KUM KEDƏ̄ 11
11
1Kum kedə̄ rāā adə̄ kəla yā Israel gə̄ udə gírí majə kə kūl̄ nge koō taa kógə̄ḿ kə́ táĺ.
2Nin̄ əndan̄ dəla lo kə́ deē ndi tū tə́ aĺ gāngə̄n̄,
ba rāān̄ kújə tandā yādə́ gə̄ lo kə́ deē əndā njan tū tə́ aĺ bátə́ tə́.
3Nin̄ dumə̄n̄ ta madə̄ ba̰ā̰də́ gə̄ ō, səlān̄ ngé rɔ̄ɔ̄ gə̄ əndān̄də́ sa̰y ō.
Kəndā man̄ rāā ngán Israel gə̄ ō, de kə́ Ejiptə tə́ gə̄ ō
4Kəndā man̄ rāādə́ adə̄ nin̄ nūūn̄ kə̄ dɔí tə́,
anī mbal̄ kógə̄ḿ kə́ kadən ra súūmú njururu kum kə̄ dɔɔ́ adə̄də́ man̄ adə̄ a̰ȳn̄,
mbal̄ kə́ ngan̄g adə̄də́ man̄ adə̄ a̰ȳn̄ adə̄ tɔ̄l̄ kəndā ń rāādə́ ní kɔ̄ɔ́.
5I beé n yá̰a̰ gə̄ nəkɔ́ ń Nə́ɓā əndań madə̄ ba̰ā̰də́ gə̄ ní,
télən̄ i yá̰a̰ gə̄ kə́ ni rāań majə sedə́ dan ń nin̄ i dan wur kɔl tə́ ní.
6Kadə̄ i man̄ bā kə́ əla naā kə mósə́ kə́ to yḛr kumuú
kə́ kə̄rā kanjə̄ dəba ń rāā rɔ̄n
7i ndéý kə́ kəndań de kə́ Ejiptə gə̄ najə̄ ndūdə́ ń unən̄ yā tɔ̄ləń ngáń kásə̄ gə̄ yā gír deē yāí gə̄ ní anī,
Kɔ́ɔ̄ɓē, ḭ̄ ādə̄ ngán Israel gə̄ i man̄ kə́ ngá̰ý kə́ nin̄ əndān̄ kemdə́ dɔ tə́ alé.
8Dan ń ḭ̄ ə́yá̰də́ adə̄ kəndā man̄ rāādə́ ní,
i nge ń nuū n ḭ̄ ɔ́jəńdə́ lo kənda ń ə́nda madə̄ ba̰ā̰də́ gə̄ ní.
9Tɔdɔ̄ ḭ̄ ə́ndádə́ i kə kum kṵṵ́ ɓá tā ba kə ta kūl̄ yá̰a̰ nāā ngeé ń toō ní,
nin̄ gerə̄n̄ yá̰á̰ kə́ tōr̄ ngá̰ý ń rāā ngé rāā yá̰a̰ kə gō kem ndigə yā Nə́ɓāá aĺ gə̄ ń gāngə̄n̄ sarya dɔdə́ tə́ kə wūngūú ní.
10Deē yāí gə̄ ɓáa, ḭ̄ ī-nāādə́ i lo bɔbə̄ ngōn̄ kə́ tāā ngōnən tə́.
Ba ngé gə̄ ń nuū ɓáa ḭ̄ ī-dəjedə́ gíŕ yá̰a̰ rāādə́ i lo mban̄g kə́ kumən ṵṵn aĺ kə́ gān̄g sarya tə́.
11Ká nin̄ i sa̰y, aké nin̄ i ngɔr rɔ̄ deē yāí gə̄ tə́ gə̄gē anī, nin̄ a̰a̰n̄ tápə̄ ō.
12Dan ń əga kemdə́ dɔ yá̰á̰ kə́ mān̄ kɔ̄ɔ́ tə́ anī, wūn̄g kə́ nja jōó rāādə́ ō,
nin̄ to̰ō̰n̄ rus rus ō.
13Tɔdɔ̄ dan ń nin̄ oōn̄ kadə̄ i yá̰a̰ nəkɔ́ ń əndanəńdə́ ní n
rāānəń majə kə madə̄də́ gēé ní anī, gerə̄n̄ kadə̄ i Kɔ́ɔ̄ɓē n rāā yá̰á̰ ní.
14Nge ń kété nin̄ mbātə́nən̄ kɔ̄ɔ́, ba əndānən̄ ndágá ō, gō tə́ anī tə̄ɓānən̄ kə luruú ō ní,
dan ń yá̰a̰ gə̄ ń rāān̄ yá̰á̰ ní gíŕdə́ gān̄g anī, ɔr kumdə́ ngá̰ý seneé,
tɔdɔ̄ kəndā man̄ ń rāādə́ ní to tītə̄ yā de kə́ sew gə̄ alé.
Nə́ɓā ənda de kə́ Ejiptə tə́ gə̄ kə loneé karī
15Ba i najə̄ yá̰a̰ rāādə́ kə́ gōtə́ aĺ ń adə̄də́ gír̄ kə́ to mbóo gə̄
adə̄ rāādə́ adə̄ ndúmə̄n̄ bátə́ ndɔ̄ȳn̄ lī gə̄ ō, dā̰ kə́ kanjə̄ kumən gə̄ ō ní
n ḭ̄ ə́la kə dā̰ kə́ kur̄ dɔdə́ gətóo gə̄ kə́ kutədə́ i ngá̰ý ə́ndańdə́ ní,
16yā kadə̄ nin̄ ger̄nəń kadə̄ deē a ənge ndéy i lo ń deē rāā majaĺ tū tə́ ní tə́.
17Jīí ń tɔ́gən i ngá̰ý ní, kété ger̄ yá̰á̰ kə́ yā rāā aĺ i mbée alé.
Tɔdɔ̄ ni rāā dɔ nang i kə yá̰á̰ kə́ kanjə̄ kadə̄ deē ger̄ loon,
yā kəlań kə dūbə̄ dā̰ úrsə gə̄ ō, ɓɔl gə̄ ō dɔdə́ tə́.
18Dā̰ kə́ to ɓōĺ kə́ deē ger̄ loodə́ aĺ gə̄ kə́ wūn̄g i ngá̰ý kemdə́ tə́ ō,
koō kə́ kóńdə́ tə́ əɓa hor ō,
aláa əɓa saa kə́ otə ndum ō,
aláa kumdə́ ndɔ̄w̄ tītə̄ tel̄ man̄ kə́ to ɓōĺ ngá̰ý beé ō ní, a əla sedə́ ō.
19Yá̰a̰ rāā dā̰ gə̄ ní kə́ majə aĺ asə rāādə́ kadə̄ nin̄ gətóon̄ kɔ̄ɔ́ i gidə kógə̄ḿ ngóy alé,
banī ka̰a̰də́ ngóy asə rāā kadə̄ ɓōĺ tɔ̄l̄də́ kɔ̄ɔ́.
20Tá kanjə̄ dā̰ gə̄ ń nuū gə̄gē ní, koō kə́ ta kógə̄ḿ beē gə̄gē asə mbə́rē tə́nīdə́ kɔ̄ɔ́,
tɔdɔ̄ yá̰a̰ rāā kə́ gōtə́ ngɔ̄də̄ gōdə́ ō,
tɔ́gí əla koō adə̄ tə̄ndā tḭ̄ḭ̄də́ ō,
banī ḭ̄ ī-tə́ndā yá̰a̰ malang i kə gō kutədə́ gə̄ ō, i kə gō mbɔ̄jə́ kɔȳdə́ gə̄ ō.
Nə́ɓā táŕ yá̰a̰ malang ń ni əndā ní
21Ḭ̄ ń ásə kɔjə tɔ́gí kə́ ngá̰ý kə̄ ndágá kə kum mbang gə̄ malang ní,
i náā n asə dum̄ ta tɔ́gə jīí ní?
22A̰á̰ā̰ dɔ nang malang to ta kumií tə́ i tītə̄ mbal̄ mbɔ̄jə́ kɔȳ yá̰á̰ kə́ dūú ngá̰ý kə́ ɔȳ yá̰a̰ mbɔ̄jə́ kɔȳ yá̰a̰ adə̄ ɗel dām̄ kógə̄ḿ,
tītə̄ tal kə́ dəloí kə́ ur̄ kum kə̄ nang tə́ beē.
23Ba kumií ṵṵī kə de gə̄ malang tām̄ ásə rāā yá̰a̰ malang ō,
ún kumií kɔ̄ɔ́ ta majaĺ yā de gə̄ tə́ yā rāań kadə̄ nin̄ ndə̄ngān̄ rɔ̄də́ tām̄ majaĺ yādə́ tə́ ō.
24Ḭ̄ ī-táŕ yá̰a̰ malang ō,
yá̰a̰ gə̄ ń ī-rāādə́ ní, nge kógə̄ḿ kə́ nelī seneé aĺ ngá̰ý gətóo ō:
ré īm̄ i nge kógə̄ḿ kə́ dandə́ tə́ anī, āī rāan alé.
25Ba lo kadə̄ yá̰á̰ kógə̄ḿ ndi kanjə̄ kadə̄ i ḭ̄ n ī-ndigə ní i ba̰ý?
aláa ngɔ̄mə̄n̄ yá̰á̰ ní kanjə̄ kadə̄ i ḭ̄ n ī-ɓārə́n ní i ba̰ý?
26Nin̄ malang i yāí gə̄ adə̄ ə́yá̰də́ adə̄ yá̰á̰ kə́ majə aĺ ɔdə rɔ̄də́ alé.
Ḭ̄ i kɔ́ɔ̄ yá̰á̰ kə́ ī-táŕ yá̰á̰ kə́ ndi kə kumneé ō,
Currently Selected:
KUM KEDƏ̄ 11: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.