KUM KEDƏ̄ 14
14
Lo rāā ɓesə̄ kə́ rang ɓáý tṵ
1De kə́ rang ń toō, ni a sāā i kaw̄ mbā kə to boó dan bəngál man̄ kə́ to ɓōĺ ngá̰ý gə̄ tə́,
anī ni ɓāŕ i kāgə̄ kə́ ur ruú tɔȳ to bo ń a aw̄ seneé ní kadə̄ kə rāā seneé.
2Tɔdɔ̄ rāān̄ to bo ní i kə rī kəngeń yá̰a̰ ō,
i kum kedə̄ yā kɔdə̄ n rāā to bo ní ō.
3Banī Bɔbə̄jí, i kem majə yāí ń i nge kəndā dɔ yá̰a̰ malang danaá majə kété ní n i nge kəhɔ dɔ ga̰ to bo ní.
Ḭ̄ ī-rāā róbə́ kógə̄ḿ dɔ bā bo tə́,
ngōn̄ róbə́ kə́ deē ənī kemən njə̄rań tū tə́ dan bəngál man̄ gə̄ tə́.
4I tītə̄ ń nuū n ɔ́jəń kadə̄ ḭ̄ ásə kajə deē ta yá̰a̰ malang kə́ to yo tə́ ní,
ká ré deē njə̄rań dɔ bā bo tə́ i kanjə̄ ger̄ man̄ gə̄gē ní.
5Ḭ̄ ī-ndigə kadə̄ kəla gə̄ ń ī-rāādə́ kə kum kedə̄ yāí ní teēn̄ yá̰a̰ aĺ alé.
I tām̄ najə̄ ń toō tə́ n de gə̄ əya̰n̄ rɔ̄də́ kem jī kāgə̄ kə́ dūú ngá̰ý tə́ ní ō,
asən̄ teē bā bo kə́ ḭḭ pu pu dɔ kāgə̄ gə̄ kə́ rákə̄ ta naā tə́ kanjə̄ kadə̄ yá̰á̰ kógə̄ḿ rāādə́ ní ō.
6I beé n ta kəla gíŕ tə́, dan ń de kə́ ngāl̄ ngá̰ý kə́ ngé kɔjə rɔ̄də́ gə̄ a oyn̄ i mbé ní,
nge ń de gə̄ malang kə́ dɔ nang tə́ əndān̄ kemdə́ dɔn tə́ ní, aw̄ ɓɔ̄ɔ̄ rɔ̄n i kem toó.
Ba too ń i kāgə̄ kə́ rákə̄ ta naā tə́ á ī-nēl̄ ní, ngɔ̄m̄ kōō de gə̄ tām̄ yā gír kojə kə́ bírí tə́.
7Kāgə̄ ń tél yá̰a̰ rāā yá̰á̰ kə́ gōtə́ ní, tɔ́r̄ ta i dɔ tə́.
8Banī ɓesə̄ kə́ tɔ́ĺ ní, ndɔ̄ĺ i dɔ tə́, ni ō, nge rāan ō.
Tām̄ yā nge rāan tə́ ɓáa, i tām̄ tɔ́ĺ kə́ ni tɔ́lən tə́,
ba tām̄ yān ni ɓesə̄ tə́ ɓáa,
i tām̄ ni ń i yá̰á̰ kə́ a ur ruú ba rāānən̄ i nə́ɓā tə́ ní.
9Tɔdɔ̄ nge rāā yá̰a̰ gō yā Nə́ɓā tə́ aĺ ō,
kəla rāan ō ní, nel̄ Nə́ɓā sedə́ aĺ mbak ō,
10a əndan̄ nge rāā kəla ō, kəla rāan ō.
11A̰á̰ā̰, Nə́ɓā a rɔ̄ɔ̄ ɓesə̄ yā nápar de gə̄ ō,
tɔdɔ̄ nin̄ télən̄ i yá̰á̰ kə́ to yḛr kum gə̄ dan yá̰a̰ gə̄ ń Nə́ɓā rāā tə́ ní ō,
télən̄ i bə̄dē kə́ a əga de gə̄ ō,
gūmbə̄ kə́ kəyā dɔ róbə njə̄rā mbóo gə̄ tə́ ō.
Ta kəla gír ɓesə̄ gə̄ kə́ ton̄ tītə̄ deē beé
12Ta kəla gíŕ tə́ ní, i gír̄ rāā ɓesə̄ kə́ ɔsə kum gotə yá̰a̰ n mēr̄ kadə̄ de gə̄ əhɔnə̄ń gō Nə́ɓā aĺ ní.
I yá̰á̰ ń nuū ń kumdə́ teē dɔ tə́ ní n nujə ndi kə kumuú yā deē sák sák kɔ̄ɔ́ ní.
13Ta kəla gíŕ tə́ ní, ɓesə̄ gə̄ kə́ ɔsən̄ kum gotə yá̰a̰ gə̄ gətóon̄ ō, nin̄ a ton̄ i ngándáńg aĺ ō.
14Ɓesə̄ gə̄ ní ton̄ dɔ nang tə́ sɔɔ̄ń i gír̄ yá̰á̰ kə́ ngá̰ý aĺ yā de gə̄ ō,
nin̄ a gətóon̄ kɔ̄ɔ́ i láẃ ngá̰ý ō.
15Bɔbə̄ ngōn̄ kógə̄ḿ kə́ wurən tōrən ngá̰ý najə̄ ngōnən kə́ oy rétə́ gēé tə́,
mēr̄ tɔ́ĺ yá̰á̰ kə́ ɔsə kum gotə ngōnən ń oy ní.
Ba yá̰á̰ ń i nīń deē ní, ngɔlaā ni rɔȳn i tītə̄ nə́ɓā beé ō,
ni ndóō deē yān gə̄ yá̰á̰ kə́ deē ger̄ loon aĺ gə̄ ō, yá̰a̰ kūjə́ gə̄ ō.
16Sḛ́ý sḛ́ý gō tə́ anī, jī bēl̄ lo rāā yá̰á̰ kə́ gō yā Nə́ɓā tə́ aĺ ngeé ń toō ní,
de gə̄ əndān̄ kumdə́ gírí ngɔ̄mə̄n̄ tītə̄ ndū najə̄ beé.
Tá ɓáý tṵ ní, mban̄g gə̄ adə̄n̄ ndūdə́ kadə̄ de gə̄ rɔȳn̄ ɓesə̄ kə́ tɔ́l gə̄.
17Tītə̄ ń deē asə rɔȳ mban̄g gə̄ ngeé ń toō ta kumdə́ tə́ aĺ, sɔɔ̄ń dɔ dáńdə́ kə́ i sa̰y ní,
rāān̄ yá̰á̰ kə́ ɔsə kum gotədə́ kə́ kadə̄ deē ra sa̰y a a̰ā̰.
Adə̄ mban̄g ń de gə̄ ɔsən̄ nodə́ nang tə́ non tə́ ní, de gə̄ rāān̄ yá̰á̰ kə́ ɔsə kum gotən
yā kadə̄ deē a̰a̰ kə kumneé, kadə̄ rɔȳń mban̄g ń gətóó ní rɔȳ kə́ al̄naā tītə̄ kə́ ni i kum tə́ beē.
18Ngé gə̄ ń gerə̄n̄ mban̄g aĺ ní gə̄gē, lo rɔȳ mban̄g ní aw̄ kum kə̄ kété kété
i kə ta kūl̄ jī ger̄ yá̰a̰ yā kɔdə̄.
19Kɔdə̄ ní gḛy kadə̄ nel̄ mban̄g seneé gáŕ,
adə̄ ni əhɔ rɔ̄n tɔgə rāā yá̰á̰ ń ɔsə kum gotə mban̄g ní adə̄ majə ngá̰ý tɔȳn.
20Kəla ń kɔdə̄ rāā ní, majən gól̄ ta kum kósə de gə̄.
Adə̄ deē ń toō ń kété de gə̄ a rɔȳnən̄ i mbé ní, tél əja a ɔsən̄ i nodə́ nang tə́ non tə́.
21I beé n de gə̄ əsōnəń kum gūmbə̄ tə́ ní.
Yá̰á̰ ń toō rāā yá̰a̰ i dan ń de gə̄ kə́ yá̰á̰ kə́ to kum kaȳ aĺ rāādə́ ndoō tə́, aláa rāā ta kṵ ɓē rāādə́ ɓəlo tə́ ní,
əndān̄ rī ń i rī Nə́ɓā ngóý ní dɔ ɓesə̄ mbal̄ gə̄ tə́ ō, ɓesə̄ kāgə̄ gə̄ tə́ ō.
Yá̰a̰ gə̄ ń a reēn̄ dɔ nge rāā ɓesə̄ tə́ ní
22Tá ɓáý tṵ ní, ndúm̄ kə́ ɔjə dɔ ger̄ Nə́ɓā aĺ ń nin̄ ndúmə̄n̄ ní asədə́ aĺ ɓáý.
Ba dan ń yá̰a̰ ger̄ aĺ əladə́ kum míndə kasə naā aĺ kə́ ngá̰ý tə́ ní,
nin̄ nāān̄ kəndā rī ndi majə dɔ yá̰á̰ kə́ tōr̄ kə́ beé gə̄ tə́.
23Nin̄ tɔ̄lə̄n̄ ngáń kə́ dūú gə̄ ba tunə̄n̄ ō, rāān̄ yá̰á̰ kə́ to lo ɓɔ̄ɔ̄ rɔ̄ tə́ kə́ deē ger̄ loon aĺ gə̄ ō,
njə̄rān̄ kə gō naá ndām̄nəń ngá̰ý kə gō yá̰a̰ kāgə̄ ɓē kə́ mān̄ dɔ majən gə̄ ō.
24Nin̄ ɓōlə́n̄ gidə ndi kə kumuú yā deē tṵ aĺ ō, ɓōlə́n̄ gidə taā naā kə́ kə gō róbəneé tṵ aĺ ō,
náā nəkɔ́ ɓáa un i dɔ madə̄n adə̄ tɔ̄l̄nən̄, aláa rāā madə̄n adə̄ wurən tōrən kə kūl̄ rāā rāyāá ō.
25Yá̰a̰ malang i kə́ tə́la naā kɔ̄ɔ́, adə̄ i ɓōkə́ mósə naā nang tə́ ō, tɔ̄l̄ naā ō, ɓogə ō, gól̄ naā kə ngamaá ō,
kəla jī nang tə́ ō, rāā yá̰á̰ kə́ gōtə́ aĺ ō, hóȳ lo ō, túbə dɔ lám̄ tə́ ō.
26Háĺ kə́ majə gə̄ kə́ tə́la naā kɔ̄ɔ́ ō, majə kə́ rāā kə deé kə́ dɔ deē ndígə̄nal kɔ̄ɔ́ ō,
yḛr kə rɔ̄ɔ́ ō, sāā naā kə́ tūr̄ gír kɔ̄ɔ́ ō,
taā naā kə́ kə róbəneé aĺ gə̄ ō, rāā rāȳ ō, sāā naā lo kaya tə́ ō.
27Tɔdɔ̄ rāā ɓesə̄ kə́ deē ger̄ loodə́ aĺ gə̄
i ta kəla gír rāā yá̰á̰ kə́ majə aĺ ō, i ni n a reē kə yá̰á̰ kə́ majə aĺ ní ō, i ni n i dan bo yá̰á̰ kə́ majə aĺ ní ō.
28Adə̄ ré deē əya̰ rɔ̄n adə̄ i rɔ̄nel̄ kə́ rāā deē kɔ̄r̄ tə́ aĺ ɓáa, a un rī Nə́ɓā n a ɔrə̄ń najə̄ kə́ kə gō kem ndigə yā Nə́ɓāá aĺ gə̄ ō.
Ré deē a rāā i yá̰á̰ kə́ gōtə́ aĺ, aĺ ɓáa a túbə i dɔ lám̄ tə́ kə̄ ta jī tə́ nuū ō.
29Dan ń nin̄ ənīn̄ kemdə́ mák mák adə̄n̄ ɓesə̄ gə̄ kə́ nin̄ a ndɔ́tə̄n̄ lo aĺ ní,
nin̄ gerə̄n̄ majə kadə̄ yá̰á̰ kógə̄ḿ kə́ majə aĺ a rāādə́ gō túbə yādə́ kə́ dɔ lám̄ tə́ alé.
30Ba a əndan̄də́ nja jōó tām̄ majaĺ yādə́ tə́,
tɔdɔ̄ əhɔn̄ gō ɓesə̄ gə̄ ɔjənə̄ń Nə́ɓā ō,
túbən̄ dɔ láḿ tə́ kə kum kedēé ngá̰ý, tɔdɔ̄ kídə̄n̄ háĺ kə́ táĺ ō.
31I tɔ́gə yā yá̰a̰ gə̄ ń deē rāādə́ yá̰á̰ kə́ kum tə́ gə̄ tə́ ní alé,
ba i yá̰a̰ rāā kə́ gōtə́ n i nge kənda ngé rāā majaĺ gə̄
ngándáńg tām̄ mān̄ dɔ ndū najə̄ yādə́ tə́ ní.
Currently Selected:
KUM KEDƏ̄ 14: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.