KUM KEDƏ̄ 16
16
A̰a̰n̄ gō Israel gə̄ kə yá̰a̰ kəsaá, ba madə̄ ba̰ā̰də́ gə̄ tá ɓōō rāādə́
1I tām̄ najə̄ ń toō tə́ n əndan̄də́ kə dā̰ kə́ tītə̄ ń nuū gə̄ ō,
ngán kur̄ kə́ dūbú ngá̰ý gə̄ rāān̄də́ yá̰á̰ kə́ tōr̄ ō ní. Tɔdɔ̄ asə kadə̄ nin̄ əngen̄ ndéý kə́ tītə̄ ń nuū.
2Gír deē yāí gə̄ tā anī ḭ̄ ə́ndádə́ ndéý kə́ tītə̄ ń nuū alé, banī ī-rāā i majə sedə́:
yā tɔ̄ləń ɓōō ń rāādə́ ní ɓáa i yá̰a̰ kəsa kə́ nel̄ ngá̰ý n ādə̄də́ ní,
i kerwḛy gə̄ n ni ndīr̄ ādə̄də́ ní.
3I beé n de gə̄ kə́ ta kəga dɔ gə̄ ní, ɓōō yá̰a̰ kəsa rāādə́ ɓá tā,
ba dā̰ gə̄ ń ḭ̄ ə́la sedə́ dɔdə́ tə́ ní ɔrə̄n̄ wurdə́
adə̄ ngur yá̰a̰ kəsa rāādə́ alé.
Banī de gə̄ kə́ kṵ jōó gə̄ ní, gō ɓōō kə́ rāādə́ dan i ngá̰ý aĺ tə́ anī,
nin̄ əngen̄ i yá̰a̰ kəsa kə́ nel̄ tadə́.
4I gáŕ kadə̄ ngé rāā kum de gə̄ ndoō tə́ gə̄ a̰a̰n̄ kadə̄ ɓōō kə́ bo ngá̰ý əsō dɔdə́ tə́ ō,
i kadə̄ ngán Israel gə̄ əndān̄ ma̰ȳ a̰a̰n̄ lo rāā ń rāān̄ madə̄ ba̰ā̰də́ gə̄ yá̰á̰ kə́ tōr̄ ní ō.
Dā̰ gə̄ kə́ ngé tɔ̄l̄ de gə̄ ō, Nə́ɓā kə́ nge kajə deē ō
5Ká ré dā̰ gə̄ kə́ kungdə́ a tɔ̄l̄ de gə̄ bə̄gān̄ wūn̄g yādə́ kə́ to ɓōĺ ngá̰ý dɔ deē yāí gə̄ tə́
adə̄ nin̄ oyn̄ sɔɔ̄ń lī gə̄ kə́ tə́gān̄də́ gə̄gē anī,
wūn̄g yāí to bátə́ ta tɔ̄l̄ ta tə́ alé.
6Ə́la ɓōĺ kemdə́ tə́ kum mbang kə́rēý tə́ ī-tāańdə́ ō,
yá̰a̰ yāí kə́ ɔjə kadə̄ ā ájə́də́ rāā adə̄ əga kemdə́ dɔ ndū najə̄ yāí tə́ ō.
7Tɔdɔ̄ náā nəkɔ́ ń tūr̄ kumən a̰a̰ń lī kə́ kəla ta kāgə̄ tə́ dɔɔ́ ní, kɔ́ɔ̄ ajə. I lī ń a̰ā̰ ní n ajən alé,
banī i ḭ̄ Kɔ́ɔ̄ɓē kə́ nge kajə de gə̄ malang n ájən ní.
8I beé n ɔ́jəń madə̄ ba̰ā̰jí gə̄
kadə̄ i ḭ̄ n i nge gān̄g dɔ deē tū yá̰á̰ kə́ majə aĺ gə̄ tə́ malang ní.
9Nin̄ oyn̄ sɔɔ̄ń yḭm̄ gə̄ kə kón̄g gə̄ kə́ tṵ́ṵ̄n̄də́,
kanjə̄ kadə̄ deē ənge dáwá kə́ yā kajəńdə́.
Tɔdɔ̄ nin̄ asən̄ kənge ndéy kə ta kūl̄ dā̰ kə́ beé gə̄.
10Ngání gə̄ tā anī, lī kə́ kungdə́ majə aĺ gə̄ ń tə́gān̄də́ ní gə̄gē,
asən rāā kadə̄ kutədə́ tél kə̄ nang tə́ alé,
tɔdɔ̄ ḭ̄ á̰a̰ kum tō ndoō yādə́ ō, ī-rāā ādə̄ əngen̄ rɔ̄ ngan̄g ō.
11Yā kadə̄ əgań kemdə́ dɔ najə̄ yāí gə̄ tə́ ɓáa, ḭ̄ ə́la lī gə̄ adə̄ tə́gān̄də́,
banī ī-gān̄g dɔdə́ láẃ ngá̰ý kɔ̄ɔ́,
na sōgə́ dɔdə́ ndígə̄nal dɔí tə́ kə́ njɔ́ḿ gə̄ tə́ ō,
gerə̄n̄ gō majə kə́ ī-rāā sedə́ tṵ aĺ ō.
12Kɔ́ɔ̄ɓē, dáwá kə́ sóódə́ tə́ i mu aĺ ō, i yibə̄ ndum aĺ ō,
ba i najə̄ yāí ń tɔ̄l̄ moy malang ní.
13Yá̰á̰ ń i ndi deē kə kumneé aké i koy deē ní, ḭ̄ aw̄ kə tɔ́gə dɔ tə́ ō, ḭ̄ āw̄ kə deé ɓádá ō, ī-teē seneé kɔ̄ɔ́ ō.
14Deē asə tɔ̄l̄ deē madə̄n kə kem nduluú,
banī koō ń teē ní, ni asə tél reē seneé gogə́ aĺ ō,
ni asə gān̄g dɔ deē ń oy ní aĺ ō.
Kɔ̄sə̄ ō, mána ō
15Lo teē jīí tə́ ka̰ȳ gətóo.
16Ngé rāā yá̰a̰ kə gō kem ndigə yā Nə́ɓāá tə́ aĺ gə̄ ń mbātə́n̄ gerī ní,
ə́ndádə́ kə tɔ́gɔ́:
adə̄ i kə man̄ kə́ kedə jóo aĺ ɓáý gə̄ ō,
kə kɔ̄sə̄ kə́ tə́sō jóo aĺ ɓáý gə̄ ō,
man̄ kə́ edə gidə kógə̄ḿ kə tɔ́gəneé kə́ əndadə́ ō,
hor kə́ ṵṵdə́ ō.
17Yá̰á̰ kə́ to dáńg ngá̰ý ní, man̄ ń i yá̰á̰ kə́ a tɔ̄l̄ yá̰a̰ malang ní,
tɔ́gə hor tɔȳ yān,
tɔdɔ̄ yá̰a̰ malang ń Nə́ɓā əndā ní, a rɔ̄ɔ̄ tām̄ yā ngé rāā yá̰á̰ kə́ gōtə́ gə̄ tə́.
18Kə́rēý gə̄ anī, hor ń kadə̄ ṵṵ dā̰ gə̄ ń əlan̄də́ kadə̄ rāān̄ ngé rāā yá̰a̰ kə gō kem ndigə yā Nə́ɓāá aĺ gə̄ yá̰á̰ kə́ tōr̄ ní, əhɔ njan pum pum tām̄
kadə̄ ṵṵdə́ alé.
Ba yá̰á̰ ń nuū ń rāā yá̰á̰ ní, i yā kadə̄ nin̄ ger̄nəń kadə̄ sarya yā Nə́ɓā a ndəle njadə́ nuū.
19Kə́rēý gə̄ anī, hor ní ṵṵ lo kum man̄ tə́ kə tɔ́gəneé tɔȳ kə́ kété,
yā nujəń kōō kə́ teē dɔ nang kə́ ndɔ̄ĺ i dɔ tə́ tə́.
20Dām̄ kə́rēý tə́ anī, ḭ̄ ī-nə̄ɓō gír deē yāí gə̄ yá̰a̰ kəsa ń de kə́ dɔ rā̰ tə́ gə̄ a əsan̄ ní.
Ḭ̄ ādə̄də́ yá̰a̰ kəsa kə́ ḭḭ dɔ rā̰ tə́ kə́ kəndā dɔ danaá kété kɔ̄ɔ́, kə́ nin̄ uyn̄ tətō gírí alé.
I yá̰a̰ kəsa kə́ nel̄ ō, nel̄ ta de gə̄ kógə̄ḿ kógə̄ḿ malang ō.
21Yá̰a̰ kəsa ń ādə̄də́ ní, ɔjə i háĺ kə́ sɔl̄ lɔm yāí kə́ tām̄ yā ngání gə̄ tə́ kə̄ ndágá.
Banī yá̰a̰ kəsa ní nel̄ ta nge kəsan ō,
tél yá̰á̰ ń deē ndigə ní ō.
22Néjə#16.22: Á̰a̰ī Teē 4.6 ō, kɔ̄sə̄ ō, dumə̄n̄ ta hor ō, yḛḛ̄n̄ aĺ ō,
yā rāań kadə̄ de gə̄ gerə̄n̄ na kōō yā madə̄ ba̰ā̰ gə̄
i kə́ nujə kɔ̄ɔ́ kə ta kūl̄ hor ń ṵṵ lo dan kɔ̄sə̄ gə̄ tə́ ní ō,
kə́rā tītə̄ tel̄ man̄ beé kum man̄ kə́ a edə tə́ ō ní.
23Hor kə́ kógə̄ḿ beē nəkɔ́ ń toō ní, yā kadə̄ de kə́ gōtə́ gə̄ əngenə̄ń yá̰a̰ kəsa
ɓáa tɔ́gən ń a nujəń lo ní gə̄gē dɔn ndígə̄nal kɔ̄ɔ́.
24Yá̰a̰ malang ń ə̄ndādə́ ní sɔlə̄n̄ dɔdə́ yā rāań kəla yāí ḭ̄ nge kəndadə́.
Nin̄ télən̄ i ndéy yā kəndań de kə́ gōtə́ aĺ gə̄,
ba əya̰n̄ gō rɔ̄də́ adə̄ sɔl̄ lɔm tām̄ majə yā ngé gə̄ ń əya̰n̄ rɔ̄də́ kem jīí tə́ ní tə́.
25I beé n yá̰a̰ malang ń ə̄ndā ní ndigə tūr̄ rɔ̄n ō,
rāā kəla tām̄ yā kadə̄ karī ń ḭḭ rɔ̄í tə́ á tél i yá̰a̰ kəsa malang
kə gō kem ndigə yā ngé gə̄ ń dəjen̄ ní ō.
26Kɔ́ɔ̄ɓē, i lo ń nuū tə́ n ngání gə̄ ń ī-táŕdə́ ní, i gáŕ kadə̄ gerə̄n̄
na i kan̄ kāgə̄ n a ətō deē ní alé,
ba i najə̄ yāí n rāā adə̄ ngé gə̄ ń taān̄ kemií ní ndin̄ kə kumdə́ ní.
27Yá̰á̰ ń kété hor nujəń aĺ ní,
kəngā yḛŕ mbang kə́ sḛ́ý beē ngóy yḛḛ̄n kɔ̄ɔ́,
28yā kadə̄ deē gerə̄ń na majə kadə̄ deē rāāī kə́rá pá tá mbang əɓa ō,
ndɔ̄yī pá tá mbang ḭḭ kə̄ dɔɔ́ ō.
29Banī deē ń usən dɔ majə kə́ rāān̄ seneé tə́ aĺ ní, kəndā kem dɔ tə́ yān a yḭ̄l̄ tītə̄ kɔ̄sə̄ man̄ kə́ kūlīí beē ō,
a də̄yā̰ kɔ̄ɔ́ tītə̄ man̄ kə́ deē rāań kəla aĺ beē ō.
Currently Selected:
KUM KEDƏ̄ 16: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.