KUM KEDƏ̄ 15
15
Taā kem yā Israel gə̄ ɔgə̄də́ rāā ɓesə̄ gə̄
1Ba Nə́ɓā yājí ḭ̄ i de kə́ majə ō,
de kə́ nge ra dɔ ndūí tə́ ō,
de kə́ nge tə́gā tan ō,
ṵ́ṵ ɓē dɔ yá̰a̰ gə̄ tə́ malang kə kum kṵṵ́ ō.
2Ká ré jə-rāā majaĺ gə̄gē anī, jḭḭ i yāí gə̄, tɔdɔ̄ jə-ger̄ kadə̄ de kə́ dɔɔ́ dɔí ḭ̄ tə́ gətóo.
Banī j-a jə-rāā majaĺ alé, tɔdɔ̄ jə-ger̄ kadə̄ ī-rāājí i deē yāí gə̄ tə́.
3Tɔdɔ̄ deē ń gerī ní a rāā yá̰á̰ kə́ gōtə́ kadə̄ majə ɔtə̄ kə taá ō,
deē ń ger̄ kadə̄ de kə́ dɔí ḭ̄ tə́ gətóó ní, kɔ́ɔ̄ a oy alé.
4Yá̰á̰ kə́ majaĺ kə́ rāā kə jī ger̄ yá̰á̰ ń de gə̄ teēnəń toō rāājí adə̄ jə-ndúm̄ alé,
kəla kə́ teē yá̰a̰ aĺ yā ngé rāā ndəbā tū yá̰á̰ tə́ kə́ ngé gól̄ lo gə̄ ń toō rāān̄jí adə̄ jə-ndúm̄ alé,
nin̄ rāān̄ ɓáĺ yá̰á̰ kə́ tayā tayā gə̄ tū yá̰á̰ tə́,
5adə̄ ré de kə́ mbóo gə̄ a̰a̰n̄ yá̰á̰ ní anī kemdə́ ḭḭ huy ō,
gḛyn̄ ndíĺ yá̰á̰ kə́ ndi kə kumuú yān gətóó ń toō ō.
6Ngé táŕ yá̰á̰ kə́ majə aĺ ō,
ngé gə̄ ń asən̄ kəndā kemdə́ dɔ yá̰á̰ kə́ tītə̄ ń nuū gə̄ tə́ ō ní,
i ngé rāādə́ gə̄ ō, ngé gḛydə́ gə̄ ō,
ngé rɔȳdə́ gə̄ ō ní, nin̄ ton̄ i tītə̄də́ beē ō.
Kɔdə̄ nánjə́ kə́ nge kəɓā ɓesə̄ gə̄ i de kə́ mbóo
7I beé n kɔdə̄ jóó ń toō əndāń rɔ̄n ta kəla mbə̄sā nánjə́ kə́ sɔl̄ lúḿ lúḿ tə́ ō,
əɓā ngáń gájə́ yá̰a̰ rāā kəla yājí gə̄ kógə̄ḿ kógə̄ḿ ō ní.
Ni əɓādə́ i kə nánjə́ kə́ kógə̄ḿ beē,
əɓā ngáń gájə́ yá̰a̰ rāā kəla kə́ to rɔȳ gə̄ ō,
kə́ to rɔȳ aĺ gə̄ ō, kə jī bēl̄ lo rāā kəla yān kə́ kógə̄ḿ beē nəkɔ́ ń toō.
Banī ngán gájə́ yá̰a̰ rāā kəla gə̄ ní, kəla rāādə́ i rí gə̄ rí gə̄?
Nge ń nuū ɓáa i kɔdə̄ jóo n i nge kɔjə ní.
8Gō tə́ anī, ni əndā rɔ̄n ta kəla kə́ to kem ndul tə́, un nánjə́ kə́ kógə̄ḿ beē nəkɔ́ ń toō əɓāń ɓesə̄ kə́ deē a góləń rɔ̄n.
Tá kɔdə̄ jóó ń rāānən̄ kə nángāá i ngɔr ɓáý ní,
sḛ́ý laā anī a tél yā kaw̄ gogə́ dɔ nang ń ni teē tū tə́ ní tə́,
dan ń a dəjenən̄ kadə̄ tél kə ndílneé adə̄də́ gogə́ ní.
9Kadə̄ ni gír̄ dɔ yon ń i yá̰á̰ kə́ ni asə gōn̄g aĺ tə́ ní ō,
dɔ ndin kə kumneé ń i yá̰á̰ kə́ dan i ngá̰ý aĺ tə́ ní ō anī,
ni gír̄ aĺ ba a nējə̄n̄ naā i kə ngé rāā kəla lɔ́r gə̄ ō, ngé nūū gində̄ arjā̰a̰ gə̄ ō,
a ndájə̄ i ngé nūū gində̄ nə̄ngá kasə gə̄ ō,
a ɔsə i go̰n rɔ̄n tām̄ yá̰á̰ kə́ rɔ̄kum aĺ kə́ ni rāā tə́ ō.
10Kemən i bū karī ō,
kəndā kem dɔ tə́ yān to kum tō ndoō ngá̰ý tɔȳ dɔ nang ō,
ndin kə kumneé i yá̰á̰ kə́ to kidə ta gírí tɔȳ kidə ta gíŕ nánjə́ tə́ ō.
11Tɔdɔ̄ deē ń rāan ní, ni gerə̄n alé,
nge kəla koō kə́ a rāā yá̰a̰ kemən tə́ ní, ni gerə̄n alé,
nge kəla ndíĺ kə́ a rāā kadə̄ deē ndi kə kumneé kemən tə́ ní, ni gerə̄n alé.
12Ndijí kə kumjí i yá̰á̰ kógə̄ naā ta kumən ni tə́ ō,
ndijí i kəndi kə́ yā rɔ̄ɔń naā dɔ yá̰á̰ tə́ ō:
ni əda na majə kadə̄ deē ənge yá̰a̰ tū yá̰a̰ malang tə́, ká ré i yá̰á̰ kə́ majə aĺ gə̄gē ní.
13Deē ngeé ń toō ger̄ majə tɔȳ de kə́ rang,
kadə̄ ni rāā i yá̰á̰ kə́ majə aĺ.
dan ń ni rāā jóó kə́ ngan̄g aĺ gə̄ ō, ɓesə̄ gə̄ ō,
kə nánjə́ ń i yá̰á̰ kə́ teē dɔ nang tə́ ní.
Rāā ɓesə̄ yā de gə̄ kə́ Ejiptə tə́ i yá̰á̰ kə́ to mbóo
14Ba madə̄ ba̰ā̰ gír deē yāí gə̄ ō, ngé rāā kumdə́ ndoō tə́ gə̄ ō ní,
Kɔ́ɔ̄ɓē, nin̄ malang ɔjən̄ kə̄ ndágá kadə̄ nin̄ i mbóo gə̄ ō, gerə̄n̄ yá̰a̰ aĺ tɔȳ ngáń kə́ dūú gə̄ ō.
15Nin̄ aw̄n̄ bátə́ rāān̄ ɓesə̄ gə̄ malang yā nápar de gə̄ i nə́ɓā gə̄ tə́ gə̄gē ɓáý.
Ɓesə̄ gə̄ ní kumdə́ a̰a̰ lo aĺ ō,
bəlo kóńdə́ kə́ yā taāń koō gətóo ō,
mbīdə́ oō lo aĺ ō,
ta ngán jīdə́ gə̄ kə́ yā kɔdəń yá̰a̰ gətóo ō,
gerə̄n̄ njə̄rā kə njadə́ aĺ ō.
16Tɔdɔ̄ i deē n rāādə́ ní,
i deē kə́ Nə́ɓā adə̄n koō lo ndə̄mā tə́ n əɓādə́ ní.
Tá de kógə̄ḿ kə́ asə kəɓā nə́ɓā kə́ to tītən gətóo.
17Deē i yá̰á̰ kə́ a oy, adə̄ jīn ń i yá̰á̰ kə́ a rāā yá̰á̰ kə́ kə gō kem ndigə yā Nə́ɓāá aĺ ní, asə i rāā yá̰á̰ kə́ ndi kə kumneé aĺ ngóy.
Tá ɓáý tṵ ní, ni i sóótə́ tɔȳ yá̰a̰ gə̄ ń ni a ɔsə non nang tə́ nodə́ tə́ ní:
Ni ənge ndi kə kumuú, banī nin̄ a əngen̄ aĺ bátə́.
18Tá dā̰ gə̄ kə́ kumdə́ majə ka̰ā̰ aĺ ngá̰ý gə̄ ní, nin̄ ɔsən̄ nodə́ nang tə́ nodə́ tə́ ō.
I dā̰ gə̄ kə́ nin̄ mbóon̄ tɔȳn̄ gotə dā̰ gə̄ malang.
19Gotə dā̰ kə́ rang gə̄ majən̄, banī nin̄ majən̄ aĺ ō, loodə́ kə́ majə kə́ yā sə̄ngā kum deē gətóo ō,
Nə́ɓā asə ndigədə́ aĺ ō, asə tɔ́r̄ tan dɔdə́ tə́ aĺ ō.
Currently Selected:
KUM KEDƏ̄ 15: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.