KUM KEDƏ̄ 19
19
Ngán Israel gə̄ teēn̄ bā katə̄
1Ba yā ngé rāā yá̰a̰ kə gō kem ndigə yā Nə́ɓāá aĺ gə̄ tāa,
wūn̄g kə́ to ɓōĺ ngá̰ý rāā Nə́ɓā dɔdə́ tə́ bátə́ ta tɔ̄l̄ ta tə́.
Tɔdɔ̄ Nə́ɓā ger̄ yá̰á̰ ń nin̄ sāān̄ rāā ní kété kɔ̄ɔ́.
2Dan ń nin̄ əya̰n̄ ngán Israel gə̄ kadə̄ aw̄ taān̄ koō ō,
tə̄ɓān̄də́ kə nja tewle gēé ō anī,
a télən̄ yā tūr̄ ndūdə́ ba ngɔ̄də̄ gōdə́.
3Tām̄ dan ń nin̄ ndin̄ a əhɔn̄ ndoō ngáńdə́ kə́ koy gə̄ ɓáý ō,
ton̄ kə̄ dɔ ɓádə́ ngáńdə́ gə̄ tə́ a nūūn̄ ō anī,
teēn̄ kə gír̄ kə́ rang kə́ kanjə̄ kumən.
Ngé gə̄ ń nin̄ rāān̄də́ ɓɔ́ kadə̄ aw̄n̄ ní,
tél ngɔ̄də̄n̄ gōdə́ tītə̄ kə́ a̰ȳn̄ i mbée beé.
4Yá̰á̰ kə́ tītə̄ dɔ koy beé rāādə́, adə̄ aw̄n̄ bátə́ ta tɔ̄l̄ ta tə́,
anī dɔdə́ ndígə̄nal yá̰á̰ ń rāādə́ kété ní kɔ̄ɔ́,
yā kadə̄ əngenə̄ń ndéý yá̰á̰ kə́ tōr̄ gə̄ ń dūúdə́ kété ní.
5Lo ń nuū tə́ gír deē yāí gə̄ a gerə̄n̄ yá̰á̰ ń i teē bā kə́ to kɔr kum ní,
ba nin̄ tā anī, a oyn̄ i yo kə́ to dáńg ngá̰ý.
6Tɔdɔ̄ yá̰a̰ malang ń ə̄ndā kə gō gíŕdə́ gēé kógə̄ḿ kógə̄ḿ ní,
i kə́ tél rāādə́ gogə́ rang.
yā kadə̄ yá̰a̰ malang kə́ majə aĺ rāā ngání gə̄ alé.
7De gə̄ a̰a̰n̄ kil̄ man̄ kə́ utə̄ dɔ géŕ ger ō,
lo ń kété man̄ i tū tə́ ní, de gə̄ a̰a̰n̄ kadə̄ tutə kɔ̄ɔ́ ō.
Bā katə̄ tél i róbə́ kə́ de gə̄ a mānə̄n̄ tū tə́ karī,
man̄ kə́ nūgə́ kə tɔ́gɔ́ tél i kubə kə́ mu əɓa tū tə́.
8Gír de kógə̄ḿ gə̄ kə taá malang mānə̄n̄ i lo ń nuū tə́ ō, jīí ngɔ̄m̄də́ ō,
nin̄ a̰a̰n̄ yá̰á̰ kə́ majə to ɓōĺ ngá̰ý kə kumdə́ ō.
9Nin̄ tḭ̄ḭ̄n̄ naā kə̄ lo gə̄ tə́ tītə̄ sə́nda gə̄ kə́ ran̄ dɔ mu tə́ beē,
tḭ́ḭ̄n̄ bal tītə̄ ngán batə̄ gə̄ beé,
rāān̄nəń walyaí ḭ̄ Kɔ́ɔ̄ɓē nge gān̄g dɔdə́.
10Tɔdɔ̄ yá̰a̰ gə̄ ń rāān̄ yá̰a̰ dan ń nin̄ i mbā gə̄ dɔ nang kə́ rang tə́ ní,
əga kemdə́ dɔ tə́ ɓáý:
dɔ nang ń majə kadə̄ i dā̰ gə̄ n ndin̄ tū tə́ anī,
i yḭ́l̄ gə̄ tá taān̄ lo ō,
bā ń majə kadə̄ i dā̰ man̄ gə̄ n ndin̄ kum tə́ anī,
i dūbə̄ karā̰ kə́ ngá̰ý gə̄ tá teēn̄ kum tə́ ō.
11Gō tə́ anī, nin̄ a̰a̰n̄ i gír kaa yel̄ kə́ kijə gə̄.
Dan ń ngur rāādə́ adə̄ dəjen̄ yá̰a̰ kəsa kə́ nel̄ tadə́ ní,
12yā tɔ̄ləń ɓōōdə́ anī, i kerwḛy gə̄ n teēn̄ kum bā bo tə́ ní. #19.12: Á̰a̰ī Tə́da 11.31
De kə́ Ejiptə tə́ gə̄ gḛyn̄ mbā gə̄ alé
13Anī yá̰á̰ kə́ tōr̄ əsō dɔ ngé rāā majaĺ gə̄ tə́,
ɓá tā ba man̄ kə́ tel̄ ō, ndang ō, i kété no tə́ yā kɔjəń gō yá̰á̰ ń a rāā yā rāā yá̰á̰ ní.
I gōtə́ ngá̰ý kadə̄ rāān̄də́ yá̰á̰ kə́ tōr̄ sɔɔ̄ń kem ndul yādə́.
Tɔdɔ̄ nin̄ imə̄n̄ mbā gə̄ kim̄ kə́ majə aĺ ngá̰ý.
14Ngé kə́ rang gə̄ əhɔn̄ de kə́ nin̄ gerə̄n̄də́ aĺ gə̄ ń reēn̄ i ngɔr ɓáý ní kə̄ rɔ̄də́ tə́ alé.
Banī nin̄ rāān̄ mbā yādə́ gə̄ ń i ngé rāā majə sedə́ gə̄ ní ɓəlo tə́.
15Gír gān̄g aĺ ɓáý: yá̰á̰ kə́ tōr̄ to a ngóō ngé kə́ kété gə̄ nuú,
tɔdɔ̄ nin̄ əhɔn̄ mbā gə̄ kə̄ rɔ̄də́ tə́ i kə rɔ̄ɔ́.
16Kété ní de kə́ Ejiptə tə́ gə̄ rāān̄ rɔ̄nel̄
ngé gə̄ ń reēn̄ ngɔr ɓáý ní. Ɔjən̄də́ kadə̄ rāān̄ kəla i kə ndū kə́ kógə̄ḿ beē tītə̄ yādə́.
Ba gō tə́ anī, əndān̄ kəla kə́ ngan̄g ngan̄g gə̄ dɔdə́ tə́ adə̄ al̄ tɔ́gə́də́.
17Adə̄ rāān̄də́ adə̄ kumdə́ a̰a̰ lo alé,
tītə̄ yā ngé gə̄ ń ndin̄ ta kújə yā de kə́ sew tə́ ní.
Lo kə́ risə til nding gīr̄ gidədə́,
adə̄ náā nəkɔ́ a sāā i ta róbə́ kújə yā de kə́ sew ní.
Nə́ɓā rāā yá̰á̰ kə́ un gō naā kə́ kijə
18Yá̰a̰ gə̄ ń Nə́ɓā rāā ní, mbélə̄n̄ gír naā dɔ dáńdə́ tə́
tītə̄ kənde ń deē ənda ba ndɔ́tə̄ kə jīneé dɔ kəlān gə̄ tə́ anī, kōon a ɓār̄ gōsə̄
ba ndū kəlān gə̄ a to i kum gotən beé ní.
Yá̰á̰ ń toō kumən unjə̄ lo ń deē əndā ma̰ȳ yá̰a̰ gə̄ ń rāān̄ yá̰á̰ ní:
19Tām̄ yá̰á̰ gə̄ ń ton̄ dɔ nang tə́ ní, télən̄ yá̰á̰ kə́ to kum man̄ tə́ gə̄ ō,
ngé gə̄ ń a alən̄ i man̄ ní, njə̄rān̄ dɔ nang tə́ ō.
20Hor kə́ kum man̄ tə́ ṵṵ tɔȳ kə́ kété ō,
man̄ asə tɔ̄lən aĺ ō.
21Ba hor asə kṵ yá̰a̰ aĺ ō,
asə kṵ dā̰ kə́ tɔ́gə́də́ gətóo gə̄ ń njə̄rān̄ kum tə́ aw̄n̄ ō télən̄ ō ní alé.
Ni asə rāā kadə̄ yá̰a̰ kəsa yā Nə́ɓā kə́ beé ń toō yḭ̄l̄ láẃ tītə̄ kɔ̄sə̄ alé.
Tɔ̄ȳ kə́ ta tɔ̄l̄ ta tə́
22Tū yá̰a̰ gə̄ tə́ malang ní, Kɔ́ɔ̄ɓē, ḭ̄ ɔ́sə i gír deē yāí gə̄ kə̄ dɔɔ́ ō, ɔ́sə i go̰ndə́ ō.
Ḭ̄ ī-rāā i sedə́ kə kum mbang gə̄ malang ō, kə̄ lo gə̄ tə́ malang ō.
Currently Selected:
KUM KEDƏ̄ 19: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.