,
ī-rɔyī kum kedə̄ anī, ā ṵ́ṵ̄ī ɓē i kə́ njɔ́ḿ gə̄ tə́.
Mbēr̄ kə́ dɔ kum kedə̄ tə́
22Ba kum kedə̄ i rí ō, gír ngəran teē i rá ō? M-ā m-ə́dásí najə̄ kə́ dɔ kum kedə̄ tə́,
kanjə̄ ɓɔ̄ɔ̄sí dɔ yá̰a̰ gə̄ kə́ ton̄ lo mundə̄ tə́.
M-ā m̄-tél yā kaw̄ gogə́ gír ngəran tə́ sa̰y, lo ń ni teē tū tə́ ní tə́.
Yá̰a̰ malang kə́ yā ger̄ kə́ sɔɔ̄ dɔ kum kedə̄ ní, m-ā m̄-teēń kə̄ ndágá wáńg,
kanjə̄ gōn̄g gidə najə̄ kə́ rɔ̄kum.
23M-ā m-ə́ya̰ ta róbə yā kadə̄ ngur yá̰á̰ ń i yá̰á̰ kə́ a nujə lo ní yā kadə̄ ɔrəm̄ ta róbə aĺ ō.
Tɔdɔ̄ nge ń nuū i yá̰á̰ kə́ ɓoon̄ naā kə kum kedēé alé.
24Ba kutə ngé kum kedə̄ kə́ ngá̰ý gə̄ a ajə de kə́ dɔ nang tə́ gə̄ ō,
mban̄g ń kur̄ dɔn ger̄ yá̰á̰ ní, gír deē yān gə̄ a ndin̄ majə ō.
25I beé ní, ə́ya̰ī rɔ̄sí ādī najə̄ yāḿ gə̄ ɔjən̄sí yá̰a̰, anī ā ə́ngeī yá̰á̰ kə́ majə tū tə́.
Currently Selected:
KUM KEDƏ̄ 6: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.