KUM KEDƏ̄ 12
12
1ndílí ń a nujə aĺ ní, ndi kem yá̰a̰ malang tə́ ō.
Əndan̄ Kanaan gə̄ kə ngamaá jəke jəke
2Adə̄ Kɔ́ɔ̄ɓē, i tām̄ najə̄ ń nuū tə́ n ngé gə̄ ń najə̄ i dɔdə́ tə́ ní,
ḭ̄ ā ə́ndádə́ i hɔliyɔ hɔliyɔ ní ō,
ḭ̄ ī-tāādə́ kadə̄ əga kemdə́ dɔ majaĺ ń rāān̄ tə́ ní ō,
yā kadə̄ nin̄ lōōnəń gíŕ yá̰á̰ kə́ majə aĺ tə́ ba taānəń kemií ní.
3To i tītə̄ ń nuū tām̄ yā de kə́ kété gə̄ ń ndin̄ dɔ nang yāí kə́ táĺ tə́
4á īm̄də́ sɔɔ̄ń yá̰a̰ rāādə́ kə́ to yḛr kum gə̄ ní:
adə̄ i mbōlí kə́ rāā ō, yá̰a̰ kūjə́ gə̄ kə́ rāā kə gō kem ndigə yā Nə́ɓāá aĺ ō,
5tɔ̄l̄ ngáń kə́ dūú gə̄ kanjə̄ kum kṵ ō,
rāā yá̰a̰ kəsa kə́ ngá̰ý kə́ de gə̄ a əsan̄ dā̰ deē ō, a̰ȳn̄ mósən ō, aw̄n̄ bátə́ əsan̄ tiīn gə̄ tū tə́ ō.
Ndoo kə́ rɔ̄kum gə̄ ń toō ń teēn̄ dɔdə́ tə́ lo kəsa wa tə́ ní,
6ngé kojə ngán gə̄ kə́ ngé tɔ̄l̄ ngáńdə́ gə̄ kə́ de kə́ nge rɔ̄ɔ̄ dɔdə́ tə́ gətóó ń toō ní,
ḭ̄ ādə̄də́ kə kaají gēé adə̄ tɔ̄lə̄n̄də́,
7yā kadə̄ ɓūtə̄ de gə̄ kə́ asən̄ kadə̄ nin̄ i ngáń Nə́ɓā gə̄ ndin̄ dɔ nang ní tə́,
dɔ nang ngeé ń toō ń ī-tárən tɔȳ gotə dɔ nang gə̄ malang ní.
8Tá, ngé gə̄ ń nuū gə̄gē ní, ḭ̄ i māȳ rɔ̄í dɔdə́ tə́, tɔdɔ̄ nin̄ i de gə̄ ō,
ḭ̄ ə́la gəmbā gə̄, adə̄ nin̄ i tītə̄ ngé rɔ̄ɔ̄ yāí gə̄ kə́ ngé kaw̄ ta rɔ̄ɔ̄ tə́ kété no madə̄də́ gə̄ tə́ beē,
yā kadə̄ nin̄ a tɔ̄ɔ̄n̄ kōōdə́ hɔliyɔ hɔliyɔ kadə̄ gətóon̄ kɔ̄ɔ́ malang.
9Rɔ̄kum, ásə kəla de kə́ ngé rāā yá̰a̰ kə gō kem ndigə yā Nə́ɓāá aĺ gə̄ jī de kə́ sew gə̄ tə́ ta rɔ̄ɔ̄ kógə̄ḿ tə́ karī,
aláa ásə nujə sedə́ gidə kógə̄ḿ kə ta kūl̄ dā̰ kə́ to ɓōĺ ngá̰ý gə̄, aláa kə ta kūl̄ najə̄ kə́ to tītə̄ kəyā kə́ ta katə beé.
10Ba dan ń ī-gān̄g sarya yāí kə́ gōtə́ i jəke jəke ní, ḭ̄ ādə̄ i ta róbə kadə̄ deē ndə̄ngań rɔ̄n tām̄ majaĺ yān tə́,
ba ī-ger̄ mbak kadə̄ deē i yá̰á̰ kə́ nujə kɔ̄ɔ́ ō,
kem ndul yān i kə́ teēń i kem kṵ́ṵn tə́ ō,
háldə́ a tūr̄ aĺ bátə́ ō.
11Tɔdɔ̄ i gír kaa kə́ ndɔ̄ĺ i dɔ tə́ i ta kəla gíŕ tə́ nú.
Ḭ̄ ə́yá̰də́ kanjə̄ kəndadə́ tām̄ majaĺ yādə́ tə́ i tām̄ ɓōĺ kə́ ī-ɓōĺ i de kógə̄ḿ tə́ alé.
12Ní, i náā n a nāā kədaī na ī-rāā i rí kə́ beé wa ní?
Yá̰á̰ ń ə̄nī ndūí dɔ tə́ yā rāā ní, i náā n a mbātə́ gōí tə́ ní?
Gír de gə̄ ń ḭ̄kɔ́ ə̄ndādə́ ní, ré ī-nujə sedə́ anī i náā n a sikíī najə̄n tə́ ní?
I náā n a reē yā kəndā najə̄ dɔí tə́ lo sarya tə́ tām̄ yā de kə́ sew aĺ gə̄ kə́ i rɔ̄ɔ̄ dɔdə́ tə́ ní?
13Nə́ɓā kə́ əndā kumən gíŕ yá̰a̰ gə̄ tə́ malang kə́ rang gətóo, ba i ḭ̄ ngóy,
Nə́ɓā kə́ rang kə́ kadə̄ ɔ́jən kadə̄ sarya ń ī-gān̄g ní i gōtə́ aĺ alé ní gətóo.
14Ngé gə̄ ń ḭ̄ ə́ndádə́ tām̄ majaĺ yādə́ tə́ ní, mban̄g kógə̄ḿ, aláa ngār kógə̄ḿ kə́ de kə́ dɔn tə́ gətóó kə́ asə kəndā nganjən ta yāí tə́ kanjə̄ ɓōĺ yā rɔ̄ɔń dɔdə́ tə́ gətóo.
Nə́ɓā ṵṵ ɓē dɔ yá̰a̰ malang ń ni əndā tə́ ní i kə yá̰a̰ rāā kə́ gōtə́
15I tām̄ ḭ̄ ń i de kə́ gōtə́ ní n ṵ́ṵ ɓē dɔ yá̰a̰ malang kə́ ə̄ndā tə́ kə yá̰a̰ rāā kə́ gōtə́ ní ō,
gān̄g sarya kə́ gōtə́ aĺ dɔ deē kə́ najə̄ gətóo dɔn tə́ ní,
ḭ̄ á̰a̰ā̰ kadə̄ i yá̰á̰ kə́ əhɔn̄ naā kə tɔ́gí aĺ ō ní.
16Tɔdɔ̄ tɔ́gí i gír gisə yá̰a̰ rāā kə́ gōtə́ ō,
i tām̄ ḭ̄ ń i kɔ́ɔ̄ yá̰a̰ malang ní n ī-rāā majə kə yá̰a̰ malang ní ō.
17Deē ń nējə̄ əda na tɔ́gə kṵ ɓē kə́ ngá̰ý yā Nə́ɓā na gətóó ní, Nə́ɓā ɔjən tɔ́gən ō,
ngé gə̄ ń gerə̄n̄ tɔ́gən ngeé ń toō ba ɔjən̄ rɔ̄də́ dɔn tə́ ní, ni əla rɔ̄sɔl̄ dɔdə́ tə́ ō.
18Ḭ̄ ń ī-ger̄ lo kəhɔ tɔ́gí gotə kógə̄ḿ ní, ə̄nī rɔ̄í sɔl̄ lɔm ī-gāngəń sarya ō,
ṵ́ṵ̄ ɓē dɔjí tə́ i kə majə kə́ ī-rāā sejí ngá̰ý tə́ ō.
Tɔ́gə́ kə́ yā rāań yá̰a̰ to i tām̄ yāí tə́ dan ń ī-ndigə rāā yá̰á̰ ní.
Nə́ɓā ɔjə̄ gír deē yān gə̄
19Dan ń ī-rāā yá̰a̰ beé ní, ḭ̄ ɔ́jə i gír deē yāí gə̄
kadə̄ gerə̄n̄ na de kə́ sew ní i gáŕ kadə̄ ni i madə̄ ta de gə̄.
Ḭ̄ ī-rāā adə̄ kəndā kem dɔ tə́ yā ngání gə̄ i ngá̰ý
tām̄ ī-rāā ādə̄ nin̄ ndə̄ngān̄ rɔ̄də́ tām̄ majaĺ yādə́ tə́.
20Ré ḭ̄ ə́nda madə̄ ba̰ā̰ ngání gə̄ tām̄ yá̰a̰ rāādə́ kə́ majə aĺ tə́ ō, de gə̄ ń ndin̄ i tām̄ yā yo tə́ ní ō,
i kanjə̄ kəhɔ gír majaĺ yādə́,
tɔdɔ̄ ādə̄də́ kum mbang ō ta róbə ō kadə̄ lōōnəń gír majaĺ yādə́ tə́ anī,
21i kə kəndā kum kedə̄ dɔ rɔ̄ tə́ kə́ ngá̰ý tɔȳ nge ń nuū n ī-gāngəń sarya dɔ ngání gə̄ tə́ ní.
I ḭ̄ n ə̄nī ndūí kə ngangá ə́hɔń madə̄ naā kə kaadə́ gēé yā rāā majə sedə́ ní.
22I beé n ḭ̄ ə́nda madə̄ ba̰ā̰jí gə̄ kə loneé ɔ́jəńjí yá̰á̰ ní,
yā kadə̄ ré j-a jə-gān̄g sarya anī jə-gír̄ dɔ kem majə yāí tə́ ō,
yā kadə̄ ré ā ī-rāā sarya sejí anī, j-əndā kemjí dɔ kum kṵ yāí tə́ ō.
Rāān̄ ngé ndɔ̄ȳ dā̰ gə̄ yá̰á̰ kə́ tōr̄
23I tām̄ ń toō tə́ n ngé gə̄ ń mbóo i kemdə́ tə́ adə̄ rāān̄ yá̰á̰ kə́ gōtə́ aĺ ní,
ḭ̄ ī-rāādə́ yá̰á̰ kə́ tōr̄ kə ta kūl̄ yá̰á̰ kə́ yḛr gə̄ ń nin̄ kɔ́ gə̄ rāān̄ ní.
24Tɔdɔ̄ nin̄ ndúmə̄n̄ teēn̄ sa̰y ngá̰ý,
adə̄ rāān̄ dā̰ gə̄ kə́ ta kumdə́ majə ka̰ā̰ aĺ gə̄ ō, kə́ to kidə ta gírí gə̄ ō, i Nə́ɓā tə́.
Nin̄ əya̰n̄ rɔ̄də́ adə̄ gólə̄n̄də́ tītə̄ ngáń kə́ dūú kə́ ger̄ kum yá̰a̰ aĺ gə̄ beé.
25Tā anī, ḭ̄ ə́ndádə́ tītə̄ ngáń kə́ ngé mbātə́ najə̄ gə̄ beé
ī-mbóoń sedə́.
26Banī ngé gə̄ ń gerə̄n̄ kum ndéy kɔjə̄ kə́ tām̄ yā ngáń gə̄ tə́ ń toō aĺ ní,
Nə́ɓā a əndadə́ ndéý kə́ rɔ̄kum.
27Dā̰ gə̄ ngeé ń toō ń rāān̄də́ adə̄ a̰a̰n̄ tápə̄ ní,
wūn̄g rāādə́ sedə́ ngá̰ý.
Ba dan ń nin̄ a̰a̰n̄ kadə̄ dā̰ gə̄ ngeé ń toō ń kété nin̄ rāān̄də́ i nə́ɓā gə̄ tə́ ní,
télən̄ i ndéy kə́ tām̄ yādə́ tə́ anī,
nin̄ gerə̄n̄ Nə́ɓā kə́ rɔ̄kum ń kété nin̄ mbātə́nən̄ ní,
sɔɔ̄ń yá̰á̰ ń rāādə́ ní.
I tām̄ najə̄ ń nuū tə́ n gāngəń sarya kə́ bo tɔȳ madə̄ gə̄ malang dɔdə́ tə́ ní.
Currently Selected:
KUM KEDƏ̄ 12: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.