KUM KEDƏ̄ 18
18
Hor kə́ ra kə ngālāá ɓururu
1Tām̄ yā de kə́ táĺ yāí gə̄ tā anī, lo kunjə̄ kógə̄ḿ kə́ bo ngá̰ý to tām̄ yādə́ tə́ ō,
de kə́ rang gə̄ oōn̄ ndūdə́ kanjə̄ kɔr̄ kam̄ tildə́ ō.
Nin̄ ədan̄ na rɔ̄nel̄ i yādə́ tām̄ na a̰a̰n̄ tápə̄ tītə̄ yādə́ alé.
2Nin̄ rāān̄ deē yāí gə̄ kə́ra tām̄ nin̄ sāān̄ dal ba̰ā̰ yá̰á̰ kə́ gōtə́ aĺ gə̄ malang ń rāādə́ ní aĺ ō,
nin̄ dəjen̄ māȳ rɔ̄ tām̄ yá̰a̰ rāādə́ kə́ majə aĺ tə́ ō.
3Deē yāí gə̄ tā a, ādə̄də́ i lo kə́ risə til nding alé, banī i hor kə́ ra kə ngālāá ɓururu,
kadə̄ ɔjədə́ róbə lo kə́ nin̄ njə̄rān̄ tū tə́ kété aĺ tə́ ō,
ādə̄də́ mbang kə́ rāā yá̰a̰ kə deé alé, kadə̄ nin̄ ndɔ́tə̄nəń ndɔ́tə̄ kə́ to kɔsə go̰n kum kə̄ kété kété ō.
4Ngé gə̄ ń nuū tā a, asə kadə̄ ɔgə̄n̄də́ lo kunjə̄ ō, ənīn̄də́ dəngáyá kum lo kə́ risə til nding tə́ ō,
tām̄ yā ngání gə̄ ń nin̄ əhɔn̄də́ ɓəlo tə́ ní.
Tɔdɔ̄ majə kadə̄ i nin̄ n a adə̄n̄ de kə́ dɔ nang tə́ gə̄ lo kunjə̄ kə́ a to ngándáńg yā ndū najə̄ ní.
Lo kə́ ndɔ̄ɔ́ kə́ to ɓōĺ ō, kə́ gān̄gnəń dɔ de gə̄ ō
5Nin̄ unən̄ ndūdə́ yā tɔ̄l̄ ngáń kásə̄ gə̄ yā de kə́ táĺ gə̄,
ba i ngōn̄ kógə̄ḿ ngóy n ajənən̄ gō kəndā kə́ əndānən̄ dɔ ndágá tə́ ní.
Yā kəndańdə́ ɓáa ḭ̄ ī-rāā adə̄ ngáńdə́ gə̄ ngá̰ý oyn̄ kɔ̄ɔ́ ō,
ḭ̄ ī-rāā adə̄ oyn̄ naā tə́ malang kum man̄ kə́ tíbə dɔdə́ tə́ ō.
6Lo kə́ ndɔ̄ɔ́ kə́ ndɔ̄ ngeé ń nuū tə́ ní, i kə́ ədan̄ kaají gə̄ adə̄ gerə̄n̄ gō kété,
yā kadə̄ míndə́ Nə́ɓā ń ənī kété á ran̄ dɔ tə́ ní, ənīn̄ kemdə́ rāānəń rɔ̄nel̄ kanjə̄ sōl̄ yá̰á̰ kógə̄ḿ.
7Lo kə́ ndɔ̄ɔ́ kə́ ndɔ̄ ngeé ń nuū tə́ ní, deē yāí gə̄ ngóōn̄ taa,
kadə̄ i ndɔ̄ ń a ajənə̄ń de kə́ gōtə́ gə̄ ní ō, a nujənə̄ń madə̄ ba̰ā̰ gə̄ sák sák kɔ̄ɔ́ ní ō.
8Tām̄ yá̰á̰ ń ə́ndań ngé rɔ̄ɔ̄jí gə̄ ní,
tél i yá̰a̰ kɔsə go̰n kə́ tām̄ yājí tə́,
tɔdɔ̄ ī-ɓāŕjí kə̄ rɔ̄í tə́.
9Gír kojə yā de kə́ sew gə̄ ń i ngé rāā yá̰a̰ kə gō ń Nə́ɓā ndigə ní, ndējə̄n̄ yá̰á̰ kə́ tun̄ gə̄ lo mundə̄ tə́ ō,
oōn̄ naā dɔ ndū najə̄ yā Nə́ɓā ń toō tə́
kadə̄ de kə́ táĺ gə̄ a əngen̄ yá̰á̰ kə́ majə tām̄ yādə́ gə̄ tə́ ō, yá̰á̰ kə́ asə yodə́ gə̄ ō.
Adə̄ nin̄ unən̄ pā gə̄ yā kaadə́ gə̄ kɔ̄ɔ́ ɓá.
10Nin̄ oōn̄ kōō kɔŕ kə́ əla naā mbitəri kə́ madə̄ ba̰ā̰ gə̄ a əgan̄ ō,
kōō nūū yā ngé nūū ngáńdə́ gə̄ kə́ ɓār̄ ta kaw̄ sa̰y ō.
11I yá̰á̰ kə́ tōr̄ kə́ kógə̄ḿ beē n rāā ɓəlo ō, kɔ́ɔ̄n ō ní.
Ɓer̄ kem ɓē ō, mban̄g ō ní, a̰a̰n̄ i tápə̄ kə́ kógə̄ḿ beē.
12Nin̄ malang ní oyn̄ i yo kə́ kógə̄ḿ beē,
nīń yādə́ gə̄ i kə́ dum̄ tə́da kutədə́ ō,
de gə̄ ń ndin̄ kə kumdə́ ní, asən̄ dubə̄də́ malang aĺ ō.
Tɔdɔ̄ gír kojə yādə́ gə̄ ń nin̄ tárən̄də́ ngá̰ý ní, gətóon̄ kɔ̄ɔ́ malang gidə kógə̄ḿ.
13Nin̄ ń kété taān̄ kem aĺ i kə́ márwāy gə̄ tə́ tām̄ əndān̄ kemdə́ i dɔ kəga gə̄ tə́ ní,
gerə̄n̄ kadə̄ de gə̄ ń toō i ngáń Nə́ɓā gə̄
i dan ń hágə́də́ gə̄ oyn̄ ní.
14Lo to kúkúkú ō, yá̰a̰ gə̄ malang ton̄ jəke ō,
lo i dan ndɔ̄ tɔȳ ō.
15Lo ń nuū tə́ najə̄ yāí ń tɔ́gən i ngá̰ý ní, ḭḭ dɔ rā̰ tə́, əya̰ kōr̄ kāgə̄ mbang,
ba ḭḭ bal əsō tītə̄ nge rɔ̄ɔ̄ kə́ a̰a̰ kum tō ndoō yā deē aĺ beē, kem ɓē kə́ ndɔ̄ĺ i dɔ tə́ tə́, danaá bang.
16Ni i kə kaskar yān kə́ ta katə ń i ndūí ń ā ī-lōō gírí aĺ ní.
Dan ń ni ɔr̄ tan dɔɔ́ anī, ni tɔ̄l̄ de gə̄ kə̄ lo gə̄ tə́ malang.
Dɔn ɔdə no rā̰ ō, njan əɓa dɔ nang ō.
17Kə̄ ta jī tə́ nuū yá̰a̰ gə̄ ń nin̄ a̰a̰n̄ kem nīī kə́ to ɓōĺ ngá̰ý gə̄ tə́ ní, nujə kemdə́ ō,
əla ɓōĺ kə́ ngá̰ý kə́ nin̄ gírə̄n̄ dɔ tə́ kété aĺ kemdə́ tə́ ō.
18Tə́nīn̄ de gə̄ kógə̄ḿ kógə̄ḿ kə̄ yóō kə̄ laā, nin̄ ton̄ i kə̄ ta yo tə́ ō,
náā nəkɔ́ a ɔjə gíŕ yá̰á̰ ń rāā yá̰á̰ á ni a oyń ní ō.
19Tɔdɔ̄ nīī kə́ to ɓōĺ gə̄ ń rāādə́ ní, tāādə́ kété kɔ̄ɔ́,
yā kadə̄ nin̄ oynə̄ń kanjə̄ ger̄ kum yá̰á̰ ń rāā yá̰á̰ á tápə̄ əsōń dɔdə́ tə́ ní alé.
Aaro̰ māȳ Nə́ɓā dɔ de gə̄ tə́ dəla lo tə́
20Rɔ̄kum, de kə́ sew gə̄ oyn̄ ō,
tɔ̄lə̄n̄ dūbə̄ de kə́ ngá̰ý gə̄ dəla lo tə́ ō.
Banī wūn̄g yā Nə́ɓā ní dan i ngá̰ý alé.
21Tām̄ de kógə̄ḿ kə́ najə̄ gətóo dɔn tə́ nāgə̄rā láẃ un dɔdə́ tə́ kɔ̄ɔ́:
ni ɔy yá̰a̰ rɔ̄ɔ̄ gə̄ kə́ tām̄ yā kəla yān tə́ jīn tə́.
Adə̄ i ndɔ̄ȳ ō, ndujə̄ nuū kāgə̄ kə́ otə majə kə́ a sɔl̄ kem Nə́ɓā ō.
Ni əndā rɔ̄n ta wūn̄g yā Nə́ɓā tə́ ō, dəba ta yá̰á̰ kə́ majə aĺ ń rāā yá̰á̰ ní ō.
I beé n ni ɔjəń kadə̄ ni i nge rāā kəla yāí kə́ rɔ̄kum ní.
22Ni tetə wūn̄g rɔ̄ɔ̄ i kə tɔ́gəneé aĺ ō,
kə yá̰a̰ rɔ̄ɔ̄ kə́ ngan̄g gēé aĺ ō.
Banī ni tetə nge rāā de gə̄ yá̰á̰ kə́ tōr̄ rɔ̄ɔ̄ i kə najá.
Aaro̰ ter̄ kem Nə́ɓā dɔ míndən ń ənī kə ngangá adə̄ kaadə́ gə̄ ní tə́ ō, dɔ madə̄ naā ń rāā sedə́ ní tə́ ō.
23Lo ń nuū tə́ nīń gə̄ i ngá̰ý kɔ̄ɔ́ ɓá.
Anī Aaro̰ aw̄ ra dɔ dán de kə́ koy gə̄ tə́ kə de kə́ kə kumuú gēé, ba tetə kə̄ngā yá̰á̰ kə́ tōr̄ ń a reē kə̄ dɔ de gə̄ tə́ ní kɔ̄ɔ́ ō,
ɔgə̄n kaw̄ rɔ̄ de kə́ kə kumuú gə̄ tə́ ō.
24Kūbə̄ ngāl̄ ń rīn na i Epod #18.24 Epod: Á̰a̰ī Teē 28.6. ní, rāān̄ yá̰a̰ malang ń Nə́ɓā əndā ní tū tə́.
Ndangən̄ rī kə́ to kɔsə go̰n yā kaají gə̄ dɔ ngán mbal̄ gə̄ ń ran̄ kə gō naá gír lo sɔ́ ní tə́ ō,
yá̰á̰ ń ɔjə kadə̄ ḭ̄ Nə́ɓā i de kə́ bo ní, əlan̄ tū kūbə̄ kənda dɔ yān tə́ ō.
25Dan ń nge tɔ̄l̄ yo a̰ā̰ beé anī, tél kə gōneé ō, ɓōĺ rāan ō.
I beé n wūn̄g kə́ sḛ́ý beē ń rāāī dɔ gír deē yāí gə̄ tə́ á nin̄ gerə̄n̄ ní, tetəń ní.
Currently Selected:
KUM KEDƏ̄ 18: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.