KUM KEDƏ̄ 13
13
Yá̰a̰ gə̄ ń Nə́ɓā rāā ní, de gə̄ rāān̄də́ i Nə́ɓā tə́
1De gə̄ malang ń ran̄ dɔ ger̄ Nə́ɓā aĺ yādə́ tə́ adə̄ ngan̄g ní, i de kə́ mbóo gə̄.
Kə ta kūl̄ yá̰á̰ kə́ majə gə̄ ń nin̄ a̰a̰n̄ kə kumdə́ gə̄gē ní, nin̄ asən̄ ger̄ nge ń ndi nuú ní alé.
Adə̄ nin̄ gerə̄n̄ kɔdə̄ kə ta kūl̄ kəla rāan gə̄ alé.
2Banī i hor ō, koō aláa néĺ kə́ əla pelele ō,
lo njə̄rā tíyō̰ gə̄ ō, aláa man̄ kə́ ḭḭ kə tɔ́gəneé ō,
aláa yá̰á̰ kə́ ndə́lē gə̄ kə́ dɔ rā̰ tə́ kə́ a ɔjən̄ lo njə̄rā yá̰á̰ kə́ dɔ nang tə́ ō n nin̄ rāān̄də́ i nə́ɓā gə̄ tə́ ní.
3Ré i majə yá̰a̰ gə̄ ngeé ń toō n gól̄də́ adə̄ nin̄ rāān̄də́ i Nə́ɓā tə́ anī,
majə kadə̄ nin̄ gerə̄n̄ na kɔ́ɔ̄ yá̰a̰ gə̄ ní i kə́ bo ngá̰ý tɔȳ yá̰a̰ gə̄ ní.
Tɔdɔ̄ nge ń i gír gisə majə yá̰á̰ ní n rāādə́ ní.
4Ré i tɔ́gə́ yá̰a̰ gə̄ ní ō, ngan̄gdə́ ō n ɔr kumdə́ anī,
ādə̄ kə ta kūl̄ yá̰á̰ kə́ rɔ̄kum gə̄ ń toō ní, nin̄ gerə̄n̄ kadə̄ nge ń rāādə́ ní, tɔ́gən i ngá̰ý mān̄ yādə́.
5Tɔdɔ̄ bo yá̰a̰ gə̄ ń Nə́ɓā rāā ní ō, majədə́ ō ní,
a mēr̄ kadə̄ deē a a̰a̰ń majə Nə́ɓā ń i nge rāādə́ ní ō.
6Ɓá tā ba majə kəndā najə̄ dɔ de gə̄ ń nuū tə́ sḛ́ý:
tām̄ majə aĺ anī nin̄ ndúmə̄n̄
i lo sāā ń nin̄ sāān̄ Nə́ɓā tə́ ní ō,
i lo gḛy ń nin̄ gḛyn̄ kənge Nə́ɓā tə́ ní ō.
7Nin̄ nayn̄ kə̄ dɔ yá̰a̰ gə̄ ń Nə́ɓā rāā tə́ ní gṵ́ṵ̄n̄də́ gḛ gḛ anī,
tél nayn̄ kə̄ dɔ gidə yá̰a̰ gə̄ ní kə́ ndágá tə́, tɔdɔ̄ yá̰a̰ malang ń Nə́ɓā rāā ní, majə ka̰ā̰ ngá̰ý.
8Ɓá tā ba nin̄ gə̄gē ní, nge ń nuū mēr̄ kadə̄ deē māyń rɔ̄n dɔdə́ tə́ alé.
9Ré nin̄ télən̄ de kə́ ger̄ yá̰á̰ ngá̰ý gə̄
adə̄ asən̄ kəda najə̄ kógə̄ḿ dɔ njə̄rā ń yá̰a̰ gə̄ a njə̄rānəń ngándáńg tə́ ní anī,
i ba̰ý á kumdə́ teē dɔ Kɔ́ɔ̄ yá̰a̰ gə̄ ń nuū tə́ kété aĺ ní?
Ɓesə̄ gə̄: j-a̰a̰ī yā nge górīyō kāgə̄
10Ba rɔ̄ tō ndoō i yā ngé gə̄ ń əndān̄ kemdə́ dɔ yá̰á̰ kə́ ndi kə kumuú aĺ gə̄ tə́ ní,
nin̄ ń ɓārə́n̄ yá̰a̰ gə̄ kə́ deē rāā kə jīneé na i nə́ɓā gə̄ ní,
adə̄ i lɔ́r ō, gində̄ arjā̰a̰ ō ń kɔdə̄ rāā kə jīn kə́ ger̄ yá̰a̰ majə,
adə̄ ɔsən̄ i kum gotə yá̰á̰ kə́ ndi kə kumuú gə̄ ní,
aláa i mbal̄ kə́ to rāā kəla aĺ ń de kə́ jóó ngá̰ý tɔ́l kə jīneé ní.
11Tá ɓáý tṵ ní, i tītə̄ nge górīyō kāgə̄ ń toō ń əja kāgə̄ kə́ lo kətōn tōr̄ alé ní.
Ni ɔr̄ ngɔ́ɔn malang kɔ̄ɔ́ kə jīn kə́ kɔdɔ̄ɔ́ ō,
tɔ́l kāgə̄ ní kə gō ń sɔɔ̄ kadə̄ ni tɔ́ləń ní,
adə̄ rāā i gájə́ yá̰a̰ rāā kəla kógə̄ḿ kə́ kadə̄ deē un rāań kəla tə́.
12Ba butə̄ kāgə̄ gə̄ ń teē lo kəla yān tə́ ní,
ni rāań hor ndīrəń yá̰a̰ əsa ndān̄.
13I bulə́n kə́ deē a rāań kəla tṵ alé n nay ní,
tɔdɔ̄ i kāgə̄ kə́ rugə ō, tīr̄ mbīnjə̄ ō:
ni un kāgə̄ ní tɔ́l kum mbang ń ni ndiń karī tə́ ní,
tɔ́lən kum mbang kə́ majə ń ni ndiń karī tə́ ní ō,
rāan adə̄ teēn̄ naā kə deé ō.
14Aláa rāan adə̄ to tītə̄ dā̰ kə́ majə ka̰a̰n aĺ beē,
rāā man̄ yá̰á̰ kə́ kərē píŕ píŕ gidə tə́ ō, rāā yá̰á̰ kə́ kərē kumən tə́ ō,
utə̄ gidə yá̰á̰ kə́ majə aĺ gə̄ malang kə́ rɔ̄n tə́ kɔ̄kə́ ō.
15Ni rāā lo ndi kógə̄ḿ kə́ majə tām̄ yān tə́,
əndān kadə bɔr tə́ ba əhɔn gotə kógə̄ḿ kə máyá̰:
16Adə̄ ni əndān i kə kum kedēé ngá̰ý kadə̄ əsō alé,
tām̄ ni ger̄ kadə̄ a ra dɔɔ́ kə kérneé alé,
tɔdɔ̄ i yá̰á̰ kə́ tɔ́l adə̄ a gḛy i kadə̄ deē əhɔn dɔɔ́ tá.
17Ba dan ń ni ndɔ̄ȳ tām̄ yā kəngeń yá̰a̰ ō,
yā taāń dəyá̰ ō, yā kəngeń ngán gə̄ ō anī,
rɔ̄n sɔlə̄n lo kɔr̄ najə̄ tə́ kə yá̰á̰ kə́ ndi kə kumneé aĺ ń toō tə́ alé.
Ré i tām̄ yā rɔ̄ ngan̄g yān tə́ ɓáa, ni ɓāŕ i yá̰á̰ kə́ tɔ́gən gətóo kadə̄ dḭḭ̄n.
18Ré i tām̄ yā ndi kə kumuú yān tə́ anī, i yá̰á̰ kə́ koy kɔ̄ɔ́ n ni rāan ɓɔ́ ní,
ré i tām̄ yā ngɔ̄m̄ rɔ̄ yān tə́ anī, i yá̰á̰ kə́ a dḭḭ̄ deē alé n ni rāan ɓɔ́ kadə̄ dḭḭ̄n ní,
ré i tām̄ yā njə̄rā mbā yān tə́ anī, i yá̰á̰ kə́ asə kun njan kógə̄ḿ ndɔ́təń alé n ni rāan ɓɔ́ ní.
19Ré i tām̄ yā yá̰á̰ kə́ yā kadə̄ ni ndiń kə kumneé tə́ ō, kəla yān tə́ ō, yá̰á̰ kə́ ni rāā kə jīneé kadə̄ teē majə tə́ ō anī,
i jī kə́ tɔ́gən gətóo n ni dəjen kadə̄ dḭḭ̄n kə tɔ́gɔ́ ní.
Currently Selected:
KUM KEDƏ̄ 13: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.