KUM KEDƏ̄ 17
17
Lo kə́ risə til nding
1Sarya yāí gə̄ ń ī-gān̄g ní i sarya kə́ bo gə̄ ō, lo ger̄ kumdə́ ngan̄g ngá̰ý ō,
adə̄ de gə̄ ń gḛyn̄ ndóō yá̰a̰ yāí aĺ ní, ndúmə̄n̄ kɔ̄ɔ́.
2Ngé rāā yá̰a̰ kə gō kem ndigə yā Nə́ɓāá gə̄ ń nuū ń kété ndigən̄ rāā gír de kə́ táĺ gə̄ ɓəlo tə́ ní,
nin̄ ton̄ dəngáyá kum til tə́ ō, nin̄ i ɓəlo gə̄ yā lo kə́ ndɔ̄ɔ́ kə́ dan gān̄g aĺ bátə́ ō,
utə̄n̄ tadə́ kújú ō, nin̄ i kə́ kɔr̄də́ kɔ̄kə́ tū tár yāí kə́ to ngándáńg tə́ ō.
3Kété ní nin̄ ɔjənə̄ń na n ndin̄ lo ɓɔ̄ɔ̄ rɔ̄ tə́ kə majaĺ yādə́ gə̄ kə́ to lo mundə̄ tə́,
sɔɔ̄ń dɔ ndígə̄nal yá̰á̰ ń i tītə̄ kūbə̄ kutə̄ ta róbə́ ní,
banī tə̄ndā tḭ̄ḭ̄n̄də́ kə̄ lo gə̄ tə́ ō, ndin̄ i kə ndíl ka̰ȳ kə́ to ɓōĺ ngá̰ý ō,
ndíĺ yá̰á̰ kə́ to ɓōĺ ngá̰ý gə̄ ń nin̄ a̰a̰n̄ ní, nujə kemdə́ kɔ̄ɔ́ ō.
4Lo ń ton̄ tū tə́ ní, ɔgə̄ kadə̄ ɓōĺ rāādə́ alé,
kōō yá̰á̰ kə́ ɓār̄ to ɓōĺ ngá̰ý gə̄ ɓār̄ kə gō gidədə́ ō,
nin̄ a̰a̰n̄ ndíl de kə́ koy gə̄ kə́ teēn̄ kə̄ rɔ̄də́ tə́ hɔy ba dɔ kumdə́ i kə wūngūú ō.
5Hor kə́ tɔ́gən i ngá̰ý tɔȳ madə̄ gə̄ asə rāā kadə̄ lo unjə̄ aĺ ō,
ndə́lē yā tíyō̰ gə̄
ugə̄ kum lo kə́ ndɔ̄ɔ́ kə́ to ɓōĺ ngá̰ý ń toō tə́ aĺ ō.
6Yá̰á̰ ń nin̄ a̰a̰n̄ ní,
i hor miī kógə̄ḿ kə́ a unjə̄ dɔ rɔ̄n ō, a əla i ɓōĺ kem deē tə́ ō ngóy.
Dan ń yá̰á̰ ń ndɔ̄w̄də́ ní sində̄ kɔ̄ɔ́ ta kumdə́ tə́ anī, kə̄ngā sāā gān̄gdə́ ō,
rāā adə̄ yá̰á̰ ń nin̄ a̰a̰n̄ ní, to ɓōĺ ngá̰ý man̄ nge ń nin̄ a̰a̰n̄ kété ní ō.
7Rāān̄ adə̄ tɔ́gə́ yá̰á̰ gól̄ lo yā nge rāā mbōlí gətóo kɔ̄ɔ́ ō,
rāā ń ni rāā kadə̄ ni na i de kə́ nge ger̄ yá̰á̰ ngá̰ý ní, nējə̄nən̄ kɔ̄ɔ́ əlanə̄ń rɔ̄sɔl̄ dɔn tə́ ō.
8Ngé gə̄ ń kété ədan̄ na tɔ́gə́də́ na asə kɔr̄ ɓōĺ ō, kem kə́ ndi kə gōó tṵ aĺ ō kɔ̄ɔ́ kem ngé moy gə̄ tə́ ní,
i nin̄ kɔ́ gə̄ n ɓōĺ kə́ to kəgō ngá̰ý rāādə́ moy tə́ ní.
9Adə̄ ká ré yá̰á̰ kə́ yā rāādə́ kə ɓōló gətóo gə̄gē anī,
mān̄ ń dā̰ gə̄ a mānə̄n̄ ní ō, ngol ń lī gə̄ a əlan̄ ní ō ngóy asə kəla ɓōĺ kemdə́ tə́:
10Nin̄ oyn̄ yo ɓōĺ ō,
mbātə́n̄ teē kumdə́ ka̰a̰ń lo kə́ risə til nding ń asən̄ teē kum tə́ ka̰ȳ aĺ ní ō.
11Kem ndul ɔjə tɔ́gə gətóo yān kə̄ ndágá lo ń najə̄ kə́ kum tə́ yān nəkɔ́ gān̄g sarya dɔn tə́ ní.
Dan ń gír̄ yā kem ndul rāan ndoō tə́ anī,
ni a gír̄ yá̰á̰ kə́ tōr̄ tɔȳ kə́ kété yā rāā ɓáý.
12Ɓōĺ i yá̰á̰ kə́ rang alé, ba i kəya̰ gír̄ kə́ rɔ̄kum kə́ a dḭḭ̄ deē kɔ̄ɔ́ ngóy.
13Ré deē əndā kemən dɔ dḭḭ̄ yā gír̄ kə́ rɔ̄kum ngeé ń toō tə́ ngá̰ý aĺ anī,
i lo ń nuū tə́ n yá̰á̰ ń rāā yá̰á̰ á deē a̰a̰ń tápə̄ ní, deē a ger̄ gírən aĺ tɔȳ kə́ kété ní.
14Ba nin̄ tā anī, lo kə́ ndɔ̄ɔ́ ngeé ń toō ń asən̄ tə́gā tadə́ gírí aĺ ō,
teē i lo kə́ ɓádá kə́ ɗúú ngá̰ý kə́ de asə tə́gā tan gírí aĺ tə́ ō ní,
nin̄ malang ɓīīn̄ majə alé.
15Tɔdɔ̄ ré i ndíl de kə́ koy gə̄ kə́ ton̄ ɓōĺ ngá̰ý gə̄ n a ngɔ̄də̄n̄də́ ní aĺ ɓáa,
i rɔ̄də́ n oy kɔ̄ɔ́ adə̄ nin̄ asən̄ rāā yá̰á̰ kógə̄ḿ alé ní.
Tām̄ ɓōĺ kə́ ngá̰ý rāādə́ gidə kógə̄ḿ kanjə̄ kadə̄ əndān̄ kemdə́ dɔ tə́.
16Adə̄ náā nəkɔ́ ń i lo ń nuū tə́ ní, əsō ō,
ni i kem kújə dəngáy kə́ ta wōyōó tə́ ō.
17Ká ré ni i nge ndɔr̄, aké i nge kul̄ yá̰a̰,
aláa i nge rāā kəla kə́ ngan̄g gə̄ kə́ dəla lo tə́ gə̄gē a,
dan ń yá̰á̰ kə́ majə aĺ ń toō əhɔn dɔ jīn tə́ ní, a a̰a̰ tápə̄ tɔdɔ̄ i gáŕ kadə̄ a rāan.
18Nin̄ malang ní, tṵ́ṵ̄n̄də́ i kə súĺ kə́ kógə̄ḿ beē ń i lo kə́ risə til nding ní.
Kōō néĺ kə́ a əla ō,
nūū yel̄ kə́ majə koō ngá̰ý gə̄ kə́ ndin̄ ta jī kāgə̄ gə̄ kə́ mbīdə́ əga ku gə̄ tə́ ō,
kōō katə man̄ kə́ nūgə́ kə tɔ́gɔ́ kə́ ɓār̄ pu pu ō,
19kōō mbal̄ gə̄ kə́ tə́sōn̄ ta reē kə̄ nang tə́ ō,
ngɔ̄də̄ kə́ deē a̰ā̰ kə kumneé aĺ yā dā̰ gə̄ kə́ a tḭ́ḭ̄n̄ bal ō,
nūū dā̰ gə̄ kə́ majən aĺ ngá̰ý tɔȳ madə̄də́ gə̄,
aláa kōō yá̰á̰ kə́ ɓār̄ ənge mbal̄ gə̄ ba tél gogə́ ō ní,
yá̰a̰ gə̄ ń nuū malang əlan̄ ɓōĺ kemdə́ tə́ adə̄ nin̄ tutən̄ njarara.
20Tɔdɔ̄ de kə́ dɔ nang tə́ gə̄ malang kə taá a̰a̰n̄ lo i kə ta kūl̄ lo kə́ unjə̄ kow ō,
nayn̄ kə̄ lo rāā kəla yādə́ gə̄ tə́ kanjə̄ kadə̄ yá̰á̰ kógə̄ḿ njə́ɓādə́ ō.
21I nin̄ ngóy n lo kə́ ndɔ̄ɔ́ kə́ a rāā kum deē ndoō tə́ séw dɔdə́ tə́ ní.
Nge ń nuū ɔjə i kum gotə lo kə́ risə til nding ń rāān̄ i kə rī kadə̄ əhɔdə́ kə̄ rɔ̄n tə́ ní.
Ba ɓōĺ yādə́ ɔȳdə́ tɔȳ lo kə́ risə til nding ń nuū ɓáý.
Currently Selected:
KUM KEDƏ̄ 17: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.